មេធាវីរបស់លោកបានថ្លែងកាលពីថ្ងៃព្រហស្បតិ៍ថា សាលាឧទ្ធរណ៍ភ្នំពេញនឹងប្រកាសសាលដីកានៅពេលក្រោយ ដោយមិនបានបញ្ជាក់ថាពេលណានោះទេ បន្ទាប់ពីសវនាការរយៈពេលពីរថ្ងៃលើបណ្តឹងឧទ្ធរណ៍របស់អតីតមេដឹកនាំគណបក្សប្រឆាំង លោក កឹម សុខា ចំពោះការផ្តន្ទាទោសពីបទក្បត់ជាតិ។
សាលាឧទ្ធរណ៍ភ្នំពេញបានបន្តសវនាការបណ្តឹងឧទ្ធរណ៍របស់លោក កឹម សុខា នៅថ្ងៃពុធ ដែលមានរយៈពេលជាង១៨ខែ បន្ទាប់ពីការសវនាការចុងក្រោយ។
ស្ថាបនិកវ័យ៧២ឆ្នាំនៃគណបក្សសង្គ្រោះជាតិ (CNRP) ដែលត្រូវបានរំលាយចោល ត្រូវបានកាត់ទោសឱ្យជាប់ពន្ធនាគារ២៧ឆ្នាំក្នុងឆ្នាំ២០២៣ ដោយជាប់ឃុំក្នុងផ្ទះនៅក្រុងភ្នំពេញ។ លោកត្រូវបានកាត់ទោសពីបទក្បត់ជាតិ ជុំវិញការចោទប្រកាន់ថាលោកបានគប់គិតជាមួយសហរដ្ឋអាមេរិក ដើម្បីផ្តួលរំលំរដ្ឋាភិបាលរបស់អតីតនាយករដ្ឋមន្ត្រី ហ៊ុន សែន ដែលកូនប្រុសរបស់លោក ហ៊ុន ម៉ាណែត កំពុងកាន់តំណែងនេះ។ លោក កឹមសុខា បានបដិសេធការចោទប្រកាន់ចាប់តាំងពីលោកត្រូវបានចាប់ខ្លួនក្នុងឆ្នាំ២០១៧។
តុលាការថ្នាក់ទាបក៏បានដកហូតសិទ្ធិនយោបាយរបស់លោក និងហាមឃាត់លោកមិនឱ្យជួបជាមួយជនបរទេស ឬនរណាម្នាក់នៅខាងក្រៅគ្រួសាររបស់លោក។ អ្នកជំនាញអង្គការសហប្រជាជាតិបាននិយាយថា ករណីនេះមានហេតុផលនយោបាយ និងឆ្លុះបញ្ចាំងពីគំរូនៃសកម្មភាពផ្លូវច្បាប់ដ៏ទូលំទូលាយប្រឆាំងនឹងឥស្សរជនប្រឆាំង។
ក្នុងអំឡុងពេលសវនាការនៅថ្ងៃព្រហស្បតិ៍ មេធាវីការពារក្តីរបស់លោក កឹម សុខា បានអំពាវនាវឱ្យតុលាការលុបចោលការផ្តន្ទាទោសនេះ ដោយអះអាងថា មិនមានភស្តុតាងគ្រប់គ្រាន់ ហើយថាគ្មានប្រទេសបរទេសណាមួយត្រូវបានកំណត់អត្តសញ្ញាណថាបានគប់គិតជាមួយគាត់នោះទេ។
លោក ផែង ហេង មេធាវីការពារក្តី បានប្រាប់អ្នកយកព័ត៌មាននៅខាងក្រៅតុលាការថា៖ «យើងមិនទាន់បានឃើញលោក កឹម សុខា ប្រគល់ដីជូនជនបរទេសណាម្នាក់សូម្បីតែមួយម៉ែត្រការ៉េទៅឱ្យបរទេសឈ្លានពាននោះទេ។ វាមិនពិតទេ»។
លោកបានថ្លែងថា ព្រះរាជអាជ្ញាបានពឹងផ្អែកលើវីដេអូនៃសុន្ទរកថាដែលលោក កឹម សុខា បានថ្លែងនៅប្រទេសអូស្ត្រាលីក្នុងឆ្នាំ២០១៣ ដល់សហគមន៍ជនភៀសខ្លួនកម្ពុជាដើម្បីចោទប្រកាន់ថាលោកបានគប់គិតជាមួយសហរដ្ឋអាមេរិក។ លោក ហេង បានបន្តថា វីដេអូនេះ «មិនមានភស្តុតាងគ្រប់គ្រាន់ដើម្បីចោទប្រកាន់»។
លោក ហេង បានបន្ថែមថា តុលាការបានចាត់ទុកសកម្មភាពដែលបានលើកឡើងក្នុងសំណុំរឿងនេះថាជាការប៉ុនប៉ងញុះញង់ឱ្យមានភាពចលាចលដែលមានគោលបំណងផ្តួលរំលំរដ្ឋាភិបាល ប៉ុន្តែមិនបានចង្អុលបង្ហាញពីសកម្មភាពឈ្លានពានណាមួយប្រឆាំងនឹងប្រទេសកម្ពុជាទេ ដោយលើកឡើងពីភាពតានតឹងព្រំដែនជាមួយប្រទេសថៃកាលពីឆ្នាំមុនថាជាឧទាហរណ៍នៃអរិភាព៕
ប្រែសម្រួលពីអត្ថបទភាសាអង់គ្លេស៖ Kem Sokha Treason Appeal Verdict Due at Later Unspecified Date, Lawyer Says
