សមាគមសម្ព័ន្ធអ្នកសារព័ត៌មានកម្ពុជា

ប្រជាពលរដ្ឋរស់នៅក្បែរទីលានចាក់សំរាម​២កន្លែងក្នុងខេត្ត​បាត់ដំបង​​​​ប៉ះពាល់សុខភាព ដោយសារក្លិនស្អុយ និងផ្សែងហុយ

ស្រ្តីម្នាក់ឈរក្បែបាវអេតចាយដែលបានប្រមូលពីទីលានចាក់សំរាម ដែលពេញទៅដោយផ្សែងខ្មៅងងឹត ហុយចេញពីគំនរសំរាមចាស់ៗ ស្ថិតនៅភូមិអូរមុនី ឃុំអន្លង់វិល ស្រុកសង្កែ ខេត្តបាត់ដំបង។ រូបថតនៅថ្ងៃទី១១ ខែមីនា ឆ្នាំ២០២៣។ ខេមបូចា/ សុវណ្ណ ស្រីពេជ្រ
ស្រ្តីម្នាក់ឈរក្បែបាវអេតចាយដែលបានប្រមូលពីទីលានចាក់សំរាម ដែលពេញទៅដោយផ្សែងខ្មៅងងឹត ហុយចេញពីគំនរសំរាមចាស់ៗ ស្ថិតនៅភូមិអូរមុនី ឃុំអន្លង់វិល ស្រុកសង្កែ ខេត្តបាត់ដំបង។ រូបថតនៅថ្ងៃទី១១ ខែមីនា ឆ្នាំ២០២៣។ ខេមបូចា/ សុវណ្ណ ស្រីពេជ្រ

ទីលានចាក់សំរាមចំនួនពីរទីតាំងផ្សេងគ្នាក្នុងខេត្តបាត់ដំបង បានក្លាយជាក្ដីកង្វល់​ទៅដល់​ប្រជាពលរដ្ឋដែលមានទីលំនៅក្បែរទីតាំងនោះ ដោយសារតែជានិច្ចកាល មានក្លិនស្អុយ និងផ្សែងខ្មួរខ្មាញ់ចេញពីទីលានចាក់សំរាម ជះមកភូមិឋានប្រជាពលរដ្ឋ។

បើតាមការលើកឡើងរបស់អ្នកស្រី ជុំ ហាន អាយុ៧២ ឆ្នាំ​ រស់នៅក្នុងភូមិឯកភ្នំ ឃុំឯកភ្នំ ស្រុកឯកភ្នំ ខេត្តបាត់ដំបង ប្រាប់ឱ្យដឹងថា ផ្សែង និងក្លិនស្អុយចេញពីគំនរសំរាមដែលមាន​ចម្ងាយប្រមាណ១គីឡូម៉ែត្រពីផ្ទះអ្នកស្រី បានក្លាយជាក្ដីកង្វល់ដល់សុខភាព និងអនាម័យ​ដល់ក្រុមគ្រួសារអ្នកស្រី ពិសេសចៅតូចៗរបស់អ្នកស្រី។

អ្នកស្រី ជុំ ហាន ប្រាប់ថា៖​ «យប់ឡើងនៅតែដុត ធុំក្លិន បារម្ភថានឹងប៉ះពាល់[សុខភាព]​ហ្នឹង​ដែរ តែមិនដឹងធ្វើម៉េច ធុំឈួលជួនណាទៅឈ្ងៀម ជួនណាទៅស្អុយ ពិសេសខែភ្លៀង»។

ទិដ្ឋភាពនៃទីលានចាក់សំរាម ដែលពោរពេញ​ទៅ​ដោយ​ផ្សែងខ្មៅងងឹត ហុយចេញពីគំនរសំរាមចាស់ៗ ស្ថិតនៅភូមិអូរមុនី ឃុំអន្លង់វិល ស្រុកសង្កែ ខេត្តបាត់ដំបង។ រូបថតនៅថ្ងៃទី១១ ខែមីនា ឆ្នាំ២០២៣។ ខេមបូចា/ សុវណ្ណ ស្រីពេជ្រ

អ្នកស្រី ហាន បន្តទៀតថា គំនរសំរាមក្បែរផ្ទះអ្នកស្រីមិនមែនទើបតែចាក់មួយឆ្នាំ ឬពីរឆ្នាំទេ គឺដប់ឆ្នាំជាងមកហើយ។ ចំពោះអ្នកស្រី បញ្ហាក្លិន និងផ្សេងបានក្លាយទៅជាទម្លាប់ ប៉ុន្តែ​អ្នកស្រី​​នៅតែខ្វាយខ្វល់ទៅដល់សុខភាព ដែលអាចនឹងប៉ះពាល់ដោយសារតែការស្រូបផ្សែង និងដកដង្ហើមជាមួយក្លិនមិនល្អពីគំនរសំរាម។

អ្នកស្រី ហាន បញ្ជាក់ថា៖ «ធ្លាក់ខ្យល់ខ្លាំងមក វា[ក្លិនស្អុយពីគំនរសំរាម]ចូលមកហើយ ធុំក្លិន​វាវេទនា តែវាមិនដឹងធ្វើម៉េច ទោះវាមិនសុំាក៏ត្រូវតែសុំា»។

ក្ដីរំពឹងរបស់អ្នកស្រី ហាន ដែលជាពលរដ្ឋមានលំនៅឋានមិនឆ្ងាយប៉ុន្មានពីគំនរសំរាម គឺ​ចង់​ឃើញ​មានការយកចិត្តទុកដាក់ និងរៀបចំទីតាំងនោះឱ្យបានល្អ ដើម្បីបញ្ចៀស​នូវការដុត​សំរាម ដែលបង្កឱ្យមានផ្សែងពុលប៉ះពាល់សុខុមាលភាព និងជះក្លិន​ស្អុយ​មកលើផ្ទះអ្នកភូមិ។

អ្នកស្រី ហាន បន្ថែមថា៖ «បានគេកែហ្នឹងអរហើយ បើមានខ្យល់បក់មកមិនបាច់នៅទេ បក់មក​យូរនៅយូរ[ក្លិនស្អុយយូរ] បើប៉ះពាល់[សុខភាព]ក៏យើងមិនដឹងធ្វើម៉េច អ្នកភូមិ​ចម្ការសំរោង តាព្រួច​អីគេប្ដឹង គេធុំក្លិនដែរ គេរករឿងដែរ តែវាមិនឈ្នះ»។

ប្រជាពលរដ្ឋកំពុងរើសសំរាមដែលអាចលក់បានក្រោមផ្សែងហុយខ្មួរខ្មាញ់ នៅទីលាន​ចាក់​សំរាមរបស់ក្រុមហ៊ុនឯកជន លាប លឹម ក្នុងភូមិអូរមុនី ឃុំអន្លង់វិល ស្រុកសង្កែ ខេត្តបាត់ដំបង។ រូបថត​នៅ​ថ្ងៃទី១១ ខែមីនា ឆ្នាំ២០២៣។ ខេមបូចា/ សុវណ្ណ ស្រីពេជ្រ

នៅក្បែរទីលានចាក់សំរាមឯកភ្នំ គឺមានផ្ទះប្រជាពលរដ្ឋរស់នៅជាច្រើនគ្រួសារ មានទាំងផ្ទះ​អ្នក​ភូមិចាស់ និងប្រជាពលរដ្ឋជាច្រើនគ្រួសាររស់នៅក្នុងបុរីទំនើបផងដែរ។

ចំណែកពលរដ្ឋរស់នៅក្នុងបុរីមួយកន្លែងក្នុងភូមិឯកភ្នំ អ្នកស្រី ស្រី ណា ប្រាប់ឱ្យដឹងថា ទីលាន​ចាក់សំរាមដែលមើលនឹងភ្នែកទទេឃើញច្បាស់​​ ហើយបើដើរទៅមិនដល់៥នាទីនោះ គឺតែងតែ​ដុតក្នុងមួយសប្ដាហ៍៤ដង ដែលភាគច្រើនដុតនៅពេលល្ងាចម៉ោង៧​ ខណៈអ្នកស្រីកំពុង​បារម្ភ​អំពីបញ្ហាសុខភាពដោយសារតែស្រូបដង្ហើមជាមួយក្លិនស្អុយ និងផ្សែងចេញពីគំនរសំរាម។

អាជីវករលក់ដូរ រូបនេះនិយាយថា៖ «[បារម្ភខ្លាច]ប៉ះពាល់ហ្នឹងហើយ សំណូមពរកុំឱ្យ​គេចាក់​សំរាម​នៅហ្នឹង វាស្អុយ វាប៉ះពាល់សុខភាពអ្នករស់នៅហ្នឹងទាំងអស់ តែមិនដឹងអង្កាល់​គេឈប់​[ដុត]»។

មិនខុសគ្នាពីអ្នកស្រី ណា លោក ម៉ៅ ឈឿម អាយុ៦៥ឆ្នាំ ជាប្រជាជនចំណូលថ្មី ដែលទើបតែ​ទិញផ្ទះក្នុង​បុរីមួយកន្លែងក្បែរទីលានចាក់សំរាម បានត្អូញត្អែរអំពីភាព​មិនអំណោយផល​នៃ​ការ​រស់​នៅ ដោយសារតែលោករំពឹងថា រស់នៅក្នុងបុរីនឹងមានផាសុខភាព មានបរិយាកាសល្អ​បរិសុទ្ធ ប៉ុន្តែអ្វីដែលធ្វើឱ្យលោក ឈឿម ខកចិត្តនោះ​ គឺក្លិនស្អុយចេញពីទីលានចាក់សំរាម និងសត្វរុយទៅវិញ។

លោក ឈឿម និយាយថា៖ «ឥឡូវនេះ មិនដឹងទៅគេចនៅឯណា? បើកុំតែទិញជ្រុល កុំអី​អត់​នៅ​នេះទេ បើខ្យល់មកអ៊ីចេះអី គ្រប់[ទឹក] រត់ចូលក្នុងផ្ទះ ជាពិសេសរុយច្រើនណាស់ ថ្នាំមូស​បាញ់មិនទាន់ទេ បិទទ្វារជិតៗមិនដែលបើកទេ»។

សម្រាប់លោក ឈឿម សង្ឃឹមថា ទីលានចាក់សំរាមនេះនឹងត្រូវបានផ្លាស់ប្ដូរ​ទៅទីតាំងផ្សេង​ដែលឆ្ងាញពីផ្ទះប្រជាពលរដ្ឋ ឬបញ្ឈប់ការចាក់សំរាមនៅទីតាំងនេះតែម្ដង។ លោក ឈឿម បន្តថា៖ «បរិយាកាសវិញគឺអាប់អួរណាស់ ដោយសារតែស្អុយសំរាមហ្នឹង អានេះគឹប៉ះពាល់​សុខភាពខ្លាំងណាស់»។

ស្រ្តីម្នាក់ពាក់មួក និងរុំក្រណាត់បិទមុខជិតឈឹង កំពុងរុញរទេះអេតចាយ ដែលរើសបាន​កាត់ទីលានចាក់សំរាម ដែលពេញទៅដោយចំហាយផ្សែងអួរអាប់ និងមានក្លិនឈ្ងៀម។

រូបថតនៅថ្ងៃទី១១ ខែមីនា ឆ្នាំ២០២៣។ ខេមបូចា/ សុវណ្ណ ស្រីពេជ្រ

បញ្ហាស្រដៀងគ្នានេះ មិនមែនកើតមានឡើងចំពោះពលរដ្ឋនៅតំបន់ឯកភ្នំនោះទេ តួយ៉ាង​ប្រជាពលរដ្ឋ​នៅភូមិអូរមុនី ដែលមិនឆ្ងាយប៉ុន្មានពីក្រុងបាត់ដំបង ក៏បានលើកឡើងពីក្ដីបារម្ភ​ទាក់ទងនឹងបញ្ហាសុខភាពរបស់ពួកគេ ដោយសារតែក្បែរភូមិដែលពួកគេរស់នៅ គឺមាន​គំនរ​សំរាម​របស់ក្រុមហ៊ុនឯកជនមួយ ដែលជានិច្ចកាលមានផ្សែង​ហុយជះមកលើផ្ទះ​សម្បែង​អ្នកភូមិ។

លោក កិល គឿត អាយុ៣៤ឆ្នាំ មានមុខរបរជាអាជីវករលក់ដូរ រស់នៅភូមិអូរមុនីមួយ ឃុំ​អន្លង់វិល ស្រុកសង្កែ ប្រាប់ឱ្យដឹងថា ផ្សែងហុយចេញពីទីលានចាក់សំរាម​ក្រោយភូមិ​របស់​លោក ហើយជារឿយៗ តែងតែជះក្លិនស្អុយ ឈ្ងៀមមកលើផ្ទះប្រជាពលរដ្ឋ ខណៈ​មិន​មាន​ភូមិឃុំដោះស្រាយបញ្ហានេះជូនពលរដ្ឋឡើយ។

លោក គឿត លើកឡើងថា៖ «ចាប់ពីខែហ្នឹងទៅខ្យល់វាបក់ពីខាងកើតមក​ចូលមកក្នុង​ភូមិ​ងងឹត​ស្លុបក៏មាន ពេលខ្លះទៅវាធុំក្លិនស្អុយហើយឈ្ងៀម កាលពីសំរាមស្ទះនៅឯកភ្នំ​គេមកចាក់​នៅ​ហ្នឹង ឆេះនិងធុំក្លិនជាងហ្នឹងទៀតណ៎ អត់ឃើញភូមិឃុំអី គេនិយាយផង»។

ដោយសារតែក្លិនស្អុយសាយភាយពីគំនរសំរាមផង គួបផ្សំនឹងផ្សែងដែលដុតចេញ​ពីសំរាម​ច្រើនប្រភេទផងនោះ លោកគឿត ប្រាប់ថាបារម្ភបញ្ហាសុខភាព ព្រោះរូបលោកតែង​ក្អក​ជា​ញឹក​ញាប់ដែរ ដោយសារតែទ្រាំមិនបាននឹងក្លិនមិនល្អចេញពីគំនរសំរាម បើទោះបីជាឆ្ងាយពីភូមិក្ដី តែនៅតែមានផ្សែងហុយជះមកដដែល។ យ៉ាងណាមិញ ពលរដ្ឋរូបនេះ រំពឹងថា អាជ្ញាធរនឹង​ដោះ​ស្រាយបញ្ហាចំពោះមុខនេះជូនពលរដ្ឋ ដែលរងផលជះពីគំនរសំរាមនេះ​ត្បិតវាមិនត្រឹមតែ​ប្រឈមនឹងសុខុមាលភាពប្រជាពលរដ្ឋនោះទេ តែវាប៉ះពាល់មុខរបររកស៊ីរបស់​ប្រជាពលរដ្ឋ​ផងដែរ។

លោក គឿត និយាយថា៖ «ក្អកចេះតែក្អកហ្នឹងឯង ពេលខ្លះវាស្អុយៗចេះតែធុំក្លិនទៅក្អកដែរ សំរាមដឹកមកពីផ្សារផង តាមផ្ទះផង ស្អុយនោះស្អុយ។ បញ្ហាច្រើនផ្ដាសាយយូរៗ​ទៅវាអាច​ធ្វើ​ឱ្យមានបញ្ហាសួត បញ្ហាប្រឈមច្រើនដែរ។ ចំណែកមុខរបរវិញ អ្នកហូបក៏គេមើលមក​ចំណី​អាហារ​យើងមិនគួរឱ្យចង់ហូប គិតមើលផ្សែងផង ស្អុយផង»។

ប្រជាពលរដ្ឋទៅរើសសំរាមដែលអាចលក់បានក្រោមផ្សែងហុយខ្មួរខ្មាញ់ នៅទីលាន​ចាក់​សំរាមរបស់ក្រុមហ៊ុនឯកជន លាប លឹម ក្នុងភូមិអូរមុនី ឃុំអន្លង់វិល ស្រុកសង្កែ។ រូបថត​នៅ​ថ្ងៃទី១១ ខែមីនា ឆ្នាំ២០២៣។ ខេមបូចា/ សុវណ្ណ ស្រីពេជ្រ

កំពុងអង្គុយយោលអង្រឹងកូនតូចអាយុទើបបានជិត៤ខែ នៅក្នុងតូបលក់ចាប់ហួយប្រក់ស័ង្កសី អ្នកស្រី កូ សុខលី អាយុ៣៦ឆ្នាំ ជាស្រ្តីទើបឆ្លងទន្លេរួច ប្រាប់ឱ្យដឹងថា ក្នុងនាមជាពលរដ្ឋ​រស់​នៅ​​ក្នុងភូមិ ដែលរងផលប៉ះពាល់ផ្សែងហុយ និងក្លិនពីគំនរសំរាម សង្ឃឹមថានឹងមានការកែ​សម្រួល​បញ្ហានេះជូនពលរដ្ឋ ត្បិតអ្នកស្រីខ្លាចប៉ះពាល់សុខភាព។

អ្នកស្រី សុខលី រៀបរាប់ថា៖ «វាធុំក្លិន វាប៉ះពាល់ដល់សុខភាពយើងហ្នឹងហើយ ចង់ឱ្យគេលុប មាន​តែមតិម្នាក់បន្តិចដើម្បីឱ្យគេលុប ធ្លាប់ដាក់ពាក្យបណ្ដឹង៣ដងដែរ តែវាស្ងាត់ទៅ។ ទាំង​អស់​គ្នាបារម្ភតែទាំងអស់គ្នាហ្នឹងឯង ព្រោះអីវាមិនមែនឈ្ងុញស្អី ធុំស្អុយចង់ងាប់ ឈ្ងៀម»។

អ្នកស្រី សុខលី បន្តថា ផ្សែងហុយចេញពីសំរាមច្រើនតែពេលយប់ ត្បិតមិនមានអ្នកប្រចាំការ​នៅទីនោះ ខណៈពេលថ្ងៃមានមេការចាំមើលទីតាំងសំរាម តែយ៉ាងណានៅតែមាន​ការ​ដុត​សំរាមនៅពេលថ្ងៃ។ ដូច្នេះ ជាជម្រើសដែលល្អ អាជ្ញាធរគប្បីបញ្ឈប់ការចាក់សំរាម​នៅតំបន់​ដែលមានពលរដ្ឋរស់នៅ។

អ្នកស្រី សុខលី បន្ថែមថា៖ «សូមតែឱ្យគេលុបទៅ ទៅឱ្យឆ្ងាញពីអ្នកស្រុកអ្នកភូមិ ទៅនេះក៏ភូមិ មកនេះក៏ភូមិ»។

នៅពេលដែលអ្នកយកព័ត៌មានចុះទៅទីតាំងនោះផ្ទាល់ ឃើញមានផ្សែងខ្មួរខ្មាញ់ហុយចេញ​ពី​គំនរ​សំរាមនៅកណ្ដាលថ្ងៃត្រង់ មានក្លិនស្អុយ និងឈួលខ្លាំងដោយសារតែមានសំរាម​ចម្រុះ​មុខ។ ប៉ុន្តែតាមការសាកសួរពលរដ្ឋដែលមករើសសំរាមនៅទីនោះ ពួកគេនិយាយថា សំរាម​ឆេះដោយ​ខ្លួនឯងមិនមានអ្នកដុតទេ ហើយក៏មិនអាចពន្លត់បានដែរ ដោយសារតែវា​ឆេះខ្លាំង​ពេក។

អភិបាលស្រុកសង្កែលោក ​នាង ច័ន្ទថារ៉ា ថ្លែងថា បញ្ហាសំរាមដែលពលរដ្ឋបានលើកឡើង​ពិត​ជាដូចការលើកឡើងមែន ប៉ុន្តែខាងស្រុកធ្លាប់បានចុះអប់រំ និងណែនាំទៅដល់ក្រុមហ៊ុន​ប្រមូល​សំរាម លាប លឹម ដែលជាក្រុមហ៊ុនឯកជន ដើម្បីយកចិត្តទុកដាក់បន្ថែមចំពោះបញ្ហា​ផ្សែង​ហុយ និងក្លិនស្អុយចេញពីទីលានចាក់សំរាមនេះ។

លោក ចាន់ថារ៉ា មានប្រសាសន៍ថា៖ «ខ្ញុំធ្លាប់បានចុះទៅណែនាំដល់ក្រុមហ៊ុនគ្រប់គ្រងសំរាម កុំឱ្យដុតសំរាម ព្រោះជាគោលការណ៍បរិស្ថានអត់ឱ្យដុតសំរាមទេ តាមពិតគេឱ្យគាត់ហ្នឹង ញែក​សំរាម ហើយគាត់ក៏បានចូលរួមក្នុងការពន្លត់ភ្លើងដែលឆេះដែរ»។

ទីលានចាក់សំរាមនៅភូមិអូរមុនីមួយ មិនមែនមានតែក្រុមហ៊ុន លាប លឹម មួយទេ ដែល​យក​សំរាម​មកចាក់នៅទៅលាននេះ សូម្បីតែក្រុមហ៊ុនប្រមូលសំរាម ស៊ិន ទ្រី ក៏យកសំរាមពី​ក្រុង​បាត់ដំបង មកចាក់នៅទីលាននេះដែរ នេះបើតាមការបញ្ជាក់ពីពលរដ្ឋ និងអភិបាលស្រុក​សង្កែ។

យ៉ាងណាមិញ លោកអភិបាលស្រុកសង្កែវិញ បញ្ជាក់ថា នៅពេលខាងមុខ​ ខាងស្រុកនឹងបិទ​មិនឱ្យមាន​ការចាក់សំរាមនៅទីលានចាស់ក្នុងភូមិអូរមុនីទៀតទេ ដោយបង្វែរទៅចាក់​នៅទី​លាន​ចាក់សំរាមថ្មីនៅភូមិតាគ្រាមជំនួសវិញ។

ផ្លូវចូលទីលានចាក់សំរាមរបស់ក្រុមហ៊ុនឯកជន លាប លឹម ដែលតែងតែមានផ្សែងហុយ សាយភាយទៅផ្ទះប្រជាពលរដ្ឋ ដែលរស់នៅឃុំអន្លង់វិល ស្រុកសង្កែ ខេត្តបាត់ដំបង។ រូបថតនៅថ្ងៃទី១១ ខែមីនា ឆ្នាំ២០២៣។ ខេមបូចា/ សុវណ្ណ ស្រីពេជ្រ

ជុំវិញបញ្ហាសំរាម ដែលជះក្លិន និងផ្សែងទៅលើប្រជាពលរដ្ឋដែលរស់នៅសង្កាត់ស្លាកែត ​លោក លាង វាសនា អភិបាលក្រុងបាត់ដំបង បកស្រាយថា ខាងក្រុងតែងតែចុះទៅ​អន្តរាគមន៍ និងអប់រំមិនឱ្យដុតសំរាម ហើយបញ្ហាឆេះនោះវាបណ្ដាលមកពីឧស្ម័នមេតាន នៅពេលដែលសំរាមក្ដៅយូរទៅ ក៏ឆាបឆេះដោយឯកឯង។

លោកវាសនាពន្យល់ថា៖ «មែនទែនទៅវាជាជាតិមេតាន ពេលខែក្ដៅសំរាម​ទុកចោលវាអាច​ប្រតិកម្មឆេះ ជានិច្ចជាកាលយើងតែងតែពន្លត់។ ខាងក្រុងកំពុងតែរៀបចំការ​គាំទ្រពី​ក្រសួង​បរិស្ថាន​យើងបានរៀបចំទីលានចាស់ទៅជាកន្លែងញែកសំរាមវិញ​ដូច្នេះសំរាមនឹងមិនច្រើន​ដូច​កាល​ពីមុនទេ ចឹងខ្ញុំសង្ឃឹមថាឆ្នាំក្រោយៗទៅវានឹងប្រសើរជាងមុនឆ្ងាយ»

លោក វាសនា បញ្ជាក់ទៀតថា បើទោះបីជាមានទីលានចាក់សំរាមថ្មីក្រោម​កម្ចីឥណទាន​ពី​ធនាគារអភិវឌ្ឍន៍អាស៊ី តែសាលាក្រុងនៅតែរក្សាទីលានចាក់សំរាមចាស់ដដែល ដើម្បី​ធ្វើការ​ញែកសំរាមចន្លោះពី២០០ទៅ៣០០តោនក្នុងមួយថ្ងៃ ដែលអាចកែច្នៃបាន និងសំរាម​ដែលមិន​អាច​កែច្នៃបាន នឹងយកទៅចាក់នៅទីលានថ្មី។

លោក វាសនា បន្ថែមថា៖ «ទីលានចាស់ទុកសម្រាប់ញែកសំរាម យើងត្រូវរក្សាទុកទីលាន​ចាស់​​​សម្រាប់ញែកយកទៅកែច្នៃទៅជាជីកំប៉ុស្ត និងកាត់បន្ថយសំរាមដែលត្រូវយកទៅ​ទីលាន​ថ្មី»។

ប្រធាន​សមាគម​គ្រូពេទ្យ​គុណធម៌​កម្ពុជា លោកវេជ្ជបណ្ឌិត ​អ៊ូច វុទ្ធី មាន​ប្រសាសន៍​ថា ទី​លានសំរាម​គឺ​ជាប្រភពនៃមេរោគ និងជាតិឧស្ម័នផ្សេងៗ ដែលអាចធ្វើឱ្យប៉ះពាល់​ទៅ​ដល់​ផ្លូវដង្ហើម ដល់មនុស្សដែលរស់នៅក្បែរទីលានចាក់សំរាម។

លោក វុទ្ធី និយាយថា៖ «វាមានហានិភ័យខ្លាំងចំពោះប្រជាពលរដ្ឋយើងដែល​រស់នៅ​ក្បែរ​គំនរ​សំរាម កុំថាឡើយកុមារ តែប្រជាពលរដ្ឋចាស់ៗក៏គាត់ប្រឈមដែរ ហើយសុខភាព​គាត់​ស្គម​ស្លេក​ស្លាំងរីងរៃ ពិសេសគាត់មានជំងឺផ្លូវដង្ហើមជាប្រចាំ»។

តាមរយៈក្រសួងសាធារណការ កាលពីថ្ងៃទី១៩ ខែមិនា ឆ្នាំ២០២៣កន្លងទៅ បានប្រារព្ធពិធី​សម្ពោធជាផ្លូវការ នូវទីលានទុកដាក់សំរាមទំហំ ២០,៨០ហិកតា ដែលគម្រោងនេះក្រោម​កម្ចី​ឥណទាន​ធនគារអភិវឌ្ឍន៍អាស៊ី( ADB )​ អស់ទឹកប្រាក់ចំនួន ៦ ២៨៣ ៧៤៧ ដុល្លារអាមេរិក។

បើតាមក្រសួងសារធារណការ និងដឹកជញ្ជូន គម្រោងនេះនឹងគ្រោងឱ្យប្រើប្រាស់នៅ​ដំណាក់​កាល​ដំបូង នៅរណ្ដៅទី១ មានទំហំ ២,៩៤ ហិកតា ហើយមានសមត្ថភាពអាចផ្ទុកសំរាមបាន ៣១៣​ ៧០៣ ម៉ែត្រគូប សម្រាប់រយៈពេល១០ឆ្នាំ។ តាមការរំពឹងទុក ប្រជាជនប្រមាណ៦០% នឹង​ទទួលបានសេវាកម្មផ្នែកអនាម័យ​បរិស្ថា​នពីទីលានចាក់សំរាមមួយនេះ៕

419 views

ព័ត៌មានទាក់ទង

ព័ត៌មានថ្មីៗ

អត្ថបទពេញនិយម