សមាគមសម្ព័ន្ធអ្នកសារព័ត៌មានកម្ពុជា

តុលាការបន្តសវនាការលើសំណុំរឿងក្បត់ជាតិរបស់លោក កឹម សុខា

លោក កឹម សុខា អតីតប្រធានគណបក្សប្រឆាំងស្វាគមន៍អ្នកគាំទ្រ ខណៈលោកចាកចេញពីសាលាដំបូងរាជធានីភ្នំពេញ។ រូបភាពថតកាលពីថ្ងៃទី១៦ ខែមករា ឆ្នាំ២០២០។ ខេមបូចា / ព្រីង សំរាំង
លោក កឹម សុខា អតីតប្រធានគណបក្សប្រឆាំងស្វាគមន៍អ្នកគាំទ្រ ខណៈលោកចាកចេញពីសាលាដំបូងរាជធានីភ្នំពេញ។ រូបភាពថតកាលពីថ្ងៃទី១៦ ខែមករា ឆ្នាំ២០២០។ ខេមបូចា / ព្រីង សំរាំង

បន្ទាប់ពីមានការពន្យារពេលយ៉ាងយូរ សាលាដំបូងរាជធានីភ្នំពេញបានកំណត់កាលបរិច្ឆេទបន្តសវនាការលើសំណុំរឿងក្បត់ជាតិរបស់​លោក កឹម សុខា អតីតមេបក្សប្រឆាំង។

សំណុំរឿងនេះត្រូវបានផ្អាកតាំងពីខែមីនា ឆ្នាំ២០២០ ចំពេលមានការរីករាលដាលនៃជំងឺកូវីដ-១៩។ ទោះជាយ៉ាងណាក៏ដោយ តុលាការបានបន្តដំណើរការជាធម្មតាឡើងវិញអស់ជាច្រើនខែមកហើយ រួមទាំងការចាប់ផ្តើមសវនាការថ្មីលើ​សកម្មជនសិទ្ធិមនុស្ស និងសមាជិកគណបក្សសង្គ្រោះជាតិដែលត្រូវរំលាយ​ចោល​រួច​ហើយនោះ។

ក្រុម​សង្គម​ស៊ីវិល​លើក​ឡើង​ថា ការ​បន្ត​សវនាការ​លើសំណុំរឿងរបស់​លោក កឹម សុខា ឡើង​វិញ​ភ្លាមៗនេះ គឺ​ដោយសារ​សម្ពាធ​អន្តរជាតិ។​​​ ទាំង​លោក អ៊ី រិន អ្នកនាំ​ពាក្យតុលា​ការនិងលោក​ ចាន់ ចេន មេធាវីការពារក្តីរបស់លោក កឹម សុខាបាន​បញ្ជាក់កាលពីថ្ងៃអង្គារថា សវនាការនឹងបន្តនៅថ្ងៃទី១៩ ខែមករា ឆ្នាំ២០​២២​។

លោក ចាន់ ចេន បានមានប្រសាសន៍​ថា៖ «សហមេធាវីយើងបានត្រៀមខ្លួនរួចរាល់​ហើយ​ ដើម្បីចូលរួមសវនាការ»

ក្រុម​មេធាវី​របស់​លោក កឹម សុខា បាន​ដាក់​សំណើ​សុំ​ទម្លាក់ចោល​សំណុំរឿង​​នេះ ប៉ុន្តែ​មិន​បាន​ទទួល​ការ​ឆ្លើយ​តប​ពី​តុលាការ​ទេ។

លោក កឹម សុខា ដែលជាអតីត​ប្រធានគណបក្សសង្គ្រោះជាតិ ត្រូវបានចាប់ខ្លួនកាលពីថ្ងៃទី០៣ ខែកញ្ញា ឆ្នាំ២០១៧ និង​ត្រូវ​បាន​ចោទប្រកាន់ពីបទសមគំនិតជាមួយបរទេស ដែល​តាម​ចោទថា សហការជាមួយសហរដ្ឋអាមេរិកប៉ុនប៉ងធ្វើបដិវត្តន៍ពណ៌ ដើម្បីផ្តួលរំលំរដ្ឋាភិបាលនៃគណបក្សប្រជាជនកម្ពុជាដែល​កំពុង​កាន់​អំណាច។

លោក កឹម សុខា បាន​អះអាង​ថា លោក​​ធ្វើ​សកម្មភាពដោយ​​ស្រប​ច្បាប់និង​ប្រ​កប​​ដោយ​តម្លាភាពក្នុង​ការ​ព្យាយាម​យក​ឈ្នះ​ការ​បោះឆ្នោត។

គណបក្ស​សង្គ្រោះ​ជាតិ​ត្រូវ​បាន​តុលាការ​កំពូល​រំលាយ​កាលពី​ឆ្នាំ២០១៧ ហើយ​​សមាជិក​គណបក្ស​ជាច្រើន​នាក់​ត្រូវ​បានចាប់ខ្លួន​ជុំវិញ​​អ្វី​ដែល​គេ​ជឿជាទូទៅ​​ថា  ​ជា​​ការ​​ចោទប្រកាន់​​ពាក់ព័ន្ធរឿង​​នយោបាយ។ មេដឹកនាំកំពូលៗរបស់គណបក្ស​នេះ​បាននិរទេសខ្លួន ហើយសមាជិកជាន់ខ្ពស់ជាង១០០នាក់ត្រូវបានហាមឃាត់មិនឲ្យធ្វើ​សកម្មភាព​នយោបាយរយៈពេល៥ឆ្នាំ។

ការពន្យារពេលលើសំណុំរឿងរបស់​លោក កឹម សុខា ធ្វើ​ឲ្យ​មាន​ក្តីបារម្ភក្នុង​ចំ​ណោម​ក្រុមសង្គមស៊ីវិលនិងអ្នកវិភាគនយោបាយ ដែលអះអាងថា ជម្លោះផ្លូវច្បាប់នេះ គឺជាផ្នែកមួយនៃយុទ្ធសាស្ត្រជំរុញឲ្យការបែក​បាក់ក្នុងចំណោម​មេ​ដឹក​នាំគណបក្សសង្គ្រោះជាតិកាន់តែធ្ងន់ធ្ងរឡើង។

លោក អំ សំអាត អនុប្រធាន​អង្គការ​សិទ្ធិ​មនុស្ស​លីកាដូ បាន​មាន​ប្រសាសន៍​ថា ការ​​បន្ត​សវនាការ​របស់​លោក កឹម សុខា គឺ​ដោយសារ​សម្ពាធ​អន្តរជាតិ ជា​ពិសេស​​នៅ​ពេល​ដែល​កម្ពុជា​ចូល​កាន់​តំណែង​ជា​ប្រធាន​អាស៊ាន​សម្រាប់​ឆ្នាំ​២០២២។ លោក សំអាត បាន​ទស្សទាយ​ថា រដ្ឋាភិបាល​នឹង​កំណត់​ជំហរ​របស់​ខ្លួនឡើងវិញ​ ​ដោយ​បញ្ជាក់​ថា ​ខ្លួន​មិន​អាច​ជ្រៀត​ជ្រែក​ក្នុង​កិច្ចការ​របស់​តុលាការ​បាន​ទេ ​នៅ​ពេល​តុលាការបន្ត​​ដំណើរការរឿង​ក្តីនេះ។

លោក​បាន​មាន​ប្រសាសន៍​ថា៖ «យើង​បាន​​ឃើញ​បញ្ហា​កម្ពុជា​របស់​យើង [ក្លាយ​ទៅ​​​ជា] វិបត្តិ​នយោបាយ​ដ៏​ចម្រូងចម្រាស និង​បញ្ហា​សិទ្ធិ​មនុស្ស។ ខ្ញុំគិតថា អ្នកនយោ​បាយគួរតែដោះស្រាយ [បញ្ហានយោបាយ] ដោយផ្អែក​លើគោលការណ៍សាមគ្គីភាព​និងឯកភាពជាតិ ដើម្បីធានាដល់​ការស្ដារលទ្ធិប្រជាធិបតេយ្យនិងការ​គោរពសិទ្ធិមនុស្ស»។

លោក ប៉ា ចាន់រឿន ប្រធាន​វិទ្យាស្ថានប្រជាធិបតេយ្យ​កម្ពុជាបាន​យល់​ស្រប​ថា កម្ពុជា​​ប្រឈម​នឹង​សម្ពាធ​កាន់​តែ​ខ្លាំង​ចាប់​តាំង​ពី​ការ​រំលាយ​គណបក្ស​សង្គ្រោះ​ជាតិ ដែល​ជា​គណបក្ស​ប្រឆាំង​ដ៏​ធំ។

លោកបានមានប្រសាសន៍ថា៖ «កិច្ចខិតខំប្រឹងប្រែងរបស់កម្ពុជាក្នុងការលុបបំបាត់បញ្ហាអវិជ្ជមាន រួមទាំងការកាត់បន្ថយភាពតានតឹងនយោបាយក្នុងស្រុកនឹងមិនប៉ះ​ពាល់ដល់ការធ្វើជាប្រធានអាស៊ាននៅឆ្នាំក្រោយនោះទេ»  ប៉ុន្តែ​លោកបានលើក​ឡើងថា ការបន្តសវនាការរបស់លោក កឹម សុខា គឺមួយផ្នែកដោយសារ​កម្ពុជា​​ធ្វើ​ជា​ប្រធានអាស៊ាន​និងការបោះឆ្នោតក្រុមប្រឹក្សាឃុំសង្កាត់នាពេលខាងមុខ​ផងដែរ​។

លោក ជិន ម៉ាលីន អ្នកនាំពាក្យក្រសួងយុត្តិធម៌បានបដិសេធថា ការបន្តសវនាការរបស់លោក កឹម សុខា ឡើងវិញ មិនមានហេតុផលនយោបាយទេ។

កាលពីសប្តាហ៍មុន សាលាដំបូងរាជធានីភ្នំពេញបានបន្តសវនាការលើអតីតសមា​ជិកនិងសកម្មជនគណបក្សសង្រ្គោះជាតិជាង១៣០នាក់ ដែលត្រូវបានចោទ​​ប្រកាន់ពីបទរួម​គំនិតក្បត់និងញុះញង់បង្កឲ្យមានភាពវឹកវរក្នុងសង្គមពាក់ព័ន្ធការព្យាយាម​មិនបានសម្រេចរបស់លោក សម រង្ស៊ី មេដឹកនាំគណបក្សប្រ​ឆាំងក្នុងការវិលត្រឡប់​មកកម្ពុជា​វិញ​កាល​ពីថ្ងៃទី៩ ខែវិច្ឆិកា ឆ្នាំ២០១៩។

សវនាការ​ដែល​មាន​មនុស្សដ៏ច្រើននេះ​ក៏ត្រូវបានពន្យារពេលជាច្រើនខែផងដែរ​ដោយសារការរីករាលដាលជំងឺកូវីដ-១៩។

លោក សំ សុគង់ មេធាវីការពារក្តីអតីតសមា​ជិកនិងសកម្មជនគណបក្សសង្រ្គោះជាតិមានប្រសាសន៍ថា តុលាការបានកំណត់ពេលបើកសវនាការរៀងរាល់ថ្ងៃអង្គារនិងថ្ងៃព្រហស្បតិ៍ ដើម្បីជម្រះ​លើបទចោទ​រួម​គំនិតក្បត់​។

លោក​បាន​មានប្រសាសន៍ថា៖ «​យើង​ឃើញថា ​តុលាការបាន​បន្ត​ការ​ជំនុំ​ជម្រះ​របស់​ខ្លួន​ឡើង​វិញ​នៅ​មុន​ការ​បោះឆ្នោត​ខាង​មុខ»

ប្រែសម្រួលពីអត្ថបទភាសាអង់គ្លេស៖ Court resumes treason trial against Kem Sokha

399 views

ព័ត៌មានទាក់ទង

ព័ត៌មានថ្មីៗ

អត្ថបទពេញនិយម