សមាជិកគ្រួសាររបស់អតីតមន្រ្តីបក្សប្រឆាំងត្រូវបានរារាំងមិនឱ្យដាក់ញត្តិថ្វាយព្រះមហាក្សត្រ នរោត្តម សីហមុនី ដោយស្នើសុំឲ្យដោះលែងសមាជិកគ្រួសាររបស់ពួកគេ ដែលជាប់ពន្ធនាគាររួមទាំងមនុស្ស ៤ នាក់ដែលត្រូវបានចាប់ខ្លួននៅខាងក្រៅស្ថានទូតចិន អំឡុងបាតុកម្មចំថ្ងៃប្រារព្ធខួបនៃកិច្ចព្រមព្រៀងសន្តិភាពទីក្រុងប៉ារីស។
សមាជិកគ្រួសាររបស់អតីតមន្រ្តីគណបក្សសង្រ្គោះជាតិបានធ្វើការតវ៉ានិងទាមទារឱ្យមានការដោះលែងសាច់ញាតិរបស់ពួកគេរៀងរាល់ថ្ងៃសុក្រអស់រយៈពេល ៤ ខែកន្លងមកនេះ។ ពួកគេក៏បានស្នើសុំឱ្យដោះលែងមនុស្សបួននាក់ផ្សេងទៀត ដែលត្រូវបានចាប់ខ្លួនកាលពីចុងខែតុលាដោយសារធ្វើការតវ៉ានៅខាងក្រៅស្ថានទូតចិន ប្រឆាំងនឹងលទ្ធភាពនៃវត្តមានយោធាចិន។
កាលពីថ្ងៃសុក្រ សន្តិសុខខណ្ឌដូនពេញបានបំបែកក្រុមអ្នកតវ៉ាប្រមាណ ២០ នាក់នៅខាងក្រៅព្រះបរមរាជវាំង ដោយស្នើឱ្យពួកគេទៅរដ្ឋសភាជំនួសវិញព្រោះព្រះករុណាព្រះបាទសម្តេចព្រះ នរោត្តម សីហមុនី បានយាងចាកចេញពីប្រទេសដើម្បីពិនិត្យព្រះរាជសុខភាពនៅប្រទេសចិន។
អ្នកស្រី ចេង ស្រីនី ភរិយារបស់លោក តុន និមល ដែលត្រូវបានចាប់ខ្លួនកាលពីថ្ងៃទី ២៣ ខែតុលា បាននិយាយថា អ្នកស្រីខកចិត្ត ដែលគ្មានមន្ត្រីណាម្នាក់មកពីព្រះបរមរាជវាំងចេញមកទទួលញត្តិរបស់ពួកគាត់។ អ្នកស្រីបានអះអាងថា ប្តីរបស់អ្នកស្រីគ្មានកំហុសទេ ហើយចង់ឲ្យដោះលែងប្តីរបស់អ្នកស្រីពីពន្ធនាគារ។
អ្នកស្រី ស្រីនី បាននិយាយថា៖ «ខ្ញុំគិតថា មានតែព្រះមហាក្សត្រទេ ដែលអាចជួយយើងបាន ហេតុនេះហើយបានជាយើងសម្រេចចិត្តមកព្រះបរមរាជវាំង»។
លោក តុន និមល អ្នកស្រី យ៉យ ស្រីមុំ និង អ្នកស្រី លឹម សានត្រូវបានចាប់ខ្លួនកាលពីថ្ងៃទី ២៣ ខែតុលា ចំណែក អ្នកស្រី សាត ផា ត្រូវបានចាប់ខ្លួននៅ ថ្ងៃទី២៧ ខែតុលា ដោយចោទប្រកាន់ពីបទញុះញង់ ព្រោះធ្វើការតវ៉ានៅខាងក្រៅស្ថានទូតចិន។ ការតវ៉ានេះ គឺប្រឆាំងនឹងលទ្ធភាពនៃវត្តមានយោធាចិននៅលើទឹកដីកម្ពុជា ហើយត្រូវបានបំបែកដោយហិង្សាពីសំណាក់កងសន្តិសុខក្នុងមូលដ្ឋាន។
អ្នកស្រី ព្រំ ចាន់ថា ជាភរិយារបស់អតីតសមាជិកគណបក្សសង្គ្រោះជាតិ លោកកាក់ កុម្ភារ ដែលត្រូវបានផ្តន្ទាទោសកាលពីឆ្នាំមុនពីបទសមគំនិតក្នុងការប្រមាថនិងញុះញង់ឲ្យមានបទឧក្រិដ្ឋជាអាទិ៍បាននិយាយថា ក្រុមអ្នកតវ៉ាបានបោះបង់ចោលផែនការដាក់ញត្តិទៅព្រះបរមរាជវាំង បន្ទាប់ពីពួកគាត់ត្រូវបានរារាំងដោយក្រុមសន្តិសុខខណ្ឌដូនពេញ។
អ្នកស្រី ចាន់ថា បាននិយាយថា៖ «វាមិនសមហេតុផលទេ ពីព្រោះបើទោះបីជាព្រះមហាក្សត្រមិនមានព្រះរាជវត្តមាន ក៏មានមន្រ្តីនៅព្រះបរមរាជវាំងដែលធ្វើការនៅទីនោះដែរ។ ខ្ញុំគិតថា ពួកគេមិនចង់ឲ្យព្រះមហាក្សត្របានឮរឿងរបស់យើងទេ ហេតុនេះហើយបានជាពួកគេមិនអើពើនឹងញត្តិរបស់យើង» ។
ក្រុមអ្នកតវ៉ាក៏ត្រូវបានរារាំងមិនឱ្យហែក្បួនពីសាលាដំបូងរាជធានីភ្នំពេញ ទៅព្រះបរមរាជវាំង ដោយចោទថាវាប៉ះពាល់ដល់សណ្តាប់ធ្នាប់សង្គម ហើយផ្ទុយទៅវិញត្រូវបានស្នើសុំឱ្យប្រើរ៉ឺម៉កម៉ូតូជំនួសវិញ។
នៅពេលក្រុមដដែលនេះកំពុងធ្វើការតវ៉ានៅជិតសាលាដំបូងរាជធានីភ្នំពេញកាលពីខែកញ្ញា សន្តិសុខខណ្ឌ៧មករា ម្នាក់បាចាប់បោកអ្នកតវ៉ាម្នាក់និងធ្វើឱ្យគាត់រងរបួស។ ក្រុមអ្នកតវ៉ាបានជួបនឹងវិធានការណ៍បង្ខំជាប្រចាំហើយម្តងម្កាលរងអំពើហិង្សា ដែលត្រូវបង្កឡើងដោយសន្តិសុខខណ្ឌ ដើម្បីបំបែកការតវ៉ារបស់ពួកគាត់។
សម្តេចព្រះបរមនាថ នរោត្តម សីហមុនី និងសម្តេចម៉ែបានយាងចេញពីប្រទេសកាលពីថ្ងៃទី ៦ ខែតុលា ដើម្បីពិនិត្យព្រះសុខភាពនៅប្រទេសចិន។ លោក អ៊ុំ ដារ៉ាវុធ ទីប្រឹក្សានៅលេខាធិការសម្តេចម៉ែបានមានប្រសាសន៍ថា លោកមិនបានដឹងអំពីករណីនេះទេ ហើយបានបង្វែរសំណួរទាំងអស់ទៅក្រសួងព្រះបរមរាជវាំងដែលមិនអាចទាក់ទងបាន ដើម្បីសុំការអត្ថាធិប្បាយកាលពីថ្ងៃសុក្រ។
លោក ជិន ម៉ាលីន អ្នកនាំពាក្យក្រសួងយុត្តិធម៌មានប្រសាសន៍ថា ក្រុមអ្នកតវ៉ាមិនបានស្វែងរកជំនួយតាមផ្លូវច្បាប់នោះទេ ប៉ុន្តែមានរបៀបវារៈនយោបាយនៅពីក្រោយការតវ៉ារបស់ពួកគេ។
លោកបានមានប្រសាសន៍ថា៖ «ការដាក់ញត្តិនៅលើកមុនគឺជាកម្មវិធីនយោបាយដែលរៀបចំដោយអង្គការនានា ។ វាមិនមែនជាវិធានការណ៍ផ្លូវច្បាប់ដើម្បីការពារជនជាប់ចោទតាមច្បាប់នោះទេ»។
លោក អំ សំអាត អនុប្រធានអង្គការលីកាដូ បានមានប្រសាសន៍ថាការចាប់ខ្លួនអតីតមន្រ្តីគណបក្សសង្គ្រោះជាតិ គឺជារឿងនយោបាយ ហើយគួរតែត្រូវបានដោះស្រាយតាមផ្លូវនយោបាយ។
លោកបានមានប្រសាសន៍ថា៖ «តាមទស្សនៈរបស់ខ្ញុំ វិធីតែមួយគត់ក្នុងការដោះស្រាយបញ្ហាទាំងនេះ គឺអ្នកនយោបាយទាំងអស់ត្រូវចរចា ដើម្បីបន្ធូរបន្ថយស្ថានការណ៍នយោបាយ ហើយដោះលែងអ្នកជាប់ពន្ធនាគារនៅក្រៅឃុំ»។
មានអតីតមន្រ្តីគណបក្សសង្រ្គោះជាតិរាប់សិបនាក់ត្រូវបានសាកសួរ ឃុំខ្លួននិងដោះលែងចាប់តាំងពីគណបក្សនេះ ត្រូវបានរំលាយចោលកាលពីឆ្នាំ ២០១៧ ។ កាលពីថ្ងៃទី ៣ ខែវិច្ឆិកា សាលាដំបូងរាជធានីភ្នំពេញបានកោះហៅអតីតសមាជិកគណបក្សសង្គ្រោះជាតិជិត ៦០ នាក់ក្នុងនោះ មានអតីតសមាជិកសភាចំនួន ៩ រូប ដោយចោទប្រកាន់ពីបទរួមគំនិតក្បត់។
ពួកគេរំពឹងថា នឹងចូលខ្លួននៅសាលាដំបូងរាជធានីភ្នំពេញនៅថ្ងៃទី ២៦ ខែវិច្ឆិកា ទោះបីពួកគេភាគច្រើនកំពុងនិរទេសខ្លួនឬលាក់ខ្លួនក៏ដោយ៕
