ទោះបីមានភ្លៀងរលឹម ធ្វើឱ្យពិបាកក្នុងការធ្វើដំណើរចាកចេញពីលំនៅឋាន ទៅកាន់ចំណតរថយន្តក្រុងដោយមិនបង់ប្រាក់ ប៉ុន្តែប្រជាពលរដ្ឋ ជាពិសេសកម្មករការិនីរោងចក្ររាប់រយនាក់ បាននាំគ្នាទៅអង្គុយរង់ចាំនៅចំណតរថយន្ត តាំងពីព្រឹកព្រលឹម ដើម្បីអាចជិះឡានក្រុងបានមុនគេ ចេញពីភ្នំពេញទៅកាន់ស្រុកកំណើតរៀងៗខ្លួន ដើម្បីជួបជុំបងប្អូនក្រុមគ្រួសារ ក្នុងឱកាសពិធីបុណ្យភ្ជុំបិណ្ឌ ប្រពៃណីជាតិខ្មែរ ឆ្នាំ២០២៦នេះ។
ចំពោះការនាំគ្នាសម្រុកមកជិះរថយន្តក្រុងរបស់រដ្ឋដោយមិនគិតថ្លៃ ជំនួសឡានឈ្មួលនេះ គឺពួកគាត់បានលើកឡើងស្រដៀងគ្នាថា ដើម្បីកាត់បន្ថយការចំណាយ ព្រោះការជិះឡានឈ្នួល ត្រូវចំណាយចន្លោះពី៥ ទៅជាង១០ម៉ឺនរៀល ទៅតាមខេត្តជិតឬឆ្ងាយ ហើយត្រូវជិះប្រជ្រៀតគ្នា មិនសូវមានផាសុខភាពដូចការជិះឡានក្រុងនោះទេ ដែលមានទាំងការចែកភេសជ្ជៈឱ្យផឹកទៀត។
កាន់បង្វេចឈរចាំឡានក្រុងរដ្ឋ នៅរង្វង់មូលកួចកាណុង កាលពីព្រឹកថ្ងៃទី១០ ខែតុលា កម្មការិនីរោងចក្រ ខាត់ រ៉ន និងមិត្តភក្តិ បានឡើងឡានក្រុងចំនួន២លើក តែក៏បានចុះមកវិញ ព្រោះមានអ្នកជិះពេញគ្រប់កៅអី ដែលមិនតម្រូវឱ្យជិះលើសនោះទេ។ តែទោះយ៉ាងណា ខាត់ រ៉ន ដែលធ្លាប់ជិះឡានក្រុងរដ្ឋម្តងហើយនោះ បានដឹងច្បាស់ទៅហើយចំពោះស្ថានភាពបែបនេះ គឺត្រូវតែចំណាយពេលដើម្បីរង់ចាំ ព្រោះមានអ្នកមកជិះច្រើន តែការជិះឡានក្រុងរដ្ឋ វាស្រួលខ្លួន និងចំណេញ។
ស្រ្តីដែលមានស្រុកកំណើតនៅខេត្តមណ្ឌលគិរីរូបនេះ បាននិយាយលាយនឹងស្នាមញញឹមថា៖ «ការជិះឡានក្រុងស្រួល អត់ចង្អៀតដូចជិះឡានឈ្នួលនោះទេ និងមានផ្តល់ទឹក និងទឹកក្រូចឱ្យញ៉ាំទៀត ហើយតៃកុងឡាន បានដឹកយើងទៅដល់ផ្លូវចូលផ្ទះតែម្តង អត់ពិបាកទេ។ អ្វីដែលសំខាន់គឺជួយកាត់បន្ថយចំណាយបានច្រើន ព្រោះពីមុនខ្ញុំជិះឡានឈ្នួលទាំងទៅ និងត្រឡប់មកវិញ អស់១២ម៉ឺនរៀល»។
យ៉ាងណាក៏ដោយ ខាត់ រ៉ន បានឱ្យដឹងថា ការធ្វើដំណើរទៅលេងស្រុក ក្នុងពិធីបុណ្យភ្ជុំបិណ្ឌលើកនេះ មិនសូវមានលុយទេ ព្រោះខាងរោងចក្រទើបបើកប្រាក់ឈ្នួលឱ្យកន្លះខែ ព្រោះមិនទាន់ដាច់ខែ ប៉ុន្តែកញ្ញាសប្បាយចិត្ត ដែលរដ្ឋបានជួយសម្រួលលើការធ្វើដំណើរដោយឡានក្រុងមិនគិតថ្លៃ ដោយបានជួយសម្រួលច្រើនដល់បងប្អូនកម្មករកម្មការិនីរោងចក្រ នៅពេលធ្វើដំណើរទៅលេងស្រុកខែបុណ្យទានបែបនេះ។
កម្មការិនីរោងចក្រវ័យក្មេង ខាត់ រ៉ន បានបញ្ជាក់ថា៖ «លុយទើបបើកបានជាង១០០ដុល្លារហ្នឹង អ៊ីចឹងមិនអាចគ្រប់គ្រាន់លើការចំណាយទេ ព្រោះទៅលេងស្រុកខែបុណ្យទានបែបនេះ ត្រូវចំណាយច្រើន។ តែទោះយ៉ាងណា ក៏ខ្ញុំបានទៅលេងស្រុកជួបជុំពុកម៉ែបងប្អូន និងបានទៅធ្វើបុណ្យនៅវត្ត ហើយខ្ញុំសប្បាយចិត្ត ដែលរដ្ឋបានផ្តល់ឡានក្រុងឱ្យជិះដោយមិនអស់លុយ ហើយខ្ញុំចង់ឱ្យមានការផ្តល់បែបនេះជារៀងរាល់ឆ្នាំ»។
មិនមែនត្រឹមតែកម្មករការិនីរោងចក្រនោះទេ ដែលបានសម្រុកនាំគ្នាមកជិះរថយន្តក្រុងមិនអស់ប្រាក់ ប៉ុន្តែអាជីករលក់ដូរ អ្នកស្រី សឿ ផល្លា ក៏បាននាំកូនៗមកជិះឡានក្រុងរដ្ឋ ដោយមិនបង់ប្រាក់ផងដែរ ដើម្បីធ្វើដំណើរទៅស្រុកកំណើត នៅខេត្តក្រចេះ ហើយអ្នកស្រីអះអាងថា ឆ្នាំនេះអ្នកមកជិះឡានក្រុងកាន់តែច្រើន ព្រោះវាងាយស្រួល និងជួយកាត់បន្ថយការចំណាយបានច្រើនទៀត។
អ្នកស្រី សឿ ផល្លា បាននិយាយទាំងញញឹមថា៖ «នៅរាល់ពិធីបុណ្យចូលឆ្នាំ និងភ្ជុំបិណ្ឌបែបនេះ ខ្ញុំតែងនាំកូនៗមកជិះឡានក្រុង ឱ្យតែសម្តេចមិនយកប្រាក់ ព្រោះវាទូលាយស្រួលជិះ និងស្រួលដាក់អីវ៉ាន់ ជាពិសេសជិះឡានក្រុងចំណេញលុយបានច្រើន។ ដូចខ្ញុំ៤នាក់ម៉ែកូន ពេលជិះឡានឈ្នួលទាំងទៅនិងមកវិញអស់ជិត៣០ម៉ឺនរៀលឯណោះ អ៊ីចឹងពេលបានជិះឡានក្រុងរដ្ឋ យើងសល់លុយនោះ សម្រាប់យកទៅចំណាយលើអ្វីផ្សេង ឬយកទៅធ្វើបុណ្យបាន គឺវាល្អណាស់»។
ចំណែកនិស្សិតជិតបញ្ចប់ឆ្នាំទី២ ក្រិក លួន ក៏បានមកសាកល្បងជិះរថយន្តក្រុងរបស់រដ្ឋជាលើកដំបូងផងដែរ ខណៈ២ឆ្នាំកន្លងមកនេះរូបគេ បានជិះឡានក្រុងឯកជន ដោយត្រូវចំណាយប្រមាណ១៥ដុល្លារ សម្រាប់ការធ្វើដំណើរពីភ្នំពេញទៅកាន់ស្រុកកំណើតនៅខេត្តមណ្ឌលគិរី ហើយ លួន បានមើលឃើញថា ការជិះរថយន្តក្រុងមិនយកប្រាក់ ពិតជាជួយសម្រួលបានច្រើនទៅដល់និស្សិតមកពីខេត្តឆ្ងាយៗ។
និស្សិតវ័យ២២ឆ្នាំរូបនេះ បានបន្ថែមថា៖ «នេះជាលើកទី១ ដែលខ្ញុំបានមកជិះរថយន្តក្រុងរបស់រដ្ឋមិនអស់ប្រាក់នេះ ព្រោះវាទូលាយស្រួលជិះ ហើយឆ្នាំនេះខ្ញុំក៏រាងមានការខ្វះខាតដែរ។ ខ្ញុំត្រូវចំណាយច្រើនទៅលើការសិក្សា និងការស្នាក់នៅហូបចុក ហេតុនេះខ្ញុំយល់ថា ការរៀបចំឱ្យមានរថយន្តក្រុងរបស់រដ្ឋមិនតម្រូវឱ្យបង់ប្រាក់នេះ គឺវាល្អប្រសើរណាស់ ដោយសារបានជួយដោះស្រាយជីវភាពដល់និស្សិតរបស់យើងមកពីខេត្តឆ្ងាយៗ»។
យ៉ាងណាក៏ដោយ ជាមួយការកើនឡើងនៃចំនួនអ្នកជិះរថយន្តក្រុងរបស់រដ្ឋដោយមិនបង់ប្រាក់នេះ បែរជាធ្វើឱ្យអ្នករត់តាក់ស៊ីមួយចំនួន មានការពិបាកក្នុងការរកម៉ូយទៅវិញ។ លោក ស៊ឹម ប៊ុនលាង ដែលបានចតរថយន្តឈ្នួលរបស់ខ្លួន ឈរចាំចាប់ម៉ូយនៅក្បែរគល់ស្ពានជ្រោយចង្វារ កាលពីព្រឹកថ្ងៃទី១០ ខែតុលានេះ បានត្អូញត្អែរថា មុខរបររត់តាក់ស៊ី ពេលនេះមានការពិបាកក្នុងការរកភ្ញៀវដឹកជាងមុខ ដោយសារមានអ្នកទៅជិះឡានក្រុងរដ្ឋច្រើន។
លោក ស៊ឹម ប៊ុនលាង ដែលរត់តាក់ស៊ី ក្នុងទិសដៅពីភ្នំពេញទៅកាន់ខេត្តកំពង់ចាម បានប្រាប់ថា៖ «ពីមុន ពេលខែបុណ្យភ្ជុំបែបនេះ មិនខ្វះភ្ញៀវដឹកនោះទេ ជាពិសេសកម្មករកម្មការិនីរោងចក្រ គឺពួកគាត់បានទាក់ទងមកកក់កៅអីទុកមុនពេញៗតែម្តង ប៉ុន្តែចាប់តាំងពីមានឡានក្រុងរដ្ឋជិះដោយមិនបង់ប្រាក់ ពួកគាត់បានងាកទៅជិះខាងនោះវិញ ព្រោះសល់លុយ ហើយអ្នកខ្លះក៏ធ្វើដំណើរដោយម៉ូតូ ឬឡានខ្លួនឯង»។
ស្ថានភាពជាក់ស្តែង សម្រាប់ការបើកឱ្យដំណើរការសេវារថយន្តសាធារណៈរាជធានីភ្នំពេញ ដោយមិនបង់ប្រាក់រយៈពេល២ថ្ងៃដំបូង កាលពីព្រឹកថ្ងៃទី៩ និងទី១០ ខែតុលានេះ គឺមានប្រជាពលរដ្ឋ កម្មករកម្មការិនីនាំគ្នាសម្រុកទៅជិះច្រើនជាងឆ្នាំណាៗទាំងអស់ ព្រោះវាជាជម្រើសដ៏ល្អមួយ ដើម្បីកាត់បន្ថយការចំណាយ ស្របពេលសេដ្ឋកិច្ចធ្លាក់ចុះ តម្លៃប្រេងឥន្ទនៈឡើងថ្លៃ ហើយការចំណាយផ្សេងៗទៀត ក៏កើនឡើង ស្ទើរលើសប្រាក់ចំណូលប្រចាំខែដែលរកបាននោះ។
លោក ឃួង ស្រេង អភិបាលរាជធានីភ្នំពេញ ដែលបានជូនដំណើរបងប្អូនប្រជាពលរដ្ឋ កម្មករកម្មការិនីឡើងជិះរថយន្តក្រុងដោយមិនបង់ប្រាក់ នៅទីលានប្រជាធិបតេយ្យ មុខឃ្លាំងសាំង ក្នុងខណ្ឌឬស្សីកែវ ទាំងភ្លៀងរលឹមទទឹកខ្លួនជោគ កាលពីព្រឹកថ្ងៃទី៩ ខែតុលា បានឱ្យដឹងថា ពីមួយឆ្នាំទៅមួយឆ្នាំ ប្រជាពលរដ្ឋបានជិះរថយន្តក្រុងទៅលេងស្រុកកំណើតជួបជុំបងប្អូនក្នុងឱកាសបុណ្យជាតិធំៗ ដូចជាពិធីបុណ្យចូលឆ្នាំថ្មី និងពិធីបុណ្យភ្ជុំបិណ្ឌជាដើមនេះ មានកំណើនកើនឡើងជាលំដាប់។
ប៉ុន្តែឆ្នាំនេះចម្លែក ដោយលោកឃើញបងប្អូនកម្មករ ក៏ដូចជាប្រជាពលរដ្ឋ ដែលមកធ្វើកិច្ចការងារ ប្រកបមុខរបរ អាជីវកម្ម នៅរាជធានីភ្នំពេញ បានធ្វើដំណើរទៅខេត្តទាំង២៤ តាមសេវាឡានក្រុងនេះ មានចំនួនច្រើនជាងមុន ដោយសារពួកគាត់បានឃើញអំពីអត្ថប្រយោជន៍ដែលរដ្ឋាភិបាលបានផ្តល់ជូនគាត់ ខណៈអ្នកបម្រើសេវាដឹកជញ្ជូន ក៏មានភាសាផ្អែមល្ហែម និងបើកបរមានសុវត្ថិភាព ហើយអ្វីដែលពិសេសនោះ គឺពួកគាត់អាចសន្សំថវិកា បានម្នាក់យ៉ាងហោចណាស់១៥ដុល្លារ ក្នុងពេលទៅ និងពេលត្រឡប់មកវិញ១៥ដុល្លារទៀត។
លោក ឃួង ស្រេង បញ្ជាក់ថា៖ «យ៉ាងហោចណាស់ម្នាក់ ត្រូវចំណាយ១៥ដុល្លារយ៉ាងតិច ក្នុងការធ្វើដំណើរទៅតាមបណ្តាខេត្តឆ្ងាយៗ ហើយមានពលរដ្ឋ បានមកទទួលសេវាជិះរថយន្តក្រុងនេះរាប់ម៉ឺននាក់ ចាប់ពី៥ទៅ៦ម៉ឺននាក់ជារៀងរាល់ឆ្នាំ អ៊ីចឹងសេវាឡានក្រុងនេះ បានជួយកាត់បន្ថយការចំណាយរបស់ពួកគាត់តាមរយៈការចេញថ្លៃប្រេង ឬក៏រថយន្ត ដែលមានស្រាប់ទៅបម្រើសេវាដល់គាត់»។
លោកបន្ថែមថា៖ «យើងឃើញថា ឆ្នាំនេះមានបងប្អូនប្រជាពលរដ្ឋមកប្រើសេវាឡានក្រុងច្រើន ប៉ុន្តែទោះជាច្រើនយ៉ាងណាក៏ដោយ ក៏រដ្ឋបាលរាជធានីភ្នំពេញ នឹងអនុវត្តនូវអនុសាសន៍របស់សម្តេចធិបតី ធានាថា ដឹកជញ្ជូនពួកគាត់ឱ្យបានគ្រាប់ៗគ្នាទៅតាមបណ្តាខេត្ត និងចាំដឹកពួកគាត់ត្រឡប់មកវិញ ក្រោយភ្ជុំបិណ្ឌចប់ ដើម្បីកាត់បន្ថយការចំណាយរបស់ប្រជាពលរដ្ឋ ហើយធានាបាននូវសុវត្ថិភាពជូនពួកគាត់ផងដែរ»។
ចំណែកលោក ហេង សួរ រដ្ឋមន្រ្តីក្រសួងការងារ និងបណ្តុះបណ្តាលវិជ្ជាជីវៈ ដែលបានធ្វើដំណើរទៅជូនដំណើរប្រជាពលរដ្ឋ ជាពិសេសកម្មករកម្មការិនីរោងចក្រ ឡើងជិះរថយន្តក្រុងដោយមិនគិតថ្លៃ នៅទីលានប្រជាធិបតេយ្យ កាលពីព្រឹកថ្ងៃទី៩ ខែតុលាដែរនោះ បានអះអាងថា ក្រសួងការងារ បានស្នើទៅគ្រប់រោងចក្រ ឱ្យបើកប្រាក់ខែដល់បងប្អូនកម្មករកម្មការិនីមុនពេលកំណត់ ដើម្បីមានលុយទៅលេងស្រុក និងធ្វើបុណ្យទាន ក្នុងពិធីបុណ្យភ្ជុំបិណ្ឌឆ្នាំ២០២៦នេះ។
លោកបានថ្លែងថា៖ «តាមអនុសាសន៍ណែនាំរបស់សម្តេចធិបតី គឺថា បើទោះបីជាអត់ទាន់ដល់ពេលបើកប្រាក់ឈ្មួលក៏ដោយ ប៉ុន្តែក្រសួងបានណែនាំទៅដល់ម្ចាស់រោងចក្រទាំងអស់ ហើយកាលពីម្សិលមិញ ឃើញថា បានបើកប្រាក់ខែជូនបងប្អូនយើងហើយ អ៊ីចឹងបងប្អូនយើង ត្រឡប់ទៅផ្ទះជាមួយនឹងរថយន្ត ដែលមិនគិតថ្លៃ ហើយមានប្រាក់ហោប៉ៅ សម្រាប់ទៅធ្វើបុណ្យធ្វើទានផងដែរ។ នេះជាការរួមចំណែកមួយ ដើម្បីធ្វើម៉េចឱ្យពិធីបុណ្យភ្ជុំបិណ្ឌនេះ ជាពិធីដែលយើងជួបជុំគ្នា សប្បាយចិត្តទាំងអស់គ្នា»។
គួររំឭកថា សម្រាប់ពិធីបុណ្យភ្ជុំបិណ្ឌ ប្រពៃណីជាតិខ្មែរ ឆ្នាំ២០២៥ រដ្ឋបាលរាជធានីភ្នំពេញ ក្រោមការណែនាំរបស់រាជរដ្ឋាភិបាល បានរៀបចំរថយន្តក្រុងចំនួន ៥៩៧គ្រឿង សម្រាប់បម្រើសេវាដឹកជញ្ជូនសាធារណៈ ដោយមិនបង់ប្រាក់ជូនដល់ប្រជាពលរដ្ឋ និងកម្មករកម្មការិនីរោងចក្រ ក្នុងរយៈពេល ៦ថ្ងៃ ដោយចាប់អនុវត្តពីថ្ងៃទី២០ ដល់ថ្ងៃទី២៥ ខែកញ្ញា ឆ្នាំ២០២៥។
នៅក្នុងរយៈពេល ៦ថ្ងៃ នៃការដឹកជញ្ជូនប្រជាពលរដ្ឋទៅលេងស្រុកកំណើត ក្នុងឱកាសពិធីបុណ្យភ្ជុំបិណ្ឌនោះ មានប្រជាពលរដ្ឋសរុបចំនួន ៩២ ៥២១ នាក់ បានធ្វើដំណើរតាមរថយន្តក្រុងសាធារណៈរបស់រដ្ឋបាលរាជធានីភ្នំពេញ ទៅស្រុកកំណើត និងត្រឡប់មកភ្នំពេញវិញ ហើយបើធៀបនឹងរដូវភ្ជុំបិណ្ឌ ឆ្នាំ២០២៤ មានចំនួនត្រឹមតែ ៧១ ៣៦០ នាក់ គឺឆ្នាំ២០២៥ កើនឡើងប្រមាណ ៣០%។
ចំពោះការកើនឡើងនេះ លោកស្រី ដោ សម្ផស្ស នាយិការងរដ្ឋបាលរាជធានីភ្នំពេញ និងជាអ្នកនាំពាក្យរដ្ឋបាលរាជធានីភ្នំពេញ ធ្លាប់បានបញ្ជាក់កាលថ្ងៃទី២៥ ខែកញ្ញា ឆ្នាំ២០២៥ថា ប្រជាពលរដ្ឋដែលជិះរថយន្តក្រុង មានសុវត្ថិភាពល្អ មិនមានគ្រោះថ្នាក់ចរាចរនោះទេ គឺសុវត្ថិភាព ១០០ភាគរយ ហើយប្រជាពលរដ្ឋដែលនាំគ្នាជិះរថយន្តក្រុងសាធារណៈ ចំណេញថវិកាផ្ទាល់ខ្លួន ម្នាក់ៗប្រមាណ ៨ម៉ឺនរៀល ឬ ២០ដុល្លារអាមេរិក ដោយមិនបានចំណាយដល់ការធ្វើដំណើរដោយរថយន្តឈ្នួលរបស់ក្រុមហ៊ុនឯកជននោះទេ។
ដោយឡែក នៅឆ្នាំ២០២៦នេះ អនុវត្តតាមប្រសាសន៍របស់លោកនាយករដ្ឋមន្រ្តី ហ៊ុន ម៉ាណែត ក្នុងកិច្ចប្រជុំពេញអង្គគណៈរដ្ឋមន្ត្រី នៅទីស្តីការគណៈរដ្ឋមន្ត្រី (វិមានសន្តិភាព) កាលពីព្រឹកថ្ងៃទី២៥ ខែកញ្ញា ឆ្នាំ២០២៦ គឺរដ្ឋបាលរាជធានីភ្នំពេញ បានរៀបចំរថយន្តក្រុងចំនួន ៦០០គ្រឿង សម្រាប់បម្រើសេវាដឹកជញ្ជូនសាធារណៈ ដោយមិនបង់ប្រាក់ រយៈពេល៥ថ្ងៃ ចាប់ពីថ្ងៃទី៩ ដល់ថ្ងៃទី១៣ ខែតុលា ឆ្នាំ២០២៦ ដើម្បីជួយសម្រួលដល់ការចំណាយរបស់បងប្អូនប្រជាពលរដ្ឋទាំងអស់ ក្នុងការធ្វើដំណើរ ទៅលេងស្រុកកំណើត ជួបជុំបងប្អូនក្រុមគ្រួសារ ក្នុងឱកាសពិធីបុណ្យភ្ជុំបិណ្ឌ ប្រពៃណីជាតិខ្មែរ។
យ៉ាងណាក៏ដោយ ចំពោះបងប្អូនប្រជាពលរដ្ឋ និងកម្មករកម្មការិនីមួយចំនួន នៅតែបន្តប្រើប្រាស់យានជំនិះផ្ទាល់ខ្លួន ដើម្បីធ្វើដំណើរទៅលេងស្រុកកំណើត ព្រោះពួកគាត់ភាគច្រើន ជាអ្នកខេត្តនៅជិតរាជធានីភ្នំពេញ ប្រើពេលខ្លីក្នុងការធ្វើដំណើរ ហើយប្តីប្រពន្ធខ្លះ មានស្រុកកំណើតខុសគ្នា ដែលត្រូវបែងចែកពេលវេលា សម្រាប់ទៅលេងខាងប្រពន្ធផង និងឆ្លៀតទៅខាងប្តីផង ហេតុនេះការប្រើយានជំនិះផ្ទាល់ខ្លួន គឺជាជម្រើសល្អជាងការចាំជិះរថយន្តក្រុងរបស់រដ្ឋ ទោះមិនត្រូវឱ្យបង់ប្រាក់។
លោក ចាប ជឿន និងភរិយា ដែលជាអ្នកបម្រើការងារនៅភោជនីយដ្ឋានលក់បាយមួយកន្លែង នៅក្បែររង្វង់មូលកួរស្រូវ បានឱ្យដឹងថា ទាំងពិធីបុណ្យចូលឆ្នាំ និងបុណ្យភ្ជុំបិណ្ឌនេះ លោកតែងជិះម៉ូតូផ្ទាល់ខ្លួនទៅលេងស្រុក ព្រោះប្រពន្ធរបស់គាត់ មានស្រុកកំណើតនៅខេត្តព្រៃវែង ចំណែកលោកមានស្រុកកំណើត នៅតាកែវ ហើយត្រូវទៅលេងទាំង២ខេត្ត។
បុរសកូនមួយរូបនេះ បាននិយាយថា៖ «រាល់ពេលមានពិធីបុណ្យធំៗបែបនេះ ខ្ញុំត្រូវលៃលកពេលវេលា គឺពេលខ្លះត្រូវទៅលេងស្រុកខាងប្រពន្ធ២ថ្ងៃ រួចទើបបន្តដំណើរទៅលេងស្រុកខាងខ្ញុំវិញ។ ខ្ញុំដឹងថា ការធ្វើបែបនេះវាហត់ ព្រោះត្រូវបើកបរទាំងយប់ក៏មាន ហើយប្រឈមនឹងគ្រោះថ្នាក់ទៀត ប៉ុន្តែវាអត់មានជម្រើសល្អក្រៅពីនេះ ហើយម្យ៉ាងទៀត យើងជិះម៉ូតូ អស់ថ្លៃសាំងតិចដែរទេ សំខាន់មានម៉ូតូជិះទៅណាទៅណីបានតាមតម្រូវការ មិនចាំបាច់ខ្ចីម៉ូតូគេជិះពេលទៅដល់ស្រុកនោះទេ»។
លោក ជ័យ តិច អ្នកស្រាវជ្រាវការអភិវឌ្ឍសង្គម និងសេដ្ឋកិច្ច បានចាត់ទុកការរៀបចំឱ្យមានរថយន្តក្រុងជិះដោយមិនបង់ប្រាក់ របស់រាជរដ្ឋាភិបាល សម្រាប់បងប្អូនប្រជាពលរដ្ឋ ជាពិសេសកម្មករកម្មការិនី ក្នុងដំណើរទៅលេងស្រុក ក្នុងពិធីបុណ្យភ្ជុំបិណ្ឌនេះ ថា គំនិតដ៏ឆ្លាតវៃ ដែលបានជួយសម្រួលក្នុងការកាត់បន្ថយការចំណាយរបស់ពួកគាត់ ស្របពេលសេដ្ឋកិច្ចមានការធ្លាក់ចុះ។
លោកថ្លែងថា៖ «ការប្រើប្រាស់មធ្យោបាយឡានក្រុង សម្រាប់ប្រជាពលរដ្ឋ និងបងប្អូនកម្មករកម្មការិនីនៅឆ្នាំនេះ មានចំនួនកាន់តែច្រើន អ៊ីចឹងនេះជាភាពឆ្លាតវៃរបស់រាជរដ្ឋាភិបាលក្នុងការដោះស្រាយសម្ពាធការចំណាយ បញ្ហានៃការឡើងថ្លៃប្រេង និងអតិផរណា ក៏ដូចជាសម្ពាធសេដ្ឋកិច្ចបច្ចុប្បន្ននេះ ដូច្នេះការប្រើប្រាស់មធ្យោបាយនេះ បានកាត់បន្ថយការកកស្ទះចរាចរណ៍ គ្រោះថ្នាក់ចរាចរណ៍ ជាពិសេសកាត់បន្ថយការចំណាយរបស់បងប្អូនប្រជាពលរដ្ឋយើង ពិសេសកម្មករកម្មការិនីរបស់យើង»។
ជាមួយគ្នានេះ លោក ជ័យ តិច បានមើលឃើញថា នៅរដូវបុណ្យភ្ជុំបិណ្ឌនេះ ប្រជាពលរដ្ឋ ជាពិសេសកម្មករកម្មការិនីរោងចក្រ គួរណាស់កាត់បន្ថយការចំណាយឱ្យបានច្រើន តាមអាចធ្វើទៅបាន ព្រោះប្រាក់ឈ្នួលដែលពួកគេទទួលបាន វាមិនទាន់អាចទប់ទល់ជាមួយបញ្ហាសម្ពាធសេដ្ឋកិច្ច និងបញ្ហាអតិផរណានៅឡើយទេ។
លោកបញ្ជាក់ថា៖ «ជារួមខ្ញុំមើលឃើញថា ការចំណាយទូទៅរបស់ប្រជាពលរដ្ឋកម្ពុជា ជាពិសេសកម្មករកម្មការិនីរបស់យើង នៅមានការកាត់បន្ថយនូវការចំណាយ សម្រាប់ពិធីបុណ្យភ្ជុំបិណ្ឌឆ្នាំនេះ ដោយសារបញ្ហាសម្ពាធនៃសេដ្ឋកិច្ច បញ្ហានៃអតិផរណា ក៏ដូចជាត្រូវរ៉ាប់រងការចំណាយជាច្រើនទៀត»។
លោក ជ័យ តិច បានបន្ថែមថា៖ «ចំណែកការឡើងនៃប្រាក់ឈ្នួលសម្រាប់កម្មករកម្មការិនីរបស់យើងឆ្នាំនេះ គឺមិនមានការឡើងថ្លៃទេ នៅ២១០ដុល្លារដដែល ហើយនឹងទទួលបាននូវប្រាក់បន្ថែមនយោបាយពីព្រះមុខរដ្ឋាភិបាលចំនួន ២ដុល្លារ គឺបាន ២១២ដុល្លារប៉ុណ្ណោះ ប៉ុន្តែអតិផរណា មានការឡើងខ្ពស់រហូតដល់ ៥.៦ភាគរយ បើតាមរបាយការណ៍មូលនិធីរូបិយវត្ថុអន្តរជាតិ (IMF)»៕
