មេបក្សកម្លាំងជាតិលោក ស៊ុន ចន្ធី ត្រូវបានដោះលែងឲ្យមានសេរីភាពវិញហើយ ក្រោយបានទទួលព្រះរាជទានលើកលែងទោសពីព្រះមហាក្សត្រ។ លោកត្រូវបានតុលាការចោទប្រកាន់ពីពីបទញុះញង់បង្កឲ្យមានភាពវឹកវរធ្ងន់ធ្ងរដល់សន្តិសុខសង្គមកាលពីចុងឆ្នាំ២០២៤។ ករណីលោក ស៊ុន ចន្ធី គឺជាករណីកម្រមួយដែលបានទទួលការលើកលែងទោសពីព្រះមហាក្សត្រក្នុងនាមជាអ្នកជាប់ពន្ធនាគារដោយការរិះគន់រដ្ឋាភិបាល។
អ្នកនាំពាក្យអគ្គនាយកពន្ធនាគារលោក ឃៀង សុណាឌីន បញ្ជាក់ថា លោក ស៊ុន ចន្ធី ត្រូវបានដោះលែងពីមណ្ឌលកែប្រែនៅខេត្តពោធិ៍សាត់ហើយ។ បើតាមការសម្រេចរបស់តុលាការលោក ចន្ធី ត្រូវជាប់ឃុំនៅពន្ធនាគារខេត្តពោធិ៍សាត់រយៈពេលពីរឆ្នាំ។ យ៉ាងណា អ្នកនាំពាក្យរូបនេះមិនបានបញ្ជាក់ពីមូលហេតុដែល លោក ចន្ធី បានទទួលព្រះរាជទានលើកលែងទោសនោះទេ។ ដើម្បីទទួលបានព្រះរាជទានលើកលែងទោស ត្រូវមានសំណើពីនាយករដ្ឋមន្ត្រីដាក់ថ្វាយទៅកាន់ព្រះមហាក្សត្រ។
ភរិយាលោក ចន្ធី បានបញ្ជាក់លើទំព័រហ្វេសប៊ុករបស់ខ្លួនថា ស្វាមីបានទទួលព្រះរាជទានលើកលែងទោសពីព្រះមហាក្សត្រ ដោយបានភ្ជាប់នូវរូបថតជាមូយស្វាមី និងកូនប្រុសផងដែរ។
ការលើកលែងទោសនេះទំនងជាអាចលើកលែងការហាមឃាត់លោក ស៊ុន ចន្ធី ពីការធ្វើនយោបាយមួយជីវិត និងទទួលបានសិទ្ធិបោះឆ្នោតវិញផងដែរ។ ពេលលោកត្រូវកាត់ទោស តុលាការបានដកហូតសិទ្ធិធ្វើនយោបាយអស់មួយជីវិត និងសិទ្ធិបោះឆ្នោតរបស់លោកផងដែរ។
លោក ចន្ធី ត្រូវបានចាប់ខ្លួនកាលពីខែឧសភា ឆ្នាំ២០២៤ នៅអាកាសយានដ្ឋានអន្តរជាតិ ពេលលោកត្រឡប់ពីជួបជាមួយពលករខ្មែរនៅប្រទេសជប៉ុនវិញ។ ការចោទប្រកាន់បានធ្វើឡើងដោយផ្អែកលើសារដែលលោកបង្ហោះលើទំព័រហ្វេសប៊ុករិះគន់ដល់ការដឹកនាំរដ្ឋាភិបាលរបស់គណបក្សប្រជាជនកម្ពុជា។ សារទាំងនោះមានខ្លឹមសាររិះគន់រួមមានលើគោលនយោបាយផ្ដល់បណ្ណក្រីក្រ ដែលអ្នកទទួលបណ្ណអាចទទួលសេវាថែទាំសុខភាព និងអត្ថប្រយោជន៍ផ្សេងទៀតពីរដ្ឋាភិបាល។
ពេលចាប់ខ្លួនលោក ស៊ុន ចន្ធី គណបក្សកម្លាំងជាតិបានហៅការចាប់ខ្លួននេះថាជារឿងនយោបាយ ប៉ុន្តែត្រូវបានអាជ្ញាធរច្រានចោលការចោទប្រកាន់នេះ។
ទីប្រឹក្សាគណបក្សកម្លាំងជាតិ លោក រ៉ុង ឈុន ស្វាគមន៍ចំពោះការដោះលែងលោក ចន្ធី និងបានអំពាវនាវឲ្យមានការដោះលែងសកម្មជន និងមន្ត្រីបក្សប្រឆាំងផ្សេងទៀត រួមទាំងអតីតមេដឹកនាំគណបក្សប្រឆាំងលោក កឹម សុខា ដែលត្រូវបានតុលាការកាត់ទោសឲ្យជាប់ឃុំក្នុងផ្ទះអស់មួយជីវិត កញ្ញា សេង ធារី សកម្មជនតស៊ូមតិផ្នែកសិទ្ធិមនុស្ស និងសកម្មជនបរិស្ថានទាំងប្រាំនាក់របស់អង្គការមាតាធម្មជាតិ។
លោកមានប្រសាសន៍ថា៖ «ការដោះលែងអ្នកជាប់ឃុំទាំងនោះ នឹងធ្វើឲ្យរដ្ឋាភិបាលទទួលបានការគាំទ្រផ្នែកការទូតពីអន្តរជាតិ ជាពិសេសលើបញ្ហាជម្លោះព្រំដែនជាមួយប្រទេសថៃ»។
លោក អំ សំអាត នាយកទទួលបន្ទុកកិច្ចការទូទៅរបស់អង្គការលីកាដូ បានហៅការដោះលែងលោក ស៊ុន ចន្ធី នេះថាជា «សញ្ញាវិជ្ជមាន» សម្រាប់អ្នកនយោបាយបក្សប្រឆាំង។
លោកមានប្រសាសន៍ថា៖ «ស្ថានភាពបច្ចុប្បន្ននេះ កម្ពុជាត្រូវការសាមគ្គីភាព ផ្សះផ្សា និងរួបរួមក្នុងចំណោមប្រជាជនខ្មែរ ហេតុនេះគ្រប់អ្នកនយោបាយត្រូវប្រកាន់ខ្ជាប់នូវប្រយោជន៍ជាតិ និងវិលទៅរកការចរចារវិញ»។
លោកបន្ថែមថា សហគមន៍អន្តរជាតិបានរិះគន់រដ្ឋាភិបាលលើការធ្លាក់ចុះលំហសង្គមស៊ីវិល សិទ្ធិមនុស្ស និងសេរីភាពនយោបាយ។ កម្ពុជាជាប់ចំណាត់ថ្នាក់ទាបបំផុតនៅក្នុងចំណោមការវាស់វែងលើលំហសង្គមស៊ីវិល និងនីតិរដ្ឋរបស់ស្ថាប័នអន្តរជាតិជាច្រើន។
បទចោទញុះញង់នៅកម្ពុជាបានរងនូវការរិះគន់យ៉ាងខ្លាំងពីសំណាក់អង្គការសិទ្ធិមនុស្ស ព្រោះបទចោទនេះមានភាពមិនច្បាស់លាស់ ទូលាយពេក និងច្រើនតែត្រូវយកមកប្រើដើម្បីបំបិទមាត់អ្នករិះគន់។ បើតាមអង្គការ លីកាដូ មាន «អ្នកទោសមនសិការ» ចំនួន៩៧នាក់កំពុងជាប់ឃុំនៅកម្ពុជា ដោយអ្នកទាំងនោះជាអ្នកនយោបាយ សកម្មជនបរិស្ថាន សកម្មជនសហជីព និងជាអ្នកសារព័ត៌មាន។ អង្គការសិទ្ធិមនុស្សចាត់ទុកថា អ្នកទាំងនោះជាប់ឃុំដោយគ្មានមូលដ្ឋានច្បាស់លាស់ក្នុងការចោទប្រកាន់ និងត្រូវជាប់ទោសដោយសារតែការបញ្ចេញមតិ ឬភាពជាសកម្មជនរបស់ពួកគេ៕
ប្រែសម្រួលពីអត្ថបទភាសាអង់គ្លេស៖ Opposition Leader Sun Chanthy Freed by Royal Pardon
