ផ្ទះសម្បែងប្រជាពលរដ្ឋជាង ៤០គ្រួសារនៅភូមិអូរអណ្តូង១ សង្កាត់ព្រែកប្រា ខណ្ឌច្បារអំពៅ រាជធានីភ្នំពេញ ត្រូវបានលិចលង់ជិត៤ខែមកហើយ ដោយសារជំនន់ទឹកភ្លៀង និងទឹកដែលហូរចេញពីការដ្ឋានបូមខ្សាច់ដែលចាក់បំពេញដីរបស់ឧកញ៉ា ហេង លី ប៉ុន្ដែអាជ្ញាធរអះអាងថា ខ្លួនកំពុងរកវិធីដោះស្រាយ។
ករណីទឹកលិចផ្ទះពលរដ្ឋរាប់ខែនេះ ត្រូវបានមន្រ្តីសង្គមស៊ីវិលមើលឃើញថា ជាការខ្វះខាតការទទួលខុសត្រូវរបស់អាជ្ញាធរ និងក្រុមហ៊ុនបូមខ្សាច់ចាក់បំពេញដីរបស់ឧកញ៉ា ហេង លី ដោយជំរុញឱ្យមន្រ្តីពាក់ព័ន្ធ ក៏ដូចជាក្រុមហ៊ុនប្រញាប់រកដំណោះស្រាយបញ្ហាទឹកលិចផ្ទះសម្បែងពលរដ្ឋខាងលើនេះ។
អូរអណ្ដូង១ ជាភូមិមួយក្នុងចំណោមភូមិចំនួន ៦នៃសង្កាត់ព្រែកប្រា ខណ្ឌច្បារអំពៅ។ បច្ចុប្បន្ននេះ បើគេធ្វើដំណើរតាមផ្លូវបេតុងមួយដែលហៅថាផ្លូវបេតុង ៣០ម៉ែត្រ ចូលទៅក្នុងភូមិអូរអណ្ដូង១ គឺមិនអាចឆ្លងកាត់បានទេ ដោយសារទឹកលិចផ្លូវមួយកំណាត់នោះបាត់ទៅហើយ។ ទឹកដែលកំពុងលិចនោះ មានពណ៌ខ្មៅ លាយឡំទៅដោយក្លិនស្អុយផងដែរ។ លើសពីនេះគេសង្កេតឃើញមានសម្រាមអណ្ដែតលើផ្ទៃទឹកមួយៗអមដោយកាកសំណល់ផ្សេងៗទៀត នៅពេលមានម៉ូតូខ្លះឆ្លងកាត់ម្ដងៗធ្វើឱ្យទឹករលកបែកខ្ចាយបោកបក់សម្រាមដែលកំពុងអណ្ដែតលើទឹកនោះ។
ពលរដ្ឋទាំងជាង ៤០គ្រួសារ កាលពីថ្ងៃទី ១៦ ខែវិច្ឆិកានេះបាននាំគ្នាសរសេរពាក្យបណ្ដឹងមួយដែលមានផ្ដិតស្នាមមេដាយរបស់ពួកគេ ហើយបានដាក់ទៅចៅសង្កាត់ព្រែកប្រា ខណ្ឌច្បារអំពៅ ដើម្បីស្វែងរកដំណោះស្រាយជុំវិញករណីទឹកលិចផ្ទះរបស់ពួកគេជិត ៤ខែមកហើយ។
ពាក្យបណ្ដឹងបានសរសេរថា៖ «យើងខ្ញុំជាប្រជាពលរដ្ឋរស់នៅភូមិអូរអណ្តូង១ សង្កាត់ព្រែកប្រា ខណ្ឌច្បារអំពៅ បានរងគ្រោះដោយសារទឹកជន់លិចផ្ទះសម្បែងអស់រយៈពេលជាច្រើនខែកន្លងមកហើយ ព្រោះមានក្រុមហ៊ុនបូមខ្សាច់មួយដែលបានបូមខ្សាច់ចាក់បំពេញដីបឹងរបស់លោកឧកញ៉ា ហេង លី ធ្វើឱ្យទឹកបឹងនេះហូរហៀរជន់លិចផ្ទះប្រជាពលរដ្ឋដែលរស់នៅក្បែរនោះទាំងអស់គ្នា ដោយសារគ្មានកន្លែងឱ្យទឹកហូរចេញ»។
ស្រ្តីវ័យជាង ៣០ឆ្នាំម្នាក់ឈ្មោះ រិទ្ធ រតនា ជាពលរដ្ឋរស់នៅភូមិអូរអណ្ដូង១ សង្កាត់ព្រែកប្រា ខណ្ឌច្បារអំពៅដែលកំពុងឈរមើលទឹកជន់លិចនៅខាងមុខផ្ទះរបស់ខ្លួនបាននិយាយថា ផ្ទះអ្នកស្រី និងពលរដ្ឋជាង ៤០គ្រួសារផ្សេងទៀត បានលិចលង់អស់រយៈពេលជិត ៤ខែមកហើយ។
អ្នកស្រីបន្តថា ពលរដ្ឋធ្លាប់បានប្តឹងក្រុមហ៊ុនបូមខ្សាច់ចាក់ដីឱ្យឧកញ៉ា ហេង លី ដែលធ្វើឱ្យទឹកហៀរហូរជន់លិចផ្ទះពួកគាត់ ប៉ុន្ដែនៅមិនទាន់មានដំណោះស្រាយនៅឡើយរហូតបានធ្វើឱ្យប្រជាពលរដ្ឋមួយចំនួននាំគ្នារត់ទៅស្នាក់នៅជាមួយបងប្អូន និងអ្នកខ្លះរត់ទៅជួលផ្ទះគេស្នាក់នៅបណ្ដោះអាសន្នដោយសារទឹកលិចចូលដល់ក្នុងផ្ទះ និងមានក្លិនស្អុយ។
អ្នកស្រី រតនា បញ្ជាក់ថា៖ «អាជ្ញាធរគាត់ដឹងដែរ តែខ្ញុំមិនដឹងថា គាត់គិតយ៉ាងម៉េចទេ គាត់មិនជួយរកដំណោះស្រាយអ្វីទេ មកចែកតែមី ចែកអង្ករ ហើយក៏នាំគ្នាទៅវិញអស់ទៅ។ ទឹកលិចរាប់ខែហើយ ជើងគ្រែ ជើងទូផ្សេងៗអី ពុកខូចជើងវាអស់ហើយ ឥវ៉ាន់ណាស្រាលៗលើកវាចេញពីផ្ទះ របស់របរណាធ្ងន់ៗគ្រាន់តែយកអ្វីមកកល់ឱ្យផុតទឹកបន្ដិចប៉ុណ្ណោះ»។
លោក ភួង ប៊ុន អាយុ ៣៩ឆ្នាំ កំពុងរុះរើអីវ៉ាន់ចេញពីផ្ទះយកទៅផ្ញើនៅផ្ទះអ្នកជិតខាងដែលមានបែកញើសជោគខ្លួនប្រាណបានរៀបរាប់ថា ទឹកនៅក្នុងផ្ទះរបស់លោកលិចត្រឹមជង្គង់លាយឡំជាមួយក្លិនស្អុយយ៉ាងខ្លាំងចេញពីលូ និងហូរចេញពីកន្លែងផ្សេងៗ។
លោកបន្តថា ទឹកនេះមិនត្រឹមតែមានក្លិនស្អុយប៉ុណ្ណោះទេ គឺថែមទាំងរមាស់ផងដែរ។ ប្រសិនបើប៉ះទឹកនេះត្រង់កន្លែងណា កន្លែងនោះនឹងមានរមាស់កន្ទួលលើស្បែកជាក់ជាមិនខាន។
លោក ប៊ុន ឱ្យដឹងថា៖ «ចំណែកកូនៗរបស់ខ្ញុំ គឺត្រូវបានជម្លៀសឱ្យទៅរស់នៅជាមួយសាច់ញាតិខ្ញុំមួយរយៈហើយ ដោយសារពួកខ្ញុំបារម្ភពីសុខភាពពួកគេ»។
លោក ប៊ុន បានបន្ថែមថា៖ «ផ្ទះខ្ញុំនេះ ខ្ញុំមកដេកតែពេលយប់ ទោះបីជាមានក្លិនស្អុយយ៉ាងណាក៏ដោយ ព្រោះខ្លាចចោរលួចអីវ៉ាន់ក្នុងផ្ទះ។ ចំណែកពេលថ្ងៃ គឺប្រពន្ធខ្ញុំទៅលក់ត្រីនៅផ្សារ ខ្ញុំចេញទៅធ្វើការ ហើយត្រូវជូនកូនទៅសាលារៀន និយាយរួមទៅ គឺយើងរស់នៅបែកគ្នាតាំងពីទឹកលិចផ្ទះមក»។
អ្នកស្រី សុខ ឆេងលីម អាយុ ២៧ឆ្នាំ កំពុងបណ្ដើរម៉ូតូចេញពីទឹកស្អុយបម្រុងទៅធ្វើការងារប្រចាំថ្ងៃរបស់ខ្លួនបានឱ្យដឹងថា ផ្ទះអ្នកស្រីត្រូវទឹកលិចក្រោមជង្គង់បន្ដិច ប៉ុន្ដែមិនអាចទុកដាក់ម៉ូតូ ឬរថយន្តនៅក្នុងផ្ទះបានទេ ដោយត្រូវយកទៅផ្ញើនៅកន្លែងផ្សេងមួយរយៈសិន ដើម្បីរង់ចាំទឹកស្រកទៅវិញ។
អ្នកស្រីថា៖ «យើងមិនទៅហាមឃាត់អីការបូមខ្សាច់ហ្នឹងទេ ប៉ុន្តែត្រូវរកកន្លែងបង្ហូរទឹកចេញពីក្នុងភូមិដែលពលរដ្ឋរស់នៅ។ ពួកគាត់គិតតែបូមចូល តែអត់រកកន្លែងបង្ហូរចេញ ហើយពីមួយថ្ងៃទៅមួយថ្ងៃទឹកឡើងស្រ៊ឺតៗអត់មានស្រកទេ»។
អ្នកស្រីបានជំរុញឱ្យអាជ្ញាធរប្រញាប់ដោះស្រាយទឹកជន់លិចផ្ទះពួកគាត់ឱ្យមានឆាប់ ព្រោះរស់នៅបែបនេះរយៈពេលជិត ៤ខែមកហើយ ដោយបានខាតបង់ពេលវេលា ទ្រព្យសម្បត្តិក្នុងផ្ទះ សម្ភារប្រើប្រាស់នានាខូចខាតស្ទើតែទាំងស្រុងហើយ។
លោក ងិន ធីរ៉ូ ចៅសង្កាត់ព្រែកប្រាបានថ្លែងថា លោកបានទទួលពាក្យបណ្ដឹងពីពលរដ្ឋហើយ គឺពិតជាមានទឹកជន់លិចផ្ទះពលរដ្ឋរស់នៅតំបន់ហ្នឹងមែន ប៉ុន្ដែអាជ្ញាធរបានកំពុងដោះស្រាយហើយ ដោយការស្ដាយប្រឡាយបង្ហូរទឹកទាំងនោះចូលទៅក្នុងព្រែកប្រា បន្ទាប់មកក៏បង្ហូរបន្តចូលទៅទន្លេបាសាក់។ គ្រឿងចក្រទើបតែចូលកាយប្រឡាយបានប៉ុន្មានថ្ងៃនេះ គឺនៅមិនទាន់រួចរាល់នៅឡើយ។
លោកបន្តថា លោកមិនទាន់ដឹងពីការប្រើប្រាស់ពេលវេលាប៉ុន្មានថ្ងៃទើបអាចស្ដាប្រឡាយនេះរួចរាល់ជាស្ថាពរ។ ដូច្នេះលោកប្រាប់ឱ្យពលរដ្ឋយោគយល់ និងអត់ធ្មត់បន្ដិចទៀត ព្រោះអាជ្ញាធរកំពុងតែខំប្រឹងដោះស្រាយបញ្ហានេះ។
លោកបញ្ជាក់ថា៖ «យើងមិនមែនថា មិនដឹងអារឿងទឹកលិចហ្នឹងទេ តែយើងកំពុងតែរកវិធីដោះស្រាយហើយ ភ្លាមៗនេះវាមិនទាន់រួចទេ។ អ៊ីចឹងសូមបងប្អូនមេត្តាអត់ធ្មត់តិចទៀតទៅ សូមយោគយល់ព្រោះយើងកំពុងធ្វើ តែវាមិនទាន់រួច។ កន្លងមកយើងធ្លាប់បានចែកស្បៀងអាហារខ្លះជូនពួកគាត់ខ្លះហើយ»។
លោក ចេង មុនីរ៉ា អភិបាលខណ្ឌច្បារអំពៅបានថ្លែងថា លោកបានចុះទៅពិនិត្យមើលករណីក្រុមហ៊ុនបូមខ្សាច់បូមចាក់លើដីរបស់ឧកញ៉ា ហេង លី ដែលបានធ្វើឱ្យទឹកជន់លិចផ្ទះសម្បែងប្រជាពលរដ្ឋទាំងជាង ៤០គ្រួសារនោះរួចហើយ។ អាជ្ញាធរមូលដ្ឋាន និងមន្រ្តីជំនាញបានរកកន្លែងបង្ហូរទឹកចេញពីតំបន់នោះ។
លោកបញ្ជាក់ថា៖ «យើងបាននិងកំពុងដោះស្រាយហើយ គឺយើងបានរកកន្លែងកាយធ្វើជាប្រឡាយបង្ហូរទឹកនោះចេញហើយ ហើយមានត្រាក់ទ័រកំពុងធ្វើការកាយធ្វើប្រឡាយ ប៉ុន្ដែមិនទាន់រួចរាល់ទេ។ ទឹកដែលកំពុងជន់លិចហ្នឹង គឺយើងធ្វើប្រឡាយ ហើយបង្ហូរវាឱ្យទៅប្រឡាយព្រែកប្រាដែលជិតទីនោះស្រាប់»។
លោកឧកញ៉ា ហេង លី ត្រូវបានពលរដ្ឋស្គាល់ថា ជាអ្នកជួលក្រុមហ៊ុនបូមខ្សាច់(មិនស្គាល់ឈ្មោះ)មួយមកចាក់បំពេញនៅលើដីរបស់ខ្លួន ដែលធ្វើឱ្យទឹកហូរហៀរចេញពីការដ្ឋាននោះមកលិចលង់ផ្ទះពលរដ្ឋដែលរស់នៅក្បែរនោះ។ ទោះបីជាយ៉ាងណា លោកឧកញ៉ា ហេង លី នៅមិនទាន់ស្វែងរកប្រភពទាក់ទងសុំការបញ្ជាក់ជុំវិញករណីនេះបានទេ។
ចំណែកតំណាងក្រុមហ៊ុនបូមខ្សាច់(មិនស្គាល់ឈ្មោះ)ដែលទទួលម៉ៅការបូមខ្សាច់ចាក់ដីឱ្យលោកឧកញ៉ា ហេង លី ក៏មិនទាន់អាចស្វែងរកប្រភពទាក់ទងបានដែរ ដើម្បីសុំបញ្ជាក់ជុំវិញការចោទប្រកាន់របស់ពលរដ្ឋខាងលើនេះ។
លោក សន ជ័យ នាយកប្រតិបត្តិនៃអង្គការសម្ព័ន្ធគណនេយ្យភាពសង្គមកម្ពុជា (ANSA) បានឱ្យដឹងថា ពលរដ្ឋក្នុងសហគមន៍ត្រូវតែយកចិត្តទុកដាក់តាមដានទៅលើការអភិវឌ្ឍនៅក្នុងមូលដ្ឋានរបស់ខ្លួន ដើម្បីដឹងថា តើគម្រោងណាមួយដែលធ្វើឱ្យប៉ះពាល់ដល់ពួកគាត់ ហើយគម្រោងណាខ្លះដែលធ្វើឱ្យពួកគាត់ទទួលផលប្រយោជន៍។
លោកបន្តថា គម្រោងអភិវឌ្ឍន៍មួយចំនួននៅក្នុងទីក្រុងភ្នំពេញបានគិតពីផលប៉ះពាល់ពលរដ្ឋ រីឯគម្រោងខ្លះទៀតមិនបានគិតគូរពីសុខមាភាពសាធារណៈទេ ដោយគិតតែពីចំណេញផលប្រយោជន៍នៅក្នុងក្រុមហ៊ុនរបស់ខ្លួន។
លោកបញ្ជាក់ថា៖ «អ្នកដែលទទួលខុសត្រូវរាល់បញ្ហាទាំងអស់ គឺអ្នកប្រព្រឹត្តជាអ្នកទទួលខុសត្រូវ បន្ទាប់មកអាជ្ញាធរជាអ្នកតាមដាន ត្រួតពិនិត្យ។ ចំណែកករណីនេះ អាជ្ញាធរនិងក្រុមហ៊ុនខ្វះការទទួលខុសត្រូវរៀងៗខ្លួន ដែលបណ្ដែតបណ្ដោយឱ្យមានទឹកលិចផ្ទះពលរដ្ឋរហូតដល់ទៅរាប់ខែបែបបនេះ»។
លោកជំរុញឱ្យអាជ្ញាធរ និងក្រុមហ៊ុមដែលពាក់ព័ន្ធ ប្រញាប់ចាត់វិធានការដោះស្រាយឱ្យបានលឿនបំផុត ព្រោះពួកគាត់ទ្រាំរស់នៅក្នុងទឹកស្អុយជាច្រើនខែមកហើយ។ ម្យ៉ាងទៀតបើសិនបណ្ដោយបែបនេះទៀត អាចនឹងបង្កឱ្យមានជំងឺផ្សេងៗកើតឡើងចំពោះពួកគាត់ទៀតផង។
តាមសេចក្ដីជូនដំណឹងរបស់រដ្ឋបាលខណ្ឌច្បារអំពៅចុះថ្ងៃទី ១៨ ខែវិច្ឆិកានេះបានឱ្យដឹងថា រដ្ឋបាលខណ្ឌ បានជូនដំណឹងពលរដ្ឋដែលរស់នៅតាមបណ្ដោយផ្លូវ ៣០ម៉ែត្រ ស្ថិតក្នុងភូមិអូរអណ្តូង១ សង្កាត់ព្រែកប្រា ខណ្ឌច្បារអំពៅ រាជធានីភ្នំពេញ ដើម្បីរំដោះទឹកភ្លៀងដែលជន់លិចលំនៅដ្ឋានប្រជាពលរដ្ឋ និងហេដ្ឋារចនាសម្ព័ន្ធ ព្រមទាំងដំណាំផ្សេងៗរបស់ពលរដ្ឋ ដោយរដ្ឋបាលខណ្ឌ នឹងធ្វើការកាយប្រឡាយតាមបណ្ដោយផ្លូវទទឹងប្រវែង ៣០ម៉ែត្រ ចាប់ពីចុងផ្លូវបេតុងដែលមានស្រាប់ក្នុងភូមិអូរអណ្តូង១ រហូតដល់ព្រែកប្រាក្នុងភូមិអូរអណ្ដូង សង្កាត់ព្រែកប្រា ដើម្បីទាញទឹកភ្លៀងដែលជន់លិចផ្នែកខ្លះក្នុងភូមិអូរអណ្ដូង១ និងភូមិអូរអណ្ដូង ទម្លាក់ចូលទៅទន្លេបាសាក់។
រដ្ឋបាលខណ្ឌច្បារអំពៅបន្តថា ការកាយប្រឡាយក្នុងភូមិសាស្រ្តខាងលើនេះនឹងចាប់ផ្ដើមអនុវត្តចាប់ពីថ្ងៃទី២២ ខែវិច្ឆិកា ឆ្នាំ២០២១ រហូតដល់ការងារត្រូវបានបញ្ចប់ស្ថាពរ។ ដូចនេះ ប្រជាពលរដ្ឋដែលមានលំនៅដ្ឋាន និងរស់នៅតំបន់នោះ ត្រូវចូលរួមសហការជាមួយអាជ្ញាធរ ដើម្បីបង្កលក្ខណៈងាយស្រួលក្នុងការកាយប្រឡាយ។ លើសពីនេះ ដើម្បីបញ្ចៀសការលិចលង់លំនៅដ្ឋាន និងផលដំណាំផ្សេងៗរបស់ពលរដ្ឋ ព្រមទាំងបញ្ចៀសការខូចខាតហេដ្ឋារចនាសម្ព័ន្ធនានាផងដែរ៕
