សមាគមសម្ព័ន្ធអ្នកសារព័ត៌មានកម្ពុជា

នគរបាលខេត្តកំពង់ស្ពឺផ្អាកការសាកសួរ បន្ទាប់ពីពលរដ្ឋជិត១ពាន់នាក់ប្រមូលផ្តុំគាំទ្រតំណាងរបស់ពួកគេ

ពលរដ្ឋរាប់រយនាក់ប្រមូលផ្តុំនៅខាងមុខសាលមហោស្រពដែលនៅជិតស្នងការដ្ឋាននគរបាលខេត្តកំពង់ស្ពឺ ដើម្បីទន្ទឹងរង់ចាំតំណាងពួកគេចេញពីការសាកសួរ។ រូបថតកាលពីថ្ងៃទី៣០ ខែវិច្ឆិកាឆ្នាំ២០២១។ រូបថតសហគមន៍ផ្ដល់ឱ្យ។
ពលរដ្ឋរាប់រយនាក់ប្រមូលផ្តុំនៅខាងមុខសាលមហោស្រពដែលនៅជិតស្នងការដ្ឋាននគរបាលខេត្តកំពង់ស្ពឺ ដើម្បីទន្ទឹងរង់ចាំតំណាងពួកគេចេញពីការសាកសួរ។ រូបថតកាលពីថ្ងៃទី៣០ ខែវិច្ឆិកាឆ្នាំ២០២១។ រូបថតសហគមន៍ផ្ដល់ឱ្យ។

ប្រជាពលរដ្ឋជិត១ពាន់នាក់ រស់នៅឃុំត្រពាំងជោ និងឃុំរស្មីសាមគ្គី ស្រុកឱរ៉ាល់ បាននាំគ្នាប្រមូលផ្តុំនៅមុខស្នងការដ្ឋាននគរបាលខេត្តកំពង់ស្ពឺ ដើម្បីគាំទ្រតំណាងរបស់ពួកគេចំនួន៦នាក់ ដែលត្រូវបានកោះហៅឲ្យចូលបំភ្លឺក្រោមបទចោទប្រកាន់«បំផ្លិចបំផ្លាញទ្រព្យសម្បត្តិអ្នកដទៃ​ដោយចេ​ត​នា​» ក្នុងជម្លោះដីធ្លីជាមួយក្រុមគ្រួសារ​យោធា។

សមត្ថកិច្ចជំនាញនៃស្នងការដ្ឋាននគរបាលខេត្តកំពង់ស្ពឺ នៅថ្ងៃទី ៣០ខែវិច្ឆិកាបានកោះហៅ​តំ​ណាង​​ពលរដ្ឋចំនួន ៦នាក់ឱ្យចូលបំភ្លឺ ប៉ុន្ដែការសាកសួរនេះមិនទាន់បានបញ្ចប់នៅឡើយ ដោយបន្តសាកសួរនៅពេលក្រោយទៀត។

តំណាងពលរដ្ឋចំនួន ៦នាក់ បានចូលបំភ្លឺនៅស្នងការដ្ឋាននគរបាលខេត្តកំពង់ស្ពឺតាមពេលវេលាក្នុង​ដី​កា​កោះ ប៉ុន្ដែពលរដ្ឋជិត ១ពាន់នាក់បាននាំគ្នាមកគាំទ្រ និងលើកទឹកចិត្តតំណាងរបស់ខ្លួន។ ក្នុង​អំឡុង​ពេលនោះ ពួកគេបាន​វេចអង្ករ ចាន ឆ្នាំង ខ្ទះត្នោត អុស ចង្រា្កនបាយ និងម្ហូបអាហារ​ជាច្រើន ដើម្បីមកស្នាក់នៅមុខស្នងការដ្ឋាននគរបាលខេត្ត ក្នុងការរង់ចាំមើលលទ្ធផលសាកសួរ ព្រោះពួកគេបារម្ភខ្លាចសមត្ថកិច្ចចាប់ឃុំខ្លួន ឬគំរាមកំហែងតំណាង​ខ្លួន។

តំណាងពលរដ្ឋទាំង ៦នាក់ដែលបានចូលបំភ្លឺនៅស្នងការដ្ឋាននគរបាលខេត្តកំពង់ស្ពឺរួមមាន លោក ឃន សារិទ្ធ លោក ងន សៅងឿន លោក សាយ ចាប លោក ភួង យឿន លោក សុខ ឃឿន និងលោក ចិន សាខុម។

អ្នកស្រី ឃន ខន ពលរដ្ឋម្នាក់ក្នុងចំណោមអ្នកផ្សេងទៀតដែលទៅគាំទ្រតំណាងខ្លួនបាននិយាយថា តំណាងពលរដ្ឋចំនួន ៦នាក់ត្រូវបានមន្រ្តីជំនាញនៃស្នងការដ្ឋាននគរបាលខេត្តកំពង់ស្ពឺកោះហៅឱ្យ​ចូល​​បំភ្លឺជុំវិញករណីពួកគាត់បានដឹកនាំពលរដ្ឋទៅរារាំងសកម្មភាពឈូសឆាយដីព្រៃ ២៦២​ហិកតា​កាលពីអំឡុងខែតុលាកន្លងទៅ។

អ្នកស្រីបន្តថា ការរារាំងសកម្មភាពឈូសឆាយដីព្រៃនេះ ពលរដ្ឋមិនបានប្រព្រឹត្តដូចការចោទប្រកាន់ទេ ដោយគ្រាន់តែរុះរើរោង តង់មួយចំនួនដែលគេសាងសង់ជ្រកធ្វើសកម្មភាពឈូសឆាយដីប៉ុណ្ណោះ ប៉ុន្ដែ​មិនមានបង្ករបួសស្នាម ឬធ្វើឱ្យបែកបាក់សម្ភារមានតម្លៃអ្វីទេ។ អ្នកស្រីថា ពលរដ្ឋគ្រាន់តែចង់ឱ្យបញ្ឈប់សកម្មភាព​ឈូស​ឆាយ ហើយងាកមកដោះស្រាយតាមនិតិវិធីវិញ។

អ្នកស្រីបញ្ជាក់ថា៖«ពួកខ្ញុំអត់បានដឹងថា បុគ្គលណាមួយដែលបានប្ដឹងពួកខ្ញុំមកស្នងការនគរបាលខេត្ត​ទេ ប៉ុន្ដែទោះបីជាយ៉ាងណា ពួកខ្ញុំបន្តប្ដេជ្ញាការពារដីព្រៃទាំងអស់នេះឱ្យបានគង់វង្ស ព្រោះដីព្រៃ​នេះជា​ជីវិតរបស់ពួកយើង​ ពួកយើងបានការពារវាអស់រយៈពេលជាង២០ឆ្នាំមកហើយ​»។

ប្រជាពលរដ្ឋនាំគ្នារៀបចំធ្វើម្ហូបអាហារសម្រាប់ទទួលទានក្នុងអំឡុងពេលពួកគេកំពុងរង់ចាំតំណាងខ្លួនចេញពីស្នងការដ្ឋាននគរបាលខេត្តកំពង់ស្ពឺ។ រូបថតកាលពីថ្ងៃទី ៣០ ខែវិច្ឆិកាឆ្នាំ២០២១។ រូបថតសហគមន៍ផ្ដល់ឱ្យ

រាជរដ្ឋាភិបាល កាលពី​ថ្ងៃទី២០ ខែសីហា ឆ្នាំ២០២១ បានចេញអនុក្រឹត្សមួយ ដោយសម្រេចកាត់ដីទំហំ ២៦២,២៤ហិកតា ពីដែនជម្រកសត្វព្រៃភ្នំឱរ៉ាល់ ស្ថិតនៅភូមិសាស្ត្រ ភូមិពោធិ៍មាស ឃុំត្រពាំងជោ ស្រុ​ក​ឱរ៉ាល់ ខេត្តកំពង់ស្ពឺ ដើម្បីប្រទានកម្មជាកម្មសិទ្ធិជូនគ្រួសារយោធិនបញ្ជាការដ្ឋានរថក្រោះកងទ័ពជើង​គោក និងប្រជាពលរដ្ឋសរុប ៤១គ្រួសារ សម្រាប់កសាងលំ​នៅ​ឋាន និងបង្កបង្កើនផល។

បន្ទាប់មក នៅថ្ងៃទី ១៩ និង ២០ ខែតុលាឆ្នាំ២០២១ ក្រុមគ្រួសារយោធិននៃបញ្ជាការដ្ឋានរថក្រោះកងទ័ពជើង​គោក បានធ្វើសកម្មភាពឈូសឆាយដីព្រៃទាំង​នេះ ​ប៉ុន្ដែប្រជាពលរដ្ឋក្នុងមូលដ្ឋានជិត ២០០នាក់ បានប្រ​មូ​ល​​ផ្ដុំតវ៉ា ខណៈទាហានកំពុងដាក់គ្រឿងចក្រឈូសឆាយ។

លោក ឃន សារិទ្ធ ជាតំណាងសហគមន៍ម្នាក់ចំណោម ៦នាក់ផ្សេងទៀតដែល​​ចូល​បំភ្លឺ​បានឱ្យដឹង​ថា ពួកលោក ៦នាក់បានចូលបំភ្លឺស្នងការរដ្ឋាននគរបាលខេត្ត ដោយមន្រ្តីសាកសួរជុំវិញករណីពួកលោក និង​ពលរដ្ឋនាំគ្នាទៅរារាំងការឈូសឆាយដីព្រៃ។ លោកមិនបានស្គាល់អត្តសញ្ញាណបុគ្គលដែលជាអ្នក​ដាក់​ពាក្យប្ដឹងនេះទេ។

លោកបន្តថា មន្រ្តីនគរបាលចំនួន ៣នាក់បានអង្គុយសាកសួរពួកលោកស្ទើតែពេញមួយថ្ងៃ ប៉ុន្ដែ​នៅ​ពេល​ដែលលោកបាន​​រៀបរាប់ពីហេតុការណ៍នាពេលនោះ មន្រ្តីនគរបាល ក៏បានអនុញ្ញាតឱ្យពួកលោក​ត្រឡប់​មកផ្ទះវិញ ប៉ុន្ដែពួកគេថា សំណុំរឿងនេះនៅមិនទាន់ចប់ទេ ដោយគ្រោងនឹងកោះហៅចូល​មក​បំភ្លឺ​នៅពេលក្រោយ​ទេ។​

លោក សារិទ្ធ និយាយថា៖«ពួកខ្ញុំអត់បានប្រព្រឹត្តដូចការចោទប្រកាន់ហ្នឹងទេ គឺយើងគ្រាន់តែទៅរុះរើរោង​ដែលគេសាងសង់អំឡុងពេលឈូសឆាយដីព្រៃហ្នឹង ហើយក៏មិនបានបំផ្លាញ ឬវាយត្រាក់ទ័រគេ​ឱ្យ​ខូចខាតដែរ។ យើងនៅតែបន្តឆន្ទៈ​យើង គឺការពារ​ដីព្រៃហ្នឹង​ មិនឱ្យមានគេមក​រំលោភបំពានទៀត​ទេ»។

លោក សុខ ឃឿន សមាជិកសហគមន៍មួយរូបទៀតឱ្យដឹង​ថា ពលរដ្ឋតែងតែហៅតំបន់ព្រៃនោះថា «ព្រៃមេត្តាធម្មជាតិ» មានផ្ទៃដីសរុបជាង ២ ០០០ហិកតា ប៉ុន្តែ​ក្រោយមក ក្រុមហ៊ុនឯកជនមួយបានរំលោភយកអស់ជាច្រើ​ន​ហិ​កតា ដោយបច្ចុប្បន្ននៅសល់ប្រហែល ៨០០ហិកតា​ប៉ុណ្ណោះ។ ហើយពេលនេះ អាជ្ញាធរបានបើកដៃឱ្យមន្រ្តីយោធា​ឈូសឆាយយកដី​ចំនួន​ជាង ២៦២ហិកតា​ទៀត ដើម្បីបែងចែកទៅឱ្យគ្រួសារកងទ័ពចំនួន ៤១គ្រួសារ។

​លោកបន្ត​ថា ពេល​ដែល​ប្រជាសហគមន៍​មកតវ៉ាច្រើន អ្នកឈូសឆាយ​បានផ្អាកសកម្មភាព ប៉ុន្តែពេល​ដែល​ប្រជាពលរដ្ឋត្រឡប់ទៅផ្ទះវិញ ពួកគេបានធ្វើសកម្មភាពឈូសឆាយបន្តទៀត​។

លោក សុខ ឃឿន និយាយថា៖ «​ខ្ញុំសូមអំពាវនាវឱ្យអាជ្ញាធរ និងមន្រ្តីជំនាញពិចារណាឡើងវិញចំពោះការឈូសឆាយ​ដីព្រៃនេះ ដើម្បីទុកបម្រើឱ្យប្រយោជន៍រួមក្នុងសហគមន៍។ ពួកខ្ញុំមិនចង់បាត់បង់ដីព្រៃនេះទេ ព្រោះពលរដ្ឋក្នុងសហគមន៍បានអាស្រ័យផលគ្រប់ៗគ្នា​ បើសិនជាប្រគល់ឱ្យទៅឯកជន គឺ​ពួ​កយើង​មិនអាច​ធ្វើអ្វីបានទេ​»។

​លោក សម សាមួន ស្នងការនគរបាលខេត្តកំពង់ស្ពឺបានថ្លែងថា មន្រ្តីជំនាញនៃស្នងការដ្ឋាននគរបាលខេត្តកំពង់ស្ពឺ ពិតជាបានកោះហៅពលរដ្ឋ ៦នាក់មកសាកសួរមែន ប៉ុន្ដែ​អ្នកផ្សេងទៀតមិនបានជាប់ពាក់​ព័ន្ធទេ។ លោកមិនដឹងថា ហេតុអ្វីបានជាពួកគេនាំគ្នាមកស្នងការដ្ឋាននគរបាលខេត្តច្រើន​បែបនេះ​នោះទេ។

លោកបន្តថា មន្រ្តីនគរបាល មិនបានចាប់ឃុំខ្លួន ឬគំរាមកំហែងអ្វីទេ ដោយគ្រាន់តែសាកសួរតាម​ដំ​ណើ​រ​សាច់រឿងធម្មតា ហើយអនុញ្ញាតឱ្យត្រឡប់ទៅផ្ទះវិញ។ មន្រ្តីជំនាញដែលកាន់សំណុំរឿងនេះ​មានធុរៈ​ដែលត្រូវដោះស្រាយបន្ទាន់។ ដូច្នេះសំណុំរឿងនេះនៅមិនទាន់បញ្ចប់នៅ​ឡើយ ដោយ​គ្រោង​នឹង​កោះ​ហៅពួកគាត់មក​សាកសួរ​បន្តទៀត។

លោក សាមួន បញ្ជាក់ថា៖ «យើងអត់មានឃុំឃាំង ឬគំរាមកំហែងពួកគាត់ទេ គឺសួរនាំតាមដំណើររឿង ប៉ុន្ដែ​ទៅវាមិនទាន់ចប់សាច់រឿង មន្រ្តីជំនាញក៏សុំចេញទៅមុន ព្រោះគាត់មានធុរៈបន្ទាន់។ អ៊ីចឹង​សំណុំរឿងនេះ គឺយើងលើកពេលសួរនាំទៅពេលក្រោយទៀត ប៉ុន្ដែ​ខ្ញុំមិនទាន់ដឹង​កោះហៅពួកគាត់​ពេល​ណាទៀតទេ»។

លោកបន្ថែមថា៖ «ខ្ញុំមិនអាចបង្ហាញអត្តសញ្ញាណ​ដើមបណ្ដឹងបានទេ វាជានីតិវិធីរបស់សមត្ថកិច្ច។ គិតត្រឹមព្រឹកថ្ងៃទី ០១ខែធ្នូនេះ ពួកគាត់ទាំងបាននាំគ្នា​ត្រឡប់ទៅផ្ទះរៀងៗខ្លួនអស់ហើយ​»។

នគរបាលខេត្តកំពង់ស្ពឺដាក់រនាំងបាំងមិនឱ្យ​ពលរដ្ឋចេញចូលកន្លែងហាមឃាត់ ខណៈដែលសមត្ថកិច្ចកំពុងសាកសួរតំណាងរបស់ពួកគេ។ រូបថតកាលពីថ្ងៃទី ៣០ខែវិច្ឆិកាឆ្នាំ២០២១។ រូបថតសហគមន៍ផ្ដល់ឱ្យ
នគរបាលខេត្តកំពង់ស្ពឺដាក់រនាំងបាំងមិនឱ្យ​ពលរដ្ឋចេញចូលកន្លែងហាមឃាត់ ខណៈដែលសមត្ថកិច្ចកំពុងសាកសួរតំណាងរបស់ពួកគេ។ រូបថតកាលពីថ្ងៃទី ៣០ខែវិច្ឆិកាឆ្នាំ២០២១។ រូបថតសហគមន៍ផ្ដល់ឱ្យ

លោក ភោគ ជុំ មេភូមិពោធិ៍មាសនៃឃុំត្រពាំងជោបានឱ្យដឹងថា ​គ្រួសារកងទ័ព​ ពិត​ជា​បាន​ស្នើសុំ​ទៅ​អាជ្ញាធរ​ពាក់ព័ន្ធ និងរដ្ឋាភិបាល ដើម្បី​សុំកាត់ដីនៅតំបន់នោះជាង ២៦២ហិកតា ដើម្បីបែងចែកទៅឱ្យគ្រួសារកងទ័ពចំនួន ៤១គ្រួសារ​ប្រាកដមែន ដោយមាន​ការឯកភាពពីក្រសួងបរិស្ថាន និងរដ្ឋាភិបាលផងដែរ។

លោក​បន្តថា៖«កន្លងមកខ្ញុំធ្លាប់​បានពន្យល់ និងបង្ហាញឯកសារឱ្យពួកគាត់​បាន​ដឹង​លឺហើយ ប៉ុន្តែពលរដ្ឋទាំងនោះមិនព្រមស្ដាប់ខ្ញុំ​ឡើយ ដោយពួកគេចង់រក្សាដីព្រៃនោះទុក​ជាដីសហគមន៍វិញ»។

លោក ឈុំ សុជាតិ អ្នកនាំពាក្យក្រសួងការពារជាតិ មិនទាន់អាចទាក់ទង​សុំ​ការបញ្ជាក់បន្ថែមជុំវិញករណីនេះបានទេ នៅថ្ងៃទីពុធនេះ។

លោក អំ សំអាត នាយករងអង្គការសិទ្ធិមនុស្សលីកាដូ បានថ្លែងថា ការកោះហៅប្រជាពលរដ្ឋសាកសួរគឺជាការគំរាមកំហែង បំភិតបំភ័យ និងប៉ះពាល់ដល់សិទ្ធសេរីភាពរបស់ពលរដ្ឋ។ លោកថា ការតវ៉ាកន្លងមក ពួកគាត់មិនមែនធ្វើសម្រាប់ប្រយោជន៍ផ្ទាល់ខ្លួនទេ ប៉ុន្ដែពួកគាត់ធ្វើដើម្បីផលប្រយោជន៍រួមសម្រាប់ជាតិ និងសហគមន៍មូលដ្ឋានពួកគាត់ទាំងមូល។

លោកបញ្ជាក់ថា៖«ខ្ញុំយល់ឃើញថា វាជាការគំរាមកំហែងសិទ្ធសេរីភាពមួយដល់សហគមន៍ដែលគាត់ប្រឹងប្រែងក្នុងកិច្ចការថែរក្សាព្រៃសហគមន៍ ឬដីរដ្ឋ ប៉ុន្ដែបែរជាមានអំពើគំរាមកំហែង ឬមានការកោះហៅទៅសាកសួរបែបនេះ។ អ៊ីចឹងយើងមើលទៅវាជារបៀបមួយដែលរងការបំបិទសិទ្ធិសេរីភាពរបស់ពលរដ្ឋ»។

តាមមាត្រា ៤១១ ​នៃក្រមព្រហ្មទណ្ឌចែងថា ការបំផ្លិចបំផ្លាញ​ទ្រព្យ​សម្បត្តិ​អ្នកដទៃដោយចេតនា កាលបើប្រព្រឹត្តដោយមានគ្នាច្រើនរូប ធ្វើសកម្មភាពក្នុងឋានៈជាចារី សហចារី អ្នកផ្តើមគំនិត ឬជាអ្នកសមគំនិត ប្រព្រឹត្តនៅទីកន្លែងលំនៅឋាន ត្រូវផ្តន្ទាទោសដាក់ពន្ធនាគារពី២ឆ្នាំទៅ៥ឆ្នាំ និង​​ពិន័យ​ជា​ប្រាក់ពី៤​លាន​ទៅ១០​លាន​រៀល​៕

273 views

ព័ត៌មានទាក់ទង

ព័ត៌មានថ្មី

អត្ថបទពេញនិយម