កម្ពុជាមិនទាន់ទទួលបានសំណើសុំកិច្ចសហការពីប្រទេសថៃ ដើម្បីស៊ើបអង្កេតជនសង្ស័យទី២ ជាជនជាតិខ្មែរនៅឡើយទេ បន្ទាប់ពីការធ្វើឃាតអតីតសមាជិកសភាកម្ពុជា លោក លិម គិមយ៉ា ដែលជនសង្ស័យជនជាតិថៃ ឈ្មោះ Ekkalak Pheanoim បានសារភាពហើយ។
ទោះយ៉ាងណា លោក Pheanoim ដែលជាអតីតទាហានជើងទឹកថៃបានបដិសេធមិនបង្ហាញពី «មេខ្លោង» ដែលបញ្ជាឲ្យមានការបាញ់សម្លាប់លោក គិមយ៉ា នោះទេ ដោយលោកបារម្ភពីសុវត្ថិភាពក្រុមគ្រួសារបន្ទាប់ពីត្រូវបានបញ្ជូនពីប្រទេសកម្ពុជាវិញ។
លោក Pheanoim ត្រូវបានចាប់ខ្លួននៅកម្ពុជាកាលពីថ្ងៃទី៨ ខែមករា បន្ទាប់ពីបានគេចខ្លួនពីប្រទេសថៃ ក្រោយបាញ់សម្លាប់លោក គិមយ៉ា នៅទីក្រុងបាងកក កាលពីថ្ងៃទី៧ ខែមករា។
អាជ្ញាធរថៃបានចេញដីកាចាប់ខ្លួនជនសង្ស័យទី២ ដែលគេជឿថាបានធ្វើជាអ្នកប្រាប់តម្រុយក្នុងអំពើឃាតកម្មនេះ។ ប៉ុន្តែរហូតមកដល់ពេលនេះ កម្ពុជាមិនទាន់ទទួលបានសំណើសុំកិច្ចសហការទាក់ទងនឹងជនសង្ស័យកម្ពុជានោះទេ។
បាងកកប៉ុស្តិ៍បានរាយការណ៍ថាបន្ទាប់ពីការចាប់ខ្លួនលោក Pheanoim ត្រូវបានបញ្ជូនទៅកាន់ប្រទេសថៃវិញនៅថ្ងៃទី១១ ខែមករា ដើម្បីសាកសួរ។
គាត់បានសារភាពថានឹងទទួលយកប្រាក់ចំនួន ៦០,០០០ បាត (ប្រហែល ១,៧០០ ដុល្លារ) សម្រាប់«ការបាញ់សម្លាប់»នេះ ដែលប្រាក់ពាក់កណ្តាលបានបញ្ជូលឱ្យលោក Pheanoim ជាមុន ហើយជនដៃដល់បានប្រើលុយនេះដើម្បីយកកាំភ្លើងដែលបញ្ចាំ។ លោកបានបង្ហើបថាដំបូងឡើយលោកបានបដិសេធការផ្តល់ជូននេះ ប៉ុន្តែក្រោយមកបានយល់ព្រមបន្ទាប់ពីទំនាក់ទំនងម្តងហើយម្តងទៀតតាមរយៈកម្មវិធីផ្ញើសារដោយបុគ្គលម្នាក់ដែលមិនបញ្ចេញឈ្មោះដែលបានផ្តល់ព័ត៌មានលម្អិតអំពីការធ្វើដំណើររបស់គិមយ៉ា និងផែនការរត់គេចខ្លួន។
ក្រោយការធ្វើឃាត សារតាមដានបាននាំគាត់ទៅកន្លែងលាក់ខ្លួនក្នុងប្រទេសកម្ពុជា។
អ្នកនាំពាក្យអគ្គស្នងការនគរបាលជាតិ លោក ឆាយ គឹមខឿន បានប្រាប់ សារព័ត៌មានខេមបូចា ថា ពួកគេមិនទាន់បានទទួលសំណើណាមួយពីអាជ្ញាធរថៃ ទាក់ទងនឹងជនសង្ស័យទី២ ក្នុងសំណុំរឿងរបស់លោក គិមយ៉ា នោះទេ។
លោកបញ្ជាក់ថា ការស៊ើបអង្កេតនឹងមិនត្រូវបានចាប់ផ្តើមក្នុងពេលដែលគ្មានភស្តុតាងជាក់លាក់នោះទេ។
លោក គឹមខឿន បានមានប្រសាសន៍ថា៖ «គ្មានអ្នកណាបើកការស៊ើបអង្កេតលើបញ្ហាដែលបានបង្ហោះតាមប្រព័ន្ធផ្សព្វផ្សាយសង្គមដោយគ្មានភស្តុតាងនោះទេ លុះត្រាតែមានព័ត៌មានច្បាស់លាស់»។ លោកបានបន្តថា៖ «យើងមិនបានទទួលសំណើណាមួយពីពួកគេ [អាជ្ញាធរថៃ]។ អាជ្ញាធរដឹងថាត្រូវធ្វើយ៉ាងណាបើមានការស្នើសុំ ហើយបើរឿងហ្នឹងប៉ះពាល់ដល់សង្គម»។
អ្នកនាំពាក្យក្រសួងមហាផ្ទៃ លោក ទូច សុខៈ បានបដិសេធមិនធ្វើអត្ថាធិប្បាយបន្ថែមទេ ដោយបញ្ជាក់ថា៖ «សម្រាប់ការស៊ើបអង្កេតផ្សេងទៀត វាអាស្រ័យលើអាជ្ញាធរថៃ»។
លោក អំ សំអាត នាយកទទួលបន្ទុកកិច្ចការទូទៅនៃអង្គការ លីកាដូ បានសង្កត់ធ្ងន់ពីតម្រូវការតម្លាភាព និងកិច្ចសហប្រតិបត្តិការរវាងប្រទេសថៃ និងកម្ពុជា។
លោកបានថ្លែងថា៖ «ដើម្បីលុបបំបាត់ការរិះគន់ ភាគីថៃត្រូវធ្វើការស៊ើបអង្កេតប្រកបដោយតម្លាភាពដើម្បីធានានូវយុត្តិធម៌។ ប្រសិនបើមានការទាក់ទងនឹងបុគ្គលដែលភៀសខ្លួនមកកម្ពុជា កម្ពុជាត្រូវសហការដោយការស៊ើបអង្កេតករណីទាំងអស់នេះ»។
ប្រទេសបារាំង រួមជាមួយនឹងអង្គការអន្តរជាតិដូចជា Human Rights Watch, ASEAN Parliamentarians for Human Rights និង Amnesty International បានថ្កោលទោសយ៉ាងខ្លាំងចំពោះការធ្វើឃាតលោក គិមយ៉ា។ ពួកគេបានអំពាវនាវឱ្យមានការស៊ើបអង្កេតភ្លាមៗ មិនលម្អៀង និងតម្លាភាព ដើម្បីឱ្យអ្នកពាក់ព័ន្ធទាំងនោះទទួលខុសត្រូវ។
បច្ចុប្បន្នសពរបស់លោក គិមយ៉ា កំពុងស្ថិតនៅក្នុងទីក្រុងបាងកក ដោយមានគម្រោងធ្វើមាតុភូមិនិវត្តន៍ទៅកាន់ប្រទេសបារាំង ដោយភរិយារបស់គាត់ជាជនជាតិបារាំងសម្រាប់ពិធីបុណ្យសព។ ទន្ទឹមនឹងនោះ គណបក្សប្រឆាំង គណបក្សកម្លាំងជាតិ សហគមន៍ខ្មែរ និងអតីតសមាជិកបក្សប្រឆាំងនៃគណបក្សសង្គ្រោះជាតិ នៅប្រទេសអូស្ត្រាលី និងសហរដ្ឋអាមេរិក បានប្រារព្ធពិធីបុណ្យសព «ប្រាំពីរថ្ងៃ» ជូនលោក គិមយ៉ា៕
ប្រែសម្រួលពីអត្ថបទភាសាអង់គ្លេស៖ Lim Kimya’s Shooter Confesses but Shields Mastermind; No Request from Thailand to Investigate Second Suspect