សមាគមសម្ព័ន្ធអ្នកសារព័ត៌មានកម្ពុជា

ប្រជាពលរដ្ឋរាប់រយនាក់ចូលរួម «វេទិកាមហាជន» មុនកិច្ចប្រជុំកំពូលអាស៊ានចូលមកដល់

ប្រជាពលរដ្ឋរាប់រយនាក់បានប្រមូលផ្ដុំគ្នានៅទីលានប្រជាធិបតេយ្យកាលពីថ្ងៃទី៣ ខែវិច្ឆិកា ឆ្នាំ២០២២ ដើម្បីទាមទាររកដំណោះស្រាយលើបញ្ហាជម្លោះដីធ្លី និងលើកឡើងពីកង្វល់ផ្សេងៗទាក់ទងនឹងបញ្ហាសិទ្ធិមនុស្សមុនកិច្ចប្រជុំកំពូលអាស៊ាននៅភ្នំពេញចាប់ផ្ដើម។ ខេមបូចា/ ព្រីង សំរាំង
ប្រជាពលរដ្ឋរាប់រយនាក់បានប្រមូលផ្ដុំគ្នានៅទីលានប្រជាធិបតេយ្យកាលពីថ្ងៃទី៣ ខែវិច្ឆិកា ឆ្នាំ២០២២ ដើម្បីទាមទាររកដំណោះស្រាយលើបញ្ហាជម្លោះដីធ្លី និងលើកឡើងពីកង្វល់ផ្សេងៗទាក់ទងនឹងបញ្ហាសិទ្ធិមនុស្សមុនកិច្ចប្រជុំកំពូលអាស៊ាននៅភ្នំពេញចាប់ផ្ដើម។ ខេមបូចា/ ព្រីង សំរាំង

សកម្ម​ជន​សហគមន៍​រងគ្រោះប្រមាណ​៩០០​នាក់ មាន​ទាំង​អ្នក​ធ្វើ​ការ​ក្នុង​វិស័យ​សេដ្ឋកិច្ច​ក្រៅ​ប្រព័ន្ធ និង​អ្នក​ផ្សេង​ទៀត​បាន​ប្រមូល​ផ្ដុំ​គ្នា​ក្នុង​ទីក្រុង​ភ្នំពេញ​កាលពី​ថ្ងៃ​ព្រហស្បតិ៍ ក្នុង​វេទិកា​សាធារណៈ​មួយ ​ដែល​​អ្នក​រៀប​ចំអះអាងថា ​ជា​ចេតនា​ក្នុង​ការ​បញ្ជូន​សារ​ទៅ​កាន់​ប្រមុខ​រដ្ឋាភិបាល​កម្ពុជា និង​មេដឹក​នាំ​ប្រទេស​អាស៊ាន​ផ្សេង​ទៀត មុន​កិច្ច​ប្រជុំ​កំពូល​នៅ​ទីក្រុង​ភ្នំពេញ​​ចាប់​ផ្ដើមនៅសប្តាហ៍ក្រោយ​។​

ក្រោម​ឈ្មោះ​ថា «​សន្និបាត​មហាជន​» គឺ​រៀប​ចំឡើង​ដើម្បី​លើក​ពី​ការ​បំពាន​សិទ្ធិ​មនុស្ស និង​ភាព​តាន​តឹង​ផ្នែក​នយោបាយ។ ជន​រង​គ្រោះ​ដោយ​បញ្ហា​ដី​ធ្លី សកម្មជន​បរិស្ថាន  កសិករ កម្មកររោងចក្រ អ្នក​បម្រើ​សេវាផ្លូវភេទ និង​អ្នកធ្វើ​ការ​ក្នុង​វិស័យ​សេដ្ឋកិច្ច​ក្រៅប្រព័ន្ធ រួម​នឹង​អ្នក​ផ្សេង​ទៀត មកពី​២០​ខេត្ត​ បាន​ប្រមូល​ផ្ដុំ​គ្នា​នៅ​ទី​លាន​ប្រ​ជាធិបតេយ្យ ដើម្បី​ជំរុញ​ឲ្យ​រាជរដ្ឋាភិបាល​ដោះ​ស្រាយ​បញ្ហា​ជម្លោះ​ដី​​ធ្លី​រ៉ាំរ៉ៃ និង​យក​ចិត្ត​ទុក​ដាក់​លើ​បញ្ហា​រំលោភ​សិទ្ធិ​មនុស្ស។ នេះ​បើ​តាម​ការ​លើក​ឡើង​របស់​អ្នក​រៀប​ចំ និង​អ្នក​ចូល​រួម​។​

អ្នក​ចូល​រួមវេទិកា លោក ចាន់ យឿត វ័យ​ ៥៣​ឆ្នាំ មក​​ពី​ខេត្ត​បាត់​ដំបង​ លើក​ឡើង​ថា លោក​មាន​ជម្លោះ​ដី​ធ្លីជិត​២០​ឆ្នាំ​មក​ហើយ ដែល​មាន​ប្រ​ជា​ពល​រដ្ឋ​ពាក់​ព័ន្ធ​ចំនួន​ ១៦​គ្រួសារ ដែល​កំពុង​ជម្នះ​ក្នុង​ការ​​ទាម​ទារ​​ដី​កសិកម្ម​របស់​ពួកកេនៅ​ក្នុងឃុំ​ខ្នាច​រមាស​។​

លោក​បន្តថា៖ «​យើង​បាន​តវ៉ា​តាំងពី​ឆ្នាំ​២០០២ ប៉ុន្តែ​មិន​មាន​ដំណោះ​ស្រាយ​ពី​អាជ្ញាធរទាំង​ខេត្ត និង​ថ្នាក់​ជាតិ​នោះទេ។ ខ្ញុំ​បាន​ស្វែង​រក​កិច្ច​អន្តរាគមន៍​ពី​គ្រប់​ស្ថាប័ន​រដ្ឋ ប៉ុន្តែ​នៅ​តែ​មិន​មាន​ដំណោះ​ស្រាយ​»។ លោក​បន្ថែម​ថា លោក​មក​ចូល​រួម​ជាមួយ​អ្នក​មាន​ជម្លោះ​ដី​ធ្លី​ផ្សេង​ទៀត​នៅ​ភ្នំពេញ​ដើម្បី​បង្ហាញ​ពី​កង្វល់ និង​ស្វែងរក​ការគាំទ្រពីមន្ត្រីជាន់​ខ្ពស់​រដ្ឋាភិបាល​។​

លោក​បន្ត​​ថា៖ «យើង​ក៏​ចង់​ផ្ញើសារទៅ​កាន់​មេដឹក​នាំ​ប្រទេស​អាស៊ាន​ផ្សេង​ទៀត​អំពី​បញ្ហា​របស់​យើង និង​ស្ថាន​ទូតនានា​ផ្សេង​ទៀត​ប្រចាំ​នៅ​កម្ពុជា ដើម្បី​ជំរុញ​ឲ្យ​រដ្ឋាភិបាល​យក​ចិត្ត​ទុក​ដាក់​ពី​បញ្ហា​របស់​ប្រ​ជា​ពល​រដ្ឋ»។​

លោក ហន់ រ៉ាវុធ មក​ពីឃុំរ៉ុន​តាឯក ​ខេត្ត​សៀម​រាប ឲ្យ​ដឹង​ដែរ​ថា ប្រជា​ពល​រដ្ឋ​ក្នុង​ភូមិ​តានី បាន​បាត់​បង់​ដីស្រែ​ ១៨​ឆ្នាំ​មក​ហើយ​។ លោក​បន្ត​ថា លោក​ផ្ទាល់​បាន​បាត់​ចំនួន​ ២​ហិកតា បន្ទាប់​ពី​រដ្ឋាភិបាល​បាន​កាត់​ចេញដីស្រែរបស់​គាត់ជិត​២០ឆ្នាំ​មក​ហើយ ដើម្បី​ត្រៀម​ទុក​បែង​​ចែក​ទៅ​ឲ្យ​ប្រ​ជាពល​រដ្ឋ​ ដែល​​ផ្លាស់​ពីស្ទឹងសៀម​រាប និង​ពលរដ្ឋ​ដែល​ទើប​ផ្លាស់ទីពី​​តំបន់​អង្គរ​នាពេល​បច្ចុប្បនេះ។​

លោក​បន្ថែម​ថា៖ «​យើង​ទាមទារ​ឲ្យ​រដ្ឋាភិបាល ដែល​ជា​ប្រធាន​អាស៊ាន គួរ​តែ​យក​ចិត្ត​ទុក​ដាក់​លើ​បញ្ហា​របស់​ពួក​យើង។ យើង​ចង់​លើក​​បញ្ហា​ឲ្យ​អាស៊ាន​បាន​ដឹង ដើម្បី​ជួយ​ជំរុញ​រដ្ឋាភិបាល ដោះស្រាយឲ្យ​​អ្នក​រងគ្រោះ​ដោយសារការ​រំលោភបំពាន​ដី​ធ្លី​អស់​ជា​ច្រើ​ន​ឆ្នាំ​មក​ហើយ​»។​ លោក​បន្ត​ថា៖ «ខ្ញុំ​ដឹង​ថា​អាស៊ាន​ជា​សមាគម​បង្កើត​ឡើ​ង​ដើម្បី​រួម​ចំណែក​ក្នុង​ការ​គោរពសិទ្ធិ​មនុស្ស»។​

មន្ត្រី​លើក​ឡើងថា​ សៀម​រាប​ជា​ខេត្ត​មួយ​មាន​ការ​តវ៉ា​រឿង​​ដី​ធ្លី​ច្រើន​នាពេល​ថ្មីៗ​នេះ ព្រោះ​ថា​ប្រ​ជា​ពល​រដ្ឋ​ជា​ច្រើន​ត្រូវ​គេ​តម្រូវ​ឲ្យ​ផ្លាស់ទី​លំនៅ​ចេញ​ពី​តំបន់​អភិរក្ស​យូណេស្កូ។ កាលពីខែ​មុន ប្រជា​ពល​រដ្ឋ​បាន​ប្រមូល​ផ្ដុំ​តវ៉ា​នៅមុខ​សាលាឃុំ​ពាក់ស្នែង ក្នុង​ស្រុក​អង្គរធំ ខេត្ត​សៀម​រាប​ ដើម្បី​ស្វែង​រក​ការ​ឆ្លើយ​តប​ពីអាជ្ញាធរ​​ទាក់ទង​នឹង​ការ​បោះបង្គោល​នៅ​លើ​ដី​ស្រែប្រជា​ពល​រដ្ឋ​ដោយ​គ្មាន​ការ​ផ្ដល់​មូល​ហេតុ​ច្បាស់លាស់​។​​

តំណាង​អ្នក​រៀប​ចំ​វេទិកា  លោក ហេង សុជាតិ មាន​ប្រសាសន៍​ថា ប្រជា​សហគមន៍​ដែល​​រងគ្រោះពី​​ការ​រំលោភ​សិទ្ធិ និង​ការ​រំលោភ​ដី​ធ្លី បាន​មើល​ឃើញ​ពី​ឱកាស​មុន​កិច្ច​ប្រជុំ​កំពូល​អាស៊ា​ន​ថា​អាច ​ជួយ​បំពង​សំឡេង​របស់​ពួកគាត់​បាន​។​

លោក​បន្ត​ថា៖ «​កម្ពុជា​ជាសមាជិក​អាស៊ាន ហើយ​មាន​ទំនាក់​ទំនង​ផ្នែក​ពាណិជ្ជកម្ម និង​ជំនួញជាមួយប្រទេសក្នុងតំបន់ ដែល​យើង​ចង់បង្ហាញ​បញ្ហាទាំងនោះទៅមេដឹកនាំ​អាស៊ានបាន​ឮ»។​

លោក​ សុជាតិ បន្ត​ថា​ការ​ជួប​ជុំ​នេះ​រួម​មាន​ទាំង​ជនជាតិ​ដើម​​ភាគតិច ដែល​កំពុង​ទាម​ទារ​ឲ្យ​មាន​ការ​ចុះ​បញ្ជី​ដី​ធ្លីសហគមន៍ និង​កិច្ច​ការ​ពារ​ធនធាន​ធម្មជាតិ ពិសេសព្រៃ​ឈើ​ផង​ដែរ។​​

លោក​អះអាង​ថា៖ «​នេះ​គឺជា​ការ​អនុវត្ត​សិទ្ធិ​របស់​ប្រ​ជា​ពល​រដ្ឋ ក្នុង​​ការ​ទាមទារ​រក​ដំណោះ​ស្រាយ»។​

តំណាង​ក្រ​សួង​មហាផ្ទៃ និង​រដ្ឋបាល​រាជធានី​ភ្នំពេញ បាន​ទទួល​ញត្តិ​របស់​អ្នក​ចូល​រួម និង​បាន​សន្យាថា​នឹង​បញ្ជូន​ញ្ញតិ​នេះ​ទៅ​កាន់​ថ្នាក់​ដឹក​នាំ​កំពូល​។

អ្នកស្រី ដេត ហួរ ដែល​អ្នក​មាន​ជម្លោះដី​ធ្លី​មកពីឃុំជីខលើ ខេត្ត​កោះ​កុង លើក​ឡើង​ថាប្រជាពល​រដ្ឋ​ ១៩៧​គ្រួសារ​បាន​បាត់​បង់​ដី​ធ្លី​ជាង​១០​ឆ្នាំ​មក​ហើយ និង​នៅ​តែបន្ត​ស្វែង​រក​ដំណោះ​ស្រាយ​សមស្រប​មួយ​។ អ្នកស្រី​ឲ្យ​ដឹង​ដែរថា មាន​សមាជិក​សហគមន៍​ចំនួន​៩នាក់ ​កំពុងជាប់​បណ្តឹង​នៅតុលាការ​​ពី​បទ​បរិហាកេរ្តិ៍ និង​ញុះញង់ ទាក់ទង​នឹង​បញ្ហាជម្លោះ​ដី​ធ្លី​នេះ​។​

អ្នកស្រី​បន្ត​ថា៖ «តាំងពី​បាត់​បង់​ដី​​មក ប្ដីរបស់​ខ្ញុំ​ធ្លាក់​ខ្លួន​ឈឺ ហើយ​ខ្ញុំ​មិន​ដែល​បាន​ទទួលបាន​ការ​គាំពារ​សង្គម​ណា​មួយ​ទេ ហើយ​ឥឡូវ​នេះ​ខ្ញុំ​គ្មាន​ដី​ធ្វើ​ស្រែចម្ការ​ទេ ហើយ​ក៏​គ្មានស្បៀង​​ហូប​គ្រប់​គ្រាន់​ដែរ​។ យើង​ក៏​ជំពាក់​បំណុលធនាគារ​ទៀត…​យើង​ចង់​ផ្ញើ​សារទៅ​កាន់​ថ្នាក់​ដឹក​នាំ​ទាំងអស់​ឲ្យ​ជួយ​ពួក​យើង»

146 views

ព័ត៌មានទាក់ទង

ព័ត៌មានថ្មីៗ

អត្ថបទពេញនិយម