សមាគមសម្ព័ន្ធអ្នកសារព័ត៌មានកម្ពុជា

ពលរដ្ឋលើកឡើងពីការលំបាកដោយសារចំណូលថយចុះតែម្ហូបអាហារ​ឡើងថ្លៃ

អាជីវករលក់គ្រឿងទេស នៅផ្សារមួយ ក្នុងរាជធានីភ្នំពេញ ដែលថតនៅថ្ងៃទី៤ ខែមិថុនា ឆ្នាំ២០២៤។ (ខេមបូចា/ ព្រីង សំរាំង)
អាជីវករលក់គ្រឿងទេស នៅផ្សារមួយ ក្នុងរាជធានីភ្នំពេញ ដែលថតនៅថ្ងៃទី៤ ខែមិថុនា ឆ្នាំ២០២៤។ (ខេមបូចា/ ព្រីង សំរាំង)

ពលរដ្ឋមួយចំនួនអះអាងថា កំពុងជួបការលំបាកផ្នែកជីវភាពខ្លាំងដោយសារចំណូលធ្លាក់ចុះ តែម្ហូបអាហារឡើងថ្លៃ ខណៈមន្ត្រីរដ្ឋាភិបាលអះអាងថា កំពុងតាមដានលើបញ្ហានេះ និង​ត្រៀម​បញ្ចេញស្បៀងរបស់រដ្ឋដែលបម្រុងទុកក្នុងករណីចាំបាច់។

អ្នកលក់បាយ និងម្ហូបខ្ចប់ចល័តនៅក្នុងខណ្ឌឫស្សីកែវ រាជធានីភ្នំពេញ អ្នកស្រី ចាប ចិន្តា ឱ្យដឹងថា ទំនិញប្រភេទអាហាររាប់ទាំងអំបិល ទឹកត្រី ប៊ីចេង ស្ករ ប្រេងឆា ជាដើមឡើងថ្លៃ​ទាំងអស់ គឺឡើងចន្លោះពី៥០០រៀលទៅ១៥០០រៀល។ ចំណែកទំនិញខ្លះទៀតឡើងថ្លៃខ្លាំង​ដូចជា ខ្ទឹមស ឡើងជិត១ម៉ឺនរៀលក្នុង១គីឡូ ​និងអង្ករឡើងពី១២ម៉ឺនរៀលទៅ១៥ម៉ឺនរៀល​ក្នុង១បេ៥០គីឡូក្រាម។

ស្ត្រីរូបនេះឱ្យដឹងថា រូបគាត់តែងតែក្រោកពីដំណេកម៉ោង២កន្លះទៀបភ្លឺរាល់យប់​ដើម្បីធ្វើបាយ​ម្ហូបហើយត្រូវដើរលក់ពេញមួយថ្ងៃ តែចំណេញមិនដល់៤ម៉ឺនរៀលទេ។ អ្នកស្រី ចាប ចិន្តា ឱ្យ​ដឹង​ទៀត​ថា ប្តីរបស់គាត់ធ្វើការសំណង់ជួនមានការធ្វើជួនក៏អត់ ចំណែកកូន​៣​នាក់​រៀន​ទាំង​អស់ គឺម្នាក់រៀននៅសកលវិទ្យាល័យ និង២នាក់ទៀតនៅសាលាចំណេះដឹងទូទៅ គឺត្រូវ​​ចំណាយ​១ថ្ងៃ​៤ម៉ឺន​រៀល។

អ្នកលក់បាយ និងម្ហូបរូបនេះបានលើកឡើងថា រូបគាត់ហត់នឿយខ្លាំង និងមានជំងឺខ្លះ ប៉ុន្តែ​មិន​ហ៊ាន​សម្រាកទេ ព្រោះក្រៅពីរកលុយ​ឱ្យ​កូនរៀនត្រូវរកដើម្បីសងបំណុលទៀត។ អ្នកស្រី ចាប ចិន្តា និយាយទាំងអស់សង្ឃឹមថា រូបគាត់ដល់បន្ទាត់ក្រហមទៅមុខលែង​ចង់រួចហើយ ចំពោះ​កូនៗមិនដឹងថា អាចរៀនបន្តដល់ពេលណាទេ?

អ្នកស្រី ចាប ចិន្តា ថ្លែងថា៖ «ចំណូលវាធ្លាក់ចុះជាងមុនឆ្ងាយ យើងចំណេញតិចបំផុត។ យើង​ត្រូវចំណាយទិញអីវ៉ាន់ទៅវិញ មានដូចជា ថង់ ស្លាបព្រា អាហ្នឹងយើងត្រូវការមានអី​ចំណូលចូល បើយើងមិនទិញច្រក យើងបានអីច្រកឱ្យគេ? ចង់និយាយថាអាហ្នឹង​ជារបស់​ហ្វ្រី​(អត់មានគិតលុយមកវិញទេ) គ្រាន់តែទិញអីវ៉ាន់ទៅវិញ និយាយទៅសឹងតែ​រកលុយ​ឱ្យ​កូនទៅរៀនអត់បានព្រឹកឡើង»។​

អ្នកបើកកង់បីនៅក្នុងរាជធានីភ្នំពេញលោក ប៉ោ ចាន់ផល ឱ្យដឹងថា ចំណូលរបស់លោក​ធ្លាក់ចុះ​ក្រោម៥ម៉ឺនរៀលក្នុងមួយថ្ងៃ ទើបធ្វើ​ឱ្យ​លោកប្រឹងប្រែងបើកបរនៅពេលយប់​បន្ថែម​ទៀតទោះជាប្រឹងបើកដឹកភ្ញៀវពេលថ្ងៃអស់កម្លាំងហើយក៏ដោយ។ លោកត្រូវចំណាយ​​លើ​កូនរៀន២នាក់​ម្នាក់រៀននៅថ្នាក់បឋម និងម្នាក់ទៀតរៀននៅថ្នាក់អនុវិទ្យាល័យដែលត្រូវឱ្យ​ពួកគេ​ម្នាក់​៧ពាន់៥រយរៀលក្នុង១ថ្ងៃ។

អ្នកបើកម៉ូតូកង់បីរូបនេះបន្តថា ទំនិញឡើងថ្លៃនេះបានថែមសម្ពាធលោកឱ្យធ្ងន់មួយកម្រិត ទៀត ខណៈចំណូលធ្លាក់ចុះ ហើយត្រូវចំណាយលើឈ្នួលបន្ទប់ស្នាក់នៅ និងបំណុល​ធនាគារ​កន្លងមកស្ទើរមិនគ្រប់គ្រាន់។

លោក ចាន់ផល ថ្លែងថា៖ «យើងបង់ធនាគារផង បង់កូនរៀនផង ហើយយើងថែម​ទាំង​ជួល​ផ្ទះ​​គេនៅទៀត។ យើងមិនមានផ្ទះសម្បែងនៅក្នុងទីក្រុងភ្នំពេញ ព្រោះយើងជា​អ្នក​ចំណាក​ស្រុក។ អ៊ីចឹងហើយត្រូវបង់ថ្លៃផ្ទះ បង់ថ្លៃទឹក បង់ថ្លៃភ្លើង គឺថាសព្វសារពើ ហើយ​ប្រាក់​ចំណូល​របស់យើងរកបានដោយសារការប្រកបមុខរបររត់កង់បីនេះ បើធៀបពីសម័យ​កូវីដ និងឥឡូវនេះគឺវាទាបជាទីបំផុត»

លោក ចាន់ផល បន្តថា លោកបានបន្ថយអាហារ ហើយពេលឈឺដែលទ្រាំបានលោក​សម្រេច​ទ្រាំដើម្បីសន្សំលុយ និងសន្សំពេលដើម្បីបានបើកកង់បីដឹកភ្ញៀវ។

ម្ចាស់ហាងម៉ាស្យា និងព្យាបាលដោយចលនានៅក្នុងខណ្ឌដង្កោរាជធានីភ្នំពេញអ្នកស្រី ពេញ សុខនីម លើកឡើងថា ហាងរបស់អ្នកស្រីថយចុះចំណូលជិតពាក់កណ្តាល ដោយសារ​ភ្ញៀវ​មួយចំនួនសុខចិត្តនៅទ្រាំឈឺព្រោះមិនមានលុយព្យាបាល។

អ្នកស្រីឱ្យដឹងថា មិត្តភក្តិមួយចំនួនដែលបើកកន្លែងលក់បន្លែ និងម្ហូបអាហារក៏បិទតូបជាបន្តបន្ទាប់ដែរ ព្រោះមិនសូវចំណេញ។ ស្ត្រីវ័យជាង៤០ឆ្នាំរូបនេះឱ្យដឹងថា ក្រោយពេលបិទបញ្ចប់ការឆ្លងរាលដាលកូវីដចំណូលកើនឡើងគួរសមគគឺអាចរកបានប្រមាណ១០ម៉ឺរៀលក្នុង១ថ្ងៃឥឡូវធ្លាក់មកត្រឹម៥ទៅ៧ម៉ឺនរៀលក្នុង១ថ្ងៃតែប៉ុណ្ណោះ។ ប៉ុន្តែរយៈពេល​ប្រមាណ​៣ខែ​ចុង​ក្រោយ​​នេះ​​ចំណូល​ថយចុះហើយម្ហូបអាហារឡើងថ្លៃនេះធ្វើឱ្យរូបគាត់ និងអ្នកភូមិនៅក្បែរៗគ្នា​នោះមាន​ការលំបាកខ្លាំង។

អ្នកស្រី ពេញ សុនីម បន្ថែមថា៖ «វេទនាណាស់សេដ្ឋកិច្ចស្រុកខ្មែរ។ បើប្រៀបធៀប​ចំណូល​ឥឡូវ គឺវាថយប្រមាណជា២០​ទៅ៣០​ភាគរយ មិនដូចមុនទេដោយសារ​ពេលខ្លះ​គាត់​​ឈឺគាត់ទ្រាំ គាត់ថា រកលុយអត់បានពេលឈឺគាត់ទ្រាំសិន  ដល់តែថា ទ្រាំអត់បាន​ទើប​គាត់​មក ដល់អ៊ីចឹងធ្វើឱ្យបងបាត់ចំណូល ថយចុះចំណូល»

អាជីវករលក់ចំណីអាហារ និងបន្លែគ្រប់មុខ នៅផ្សារមួយ ក្នុងរាជធានីភ្នំពេញ ដែល​ថត​​នៅថ្ងៃទី៤ ខែមិថុនា ឆ្នាំ២០២៤។ (ខេមបូចា/ ព្រីង សំរាំង)

ស្ថានភាពបាត់បង់ចំណូលហើយទំនិញឡើងថ្លៃនេះក៏មានការជជែកគ្នានៅលើបណ្តាញទំនាក់ទំនងសង្គមជាបន្តបន្ទាប់ដែរ ហើយមិនមែនកើតមានតែនៅរាជធានីភ្នំពេញទេ គឺនៅតាម​បណ្តា​​ខេត្តផ្សេងក៏ជួបបញ្ហានេះដែរ។

ពលរដ្ឋនៅខេត្តព្រះសីហនុអ្នកស្រី សុខ ស្រីនាង ឱ្យដឹងថា រូបគាត់រស់នៅពឹងផ្អែក​លើ​របរ​បេះ​បន្លែ និងរកត្រីបន្តិចបន្ទួចយកទៅលក់ គឺចំណូលបានតិចតួច ហើយពេលខ្លះក៏រក​មិនបាន​សោះ​។  អ្នកស្រីកត់សម្គាល់ថា ប្រេងឆាឡើងថ្លៃជាងគេ ចំណែកម្ហូបអាហារផ្សេងទៀត​​ក៏​ឡើង​ដូចគ្នាចន្លោះពី៥រយរៀលទៅ១ពាន់៥រយរៀល។

អ្នកស្រី សុខ ស្រីនាង អះអាងថា៖ «កាលមុនខ្ញុំទិញខ្លាញ់យើងអា១ដប៧[រឺ]៨ពាន់នោះ ខ្ញុំ​ទិញ​នៅផ្សារតែ៥ពាន់រៀលទេ ឥឡូវឡើងដល់៦ពាន់៥រយរៀល។ និយាយទៅវាបះពាល់​ខ្លាំង​ម៉ង យើងត្រូវទប់ទល់ទឹកភ្លើងផង ហើយឥឡូវទឹកភ្លើងក៏ឡើងគុណនិងពីរទៀត ដោយ​សារមេឃក្តៅ។ ហើយអាស្ករ អំបិល ប៊ីចេង ទឹកត្រីហ្នឹងឡើងមួយមុខ២ពាន់រៀល មួយមុខ​៣ពាន់រៀល បើយើងទិញផ្សារ​វាថោក​ វាឡើងដែរតែវាឡើងមួយមុខ១ពាន់ ឬ១ជាងអ៊ីចឹង​ណា៎ តែបើយើងទិញតាមផ្ទះវាថ្លៃ»

ពលរដ្ឋរស់នៅខេត្តស្វាយរៀង អ្នកស្រី ខៀវ សារុន លើកឡើងជាចម្ងល់ថាទំនិញនៅ​លើ​ទីផ្សារ​​ឡើងថ្លៃគ្រប់មុខចន្លោះពី១ពាន់ទៅ​២ពាន់​រៀល ប៉ុន្តែកសិផល​ដែល​កសិករ​ផលិត​បាន​មិនឡើងថ្លៃទេ។ អ្នកស្រីបន្តថា ម្ហូបអាហារជាតម្រូវការចាំបាច់ទោះឡើងថ្លៃក៏ពលរដ្ឋ​នៅតែ​ប្រឹងប្រែង​រកមធ្យោបាយផ្សេងៗដើម្បីទិញយកមកបរិភោគ។

អ្នកស្រី ខៀវ សារុន ថ្លែងថា៖ «សម្រាប់បន្លែដូចមួយរយៈនេះ បន្លែនាំចូលឡើងដែរ​លោកគ្រូ​ឡើង​មួយមុខចង់១ពាន់រៀល ដូចត្រីនាំចូលអីពីមុន១គីឡូ១ម៉ឺន ឥឡូវឡើង១ម៉ឺន​២ពាន់​រៀល ការឡើងនេះបើឆ្លុះបញ្ចាំងជាមួយចំណូលវាអត់មានអីបាន ព្រោះយើងអត់មានអី​ធ្វើ​នឹងបានចំណូលណាលោកគ្រូ។ និយាយទៅអាហារបីពេលហ្នឹងត្រូវតែហូប បើទោះជាមិន​មាន​លុយក៏ដោយលោកគ្រូ»

ចំណែកពីខេត្តកំពង់ឆ្នាំងវិញ អ្នកស្រី ឈិត ចាន់ធឿន ជាបុគ្គលិកក្រុមហ៊ុនម្នាក់ឱ្យដឹងថា ប្រាក់​ខែ​​របស់គាត់មិនឡើងទេ ប៉ុន្តែម្ហូបអាហារ​ឡើងស្ទើរគ្រប់មុខ។ អ្នកស្រីឱ្យដឹងបន្តថា រូបគាត់​កំពុង​ចិញ្ចឹមកូនម្នាក់ឱ្យរៀននៅសាលាចំណេះដឹងទូទៅ ហើយត្រូវ​ចំណាយ​លុយខ្លះ​សម្រាប់​រៀនភាសាអង់គ្លេសបន្ថែមសម្រាប់ខ្លួនឯង ធ្វើឱ្យជួបការលំបាកខ្លាំង។​

អ្នកស្រី ឈិត ចាន់ធឿន ថ្លែងថា៖ «ចំណូលមានតែ១មុខ គឺប្រាក់ខែ ដល់ពេល​ចំណាយ​ត្រូវ​បែងចែកយើងរៀនខ្លះផង កូនរៀនខ្លះផង ចំណាយលើការហូបចុកប្រចាំថ្ងៃ ការទិញ​សម្ភារៈ​ប្រើប្រាស់ និងចំណាយលើការធ្វើដំណើរទៅមកផង។ ចំណាយច្រើនច្រក ចឹងទម្រាំដល់​ពេល​​​​បើកលុយគឺដាច់ខ្យល់ ដូចពាក្យថាដាច់ខែ ដាច់ខ្យល់។ ហើយមួយណា​ទំនិញកំពុងតែ​ឡើងថ្លៃ ចំណែកឯប្រាក់ខែយើងនៅដដែល អ៊ីចឹងវាមិនជួបផលវិបាក?»

របាយការណ៍របស់ស្ថាប័នស្ថិតិឥណ្ឌូនេស៊ី Seasia Stats ចេញផ្សាយនៅក្នុង​ឧសភាឆ្នាំ២០២៤ បង្ហាញថា កម្ពុជាជាប់ចំណាត់ថ្នាក់លេខ១ក្នុងតំបន់អាស៊ាន និងឈរនៅលេខរៀងទី៣​ក្នុង​ចំណោម​​ប្រទេសដែលមានកំណើនសេដ្ឋកិច្ចខ្ពស់ជាងគេទាំង២០ក្នុងតំបន់អាស៊ី។ ប៉ុន្តែ​អ្នក​វិភាគ​​​​​លើ​របាយការណ៍នេះបង្ហាញថា កំណើនវាមិនបានបញ្ជាក់ពីស្ថានភាព​ចំណូល​ល្អ​ប្រសើរ​របស់ប្រជាពលរដ្ឋទេ ព្រោះជាអត្រាកំណើតសេដ្ឋកិច្ច ប៉ុន្តែបើនិយាយ​ពីទំហំ​សេដ្ឋកិច្ច​កម្ពុជា​នៅតែស្ថិតកម្រិតទាបជាងប្រទេសជិតខាង។

អ្នកនាំពាក្យក្រសួងសេដ្ឋកិច្ច និងហិរញ្ញវត្ថុ លោក មាស សុខសេនសាន មានប្រសាសន៍ថា បើតាមបច្ចេកទេសស្ថានភាពអថិផរណានៅកម្ពុជាមានភាពប្រសើរឡើងជាងប្រទេសជិតខាងផង ដូច្នេះមិនមានអ្វីជាបញ្ហាចោទចំពោះការឡើងថ្លៃទំនិញទូទៅក៏ដូចជាម្ហូបអាហារនោះទេ។

លោក មាស សុខសេនសាន មានប្រសាសន៍ថា៖ «ប៉ុន្តែឥឡូវនេះ អត្រាអតិផរណាវា​មក​ធម្មតា​​វិញហើយសម្រាប់កម្ពុជាយើង បើប្រៀបធៀបនឹងតំបន់អត្រាអតិផរណា​នៅកម្ពុជា​វាចង់គ្រាន់​បើជាងគេនៅក្នុងតំបន់ផង ចង់និយាយអ៊ីចឹងណា៎ ដោយវាត្រឡប់មកដូចដើមវិញ​បណ្តើរៗហើយ។ ចឹងខ្ញុំចង់ឱ្យមើលតួលេខនឹងសិន បើយើងច្បិចយកតែមួយជ្រុងវាអាច​ឃើញ​ឡើង ប៉ុន្តែបើយើងមើលមួយជ្រុងទៀតស្រក ដល់ពេលជាមធ្យមវាធម្មតាវិញ»

អ្នកនាំពាក្យក្រសួងពាណិជ្ជកម្មលោក គឹម មាសសុខសីហា មានប្រសាសន៍ថា បញ្ហាម្ហូប​អាហារឡើង​ថ្លៃអាចដោយសារតែរដូវក្តៅកន្លងទៅនេះកសិករដាំដុះមិនសូវបានផល។ លោក​បន្តថា ការឡើងថ្លៃបន្តិចបន្ទួចមិនទាន់ជាបញ្ហានៅឡើយ។

ទោះយ៉ាងណាអ្នកនាំពាក្យរូបនេះបញ្ជាក់ថា ស្ថាប័នជំនាញរបស់រដ្ឋាភិបាល​កំពុងតាមដាន​លើ​ករណីនេះ និងបានត្រៀមស្បៀងអាហាររួចជាស្រេចដែលអាចនឹងបញ្ចេញក្នុងករណីចាំបាច់។

លោក គឹម មាសសុខសីហា មានប្រសាសន៍ថា៖ «យើងជាធម្មតា យើងត្រៀមតែស្បៀង​ជា​យុទ្ធសាស្ត្រទេ ដូចជាអង្ករ ដូចជាទឹកត្រី ទឹកស៊ីអ៊ីវអី នៅក្នុងកាលៈទេសៈខ្វះខាតហ្នឹង ក្រុមហ៊ុនបម្រុងរបស់រដ្ឋដែលមានក្រសួងពាណិជ្ជកម្មយើងជាសេនាធិការហ្នឹង គឺគ្រីនដ្រេត​ហ្នឹងសម្រាប់អន្តរាគមន៍»

អ្នកនាំពាក្យក្រសួងកសិកម្ម លោក ឃឹម ហ្វីណង់ ទទួលស្គាល់ថា នៅក្នុងរដូវក្តៅកន្លងទៅនេះ ពិតជាប៉ះពាល់ខ្លាំងដល់កសិករបង្កបង្កើនផលមែន។ ប៉ុន្តែចំពោះថា បញ្ហាម្ហូបអាហារឡើងថ្លៃ​ដោយ​សារតែបញ្ហាដាំដុះនេះលោកមិនហ៊ានសន្និដ្ឋានទេ។

លោក ឃឹម ហ្វីណង់ មានប្រសាសន៍ថា៖ «បាទចំពោះករណីនេះយើងបានឃើញ​នៅក្នុង​ករណី​សណ្តែកកួររួចហើយ គឺវាផ្កាក្តិបមករួញតែម្តង វាធ្វើឱ្យទិន្នផលរបស់​គាត់ធ្លាក់ចុះ​រហូត​ដល់ជាង៩០ភាគរយឯណោះដែលជាមូលហេតុធ្វើឱ្យសណ្តែកកួរឡើងថ្លៃ១គុណនិង១០ តែយើងមិនទាន់បានទិន្នន័យជារួមសម្រាប់ដំណាំទូទៅទេ តែយើងឃើញដំណាំខ្លះ​ក៏ទទួល​រងផលប៉ះពាល់ដែរ ដូចជាស្វាយចន្ទី ម្រេច សុទ្ធតែមានការធ្លាក់ចុះនូវទិន្នផល​នៃចម្ការ​នីមួយៗផងដែរ»

ម្ហូបអាហារចម្អិនស្រាប់ដែលដាក់លក់នៅកន្លែងលក់អាហារមួយ ក្នុង​រាជធានីភ្នំពេញ ដែលថតនៅថ្ងៃទី៤ ខែមិថុនា ឆ្នាំ២០២៤។ (ខេមបូចា/ ព្រីង សំរាំង)

ប្រធានសមាគមអ្នកប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធលោក វន់ ពៅ លើកឡើង​ថា សមាជិកសមាគមរបស់លោកជាច្រើនកំពុងតែ​ជួបការលំបាកខ្លាំងដោយសារ​ចំណូល​ថយ​ចុះ និងទំនិញឡើងថ្លៃនាំឱ្យអ្នកខ្លះបន្ថយអាហារ និងធ្វើការទាំងឈឺក៏មាន។ លោកស្នើឱ្យ​រដ្ឋាភិបាលកំណត់បញ្ហាស្បៀងអាហារជាបញ្ហាអាទិភាពដែលត្រូវមានគោលនយោបាយទប់ស្កាត់ការឡើងថ្លៃ កុំឱ្យមានភាពក្រីក្រកាន់តែកើនឡើងខ្លាំងថែមទៀត។​

លោក វន់ ពៅ ថ្លែងថា៖ «ខ្ញុំក្នុងនាមប្រធានសមាគមយើងធ្វើការជាមួយអ្នកសេដ្ឋកិច្ច​ក្រៅ​ប្រព័ន្ធ យើងចង់ឱ្យរដ្ឋាភិបាលពិនិត្យឡើងវិញទៅលើទំនិញនៅលើទីផ្សារណាដែល​ជា​ទំនិញ​តម្រូវការចាំបាច់ប្រចាំថ្ងៃរបស់ពលរដ្ឋ។ ចឹងត្រូវពិនិត្យមើលតម្លៃទំនិញទាំងអស់ហ្នឹង រៀបចំយន្តការដើម្បីចុះថ្លៃក្នុងការឆ្លើយតបទៅនឹងតម្រូវការរបស់ពលរដ្ឋ ក៏ដូចជាឆ្លើយតប​ទៅនឹងប្រាក់ចំណូលដែលកំពុងធ្លាក់ចុះ ហើយជាការឆ្លើយតបទៅនឹង​បរិបទសេដ្ឋកិច្ច​ផង​ដែរ បើសិនជាមិនមានយន្តការនេះទេអត្រានៃភាពក្រីក្ររបស់ពលរដ្ឋនឹងកាន់តែច្រើនទៅៗ​ហើយ»

អ្នកស្រាវជ្រាវពីការអភិវឌ្ឍសង្គមលោកបណ្ឌិត មាស នី អះអាងថា លោកពិតជាសង្កេត​ឃើញ​ថា ទំនិញម្ហូបអាហារឡើងថ្លៃស្ទើរគ្រប់មុខដូចពលរដ្ឋលើកឡើងមែន។ លោកជំរុញឱ្យ​រដ្ឋាភិបាល​​ពន្លឿនដោះស្រាយបញ្ហានេះឱ្យបានឆាប់ ដើម្បីកុំឱ្យពលរដ្ឋធ្លាក់ខ្លួន​ក្នុង​ភាពក្រីក្រ​កាន់តែច្រើន ហើយអាចប៉ះពាល់ដល់ការប្រមូលពន្ធចូលជាចំណូលរដ្ឋ។

លោក មាស នី មានប្រសាសន៍ថា៖ «យើងដឹងហើយថាប្រទេសនីមួយៗរស់បានដោយសារ​រាស្ត្រ​ជាអ្នកបង់ពន្ធ មន្ត្រីរាជការក៏រាស្ត្រចិញ្ចឹមដែរ អ៊ីចឹងនៅពេលណាដែលរាស្ត្រមិនមាន​លទ្ធភាព​ក្នុងការរកប្រាក់ចំណូល​​បានច្រើន គឺការបង់ពន្ធនោះក៏វាថយដែរ។ ឧបមាថា​ ខ្ញុំ​មាន​អាជីវកម្ម បើអាជីវកម្មខ្ញុំដួល ខ្ញុំមានលុយណាបង់ពន្ធ ហើយមុន និងក្រោយរដ្ឋ​នឹង​ជួប​វិបត្តិ​មួយ គឺវិបត្តិថវិកាជាតិអាចរកអត់គ្រប់ នៅពេលដែលសេដ្ឋកិច្ចខាងក្រោមដើរអត់​ខ្លាំង»

អ្នកជំនាញសេដ្ឋកិច្ចនៃវិទ្យាស្ថានទំនាក់ទំនងអន្តរជាតិនៃរាជបណ្ឌិតសភាកម្ពុជាលោកបណ្ឌិត ហុង វណ្ណៈ មានប្រសាសន៍ថា ឥទ្ធិពល​សង្គ្រាមនៅរុស្ស៊ី និងអ៊ុយក្រែនបានធ្វើឱ្យទំនិញ​នៅ​លើ​ពិភពលោកឡើងថ្លៃក្នុងនោះកម្ពុជាក៏រងគ្រោះដែរ។ លោកបន្តថា ដំណោះស្រាយបញ្ហាចំពោះ​មុខ គឺទាំងស្ថាប័នរដ្ឋ និងឯកជនត្រូវជំរុញឱ្យមានទំនិញក្នុងស្រុកច្រើនសម្រាប់ប្រើប្រាស់ ខណៈ​​បច្ចុប្បន្នលោកអះអាងថា កម្ពុជានាំចូលទំញភាគច្រើន។

លោកបណ្ឌិត ហុង វណ្ណៈ បន្តថា ជាក់ស្តែងដូចនៅប្រទេសរុស្ស៊ី ទោះបីជាមានសង្គ្រាមក៏​ទំនិញ​​មិន​ឡើងថ្លៃ​ខ្លាំងដែរ ​ដោយសារតែទំនិញប្រើប្រាស់នៅក្នុងប្រទេសនោះភាគច្រើន​ផលិត​នៅក្នុងស្រុក។

លោកបណ្តិត ហុង វណ្ណៈ មានប្រសាសន៍ថា៖ «ប្រទេសរុស្ស៊ីត្បិតតែជាប្រទេស​ដែល​ធ្វើ​អន្តរាគមន៍​​​យោធាទៅលើអឺរ៉ុបនោះ ក៏ប៉ុន្តែទំនិញផលិតផលអីផ្សេងៗ​ដោយសារ​រុស្ស៊ី​គេ​មាន​បស់គេសម្រាប់ប្រើប្រាស់ក្នុងស្រុកបស់គាត់ ចឹងការដាច់ទំនាក់ទំនងនៅប៉ែកអឺរ៉ុប​ខាងកើត ឬក៏អឺរ៉ុបខាងលិចមួយចំនួន ឬក៏ជាមួយសហរដ្ឋអាមេរិក មួយចំនួនដាក់ទណ្ឌកម្ម អាទំនិញ​មួយចំនួនដូចជាមិនហក់ឡើងខ្លាំងទេ លើកលែងតែទំនិញនាំចូល ឱ្យតែតែទំនិញ​នាំចូល គឺហក់ឡើងហើយ»

ជុំវិញបញ្ហាសន្តិសុខស្បៀងនេះ រដ្ឋាភិបាលអាណត្តិទី៧ ដឹកនាំដោយលោកនាយករដ្ឋមន្ត្រី​កម្ពុជា ហ៊ុន ម៉ាណែត បានលើកឡើងជាបន្តបន្ទាប់ដោយជំរុញឱ្យមន្ត្រីក្រោមបង្គាប់​យកចិត្ត​ទុកដាក់ ទន្ទឹមនឹងនេះ​ក៏បញ្ហាសន្តិសុខស្បៀងមានសរសេរក្នុងកម្មវិធីនយោបាយជាតិ​ផង​​ដែរ។

ក្នុងកម្មវិធីមួយនៅចុងឆ្នាំ២០២៣ លោក ហ៊ុន ម៉ាណែត ក្រើនរំឭកដល់មន្ត្រីរបស់លោកឱ្យ​យក​ចិត្តទុក​ដាក់លើវិស័យសកម្ម និងសន្តិសុខស្បៀងបើទោះជាកម្ពុជាកំពុងរីកចម្រើនបន្តបន្ទាប់​លើ​វិស័យឧស្សាហកម្មក៏ដោយ។  លោក ហ៊ុន ម៉ាណែត បន្តថា គោលនយោបាយ​កសិកម្ម​នឹង​ធានាដល់សន្តិសុខស្បៀងកំពុងដើរលើផ្លូវត្រូវដោយអាចផលិតផ្គត់ផ្គង់នៅក្នុងប្រទេសផង និង​នាំចេញផង។

លោក ហ៊ុន ម៉ាណែត មានប្រសាសន៍ថា៖ «តែផ្ទុយទៅវិញនៅខណៈដែលប្រទេសជាច្រើន​កំពុង​ជួបវិបត្តិនេះកម្ពុជាយើងបានធានាបាននូវសន្តិសុខស្បៀង ហើយមិនត្រឹមតែបើតាម​របាយការណ៍​របស់ឯកឧត្តមរដ្ឋមន្ត្រី[កសិកម្ម] មិនត្រឹមតែធានានូវសន្តិសុខស្បៀង​នៅក្នុង​ប្រទេសប៉ុណ្ណោះទេ ប៉ុន្តែយើងបាននាំចេញ៦.២លានតោននៅក្នុង១០ខែកន្លងមកនេះ»

យុទ្ធសាស្ត្របញ្ចកោណអាណត្តិទី៧នេះ បានកំណត់កម្មវិធីនយោបាយ​អាទិភាពចំនួន៦​ដែល​ត្រូវ​ដាក់ចេញអនុវត្តន៍បន្ទាន់ ក្នុងនោះកម្មវិធីទី៥ និងទី៦គឺផ្តោតលើវិស័យកសិកម្ម។

កម្មវិធីនយោបាយទី៥ គឺរដ្ឋាភិបាលដាក់ចេញកញ្ចប់ថវិកាជាក់លាក់ចំនួន១០០លានដុល្លារ និង​អាច​ដាក់បន្ថែមក្នុងករណីចាំបាច់ដើម្បីលើកស្ទួយដល់ការផលិត និងរក្សាលំនឹង​ទីផ្សារ​លើ​ផលិត​ផលកសិកម្ម។ ចំណែកកម្មវិធីនយោបាយទី៦​រដ្ឋាភិបាល​ដាក់ពង្រាយ​មន្ត្រីកសិកម្ម​នៅ​គ្រប់ឃុំ សង្កាត់ទូទាំងប្រទេសដើម្បីជួយដល់ការផលិតកម្មកសិកម្ម និងជួយដល់គ្រួសារ​កសិករ។

ទោះយ៉ាងណាទាំងប្រជាពលរដ្ឋ និងអ្នកជំនាញលើកឡើងថា បញ្ហាទំនិញឡើងថ្លៃ ខណៈ​ចំណូលពលរដ្ឋធ្លាក់ចុះនៅពាក់កណ្តាលឆ្នាំ២០២៤​នេះនៅមិនទាន់មានយន្តការដោះស្រាយឱ្យមានប្រសិទ្ធភាពនៅឡើយ៕

446 views

ព័ត៌មានទាក់ទង

ព័ត៌មានថ្មីៗ

អត្ថបទពេញនិយម