ប្រជាពលរដ្ឋប្រមាណ ២០០នាក់ដែលកំពុងរស់នៅក្នុងស្រុកកណ្ដាលស្ទឹង និងក្រុងតាខ្មៅ បានប្រមូលផ្ដុំគ្នានៅមុខសាលាខេត្តកណ្ដាលកាលពីថ្ងៃអង្គារ ដើម្បីទាមទាររកការបញ្ជាក់ថាតើពួកគាត់ត្រូវស្ថិតក្នុងក្រុមដែលត្រូវបណ្ដេញចេញជាមួយនឹងមនុស្សរាប់ពាន់នាក់ទៀតឬយ៉ាងណា ទាក់ទងនឹងគម្រោងព្រលានយន្តហោះថ្មី។
បើតាមប្រជាពលរដ្ឋទាំងនោះ មានកម្មករដែលអ្នកភូមិស្គាល់ថាជាបុគ្គលិកធ្វើការនៅអាកាសយានដ្ឋានអន្តរជាតិ និងអាជ្ញាធរមូលដ្ឋានបានចុះបាញ់ថ្នាំក្រហមជាសញ្ញាសម្គាល់នៅតាមផ្ទះរាប់សិបខ្នងកាលពីចុងខែវិច្ឆិកា កន្លងមក។ ការណ៍នេះបានធ្វើឲ្យប្រជាពលរដ្ឋមានការបារម្ភថាពួកគាត់នឹងត្រូវគេបណ្ដេញចេញដែរ។ ប៉ុន្តែអភិបាលរងខេត្តកណ្ដាល លោក នូវប៉េង ច័ន្ទតារា មានប្រសាសន៍ថាការបាញ់ថ្នាំសម្គាល់នោះមិនពាក់ព័ន្ធនឹងព្រលានយន្តហោះថ្មីនោះទេ។ លោកបញ្ជាក់ថា ការបាញ់ថ្នាំសម្គាល់នេះ អាជ្ញាធរមូលដ្ឋានធ្វើឡើងដើម្បីសម្គាល់ចំនួនផ្ទះ និងថាដើម្បីគ្រាន់តែចង់ដឹងពីចំនួនប្រជាជនដែលកំពុងរស់នៅទីនោះប៉ុណ្ណោះ។
អ្នកស្រី ជាង សុភាព វ័យ៦០ឆ្នាំ មកពីឃុំកណ្ដោក ជាអ្នកភូមិម្នាក់ក្នុងចំណោមអ្នកភូមិផ្សេងទៀតដែលបានចូលជួប លោក នូវប៉េង ច័ន្ទតារា ដើម្បីសួរបញ្ជាក់ពីវិសាលភាពគម្រោងព្រលានយន្តហោះនេះ។
អ្នកស្រីឲ្យដឹងថា៖ «[ក្រុមហ៊ុន] មិនអនុញ្ញាតឲ្យប្រជាពលរដ្ឋសាងសង់ផ្ទះថ្មីនោះទេ ពួកគេថាវាគឺជាដីរបស់គេ និងជាតំបន់របស់ពួកគេ»។ អ្នកស្រីបន្តថា៖ «ខ្ញុំពិតជាមិនយល់ទេ ហេតុនេះហើយបានជាខ្ញុំមកទីនេះ និងចង់បានការបញ្ជាក់ពីអាជ្ញាធរឲ្យបានច្បាស់លើរឿងនេះ»។
អ្នកស្រីបញ្ជាក់ថា៖ «ខ្ញុំសប្បាយចិត្តចំពោះការអភិវឌ្ឍ ប៉ុន្តែពួកគេក៏ត្រូវមើលប្រជាជនផង។ បើការអភិវឌ្ឍធ្វើឲ្យប្រជាពលរដ្ឋទឹកភ្នែក កុំអភិវឌ្ឍន៍អីល្អជាង»។
កន្លងមកប្រជាពលរដ្ឋជាង ៣០០គ្រួសារក្នុងឃុំបឹងខ្យាង ស្រុកកណ្ដាលស្ទឹង ខេត្តកណ្ដាល និងស្រុកបាទី ខេត្តតាកែវ បានរងផលប៉ះពាល់ពីគម្រោងព្រលានយន្តហោះដែលមានតម្លៃ ១,៥ពាន់លានដុល្លារ។ គម្រោងព្រលានយន្តហោះនេះសាងសង់ដោយក្រុមហ៊ុន OCIC ដែលគេស្គាល់ថាជារបស់លោកឧកញ៉ា ពុង ឃាវសែ ដែលស្និទ្ធនឹងរដ្ឋាភិបាល។
ប៉ុន្តែសម្រាប់ប្រជាពលរដ្ឋដែលផ្ទះរបស់ពួកគេត្រូវអាជ្ញាធរចុះបាញ់ថ្នាំសម្គាល់នាពេលកន្លងមកនេះ ថាខ្លួនមិនត្រូវបានជូនដំណឹងថាដីរបស់ពួកគេដែលកំពុងរស់នៅនេះ រងផលប៉ះពាល់ពីគម្រោងនេះទេ។
អ្នកស្រី ង៉ូវ សំណាង វ័យ ៣១ឆ្នាំមកពីភូមិអាចម៌កុក ឃុំកំពង់សំណាញ់ ឲ្យដឹងថាពួកអ្នកស្រីចង់បានការពន្យល់ពីអាជ្ញាធរខេត្ត ព្រោះថាបុគ្គលិកខាងព្រលានយន្តហោះបានប្រាប់ឲ្យពួកគេចាកចេញពីដីកំពុងរស់នៅសព្វថ្ងៃ។
អ្នកស្រីបន្ថែមថា៖ «ខ្ញុំមានការបារម្ភអំពីការបណ្ដេញចេញ ដោយសារតែពួកគេបានបាញ់ថ្នាំលើជញ្ជាំងផ្ទះប្រជាពលរដ្ឋ ហើយសន្តិសុខព្រលានយន្តហោះដើរល្បាតពេលយប់ ធ្វើឲ្យពួកយើងភ័យខ្លាច»។
អ្នកសារព័ត៌មានខេមបូចា បានចុះទៅដល់ទីតាំងកាលពីថ្ងៃអង្គារ និងបានឃើញមានការបាញ់ថ្នាំនៅតាមផ្ទះធ្វើពីឈើ និង ស័ង្កសី ប្រហែល៩០ភាគរយ ដែលផ្ទះទាំងនោះត្រូវបានសាងសង់អមសងខាងប្រឡាយ ដែលគេស្គាល់ថា ទំបន់ «៩៤» ដែលមានចម្ងាយប្រហែលប្រាំគីឡូម៉ែត្រពីទីតាំងព្រលានយន្តហោះថ្មី។
អ្នកស្រី សេង សុខរី វ័យ៣៩ឆ្នាំ ដែលថាបានរស់នៅទីតាំងនេះជាង២០ឆ្នាំមកហើយនោះ ប្រាប់ខេមបូចា ថា កម្មករព្រលានដែលបានមកបាញ់ថ្នាំទាំងនោះមិនបានប្រាប់អ្វីទាំងអស់ពេលមកបាញ់ថ្នាំតាមផ្ទះប្រជាពលរដ្ឋ។
អ្នកស្រីបន្ថែមថា៖ «ខ្ញុំគិតថាព្រលានយន្តហោះគឺនៅឆ្ងាយពីទីនេះ ហើយមិនមានអ្វីត្រូវប៉ះពាល់ជាមួយខ្ញុំទេ ប៉ុន្តែឥឡូវពួកគេមកប្រាប់ឲ្យយើងចាកចេញ»។ អ្នកស្រីបន្តថា៖ «គេប្រាប់ឲ្យខ្ញុំរើចេញទៅកន្លែងផ្សេង ប៉ុន្តែគេមិនបានប្រាប់ថាត្រូវទៅទីណានោះទេ។ ខ្ញុំមិនចង់ចាកចេញទៅកន្លែងផ្សេងទេ នៅទីនេះខ្ញុំអាចរកត្រីដើម្បីចិញ្ចឹមជីវិត។ ខ្ញុំបានសួរពួកគេពីរឿងនេះដែរ តែពួកគេថាក៏មិនដឹងដូចគ្នា»។
អ្នកស្រីថា អ្នកស្រីបារម្ភថាបើត្រូវរើចេញមែន ពួកអ្នកស្រីនឹងត្រូវឲ្យទៅរស់នៅកន្លែងដែលមានទីតាំងមិនល្អ និងគ្មានហេដ្ឋរចនាសម្ព័ន្ធគ្រប់គ្រាន់ដូចទីតាំងបច្ចុប្បន្ន ដូចដែលករណីកន្លងមកមានកើតច្រើនហើយនៅក្នុងប្រទេស។
អ្នកស្រីលើកឡើងថា៖ «ខ្ញុំបារម្ភអំពីទីតាំងដែលពួកខ្ញុំត្រូវផ្លាស់ទៅហ្នឹង»។
សម្រាប់អភិបាលរងខេត្តកណ្ដាល លោក នូវប៉េង ច័ន្ទតារា ដែលបានជួបជាមួយប្រជាពលរដ្ឋ បានប្រាប់ខេមបូចា ថា អាជ្ញាធរគ្មានគម្រោងបណ្ដេញប្រជាពលរដ្ឋចេញពីទីតាំងដែលពួកគាត់កំពុងរស់នៅនោះទេ ដោយថាអាជ្ញាធរគ្រាន់តែចង់ដឹងពីចំនួនប្រជាពលរដ្ឋជាក់លាក់ដែលកំពុងរស់នៅលើទីតាំងនោះតែប៉ុណ្ណោះ។
លោកបន្ថែមថា៖ «វាអាក្រក់ស្តាប់ណាស់ក្នុងការនិយាយនូវពាក្យបណ្ដេញចេញ រដ្ឋាភិបាលមិនដែលបណ្ដេញប្រជាពលរដ្ឋដូចក្នុងរបបខ្មែរក្រហមនោះទេ»។ លោកថា៖ «ពួកគាត់រស់នៅលើដីសាធារណៈរបស់រដ្ឋ ដូចនេះយើងគ្រាន់តែធ្វើស្ថិតិឲ្យបានច្បាស់ដើម្បីងាយស្រួលគ្រប់គ្រង»។
លោកអះអាងថាការបាញ់ថ្នាំនោះមិនជាប់ពាក់ព័ន្ធនឹងគម្រោងព្រលានយន្តហោះថ្មីទេ ប៉ុន្តែលោកថាអាជ្ញាធរក៏គ្មានគម្រោងចេញប្លង់កម្មសិទ្ធិឲ្យអ្នករស់នៅទីនោះដូចគ្នា។
ព្រលានយន្តហោះថ្មីគ្របដណ្ដប់លើផ្ទៃដី ២ ៦០០ហិកតា មានផលប៉ះពាល់ប្រជាពលរដ្ឋរាប់ពាន់គ្រួសារក្នុងស្រុកកណ្ដាលស្ទឹង ក្រុងតាខ្មៅ ខេត្តកណ្ដាល និងស្រុកបាទី ខេត្តតាកែវ។
ប្រជាពលរដ្ឋរាប់ពាន់គ្រួសារដែលមានដីស្រែ និងផ្ទះរងផលប៉ះពាល់បានបដិសេធទទួលសំណងជាប្រាក់ ៨ដុល្លារក្នុងមួយម៉ែត្រការ៉េ ដែលក្រុមហ៊ុនផ្ដល់ឲ្យ ទោះបីជាដីរបស់ពួកគេត្រូវបានឈូសឆាយហើយក៏ដោយ។
ជម្លោះដែលបន្តអូសបន្លាយនេះ បានធ្វើឲ្យប្រជាពលរដ្ឋប្រាំបួននាក់ត្រូវបានចោទប្រកាន់ពីបទអំពើហិង្សាដោយចេទនា រំខានកិច្ចការមន្ត្រីសាធារណៈ និងញុះញង់ឲ្យប្រព្រឹត្តបទឧក្រិដ្ឋ បន្ទាប់ពីអ្នកទាំងនោះបានចូលរួមតវ៉ាប្រឆាំងនឹងការអភិវឌ្ឍ។ តុលាការខេត្តកណ្ដាល កាលពីខែវិច្ឆិកា បានរកឃើញថាអ្នកទាំងនោះគ្មានកំហុស។
មន្ត្រីឃ្លាំមើលសិទ្ធិមនុស្សជាន់ខ្ពស់របស់សមាគមអាដហុក លោក យី សុខសាន្ត មានប្រសាសន៍អាជ្ញាធរមូលដ្ឋានគួរតែឆ្លើយតបទៅនឹងការទាមទាររបស់ប្រជាពលរដ្ឋឲ្យបានសមរម្យ ពេលដែលប្រជាពលរដ្ឋរងផលប៉ះពាល់ពីការអភិវឌ្ឍ។
លោកបន្ថែមថា៖ «រដ្ឋាភិបាលត្រូវតែធ្វើឲ្យប្រាកដថាមានការអភិវឌ្ឍហេដ្ឋារចនាសម្ព័ន្ធ ដូចជាផ្លូវ ស្ពាន មន្ទីរពេទ្យ សាលារៀន ពេលពួកគាត់ទៅនៅទីតាំងថ្មី»៕
ប្រែសម្រួលពីអត្ថបទភាសាអង់គ្លេស៖ Families Seek Clarity After Displacement Rumors Related to the Kandal Stung Mega-Airport Project
