សមាគមសម្ព័ន្ធអ្នកសារព័ត៌មានកម្ពុជា

ប៉ូលិសអះអាងថា ជនជាតិជប៉ុន និងម៉ាឡេស៊ីត្រូវបានរំដោះចេញពីទីតាំង ប៉ុន្តែមិនមែនជាការបង្ខាំងផ្ទុយពីឆន្ទៈនោះទេ

រង្វង់មូលតោដ៏ល្បីក្នុងក្រុងព្រះសីហនុ ជាទីក្រុងជាប់មាត់សមុទ្រ ដែលមានទីកន្លែងមួយចំនួនជាប់ពាក់ព័ន្ធករណីឆបោក។ រូបភាព៖ ថ្ងៃទី២៤ ខែសីហា ឆ្នាំ២០២២។ (ខេមបូចា/ព្រីង សំរាំង)
រង្វង់មូលតោដ៏ល្បីក្នុងក្រុងព្រះសីហនុ ជាទីក្រុងជាប់មាត់សមុទ្រ ដែលមានទីកន្លែងមួយចំនួនជាប់ពាក់ព័ន្ធករណីឆបោក។ រូបភាព៖ ថ្ងៃទី២៤ ខែសីហា ឆ្នាំ២០២២។ (ខេមបូចា/ព្រីង សំរាំង)

នគរបាល​អះអាងថា ជនជាតិជប៉ុន១៩នាក់ ដែលត្រូវបានរំដោះចេញពីទីតាំង​មួយ​​នៅ​ក្នុង​ក្រុងព្រះសីហនុ កាលពីចុងខែមករា មិនត្រូវបានបង្ខាំង​ផ្ទុយពីឆន្ទៈរបស់ពួកគេនោះ​ទេ ហើយកំពុងត្រូវបានស៊ើបអង្កេតពី​សកម្មភាព​ល្មើស​ នេះបើយោងតាមលោក ឆាយ គឹមឃឿន អ្នកនាំពាក្យអគ្គស្នងការនគរបាលជាតិ។

លោក គឹមឃឿន បានឲ្យ​ដឹង​តាម​រយៈ​សារ​តេឡេ​ក្រាមមក​កាន់​ខេមបូចាថា៖ «តាមពិតពុំមានករណីចាប់បង្ខាំងនោះទេ ប៉ុន្តែយើងមានតម្រុយផ្សេង​ថា ពួកគាត់អាចបើកមុខរបរខុសច្បាប់ តែយើងមិនទាន់ចោទគេទេណា…ហើយ​យើង​កំពុង​ស៊ើប​អង្កេត ព្រោះ​យើង​មាន​ការ​លំបាក​ក្នុង​ការ​ស្វែង​រក​អ្នក​បក​ប្រែ​ភាសា​ជប៉ុន ដូច្នេះ​យើង​ត្រូវ​តែ​ប្រុង​ប្រយ័ត្ន»។

លោក គឹមឃឿន បន្ត​ថា អាជ្ញាធរ​បាន​ដឹង​ពីករណី​ជនជាតិ​ជប៉ុន​នេះ បន្ទាប់​ពី​ទទួល​បាន​​ព័ត៌មាន​ពី​ស្ថានទូត​ជប៉ុន​ប្រចាំ​រាជធានី​ភ្នំពេញ។ បន្ទាប់ពីការស៊ើបអង្កេតនេះ អាជ្ញាធរនឹងសម្រេចថា តើត្រូវចោទប្រកាន់ជនជាតិជប៉ុនទាំង​នេះ​ក្រោមច្បាប់​អន្តោប្រវេសន៍ ឬច្បាប់ល្បែងស៊ីសង​។

ស្ថានទូតជប៉ុនបានប្រាប់ខេមបូចា​តាមអ៊ីម៉ែលថា ពល​រដ្ឋ​ជប៉ុនចំនួន១៩នាក់ ជាបុរសដែលមានអាយុចន្លោះពី២០ទៅ៥០ឆ្នាំ ត្រូវបាន «រក​ឃើញ» នៅសណ្ឋាគារមួយក្នុងក្រុងព្រះសីហនុ កាលពីថ្ងៃទី២៤ ខែមករា។

ស្ថានទូត​បាន​លើកឡើង​ថា៖ «នគរ​បាល​​កម្ពុជា​បាន​នឹង​កំពុង​ប្រមូល​ព័ត៌មាន​ពី​ពួកគេ ហើយ​ស្ថានទូត​សូម​បដិសេធ​មិន​ធ្វើ​ការ​អត្ថាធិប្បាយ​លម្អិត​បន្ថែម​ទៀត​ទេ​​។ ស្ថានទូត​តែង​ផ្តល់​ដំបូន្មាន​ដល់​ជន​ជាតិ​ជប៉ុន​ឲ្យ​ប្រុង​ប្រយ័ត្ន​ជា​ចាំ​បាច់​អំពី​សុវត្ថិភាព​នៅ​កម្ពុជា»។

យោងតាមបុគ្គលិកសណ្ឋាគារបានឲ្យដឹងថា ជនជាតិជប៉ុនទាំង១៩នាក់នេះ​បានជួលបន្ទប់សណ្ឋាគារចំនួន៨នៅសណ្ឋាគារ Mary Beach Hotel and Resort ក្នុងសង្កាត់បួន​ក្នុង​ក្រុង​ព្រះសីហនុ។ លោក ជួន ណារិន ស្នងការ​នគរបាល​ខេត្ត​ព្រះសីហនុ បាន​ថ្លែង​ថា អាជ្ញាធរ​រកមិន​​ឃើញ​ភស្តុតាង​នៃ​ការ​បង្ខាំង​មនុស្សនិង​ការ​ធ្វើ​​ទារុណកម្ម​ទេ។

លោក ណារិន បាន​មាន​ប្រសាសន៍​ថា៖ «ពួកគេ​មាន​ឯកសារ​ត្រឹមត្រូវ លិខិតឆ្លងដែន និង​ទិដ្ឋាការ​មានសុពលភាព»។

ជា ស្រីពេជ្រ ជា​បុគ្គលិកទទួលភ្ញៀវនៅសណ្ឋាគារ Mary Beach Hotel and Resort បាននិយាយថា ជនជាតិជប៉ុនទាំងនោះបានជួលបន្ទប់សណ្ឋាគារសម្រាប់ស្នាក់នៅរយៈពេលយូរ ហើយនិយាយថា នាងជឿថា ពួកគេមិនត្រូវបានគេបង្ខាំងទេ។ បុគ្គលិកម្នាក់ទៀតបាននិយាយថា ជនជាតិជប៉ុនត្រូវបានអនុញ្ញាតឱ្យចាកចេញពីសណ្ឋាគារនេះ​ដោយសេរី។

នាងបាននិយាយថា៖ «ពួកយើង [នៅសណ្ឋាគារ] ក៏ភ្ញាក់ផ្អើលដែរ នៅពេលដែលប៉ូលិសចុះមក ដោយសារ​គ្មាន​ការបង្ខាំងមនុស្ស​ទេ ព្រោះពួកគេអាចដើរ ហាត់ប្រាណ និងហែលទឹកនៅសណ្ឋាគារបានដូចធម្មតាដូចភ្ញៀវផ្សេងទៀតដែរ​» ដោយ​បាន​បន្ថែម​ថា សណ្ឋាគារនេះ​ដំណើរការដូចធម្មតា។

ជន​ជាតិ​ជប៉ុន​មិន​មែន​ជា​ជន​បរទេស​តែ​មួយ​​គត់​ដែល​​ត្រូវ​បាន​រំដោះ​​ចេញ​ពី​ទីតាំង​​​ឆបោក​ដែល​ត្រូវ​បាន​គេ​ចោទ​ប្រកាន់​នោះ​ទេ។ ជនជាតិម៉ាឡេស៊ីចំនួនប្រាំនាក់​ត្រូវបានបង្ខំឱ្យធ្វើការក្នុងប្រតិបត្តិការឆបោកដែលមានមូលដ្ឋាននៅប្រទេសកម្ពុជា ហើយត្រូវបាននិរទេសត្រឡប់ទៅប្រទេសម៉ាឡេស៊ីវិញកាលពីសប្តាហ៍មុន​ បន្ទាប់ពីត្រូវបានជួយសង្គ្រោះ នេះបើយោងតាមការចុះផ្សាយរបស់កាសែត​ Malay Mail។

អាជ្ញាធរម៉ាឡេស៊ីបានអះអាងថា មានជនជាតិម៉ាឡេស៊ីយ៉ាងតិច៣០០នាក់ ដែល​បានដាក់ពាក្យបណ្ដឹងអំពីការបង្ខាំងដោយបង្ខំ​ ខណៈជនរងគ្រោះចំនួន ១១៣នាក់នៅជាប់គាំងនៅក្នុងប្រទេសកម្ពុជា ឡាវ និងប្រទេសដទៃទៀត។

តាម​សេចក្តី​រាយការណ៍ថា ជនជាតិ​ម៉ាឡេស៊ីត្រូវបាន​ចាត់ទុក​ថា មានតម្លៃសម្រាប់​ប្រតិបត្តិការឆបោកដោយសារតែពួកគេ​មាន​ជំនាញភាសាអង់គ្លេសនិងភាសាចិន។

លោក ដាទុក អែលឌីន ហ៊ូសៃនី ម៉ូដ ហាស៊ីម (Datuk Eldeen Husaini Mohd Hashim) ឯកអគ្គរដ្ឋទូតម៉ាឡេស៊ីប្រចាំកម្ពុជានិងលោក ស្រ៊ី អាប់ ចាលីល ប៊ីន ហាសសាន (Sri Abb Jalil Bin Hassan) មន្ត្រីអនុវត្តច្បាប់ម៉ាឡេស៊ីបានជួបជាមួយអាជ្ញាធរខេត្តព្រះសីហនុកាលពី​ថ្ងៃទី២៦ ខែមករា ដើម្បីពិភាក្សាអំពីករណី​ជួញដូរមនុស្ស។

ក្នុងកិច្ចប្រជុំនេះ អាជ្ញាធរខេត្តព្រះសីហនុបានរាយការណ៍ថា ជនជាតិម៉ាឡេស៊ីចំនួន៤៦៨នាក់ ក្នុងនោះស្រី៩៥នាក់ បានធ្វើការនៅក្នុងកាស៊ីណូ សណ្ឋាគារ អគារអាផាតមិន និងអគារផ្សេងៗក្នុងក្រុងព្រះសីហនុ។

អាជ្ញាធរកម្ពុជាបានច្រានចោលជាបន្តបន្ទាប់នូវរបាយការណ៍នៃការជួញដូរមនុស្ស និងការបង្ខាំងមនុស្សដោយអះអាងថា ជនរងគ្រោះដែលអះអាងទាំង​នោះ​មិនត្រូវបានបង្ខាំងផ្ទុយ​នឹងឆន្ទៈរបស់ពួកគេទេ​ ហើយគ្រាន់តែស្វែងរកជំនួយដើម្បីផ្លាស់ប្តូរកន្លែងធ្វើការរបស់ពួកគេប៉ុណ្ណោះ​។ ប៉ុន្តែ​ប៉ូលិស​ម៉ាឡេស៊ី​បាន​អះ​អាង​​ថា ការ​ជួញ​ដូរ​ជន​ជាតិ​ម៉ាឡេស៊ី​មក​កម្ពុជាគឺ​​ជា​កង្វល់​ធំ។

យោងតាម​កំណត់ហេតុ​នៃកិច្ច​ប្រជុំ លោក ហាសសាន​ បានប្រាប់អាជ្ញាធរក្រុងព្រះ​សីហនុថា៖ «យើងទទួលបាន​របាយការណ៍អំពីការជួញដូរមនុស្សពីប្រទេសម៉ាឡេស៊ី ក្រោមហេតុផលថា ជនរងគ្រោះត្រូវបានជួញដូរ ដោយស្នើសុំអន្តរាគមន៍ជួយសង្គ្រោះនៅក្រៅប្រទេស រួមទាំងនៅកម្ពុជាផងដែរ»។

លោក ស៊ឹង សែនករុណា អ្នកនាំពាក្យសមាគមសិទ្ធិមនុស្សអាដហុកមានប្រ​សា​សន៍ថា ការបង្ខាំងមនុស្សមានន័យថា រារាំងបុគ្គលណាម្នាក់មិនឱ្យចាកចេញពីអគារ ហើយអាជ្ញា​ធររដ្ឋតែមួយគត់ដែល​មាន​សិទ្ធិ​ធ្វើ​ដូច្នេះ មិនមែនក្រុមហ៊ុនឯកជននោះទេ។

លោក សែន​ករុណា បាន​មាន​ប្រសាសន៍ថា៖ «ខ្ញុំ​គិត​ថា ​អាជ្ញាធរ [​កម្ពុជា​] កំពុង​ព្យាយាម​និយាយ​សម្រាល​​​ពី​ស្ថានភាព​នេះ»​  លោកបានបន្ថែមថា៖ «បាទ! យើង​អាច​និយាយ​ថា ករណី​ទាំង​នោះ គឺ​​ជា​បញ្ហា​វិវាទ​ការងារ ប៉ុន្តែ​សហគមន៍​អន្តរជាតិ​ចាត់​ទុក​ថា ​បញ្ហា​ទាំង​នេះ​គឺ​​ជា​ការ​បង្ខាំង​មនុស្ស។ អាជ្ញាធរ​គួរតែ​ប្រយ័ត្ន ព្រោះ​ប្រសិនបើ​ពួកគេ​យល់​ខុស​អំពី​​និយមន័យ វា​នឹង​នាំ​ឲ្យ​មានការ​ចោទប្រកាន់​ធ្ងន់ធ្ងរ​មក​លើ​ប្រទេស​កម្ពុជា​»។

ក្នុងរយៈពេលពីរឆ្នាំចុងក្រោយនេះ ពលករបរទេសរាប់រយនាក់បានមកដល់ទីតាំង​មួយ​ចំនួន​ក្នុងក្រុងព្រះសីហនុ និងនៅទូទាំងប្រទេសកម្ពុជា បន្ទាប់ពីត្រូវបានសន្យាថា នឹងមានការងារដែលមានប្រាក់ខែខ្ពស់ ប៉ុន្តែ​បែរ​ជា​ត្រូវបានបង្ខំដោយ​ហិង្សាឱ្យដំណើរការឆបោកតាមប្រព័ន្ធអ៊ីនធឺណែត ដែល​ជាញឹកញាប់ធ្វើ​ជាមួយ​ជនរួមជាតិរបស់ពួកគេនៅ​ប្រទេសកំណើត។

អាជ្ញាធរខេត្តព្រះសីហនុបានអះអាងថា ខ្លួនបាន​ទទួលពាក្យបណ្ដឹងចំនួន២៣ពាក់ព័ន្ធនឹងការបង្ខាំងមនុស្ស និងពល​កម្ម​ដោយ​បង្ខំចាប់ពីថ្ងៃទី៣ ខែតុលា ឆ្នាំ២០២២ ដល់​ថ្ងៃទី១៧ ខែមករា ឆ្នាំ២០២៣។ ចាប់ពីខែមករា ដល់ខែសីហា ឆ្នាំមុន អាជ្ញាធរ​បានជួយសង្គ្រោះជនបរទេសចំនួន៨៦៥ នាក់ ដែលត្រូវបានជួញដូរ និងរត់ពន្ធមកកម្ពុជា នេះបើយោងតាមលោក ស ខេង រដ្ឋមន្ត្រីក្រសួងមហាផ្ទៃ។

លោក អាន រ៉ាម៉ា តំណាងអង្គការ​សង់ត្រាល់ជា​អង្គការ​ក្រៅរដ្ឋាភិបាល​​ដែល​ធ្វើ​ការ​​​ងារ​ទាក់ទងសិទ្ធិ​ការងារ​ប្រចាំ​ខេត្ត​ព្រះសីហនុ បានប្រាប់ខេមបូចា​ថា ចាប់តាំងពីពាក់កណ្តាលឆ្នាំ២០២២ ជនជាតិម៉ាឡេស៊ី និងឥណ្ឌូនេស៊ីកាន់តែច្រើនបានសម្រុកមកធ្វើការនៅកាស៊ីណូ និងសណ្ឋាគារក្នុងក្រុងព្រះសីហនុ។

លោក​មាន​ប្រសាសន៍ថា៖ «លំហូរ​ពលករ​បរទេស​មក​ធ្វើ​ការ​នៅ​ខេត្ត​ព្រះសីហនុ​នឹង​​ក្លាយ​ជា​ឱកាស​សម្រាប់​ឧក្រិដ្ឋជន​ប្រព្រឹត្ត​បទ​ឧក្រិដ្ឋ​​ជួញដូរ​មនុស្ស ​ព្រោះ​ជនបរទេស​ភាគច្រើន​ត្រូវ​បាន​រក​ឃើញ​ដោយ​គ្មាន​ឯកសារ​ត្រឹមត្រូវ»។

អង្គការសង់ត្រាល់​បានជួយសង្រ្គោះជនជាតិម៉ាឡេស៊ីម្នាក់កាលពីខែវិច្ឆិកាឆ្នាំមុន បន្ទាប់ពីនាងត្រូវបានបង្ខាំងអស់រយៈពេលប្រហែលមួយឆ្នាំនៅកាស៊ីណូមួយ​ដែល​គ្រប់គ្រងដោយជនជាតិចិនក្នុងក្រុងព្រះសីហនុដែលគេស្គាល់ថា Jin Bei 3​។ លោក រ៉ាម៉ា មាន​ប្រសាសន៍ថា នាងត្រូវបានគេសន្យាផ្តល់​ប្រាក់​ខែ​៨០០ដុល្លារ​ ក្នុង​មួយខែសម្រាប់ការងារផ្តល់​សេវា​ដល់​អតិថិជន ប៉ុន្តែតាមពិតទទួលបានត្រឹមតែ៣០០​ដុល្លារ​ ហើយត្រូវបានបង្ខំឱ្យធ្វើការរហូតដល់១៦​ម៉ោងក្នុងមួយថ្ងៃ។

លោក​មាន​ប្រសាសន៍ថា៖ «​យោង​តាម​បណ្តាញ​របស់​យើង​ដែល​ជា​កម្មករ​ដឹក​ជញ្ជូន​ម្ហូប​អាហារ​ ពេល​ពួក​គេ​យក​អាហារ​ទៅ​សណ្ឋាគារ និង​កាស៊ីណូ កាស៊ីណូ​ខ្លះ​​ដែល​ជា​កម្មសិទ្ធិ​របស់​ជនជាតិ​ចិន​នៅ​តែ​មិន​អនុញ្ញាត​ឲ្យ​កម្មករ​ចេញ​ពី​ទីតាំង​​នោះ​ទេ»។

នៅក្នុងរបាយការណ៍ស្តីពីការជួញដូរមនុស្សឆ្នាំ២០២២របស់រដ្ឋាភិបាលសហរដ្ឋអាមេរិក  ប្រទេសកម្ពុជាត្រូវបានទម្លាក់ទៅចំណាត់ថ្នាក់​ទី​៣ ដែលជាចំណាត់​ថ្នាក់​ទាបបំផុត​ ដោយសារអំពើពុករលួយជាសកល និងកង្វះ​ឆន្ទៈក្នុងការដាក់​ឱ្យអ្នកប្រព្រឹត្ត​ការ​ជួញ​ដូរមនុស្សទទួលខុសត្រូវ៕

ប្រែសម្រួលពីអត្ថបទភាសាអង់គ្លេស៖ Police Claim Japanese, Malaysian Nationals Removed From Compound Not Confined Against Will

 
926 views

ព័ត៌មានទាក់ទង

ព័ត៌មានថ្មីៗ

អត្ថបទពេញនិយម