សមាគមសម្ព័ន្ធអ្នកសារព័ត៌មានកម្ពុជា

ជនជាប់ចោទបដិសេធបទសមគំនិតក្បត់ក្នុងសំណុំរឿងធំបំផុតប្រឆាំងនឹងមន្ត្រី និងអ្នកគាំទ្រអតីតគណបក្សសង្គ្រោះជាតិ

មេធាវី និងសកម្មជនសិទ្ធិមនុស្ស កញ្ញា សេង ធារី មកដល់សាលាដំបូងរាជធានីភ្នំពេញ កាលពីថ្ងៃព្រហស្បតិ៍ ទីដែលចុងបណ្តឹងចំនួន ១៣០នាក់ដែលជាប់ពាក់ព័ន្ធនឹងអតីតគណបក្សសង្រ្គោះជាតិត្រូវបានកោះហៅចូលសវនាការពីបទសមគំនិត និងបទញុះញង់។ បញ្ញ ឆព័ណ្ណ
មេធាវី និងសកម្មជនសិទ្ធិមនុស្ស កញ្ញា សេង ធារី មកដល់សាលាដំបូងរាជធានីភ្នំពេញ កាលពីថ្ងៃព្រហស្បតិ៍ ទីដែលចុងបណ្តឹងចំនួន ១៣០នាក់ដែលជាប់ពាក់ព័ន្ធនឹងអតីតគណបក្សសង្រ្គោះជាតិត្រូវបានកោះហៅចូលសវនាការពីបទសមគំនិត និងបទញុះញង់។ បញ្ញ ឆព័ណ្ណ

សាលា​ដំបូង​រាជធានី​ភ្នំពេញ​កាល​ពី​ថ្ងៃ​ព្រហស្បតិ៍​​កន្លង​ទៅ​នេះ​បាន​ចាប់ផ្ដើម​ដំណើរការ​សវនាការ​លើ​សមាជិក​និង​អ្នក​គាំទ្រ​អតីត​គណបក្ស​សង្គ្រោះជាតិ​ជាង ១៣០​នាក់ ​ពីបទ«​ញុះញង់​ឲ្យ​មាន​ភាព​វឹកវរ​ធ្ងន់ធ្ងរ​» ​និង​បទ«រួម​គំនិត​ក្បត់​» ដែលករណី​នេះ​ទាក់ទិន​នឹង​​ការ​គាំទ្រ​របស់​ជនជាប់ចោទ​​ចំពោះ​​ការ​ប៉ុនប៉ង​វិល​ត្រឡប់​​មក​មាតុភូមិ​ របស់​លោក​ សម​ រង្ស៊ី​ កាល​ពី​ឆ្នាំ ២០១៩។

លោក​ គុជ ​គឹមឡុង​ អ្នក​នាំ​ពាក្យ​សាលា​ដំបូង​រាជធានី​ភ្នំពេញ​ បាន​មានប្រសាស៍​ថា សវនាការ​នេះ​គឺ​ជា​សវនាការ​ដ៏​ធំ​បំផុត​បើ​និយាយ​ពី​​ចំនួនជនជាប់ចោទ​ ប៉ុន្តែ​មាន​វត្តមាន៣៤ នាក់​ប៉ុណ្ណោះ​នៅ​ក្នុង​ចំណោម​អ្នក​រង​ការ​ចោទប្រកាន់​​សរុប ១៣៩ នាក់​។ ជនជាប់ចោទមួយចំនួន​ដែល​ក្នុង​នោះ​រួម​មាន​ ថ្នាក់​ដឹកនាំ​ជាន់ខ្ពស់​អតីត​គណបក្ស​សង្គ្រោះជាតិ​​ និង​អ្នកគាំទ្រ​កំពុង​រស់នៅ​ក្រៅប្រទេស​ ឬ​កំពុង​និរទេសខ្លួន។

ក្រោម​សំណើ​របស់​ព្រះរាជអាជ្ញារង​លោក​ សេង ​ហៀង ចៅក្រម​លោក ​រស់ ពិសិដ្ឋ​ បាន​ពន្យារ​​ពេល​សវនាការ​កាល​ពី​ថ្ងៃព្រហស្បតិ៍​កន្លង​ទៅ​នេះ​ បន្ទាប់​ពី​សម្រេច​បញ្ចូល​សំណុំរឿង​ចំនួន ០៤ ចូល​ជា​ពីរ​សំណុំរឿង។ ​​​សវនាការ​ថ្មី​ត្រូវ​បាន​កំណត់​ពេល​​ធ្វើ​ឡើង​នៅ​ថ្ងៃ​ទី ១៤ ខែ​មករា និង​ថ្ងៃ​ទី ០៤ ខែមីនា ឆ្នាំ២០២១។

ក្រុម​គាំពារ​សិទ្ធិ​​និយាយថា ការ​ពន្យារ​ពេល​​សវនាការ​នឹង​ប៉ះពាល់​ទៅ​ដល់​សិទ្ធិ​ទទួល​បាន​ការ​ជំនុំជម្រះ​ក្តី​​ដោយ​យុត្តិធម៌​សម្រាប់​ជនជាប់ចោទ ដោយសារ​ពួកគេ​​មួយចំនួន​មាន​ការ​ភ្ញាក់ផ្អើល​ទៅ​នឹង​បទ​ចោទប្រកាន់​ប្រឆាំង​នឹង​ពួកគេ។

លោក​ អ៊ី រិន​ អ្នក​នាំ​ពាក្យ​សាលាដំបូងរាជធានីភ្នំពេញ​ ​បាន​បដិសេធ​ការ​ពន្យារ​សវនាការ​នឹង​ប៉ះពាល់​ដល់​ដំណើរការ​ជំនុំជម្រះ​ក្តី​ ដោយ​លើក​ឡើង​ថា​ មេធាវី​ការពារក្តី​​ចុងចោទ​បាន​ស្នើ​ឲ្យ​ពន្យារ​សវនាការ។

លោក​បាន​មានប្រសាសន៍​ថា៖ «វា​ហាក់​ដូច​ជា​មិនមាន​ជា​បញ្ហា​នោះ​ទេ ពី​ព្រោះ​មេធាវី​ការពារ​ក្តី​បាន​ស្នើ​សុំ​ការ​ពន្យារ ពីព្រោះ​មេធាវីការពារ​ក្តី​មួយ​ចំនួន​មិនទាន់​​បាន​​ពិនិត្យ​លើ​ឯកសារ​ពាក្យ​បណ្តឹង​នៅ​ឡើយ​ទេ»

លោក​ នី សុខា​ ប្រធាន​ផ្នែក​សិទ្ធិមនុស្ស​និង​សិទ្ធិ​ដីធ្លី​​នៅ​អង្គការ​ ADHOC ​បាន​បង្ហាញ​ការ​ព្រួយបារម្ភ​ពាក់ព័ន្ធ​នឹង​សមត្ថភាព​របស់​តុលាការ​ដើម្បី​រក្សា​ដំណើរការ​​សវនាការ​ប្រកប​ដោយ​យុត្តិធម៌​សម្រាប់​ចុងបណ្ដឹង ដោយ​លើកឡើងថា ជនជាប់ចោទ​មួយចំនួន​មិន​ត្រូវ​បាន​ផ្ដល់​ព័ត៌មាន​ពាក់ព័ន្ធ​នឹង​បទ​ចោទប្រកាន់​ប្រឆាំង​នឹង​ពួកគេ​នោះ​ទេ។

លោក​បានមានប្រសាសន៍ថា សវនាការ​ ដែល​អូសបន្លាយ​ពេលយូរ នឹង​ប៉ះពាល់​​ដល់​ចុងបណ្ដឹង​ទាំងអស់​ ជា​ពិសេស​អ្នក​​កំពុង​ជាប់​​នៅ​ក្នុង​ពន្ធនាគារ​ស្រាប់​​​ទៅ​ហើយ។

លោក​សុខា​ មានប្រសាសន៍ថា៖ «ដូច្នេះ​ នៅ​ពេល​ដែល​សំណុំ​រឿង​ត្រូវ​បាន​ដាក់​បញ្ចូល​គ្នា ខ្ញុំ​គិត​ថា នឹង​មាន​ការ​លំបាក​ដើម្បី​ស្វែង​រក​យុត្តិធម៌​នៅ​ក្នុង​សំណុំ​រឿង​​ទាំង​នោះ»

លោក ​ឡោ ជុនធី មេធាវី​ការពារ​ក្តី​មួយ​រូប​ដែល​តំណាង​ឲ្យ​ជនជាប់ចោទ​ចំនួន ១២នាក់ ​ក្នុង​ចំណោម​​សរុប ១៣៩​នាក់ ​បាន​បញ្ជាក់​ថា មេធាវី​ការពារ​ក្តី​ជនជាប់ចោទ​​បាន​ស្នើ​ឲ្យ​ចៅក្រម​ពន្យារ​ពេល​ពីព្រោះ​ពួកគេ​ត្រូវ​សិក្សា​ពី​ពាក្យ​​បណ្ដឹង​ ជាពិសេស​នៅ​ពេល​ដែល​ពាក្យ​​បណ្តឹង​ត្រូវ​បាន​ដាក់​បញ្ចូល​គ្នា។

លោក​ឈុនធី​ បានលើកឡើង​ថា៖ «ជនជាប់ចោទដែល​បាន​ចូលរួម​សវនាការ​មិន​​ព្រមទទួល​យក​មេធាវី​ដែល​គណៈមេធាវី​ផ្តល់​ឲ្យ​ពួកគេ​នោះ​ទេ» ដោយ​បន្ថែម​ថា ចៅក្រម​បាន​អនុញ្ញាត​ឲ្យ​ជនជាប់ចោទ​ស្វែងរក​មេធាវី​តំណាង​ខ្លួន​ឯង​ផ្ទាល់ និង​ជូន​ដំណឹង​ត្រឡប់​ទៅ​តុលាការ​វិញ​ពីរ​សប្តាហ៍​មុន​ថ្ងៃ​សវនាការ។

ជនជាប់ចោទ​មួយចំនួន​មាន​ការ​ភ្ញាក់ផ្អើល​យ៉ាង​ខ្លាំង​ទៅ​នឹង​បទ​ចោទ​ប្រកាន់​ប្រឆាំង​នឹង​ពួកគេ​ ហើយ​​មិន​បាន​ដឹង​​​ថា ពួកគេ​បាន​ប្រព្រឹត្ត​​អ្វី​ខុស​ ដែល​ត្រូវ​ប្រឈម​​នូវ​បទ​ចោទប្រកាន់​​ធ្ងន់ធ្ងរ​ដូចនេះ។

អ្នក​រាយការណ៍​ពិសេស​អង្គការ​សហប្រជាជាតិ​ប្រចាំ​កម្ពុជា ​លោកស្រី ​រ៉ូណា ស្មីត (Rhona Smith) បាន ចេញ សេចក្តី​ថ្លែង​ការណ៍​មួយ​កាល​ពី​ថ្ងៃ​ពុធ​ ដោយ​បង្ហាញ​ការ​ព្រួយបារម្ភ​ពាក់ព័ន្ធ​នឹង​ចំនួន​ចុងបណ្ដឹង​ជា​ច្រើន​នៅ​ក្នុង​សវនាការ​ និង​បាន​ចោទ​សួរ​ពី​មូលដ្ឋាន​ផ្លូវ​ច្បាប់​នៃ​បទ​ចោទប្រកាន់​​​ប្រឆាំង​នឹង​ចុងបណ្តឹង​ទាំង​នោះ។

លោកស្រី​បាន​មានប្រសាសន៍ថា៖ «សវនាការ​ដ៏​ធំ​ប្រឆាំង​នឹង​សកម្មជន​គណបក្ស​សង្រ្គោះជាតិ ហាក់ដូចជា ត្រូវ​បាន​ជំរុញ​ពី​ក្រោយ​ហេតុផល​នយោបាយ មិនមាន​មូលដ្ឋាន​ផ្លូវច្បាប់​ច្បាស់លាស់ និង​ស្មើ​នឹង​ការ​រំលោភ​ធ្ងន់ធ្ងរ​ទៅ​លើ​សិទ្ធិ​ ដែល​ចែង​នៅ​ក្នុង​ច្បាប់​សិទ្ធិ​មនុស្ស​អន្តរជាតិ»​ ដោយ​បន្ថែម​ថា ​សវនាការ​ហាក់​ដូចជា​ផ្នែក​មួយ​នៃ​យុទ្ធសាស្ត្រ​ ដើម្បី​គំរាម​និង​បំបិទសំឡេង​ក្រុម​អ្នក​ប្រឆាំង​នឹង​រដ្ឋាភិបាល។

ជា​ការ​ឆ្លើយតប ​ស្ថាន​បេសកកម្ម​អចិន្ត្រៃយ៍​កម្ពុជា​ទៅ​កាន់​អង្គការសហប្រជាជាតិ​បាន​ច្រានចោល​ការ​ព្រួយបារម្ភ​របស់​លោកស្រី រ៉ូណា ស្មី និង​បាន​ចាត់​ទុក​ថា នេះ​គ្រាន់​តែ​ជា​ទស្សនៈ​ផ្ទាល់ខ្លួន​របស់​លោកស្រី​តែ​ប៉ុណ្ណោះ។

សេចក្តី​ថ្លែងការណ៍​ពី​ស្ថាន​បេសកកម្ម​​កម្ពុជា​ទៅ​កាន់​អង្គការសហប្រជាជាតិ​បាន​សរសេរ​ថា៖ «ទស្សនៈផ្ទាល់ខ្លួនដែលអះអាងថាអ្នកជំនាញ ប៉ុន្តែ​មិនមែន​ជា​មន្ត្រី​របស់​​អង្គការសហប្រជាជាតិ គឺជាការលើកឡើងដែសម្រាំងយកតែផ្នែកខ្លះ និងបកស្រាយដោយមួលបង្កាច់ មិនផ្អែកលើការពិត»

លោក​ សារ៉ូ សុវុឌ្ឍិ ដែល​ជា​ចៅសង្កាត់អតីត​គណបក្ស​សង្គ្រោះជាតិ ​មក​ពី​ឃុំ​និមិត្ត ​ក្រុង​ប៉ោយប៉ែត​បាន​រក្សា​នូវ​ភាព​ស្អាតស្អំ​របស់​លោក​ និង​ចង់​បង្ហាញ​ទៅ​តុលាការ​ថា​ លោក​មិន​បាន​ចូលរួម​ក្នុង​ការ​សម​គំនិត ​ឬ​ញុះញង់​​នរណា​ម្នាក់​នោះ​ទេ។

លោក​បាន​និយាយ​ថា៖ «ខ្ញុំ​ជឿ​ថា តុលាការ​នឹង​ទម្លាក់​ចោល​បទចោទប្រកាន់​ប្រឆាំង​នឹង​ខ្ញុំ ពីព្រោះ​ខ្ញុំ​មាន​ភស្តុតាង​បង្ហាញ​ថា ខ្ញុំ​មិនបាន​សម​គំនិត [ប្រឆាំង​នឹង​រដ្ឋាភិបាល] ​នោះ​ទេ»។​

លោក​ សុវុឌ្ឍិ ​ អាយុ៣៨ ឆ្នាំ​ មាន​ស្រុកកំណើត​មក​ពី​ខេត្ត​បន្ទាយមានជ័យ ​បាន​និយាយ​ថា នឹង​មាន​ការ​លំបាក​សំរាប់​លោក​ក្នុង​ការ​ធ្វើ​ដំណើរ​ទៅ​ក្រុង​ភ្នំពេញ​ដើម្បី​ចូលរួម​សវនាការ​ និង​ថា​បទចោទប្រកាន់​ប្រឆាំង​នឹង​លោក​បាន​បង្ក​ឲ្យ​ជា​សម្ពាធ​មក​លើ​​សមាជិក​គ្រួសារ​របស់​លោក។

អតីត​សមាជិក​ព្រឹទ្ធសភា​គណបក្ស​សម រង្ស៊ី​ លោក​ថាច់ សេដ្ឋា ​ក៏​បាន​បដិសេធ​នូវ​ការ​ពាក់ព័ន្ធ​ណា​មួយ​នៅ​ក្នុង​បទឧក្រិដ្ឋ​ដែល​ត្រូវ​បាន​ចោទប្រកាន់​មក​លើ​រូប​លោក ​និង​បាន​ប្រាប់​ទៅ​ក្រុម​អ្នកសារព័ត៌មាន​ថា លោក​មិន​បាន​ដឹង​ថា លោក​បាន​ប្រព្រឹត្ត​សកម្មភាព​ជាក់លាក់​ណា​មួយ​ដែល​ខុសច្បាប់​នោះ​ទេ។

លោក​សេដ្ឋា ​និយាយ​ថា៖ «ដូច្នេះ​ ខ្ញុំមក​សវនាការ​នេះ ពីព្រោះ​ខ្ញុំ​ចង់​ដឹង​ថា ខ្ញុំ​សម​គំនិត​ជាមួយ​នរណា ហើយ​ខ្ញុំ​ក្បត់​នរណា»។ ​

អតីតសមាជិកព្រឹទ្ធសភាពីគណបក្សសមរង្ស៊ីលោក ថាច់ សេដ្ឋា ចាកចេញពីសាលាដំបូងរាជធានីកាលពីថ្ងៃព្រហស្បតិ៍ បន្ទាប់ពីសវនាការប្រឆាំងនឹងចុងបណ្តឹងចំនួន ១៣០នាក់ ដែលជាប់ពាក់ព័ន្ធនឹងគណបក្សសង្រ្គោះជាតិ ត្រូវបានពន្យារពេល។ បញ្ញ ឆព័ណ្ណ
អតីត​សមាជិក​ព្រឹទ្ធសភា​ពី​គណបក្ស​សមរង្ស៊ី​លោក ​ថាច់ សេដ្ឋា ចាក​ចេញ​ពីសាលាដំបូងរាជធានី​កាល​ពី​ថ្ងៃ​ព្រហស្បតិ៍ បន្ទាប់​ពី​សវនាការ​ប្រឆាំង​នឹង​ចុង​បណ្តឹង​​ចំនួន​ ១៣០​នាក់​ ដែល​ជាប់​ពាក់ព័ន្ធ​នឹង​គណបក្ស​សង្រ្គោះជាតិ​ ត្រូវ​បាន​ពន្យារពេល។ បញ្ញ ឆព័ណ្ណ​​

កញ្ញា​ សេង ​ធារី​ មេធាវី​ជនជាតិ​ខ្មែរ​អាមេរិកាំង និង​សកម្មជន​សិទ្ធិមនុស្ស​ បាន​និយាយ​ថា កញ្ញា​​មិនចង់​បាន​មេធាវី​ចាត់​តាំង​ដោយ​តុលាការ​នោះ​ទេ​ និង​ថា​ កញ្ញា​ចង់​មើល​ទៅ​លើ​ករណី​នោះ​ផ្ទាល់ ជា​ពិសេស​របាយការណ៍​ចុង​ក្រោយបង្អស់​របស់​ចៅក្រម​ស៊ើបសួរ។

កញ្ញា​​ធារី​ បាន​និយាយ​ថា៖ «ខ្ញុំ​ និង​អ្នក​ដទៃ​ទៀត​ មិនបាន​ទទួល​របាយការណ៍​​អ្វី​ដែល​បាន​ធ្វើ​ខុស​នឹង​ច្បាប់ ហើយ​យើង​​ទទួល​បានត្រឹមតែ​ដីកោះហៅ​មួយ។ ដូច្នេះ​ វា​មិន​គ្រប់គ្រាន់​នោះ​ទេ»

ទោះ​បី​ជា​ជំទាស់​ទៅ​នឹង​សវនាការ​ក៏​ដោយ កញ្ញា​ធារី ​បាន​និយាយ​ថា កញ្ញា​​នឹង​ត្រឡប់​​មក​ចូលរួម​សវនាការ​នៅ​ថ្ងៃ​ទី ១៤ ខែមករា ​ឆ្នាំ​ក្រោយ។

ខណៈ​សវនាការ​កំពុង​ដំណើរការ​ អ្នក​គាំទ្រ​ប្រមាណ​១០០​នាក់​មក​ពី​ទូទាំង​ប្រទេស​បាន​ប្រមូល​ផ្ដុំ​នៅ​ខាងក្រៅ​តុលាការ​ ហើយ​​ត្រូវ​បាន​រារាំង​មិន​ឲ្យ​ឈរ​ជិត​បរិវេណ​តុលាការនោះទេ។

លោក​ ស៊ូ យ៉េន​ កសិករ​អាយុ ៥១​ឆ្នាំ​ពី​ស្រុក​មេមត់​ ខេត្ត​ត្បូងឃ្មុំ​ មិន​ពេញចិត្ត​ចំពោះ​ការ​ដែល​សន្តិសុខ​មិន​អនុញ្ញាត​ឲ្យ​លោក និង​អ្នក​ដទៃទៀត​បញ្ចេញ​មតិ​របស់​ខ្លួន​នៅ​ខាង​ក្រៅ​អគារ​តុលាការ។

លោក​បាន​និយាយ​ថា៖ «ខ្ញុំ​ខ្លាច​ ប៉ុន្តែ​ខ្ញុំ​ត្រូវមក​ទី​នេះ​ ដើម្បី​ទាមទារ​សេរីភាព​សម្រាប់​អ្នក​ដែល​មិនមាន​កំហុស។ ប៉ុន្តែ​យើង​ឃើញ​ថា ពួកគេ​កំពុង​រឹតត្បិត​ពួកយើង»៕​

360 views

ព័ត៌មានទាក់ទង

ព័ត៌មានថ្មីៗ

អត្ថបទពេញនិយម