ប្រជាពលរដ្ឋ១២គ្រួសាររស់នៅជិតប្រឡាយបឹងត្របែកក្នុងសង្កាត់ផ្សារដើមថ្កូវ ខណ្ឌចំការមន អះអាងថាសំណងដែលផ្ដល់ជូនពួកគាត់មានចំនួនតិចតួចចន្លោះពី ១ ០០០ ដុល្លារទៅ ៣ ០០០ ដុល្លារ និងបានទាមទារឲ្យមានការការផ្ដល់សំណងសមរម្យ ឬអាចរកទីតាំងថ្មីសម្រាប់រស់នៅ។ អាជ្ញាធរខណ្ឌ កាលពីថ្ងៃទី១៣ ខែមិថុនា បានប្រកាសឲ្យអ្នកទាំងនេះរើផ្ទះចេញនៅត្រឹមថ្ងៃទី២២ ខែមិថុនា។
គម្រោងរំដោះទឹកជំនន់នេះ រួមមានការសាងសង់ប្រព័ន្ធលូ និងប្រព័ន្ធរំដោះទឹក កំពុងដំណើរការសាងសង់នៅក្នុងតំបន់របស់អ្នកភូមិទាំងនោះ ក្នុងន័យធ្វើឲ្យប្រព័ន្ធរំដោះទឹកក្នុងទីក្រុងកាន់តែល្អប្រសើរ។ រដ្ឋបាលរាជធានីភ្នំពេញបានចុះវាស់វែងផ្ទះអ្នកភូមិ និងបានអញ្ជើញអ្នកភូមិប្រជុំពិភាក្សាអំពីសំណងកាលពីខែមេសា ឆ្នាំ២០២៤។
នៅពេលនោះ អាជ្ញាធរបានផ្ដល់សំណងទៅតាមទំហំផ្ទះចន្លោះពី ១ ០០០ដុល្លារទៅ ៣ ០០០ដុល្លារសម្រាប់ផ្ទះតូចៗ និងផ្ទះធំទទួលបានសំណង ៦ ០០០ដុល្លារ។
បើតាមរដ្ឋបាលរាជធានីភ្នំពេញ ប្រជាពលរដ្ឋរស់នៅតាមបណ្ដោយប្រឡាយបឹងត្របែកចំនួន១៣១គ្រួសាររងផលប៉ះពាល់ពីគម្រោងអភិវឌ្ឍន៍នេះ ហើយដំណោះស្រាយរឿងសំណងបានធ្វើរួចរាល់កាលពីខែសីហា ឆ្នាំ២០២៤។ រដ្ឋបាលរាជធានីភ្នំពេញឲ្យដឹងទៀតថាអ្នកភូមិបានយល់ព្រមទទួលសំណងពីក្រសួងសេដ្ឋកិច្ច ជាថ្នូរនឹងការរើចេញ «ដោយស្ម័គ្រចិត្ត» ដើម្បីជៀសវាងផលប៉ះពាល់ដល់គម្រោង។
អ្នកស្រី នូ ហឹម វ័យ៤៧ឆ្នាំ ជាអ្នកលក់ដំឡូង និងបានរស់នៅទីនោះជាង២០ឆ្នាំមកហើយបានលើកឡើងថាអ្នកស្រីមានសៀវភៅស្នាក់នៅ សៀវភៅគ្រួសារ បណ្ណបោះឆ្នោត និងអត្តសញ្ញាណបណ្ណ ប៉ុន្តែថាមិនមានប្លង់កម្មសិទ្ធិដីធ្លីនោះទេ។
អ្នកស្រីមិនបានយល់ព្រមទទួលសំណង ១ ៥០០ដុល្លារពីអាជ្ញាធរខណ្ឌចំការមននោះទេ ដោយថាវាមិនគ្រប់គ្រាន់សម្រាប់សង់ផ្ទះថ្មី។ អ្នកស្រីឆ្ងល់ថាហេតុអ្វីអាជ្ញាធរមិនពិចារណាផ្ដល់ជម្រើស និងដំណោះស្រាយល្អជាងនេះដល់ប្រជាពលរដ្ឋក្រីក្រដែល «គ្រាន់តែស្នើឲ្យផ្ដល់ជម្រកសមរម្យនៅក្បែរទីក្រុង»។
អ្នកស្រីប្រាប់ សារព័ត៌មានខេមបូចា ថា អ្នកស្រីមិនជំទាស់នឹងការអភិវឌ្ឍនោះទេ ប៉ុន្តែស្នើសុំឲ្យមានសំណងសមរម្យ។ អ្នកស្រីបន្តថា៖ «សំណងតិចតួចណាស់។ ខ្ញុំមិនអាចទទួលយកបានទេ។ ការបណ្ដេញចេញវាអាក្រក់ណាស់។ យើងមិនបានបញ្ឈប់ការអភិវឌ្ឍទេ។ យើងនឹងចាកចេញពីទីនេះ ប៉ុន្តែស្នើសុំដីសម្រាប់រស់នៅឲ្យបានសមរម្យ»។
អ្នកស្រីបន្តថា បើសិនជាមានការបណ្ដេញចេញនៅសប្ដាហ៍នេះមែនវាពិតជារឿងអាក្រក់ណាស់ ព្រោះថាសំណងមិនគ្រាន់នឹងទិញ «សូម្បីដីមួយម៉ែត្រការ៉េផង»។ អ្នកស្រីជំរុញឲ្យរដ្ឋាភិបាលពិចារណាលើយន្តការផ្ដល់សំណងដល់ប្រជាពលរដ្ឋដែលបានរស់នៅទីតាំងនោះយូរឆ្នាំ។
អ្នកស្រីបន្ថែមថា៖ «នៅពេលនេះ ខ្ញុំមិនចាំបាច់ជួលបន្ទប់ទេ ព្រោះខ្ញុំមានកូនផ្ទះមួយ។ ចំណូលដែលខ្ញុំរកបានគ្រាន់តែចាយមួយថ្ងៃទៅមួយថ្ងៃ។ ដូចនេះ បើសិនជាគ្មានជម្រក ជីវិតខ្ញុំនឹងកាន់តែវេទនា»។
អ្នកភូមិម្នាក់ទៀត គឺអ្នកស្រី ឃឹម ពៅ វ័យ៥៨ឆ្នាំ ជាអ្នករើសអេតចាយ បានឲ្យដឹងថា អ្នកស្រីមិនមានប្លង់កម្មសិទ្ធិលើដីកំពុងរស់នៅនោះទេ បើទោះបីជាអ្នកស្រីបានរស់នៅតាំងពីឆ្នាំ១៩៩៣។ អ្នកស្រីបានទទួលសំណង ១ ២០០ដុល្លារនៅពេលគម្រោងពង្រីកប្រឡាយនេះបានចាប់ផ្ដើម។ អ្នកស្រីថាសំណងនេះមិនគ្រប់គ្រាន់សម្រាប់ទិញដី និងសង់ផ្ទះថ្មីសម្រាប់អ្នកស្រី និងកូនៗទាំងប្រាំពីរនាក់នោះទេ។
អ្នកស្រីឲ្យដឹងថា ប្រជាពលរដ្ឋដែលរងផលប៉ះពាល់បានស្នើឲ្យអាជ្ញាធរជួយដោះស្រាយជាច្រើនដង ប៉ុន្តែអាជ្ញាធរនៅតែជ្រើសរើស«វិធីដដែល» មិនពិចារណាលើសុខុមាលភាពអ្នកភូមិនោះទេ។
អ្នកស្រីបន្តថា៖ «សំណង ១ ២០០ដុល្លារមិនគ្រាន់នឹងទិញដីមួយម៉ែត្រផង ប៉ុន្តែអាជ្ញាធរនៅតែផ្ដល់ចំនួននេះដល់ប្រជាពលរដ្ឋ។ យើងបានដាក់លិខិតទៅច្រើនកន្លែង គ្មានខាងណាឆ្លើយតបទេ»។
អ្នកស្រីលើកឡើងថា ជីវិតអ្នកស្រីនឹងកាន់តែវេទនា ព្រោះតែគ្មានផ្ទះសម្បែង បើសិនជាអាជ្ញាធររុះរើផ្ទះដែលកំពុងរស់នៅនេះមែន។ អ្នកស្រីចោទជាសំណួរថាហេតុអ្វីអាជ្ញាធរមិនអើពើនឹងការទាមទាររបស់ប្រជាពលរដ្ឋ ព្រោះអីអ្នកទាំងនោះជាខ្មែរដូចគ្នា។ ជីវិត «ជួបការលំបាកខ្លាំង» ស្រេចទៅហើយ សម្រាប់អ្នកស្រី ដូចនេះបើសិនជាមានការបណ្ដេញចេញ និងផ្ដល់សំណងតិចតួចទៀត នោះនឹងប៉ះពាល់ខ្លះដល់អនាគតកូនៗរបស់អ្នកស្រី។
អ្នកស្រីបន្តថា៖ «បើសិនជាខ្ញុំបាត់បង់ផ្ទះ ខ្ញុំប្រហែលជាត្រូវរស់នៅតាមផ្លូវ។ ខ្ញុំចង់ឲ្យអាជ្ញាធរផ្ដល់ដីមួយដុំគ្រាន់យើងអាចសង់ផ្ទះថ្មីបាន»។
ក្នុងសេចក្ដីជូនដំណឹងកាលពីថ្ងៃទី១៣ ខែមិថុនា អាជ្ញាធរខណ្ឌចំការមនបានលើកឡើងថាប្រជាពលរដ្ឋទាំង១២គ្រួសារដែលរងផលប៉ះពាល់ពីគម្រោងពង្រីកប្រព័ន្ធរំដោះទឹកជំនន់នៅក្នុងសង្កាត់ផ្សារដើមថ្កូវមិនយល់ព្រមទទួលសំណងនោះទេ។
តាមរយៈលិខិតដដែល អាជ្ញាធរបានបញ្ជាឲ្យអ្នកទាំងនោះរើផ្ទះនៅត្រឹមថ្ងៃទី២២ ខែមិថុនា ឆ្នាំ២០២៥ ហើយផុតពីនោះ អាជ្ញាធរនឹងចាប់ផ្ដើមរុះរើសម្អាត និងមិនទទួលខុសត្រូវលើការខូចខាតទ្រព្យសម្បត្តិនោះទេ។ យ៉ាងណាលិខិតបញ្ជាក់ទៀតថា ប្រជាពលរដ្ឋអាចដាក់បណ្ដឹងទៅតុលាការបើទោះជាពួកគេបានទទួលសំណង ឬគម្រោងបានបញ្ចប់ហើយក៏ដោយ។
អ្នកនាំពាក្យសាលារាជធានីភ្នំពេញ អ្នកស្រី ដោរ សម្ផស្ស និងអភិបាលខណ្ឌចំការមន លោក គៀង ល័ក្ស បានចុចបិទទូរសព្ទពេលអ្នកសារព័ត៌មានខេមបូចាទាក់ទងទៅ។
លោក ស៊ាង មួយឡៃ ប្រធានកម្មវិធីនៃសមាគមធាងត្នោត បានប្រាប់ សារព័ត៌មានខេមបូចា ថា «ការបណ្ដេញចេញដោយបង្ខំ មិនមែនជាជម្រើសល្អទេ»។ លោកថាបញ្ហានៅបឹងត្របែកគឺមិនពិបាកដោះស្រាយនោះទេ អាជ្ញាធរអាចបង្កើនថ្លៃសំណង ដូចជាដល់ ១ម៉ឺនដុល្លារក្នុងមួយគ្រួសារ ឬផ្ដល់ដីមួយកន្លែងនៅក្បែរ ឬក្នុងខណ្ឌច្បារអំពៅ ក្រោយវត្តជំពោះក្អែក ដែលជាកន្លែងអាជ្ញាធរក្រុងត្រៀមសម្រាប់ផ្ដល់ជូនប្រជាពលរដ្ឋផ្សេងទៀត។
លោកពន្យល់ថា រដ្ឋនៅមានដី «សល់» ជាច្រើនកន្លែង ហើយកន្លែងខ្លះបានផ្ដល់ទៅឲ្យឧកញ៉ាមួយចំនួននាពេលកន្លងមក។ ជាការពិត «ដីជាង១៧ហិកតាបានផ្ដល់ទៅឲ្យក្រុមហ៊ុន និងក្រុមគ្រួសារមួយចំនួននាពេលកន្លងមក»។ លោកបន្តថា៖ «ដូចនេះ ហេតុអ្វីរដ្ឋមិនអាចចែកដី៤០ម៉ែត្រការ៉េដល់ពលរដ្ឋ? ហេតុអ្វីរដ្ឋមិនអាចផ្ដល់ដីដល់ប្រជាពលរដ្ឋសាមញ្ញ បើសិនជាអាជ្ញាធរបានគិតគូរល្អិតល្អន់មែន»។
លោកបន្ថែមថា៖ «ខ្ញុំគិតថាអាជ្ញាធរ ក្នុងនាមជាអ្នកផ្ដល់សេវាល្អ គួរតែបន្ទន់ឥរិយាបទបន្តិចពិភាក្សាបញ្ហានេះជាមួយប្រជាពលរដ្ឋ ដូចនេះគ្រប់ភាគីអាចទទួលយកបាន»។
ការបណ្ដេញប្រជាពលរដ្ឋចេញពីលំនៅឋានក្រោមលេសថាបានផ្ដល់សំណងគឺ «មិនត្រឹមត្រូវទេ» ព្រោះថាអ្នកទាំងនោះក៏ជាប្រជាជនខ្មែរដែរ។ លោកបន្ថែមថា៖ «ពួកគាត់មានសិទ្ធិ និងអាចទទួលបានការកាពារពីរដ្ឋ។ ពួកគាត់ត្រូវការជ្រើសរើសកន្លែងមួយដែលពួកគាត់ និងកូនៗអាចធ្វើការ និងរៀនសូត្របាន»៕
ប្រែសម្រួលពីអត្ថបទភាសាអង់គ្លេស៖ Boeung Trabek Residents Face Eviction as June 22 Deadline Looms
