លោក អ៊ុត ជឿន សមាជិកក្រុមប្រឹក្សាស្រុកមោងប្ញស្សីដែលទើបជាប់ឆ្នោតថ្មីមកពីគណបក្សឆន្ទៈខ្មែរត្រូវបានកាត់ទោសឱ្យជាប់ពន្ធនាគារប្រាំពីរឆ្នាំពីបទ«រួមគំនិតក្បត់» ដែលជាប់ពាក់ព័ន្ធនឹងដំណើរវិលត្រឡប់មិនបានសម្រេចរបស់លោក សម រង្ស៊ី អតីតមេដឹកនាំគណបក្សសង្គ្រោះជាតិ (CNRP) កាលពីខែវិច្ឆិកា ឆ្នាំ២០១៩។
ក្រៅពីការផ្តន្ទាទោសលោក អ៊ុត ជឿន ឲ្យជាប់ពន្ធនាគាររយៈពេល៧ឆ្នាំ សាលាដំបូងខេត្តបាត់ដំបង ក៏បានចេញដីកាចាប់ខ្លួនផងដែរ នេះបើតាមការអះអាងរបស់អ្នកស្រី សេង រ័ត្នមុនី ភរិយារបស់លោក អ៊ុត ជឿន ដែលអ្នកស្រីបានចូលរួមស្តាប់ការប្រកាសសាលក្រមកាលពីថ្ងៃព្រហស្បតិ៍។
អ្នកស្រី រ័ត្នមុនី បាននិយាយថា៖ «នេះគឺជារឿងអយុត្តិធម៌សម្រាប់ប្ដីរបស់ខ្ញុំ ព្រោះគាត់មិនដែលមានចេតនាទុច្ចរិតចំពោះរដ្ឋាភិបាលទេ»។ អ្នកស្រីបានបន្តថា៖ «ក្រោយការរំលាយ [គណបក្សសង្គ្រោះជាតិ] គាត់បានក្លាយជាអ្នករត់តាក់ស៊ី ប៉ុន្តែគេ [តុលាការ] ចោទប្រកាន់គាត់ថា បានប្រព្រឹត្តបទល្មើស»។
អ្នកស្រីបាននិយាយថា ប្តីរបស់អ្នកស្រីទើបតែត្រូវបានប្រកាសចូលកាន់តំណែងជាផ្លូវការកាលពីថ្ងៃពុធ ក្នុងនាមជាសមាជិកក្រុមប្រឹក្សាស្រុកមោងឫស្សី ទីដែលគណបក្សឆន្ទៈខ្មែរទទួលបានអាសនៈច្រើនក្នុងការបោះឆ្នោតជ្រើសរើសក្រុមប្រឹក្សាខេត្ត ក្រុង ស្រុក ខណ្ឌ នាពេលថ្មីៗនេះ។
ថ្លែងប្រាប់ ខេមបូចា តាមទូរស័ព្ទ លោក អ៊ុត ជឿន បានឱ្យដឹងថា លោកបានទទួលព័ត៌មានអំពីសាលក្រមនេះ ហើយនឹងស្នើឲ្យមេធាវីរបស់លោកប្តឹងឧទ្ធរណ៍ប្រឆាំងនឹងសេចក្តីសម្រេចនេះ ដោយលោកអះអាងថា លោក«មិនដែលកៀរគរសមាជិកទេ»។
លោក អ៊ុត ជឿន បន្ថែមថា៖ «ខ្ញុំគិតថា វាអយុត្តិធម៌ ព្រោះខ្ញុំមិនបានធ្វើអ្វីខុសទេ។ ខ្ញុំនៅតែផ្ទះ ហើយរកស៊ីដូចធម្មតា។ បាទ! គេបានប្រកាសខ្ញុំជាសមាជិកក្រុមប្រឹក្សាជាផ្លូវការ ហើយថ្ងៃនេះ [ថ្ងៃព្រហស្បតិ៍] គេបានផ្តន្ទាទោសខ្ញុំ»។
លោក សំ វង្សតារា ប្រធានគណបក្សភ្លើងទៀន ខេត្តបាត់ដំបង ដែលបានចូលរួមសវនាការកាលពីខែឧសភាឆ្នាំនេះ បានមានប្រសាសន៍ថា តុលាការបានចោទប្រកាន់លោក អ៊ុត ជឿន ពីបទរួមគំនិតក្បត់ ដែលតាមចោទថា បានកៀរគរអ្នកគាំទ្រគណបក្ស ដើម្បីទៅទទួលលោក សម រង្ស៊ី កាលពីឆ្នាំ២០១៩។ ទោះបីជាយ៉ាងណា លោក សម រង្ស៊ី មិនបានវិលត្រឡប់ដូចការគ្រោងទុកនោះទេ។
លោកបានថ្លែងថា៖ «វាជាសេចក្តីសម្រេចរបស់តុលាការ ខ្ញុំមិនហ៊ានធ្វើអត្ថាធិប្បាយទេ»។ ដោយលោកបន្ថែមថា ពួកគាត់ដឹងច្បាស់ថា គេអាចកាត់ទោសពួកគាត់តាមរបៀបណា។ «យើងសោកស្ដាយដែលយើងនឹងបាត់បង់តំណាងម្នាក់របស់អ្នកភូមិ»។
លោក អ៊ិន គង់ជិត អ្នកគ្រប់គ្រងប្រចាំតំបន់នៃអង្គការលីកាដូ ដែលមានការិយាល័យនៅខេត្តបន្ទាយមានជ័យ បានសម្តែងការព្រួយបារម្ភថា សមាជិកគណបក្សប្រឆាំងនៅតែរងបណ្តឹងនិងការកាត់ទោស ខណៈព្យាយាមធ្វើសកម្មភាពរបស់ខ្លួន។
លោកបានមានប្រសាសន៍ថា៖ «វាគឺជាការកាត់ទោស [សមាជិកគណបក្សប្រឆាំង] ដែលជាការគំរាមបំបាក់ស្មារតីរបស់គាត់»។
លោក គង់ជិត ដែលបានចូលរួមសវនាការលើសំណុំរឿងរបស់លោក អ៊ុត ជឿន កាលពីខែឧសភា បានរំលឹកថា លោក ជឿន បានប្រាប់តុលាការថាលោកបានផ្តល់បទសម្ភាសន៍ដល់វិទ្យុអាស៊ីសេរី ដោយនិយាយថា លោកគ្រោងនឹងស្វាគមន៍លោក សម រង្ស៊ី នៅថ្ងៃទី៩ ខែវិច្ឆិកា ប៉ុន្តែថា លោកត្រូវបានគេឃុំខ្លួនក្នុងពន្ធនាគាររួចទៅហើយនៅពេលនោះ។
លោក គង់ជិត មានប្រសាសន៍ថា លោក ជឿន ត្រូវបានចាប់ខ្លួននៅខែតុលា ឆ្នាំ ២០១៩ ហើយត្រូវបានដោះលែងឱ្យនៅក្រៅឃុំនៅថ្ងៃទី១៤ ខែវិច្ឆិកា នៅឆ្នាំដដែលនោះ បន្ទាប់ពីមានការអំពាវនាវរបស់អតីតនាយករដ្ឋមន្ត្រី ហ៊ុន សែន ឱ្យមន្ត្រីតុលាការដោះលែងមេដឹកនាំគណបក្សប្រឆាំង ដែលត្រូវបានចោទប្រកាន់ពាក់ព័ន្ធនឹងលោក សម រង្ស៊ី នៅក្រៅឃុំបណ្តោះអាសន្ន។
កាលពីខែមុន សមាជិកគណបក្សឆន្ទៈខ្មែរប្រចាំខេត្តបាត់ដំបង លោក ភូ សុវណ្ណថា ដែលត្រូវឈរឈ្មោះក្នុងការបោះឆ្នោតក្រុមប្រឹក្សាខេត្ត ត្រូវបានចាប់ខ្លួនពីបទបរិហារកេរ្តិ៍ និងញុះញង់។
លោក ឌួង សារ៉ន ព្រះរាជអាជ្ញារងអយ្យការអមសាលាដំបូងខេត្តបាត់ដំបង បានបដិសេធមិនធ្វើអត្ថាធិប្បាយ ហើយបានបង្វែរសំណួរទៅលោកស្រី ជា ច័ន្ទរស្មី អ្នកនាំពាក្យសាលាដំបូងខេត្តបាត់ដំបង ប៉ុន្តែលោកស្រីមិនអាចឆ្លើយសំណួរបានទេ ដោយសារលោកស្រីជាប់រវល់ប្រជុំ។
លោក គីមសួរ ភីរិទ្ធ អ្នកនាំពាក្យគណបក្សឆន្ទៈខ្មែរ បានបង្វែរសំណួរទៅលោក គង់ ម៉ូនីកា អគ្គលេខាធិការគណបក្ស។ លោក គង់ ម៉ូនីកា មិនអាចទាក់ទងសុំការអត្ថាធិប្បាយបានទេ។ ចំណែកលោក អ៊ឹម ផាន់ណា ជាមេធាវីការពារក៏មិនអាចសុំការអធិប្បាយបានដែរ៕
ប្រែសម្រួលពីអត្ថបទភាសាអង់គ្លេស៖ Newly-Elected Mong Russei District Councilor To Serve Seven Years In Prison On “Plotting” Charges
