សមាគមសម្ព័ន្ធអ្នកសារព័ត៌មានកម្ពុជា

ពលរដ្ឋនៅភូមិព្រែកតាគង់ត្រូវទឹកស្អុយជនលិចរាប់ខែ ស្នើអាជ្ញាធរ​ជួយដោះស្រាយប្រព័ន្ធលូ

បុរសចំណាស់ម្នាក់ កំពុងដងទឹកលូដែលដក់ត្រាំយូរខែ មកជះលាងទីធ្លាខាងមុខផ្ទះ ដោយនិយាយថា ទឹកនេះដក់រាប់ខែ និងមានក្លិនស្អុយ។ រូបថតថ្ងៃទី២០ ខែកញ្ញា ឆ្នាំ២០២២។ ខេមបូចា/ សុវណ្ណ ស្រីពេជ្រ
បុរសចំណាស់ម្នាក់ កំពុងដងទឹកលូដែលដក់ត្រាំយូរខែ មកជះលាងទីធ្លាខាងមុខផ្ទះ ដោយនិយាយថា ទឹកនេះដក់រាប់ខែ និងមានក្លិនស្អុយ។ រូបថតថ្ងៃទី២០ ខែកញ្ញា ឆ្នាំ២០២២។ ខេមបូចា/ សុវណ្ណ ស្រីពេជ្រ

ចុះពីស្ពានអាកាសក្បាលថ្នល់ប្រមាណ១គីឡូម៉ែត្រ នៅភូមិព្រែកតាគង់ សង្កាត់ចាក់អង្រែលើ ខណ្ឌមានជ័យ ប្រជាពលរដ្ឋប្រមាណ​៣០គ្រួសារ លើកឡើងថាពួកគេរស់នៅជាមួយទឹកស្អុយ​ជន់លិចផ្លូវ និងផ្ទះអស់ជាច្រើនខែមកហើយ ពួកគេស្នើឱ្យអាជ្ញាធរពាក់ព័ន្ធ​ជួយដោះស្រាយ​ប្រព័ន្ធ​​​លូឱ្យបានឆាប់។

កំពុងអង្គុយលក់ចាប់ហួយនៅខាងមុខផ្ទះដែលផ្លូវលិចទឹក អ្នកស្រី​ ឆើម សុគន្ធ អាយុ៤១ឆ្នាំ ថ្លែងប្រាប់ថា ពីមុនផ្លូវនៅមុខផ្ទះអ្នកស្រីមិនដែលមានទឹកលិចយូរខែដូច្នេះឡើយ ប៉ុន្តែក្រោយ​ចូលឆ្នាំខ្មែរហើយ មានភ្លៀងធ្លាក់បណ្ដាលឱ្យផ្លូវបេតុងនៅខាងមុខផ្ទះអ្នកស្រីក្លាយ​ទៅជា​កូន​ប្រឡាយទឹកស្អុយ​រហូតមកទល់សព្វថ្ងៃនេះ។

អ្នកស្រីរៀបរាប់ថា៖ «និយាយរួមទឹកលិចហ្នឹងតាំងពីចូលឆ្នាំ ទឹកវាជាប់នៅហ្នឹងរហូត វាគោក​មួយសារមុនបោះឆ្នោត តែឥឡូវវាលិចជាប់រហូតចឹងទៅ។ នេះនៅមុខផ្ទះបងក៏មានលូដែរ តែ​វា​ហូរតិចៗ ពីដំបូងគេថាលូស្ទះ តែមិនដឹងថាយ៉ាងម៉េចវាមិនហូរ[ទឹកស្អុយ

អ្នកស្រីបន្តថា បើទោះជាមានលូនៅមុខផ្ទះក៏ដោយ ក៏ទឹកដែលដក់នោះមិនព្រមហូរចូលលូ ហើយ​បង្កការលំបាកដល់ការរស់នៅ និងប្រកបរបររកស៊ីរបស់អ្នកស្រី។ អ្នកស្រីប្រាប់ទៀតថា តាំងពីមានទឹកលិចផ្លូវដូច្នេះមក មិនសូវមានភ្ញៀវមកទិញអីវ៉ាន់​ចំណែក​​អ្នកជួលផ្ទះ​ក៏រើ​ចេញ ដោយសារតែផ្លូវលិចទឹកត្រាំយូខែទៅជាស្អុយ ពិបាក​ដល់ការរស់​នៅ និងធ្វើដំណើរ។

អ្នកស្រី សុគន្ធ បញ្ជាក់ថា៖ «គេឃើញទឹកលិចគេអត់ចង់នៅ ទោះផ្ទះយើងអត់លិច តែលិចផ្លូវ អាណា​គេជួលផ្ទះយើង ហើយម៉ូតូគេល្អៗគេចេញអស់ហើយ»

ដោយសារតែទឹកនោះស្អុយមានក្លិនមិនល្អ និងមានស្លែក្រាស់ឃ្មឹក អ្នកស្រីសម្ដែងការបារម្ភ​អំពី​បញ្ហាសុខភាព និងសុវត្ថិភាពកូនៗនៅពេលពួកគេដើរទៅរៀន ត្បិតថានៅពេលដើរ​កាត់ទឹក​នោះ ធ្វើឱ្យរមាស់ដៃជើង និងមានបញ្ហាទឹកស៊ីជើង ឬរអិលដួលជាដើម។  

ក្រៅតែពីមានក្លិនមិនល្អ ទឹកស្អុយដែលដក់ត្រាំរាប់ខែនោះ ធ្វើឱ្យអ្នករស់នៅភូមិព្រែកតាគង់ បង្ហាញអារម្មណ៍តានតឹងចិត្ត ធុញថប់និងបរិយាកាសដ៏អាប់អួរនេះផងដែរ ត្បិតថាការរស់នៅ​មិនមានផាសុខភាព ផ្លូវធ្វើដំណើរ ដែលក្មេងៗអាចរត់លេងបានប្រែទៅ​ជាមាន​ទឹកលិចមានក្លិនស្អុយ ក្មេងខ្លះសំងំនៅតែក្នុងផ្ទះព្រោះមិនហ៊ានចេញមកលេងនៅខាងក្រៅ ខ្លាចរមាស់ដៃជើង។

ក្នុងកិច្ចសម្ភាសន៍ជាមួយ ខេមបូចា អ្នកស្រីថ្លែងថា៖ «ពីមុនមកវាលិចដែរ តែទៅមកៗ វាអត់​លិចរ៉ាំរ៉ៃដូចឥឡូវ ឥឡូវវាលិចជាប់ហ្មង៎ ស្អុយវាស្អុយហើយ ហិតឡើងទៅជា​ទម្លាប់​ទៅ​ហើយ។ វាពិបាកណាស់អូន កូនទៅរៀនខ្ញុំអៀវកូនទៅរៀនព្រោះសាលានៅជិតនេះដែរ​ ហើយ​យើងទៅផ្សារត្រូវលុយទឹកលុយអី ទឹកស៊ីជើង ឯចាស់ៗគាត់ដើររអិលដួល»

អ្នកស្រីឱ្យដឹងថា ឃើញអាជ្ញាធរភូមិឃុំចុះមកមើលដែរ ប៉ុន្តែមិនទាន់ឃើញមានចំណាត់ការ​ណា ដែលដោះស្រាយបញ្ហាទឹកស្អុយនេះចេញឡើយ។ ស្រ្តីវ័យ៤១ឆ្នាំនេះ រំពឹងថា ថ្នាក់ដឹកនាំ​ឃុំសង្កាត់ និងអាជ្ញាធរពាក់ព័ន្ធនឹងពន្លឿនការដោះស្រាយបញ្ហាទឹកស្អុយនេះ ជូនពលរដ្ឋឱ្យ​បាន​ឆាប់ៗ ត្បិតថាពួកគេរស់នៅត្រាំត្រែងជាមួយទឹកស្អុយ​រាប់សិប​ខែមកហើយ។

កុមារាម្នាក់កំពុងអៀវប្អូនប្រុសតូចចេញពីផ្ទះឆ្លងកាត់ផ្លូវដែលមានទឹកស្អុយក្នុងសង្កាត់​ចាក់អង្រែលើ ខណ្ឌមានជ័យ រាជធានីភ្នំពេញ។ រូបថតថ្ងៃទី២០ ខែកញ្ញា ឆ្នាំ២០២២។ ខេមបូចា/ សុវណ្ណ ស្រីពេជ្រ

អង្គុយនៅខាងមុខតូបលក់អីវ៉ាន់ អ្នកស្រី ព្រឿង សុផាត វ័យ៧៥ឆ្នាំ បានលើកឡើងថា អ្នកស្រីរស់នៅតំបន់នេះតំាងតែពីឆ្នំា១៩៧៩ មិនដែលប្រទះនឹងបញ្ហាទឹកលិច​ផ្លូវស្អុយដូច្នេះ​ឡើយ។

អ្នកស្រីថ្លែងថា៖ «យើងបានប្រាប់គេ[អាជ្ញាធរ]ដែរ តែគេថាថ្ងៃនេះថ្ងៃនោះ ចឹងចេះតែចាំមើល​ទៅ។ ខ្ញុំគ្មានទៅចង់បានស្អី ឱ្យតែផ្លូវហ្នឹងគោកទៅ ក្មេងៗបានទៅរៀនស្រួល ក្មេងៗរស់​នៅ​ក៏មិនឈឺស្កាត់មូសខ្លាអីមិនខាំ ចាស់ៗក្នុងភូមិក៏បានដើរទៅវត្ត​ដោយមិនភ័យខ្លាច​រអិល​ដួល ព្រោះមុនៗចាស់ៗម្ដុំនោះដើរដួលអុកគូទ»

អ្នកស្រីបន្តថា៖ «ផ្លូវលិចទឹកអ៊ីចឹងវាពិបាកហ្នឹងហើយកូន យើងត្រូវចេញចូល​ប្រកប​របរ​ទទួល​ទានប្រចាំថ្ងៃ ចង់លក់ដូរអីក៏អត់ដាច់សឹងរកលុយមិនបានទៅវត្តផង។ ទឹកនេះលិចតាំងពី​ចូលឆ្នាំខ្មែរ​ទល់ឥឡូវ ទឹកស៊ីជើង លេបថ្នាំអស់បីដប ប្រេងកូឡាមួយខ្លងហើយ លាប​រាល់​យប់»។​

អង្គុយលើកៅអីជ័រពណ៌ឈាមជ្រូក ស្រដីមួយៗ ស្រ្តីរូបនេះ លើកឡើងថា មូលហេតុដែល​ទឹក​លិច​យូរខែ​ដូច្នេះ ទំនងអាចមកពីមានវត្តមានបុរី សំណង់អគារជុំជិត គួបផ្សំនិងការ​លុបបឹង​ទំពុន និងដីកកស្ទះក្នុងលូផងនោះ ទើបធ្វើឱ្យមិនមានផ្លូវទឹកហូរត្រឹមត្រូវ។

អ្នកស្រី សុផាត បញ្ជាក់ថា៖ «លូវាតូចពេកម៉្លោះហើយវាស្ទះសុទ្ធតែដីតែម្ដង ពីដើម​ឱ្យ​តែ​មាន​ទឹក វាស្រកទៅវិញអស់ហើយ តែចាប់តាំងពីចាក់ដីធ្វើបុរី ហើយគេលុប​[លុបបឹងទំពុន]​ទៀតទៅយើងមិនចប់ ពីមុនមកអស់នេះ[តំបន់នេះ]មានលិចឯណា»។

មិនខុសពីអ្នកស្រី សុផាត ស្រ្តីចំណាស់មួយរូបទៀត កំពុងបោសសំអាតផ្ទះ គឺអ្នកស្រី ម៉ៅ ស្រី អាយុ៥៩ឆ្នាំ អះអាងថាពីដើមឡើយផ្ទះអ្នកស្រីមិនដែលភ្លៀងមកលិចផ្លូវរាប់ខែដូច្នេះឡើយ ហើយទំនងមកពីគ្មានប្រព័ន្ធរំដោះទឹកត្រឹមត្រូវ គួបផ្សំនិងការលុបបឹង ដើម្បីធ្វើសំណង់អគារ​ធំៗ​ទើបបិទផ្លូវទឹកហូរ។

អ្នកស្រីថ្លែងថា៖ «គាត់[ចៅសង្កាត់]កាយលូ គាត់ធ្វើឱ្យរហូតដែរ តែដោះស្រាយមិនចេញ ទឹក​ហូរ​ទៅមិនរួច តាំងពីគេបុកធ្វើអគារច្រើនជាន់មក វាស្ទះគេគ្រប់គ្នា បញ្ហាគេលុបបឹង​អស់​ទៅ​វាអត់ផ្លូវទឹកហូរ»

ជុំវិញបញ្ហានេះ លោក កែវ សាវឿន ចៅសង្កាត់ចាក់អង្រែលើ មានប្រសាសន៍ថា បញ្ហាទឹក​លិច​ផ្លូវ និងផ្ទះប្រជាពលរដ្ឋនេះ លោកបានចុះដោះស្រាយជាច្រើនលើកច្រើនសារ​ហើយ ហើយ​ឥឡូវ​នេះមិនមានភូមិណាក្នុងសង្កាត់ចាក់អង្រែលើលិចទឹកទៀតទេ ព្រោះសង្កាត់បាន​រៀបចំ​ប្រព័ន្ធលូថ្មីហើយ។ លោកថា ពីមុនដោយសារតែអាជ្ញាធរមិនទាន់រកកន្លែង​រំដោះ​ទឹកលូ​ចេញ ហើយថ្ងៃស្អែកនេះ ខាងសង្កាត់នឹងដាក់ដេញថ្លែគម្រោងស្ដារប្រព័ន្ធលូថ្មី ដើម្បីបញ្ចៀស​ការ​លិចទឹក ហើយទឹកទាំងនោះនឹងបង្ហូរទៅស្ថានីយ៍ទឹកបឹងត្របែក​។

លោក សាវឿន ថ្លែងថា៖ «កន្លែងដែលក្មួយសួរហ្នឹងណា៎ ពូនឹងដាក់ដេញថ្លៃថ្ងៃស្អែក ធ្វើទាំង​អស់​ផ្លូវហ្នឹង រៀបប្រព័ន្ធលូឡើងវិញ ថ្មីទាំងអស់ ចាក់បេតុងផ្លូវអត់ឱ្យមានរលាក់ទៀតទេ»

លោកបន្តថា៖ «ឥឡូវគ្មានកន្លែងណាលិចទេ ព្រោះយើងធ្វើលូអស់ហើយ គ្រាន់តែវាហូរ​យឺត​បន្តិចយើងរកប្រព័ន្ធឃើញអស់ហើយ និយាយឱ្យចំអភិវឌ្ឍគ្រប់កន្លែង​អត់មាន​ឱ្យ​ទឹក​លិច​ទៀត​ទេ»។

យ៉ាងណាមិញ​ ចៅសង្កាត់រូបនេះបដិសេធថា មិនមានទឹកស្អុយលិចផ្លូវ ឬផ្ទះប្រជាពលរដ្ឋ​រាប់​ខែ ដូចប្រជាពលរដ្ឋបានលើកឡើងទេ។ ប៉ុន្តែតាមរយៈកិច្ចសម្ភាសន៍ជាមួយ ខេមបូចា ពលរដ្ឋ​ជាច្រើននាក់បានអះអាងថា ពិតជាមានទឹកស្អុយលិចផ្លូវ និងផ្ទះពួកគេរាប់ខែតាំងពីខែមេសា កំឡុងចូលឆ្នាំមកម្ល៉េះ។

លោកចៅសង្កាត់ថា៖ «​ហ្អេ៎!មានរាប់ខែឯណា អ្នកណាអ្នកនិយាយ? និយាយរាប់ខែអ៊ីចឹង​ពូមិន​អាចនិយាយបានទេ  ក្មួយឯងចុះមកមើលវិញ មកជិតពូតែម្ដងមក ពូដឹកដៃមកមើលជាមួយ​គ្នាក្មួយ ពូទើបតែស្តារហើយទេ នៅហ្នឹងស្ដារហូត»

សម្រាប់គម្រោងកែប្រព័ន្ធលូថ្មីឡើងវិញ លោកចៅសង្កាត់បញ្ជាក់ថា មានប្រវែង៣៣១ម៉ែត្រ និងចាក់បេតុងប្រវែង៣៣១ម៉ែត្រ ដោយខ្ទង់ចំណាយអស់ជិត៣ម៉ឺន៤ពាន់ដុល្លារ។

ផ្លូវបេតុងនៅតាមច្រកចូលផ្ទះប្រជាពលរដ្ឋ មានទឹកលិច និងមានក្លិនស្អុយ ស្ថិតក្នុង​ភូមិព្រែកតាគង់ សង្កាត់ចាក់អង្រែលើ ខណ្ឌមានជ័យ រាជធានីភ្នំពេញ។ រូបថតថ្ងៃ​ទី២០ ខែកញ្ញា ឆ្នាំ២០២២។ ខេមបូចា/ សុវណ្ណ ស្រីពេជ្រ

ជុំវិញបញ្ហានេះ លោកម៉េត មាសភក្ដី មិនអាចសុំការបកស្រាយបានឡើយ ដោយទូរសព្ទ​ចូល​ហើយ ប៉ុន្តែចុចបិទ។

យោងតាមរបាយការណ៍ចេញផ្សាយដោយអង្គការសង្គមស៊ីវិលចំនួន៤ កាលពីខែកក្កដា ឆ្នាំ​២០២០ បានឱ្យដឹងថា ប្រជាពលរដ្ឋជាងមួយលាននាក់នៅទូទាំងរាជធានីភ្នំពេញ កំពុង​ប្រឈម​មុខនឹងហានិភ័យនៃទឹកជំនន់កើនឡើង ហើយជាងមួយពាន់គ្រួសារទៀត​ប្រឈម​មុខនឹងការបណ្តេញចេញ បាត់បង់ប្រាក់ចំណូល និងអសន្តិសុខស្បៀង។

លោក សឿង សា​រ៉ន នាយក​ប្រតិបត្តិ​អង្គការ​សមាគម​ធាងត្នោត បានឱ្យ​ដឹង​ថា ការលុបបឹង​ធម្មជាតិ និងការកសាងហេដ្ឋារចនាសម្ព័ន្ធ ដោយមិនបានថ្លែងថ្លែងពីផលប៉ះពាល់ ជាចំណែក​មួយ ដែលធ្វើឱ្យប្រជាពលរដ្ឋដែលរស់នៅក្បែរតំបន់នោះ រងការជន់លិចផ្ទះសម្បែង និងប៉ះ​ពាល់​ដល់ជីវភាពរស់នៅ។

លោក សារ៉ន ថ្លែងថា៖ «កត្តាទីមួយហ្នឹងគឺប្រព័ន្ធបង្ហូរទឹកហ្នឹងវាអត់ល្អ ហើយទីពីរ​ អាង​ស្តុក​ទឹកសំខាន់ៗត្រូវបានលុប ដូចជាបឹងទំពុន និងជើងឯក។ មួយទៀត​ហេដ្ឋា​រចនា​សម្ព័ន្ធ​ការអភិវឌ្ឍក្នុងទីក្រុង ការស្ដាធ្វើផ្លូវឡើងវិញវាប៉ះពាល់​ទៅដល់​លំហូរ​នៃទឹកផងដែរ»។

លោកបន្ថែមថា ដើមចមនៃបញ្ហានេះ ក៏ដោយសារតែការគ្រប់គ្រងផ្នែកនគររូបនីយកម្ម​នៅ​ទៅ​ក្រុងមិនទាន់បានល្អ ខណៈកំណើននៃប្រជាពលរដ្ឋមានការកើនឡើងជាលំដាប់។ ដូច្នេះ ផែនការមេដែលសាលារាជធានីភ្នំពេញរៀបចំ គួរធានាឱ្យបាននូវសុខមាលភាព​ដល់​ប្រជាពលរដ្ឋ និងគូរបើកឱ្យមានការចូលរួមពីអ្នកពាក់ព័ន្ធនានា ដើម្បីដាក់ធាតុចូលអំពី​តម្រូវការ​ជាក់​ស្ដែងរបស់ពលរដ្ឋ។

លោក សារ៉ន បន្ថែមថា៖ «សូម្បីតែអង្គការធាងត្នោតយើង យើងអត់អាចទទួលបានការចូលរួម​ផងហ្នឹ​ង អ៊ីចឹង ប្រជាសហគមន៍ទូទៅក៏មិនបានចូលរួម និងដឹងពីចំណុចហ្នឹងដែរ ចឹងជារួម​ផែនការ​នៃការអភិវឌ្ឍនានា គួរតែត្រូវបានលើកកម្ពស់ឱ្យបានទូលំទូលាយ»

តាមរបាយការណ៍ដដែល បានបង្ហាញថា បឹងទំពុននិ​ងបឹងជើងឯក មានផ្ទៃសរុបចំនួន​១៥០០​ហិកតា ក៏ប៉ុន្តែបឹងនេះត្រូវបានផ្ដល់សិទ្ធិទៅឱ្យក្រុមហ៊ុន ING Holdings (ក្រុមហ៊ុន អាយ អិន ជី) ដែលមានទំនាក់ទំនងនឹងឧកញ៉ា​ អ៊ឹង ប៊ុន​ហ៊ូវ​ ដើម្បីធ្វើ​ការអភិវឌ្ឍ ក្នុងនោះមានក្រុមហ៊ុន​ធំៗ​ចំនួន៣ កំពុងលេចចេញជារូបរាងនៅក្នុង​គម្រោងអភិវឌ្ឍន៍បឹងទំពុននេះដែរ គឺ​ផ្សារ AEON Mall គម្រោង Chip Mong Land  ខុនដូរ Urban Village  គម្រោងបុរី ប៉េង ហូត និងអ័រគីដេ វីឡាជាដើម។

យ៉ាងណាមិញ ប្រភពដដែល បង្ហាញថា បឹងទាំងនេះមានសមត្ថភាពបម្រើសេវាសាធារណៈ​សំខាន់ៗចំនួនពីរទីមួយ កាត់បន្ថយទឹកជំនន់ពីរាជធានីភ្នំពេញ​ដោយការស្តុកទុកទឹក​ភ្លៀង​ទាំងអស់នៅក្នុងទីក្រុង និងមួយផ្នែកទៀត ចម្រុះទឹកស្អុយពីទីក្រុង មុនពេលវាហូរទៅ​ទន្លេ​បាសាក់៕

449 views

ព័ត៌មានទាក់ទង

ព័ត៌មានថ្មីៗ

អត្ថបទពេញនិយម