សមាគមសម្ព័ន្ធអ្នកសារព័ត៌មានកម្ពុជា

ប្រជាពលរដ្ឋខេត្តព្រះសីហនុរងការបណ្ដេញចេញ ខណៈមនុស្សបួននាក់ត្រូវបានតុលាការចោទប្រកាន់ពីបទទន្រ្ទានដីឯកជន

អ្នកភូមិកំពុងឈរក្បែរខ្ទមដែលត្រូវបានរុះរើ ដោយពួកគាត់និយាយថាអាជ្ញាធរបានរុះរើបំផ្លាញកាលពីសប្ដាហ៍មុន។ រូបភាពថតកាលពីថ្ងៃទី២៤ ខែសីហា ឆ្នាំ២០២២។ ខេមបូចា/ព្រីង សំរាំង
អ្នកភូមិកំពុងឈរក្បែរខ្ទមដែលត្រូវបានរុះរើ ដោយពួកគាត់និយាយថាអាជ្ញាធរបានរុះរើបំផ្លាញកាលពីសប្ដាហ៍មុន។ រូបភាពថតកាលពីថ្ងៃទី២៤ ខែសីហា ឆ្នាំ២០២២។ ខេមបូចា/ព្រីង សំរាំង

ស្ទឹងហាវ៖ ផ្ទះ​ខ្ទម​ប្រហែល​ ២០០ ដែល​អាជ្ញាធរ​អះអាងថា​បាន​សាងសង់​ដោយ​ខុស​ច្បាប់​នៅ​លើ​ដី​កម្មសិទ្ធឯកជន​ក្នុង​តំបន់​សេដ្ឋកិច្ច​ពិសេស​ខេត្ត​ព្រះ​សី​ហនុ ត្រូវ​បាន​រុះរើកាលពីព្រឹក​​ថ្ងៃព្រហស្បតិ៍​ ដែលនេះជាផ្នែកមួយ​នៃបញ្ហា​ជម្លោះ​ដី​ធ្លី​ដែល​កំពុង​កើត​ឡើង​​ក្នុង​ស្រុក​ស្ទឹង​ហាវ ខេត្ត​ព្រះ​សីហនុ​។​

ប្រ​ជា​ពល​រដ្ឋ​លើកឡើង​ថា​អាជ្ញធរ​ជា​ច្រើន​រយ​នាក់​បាន​បំផ្លាញ​ខ្ទម​របស់​ពួកគាត់ និង​បាន​គំរាម​ចាប់​ខ្លួន​អ្នក​ដែល​បន្ត​ស្នាក់នៅ និង​តវ៉ា។

លោក ស៊ីម ប៊ុន​ធឿន ប្រជាពលរដ្ឋម្នាក់​ដែលបាន​មកតាំងទីលំនៅលើដីនេះ​ ឲ្យ​ដឹង​ថា៖ ​«ប្រ​ជា​ពល​រដ្ឋ​បាន​ចាក​ចេញ​ពី​ទីតាំង​នេះអស់​ហើយ ហើយ​ខ្ទប់​ទាំង​អស់​ត្រូវ​អាជ្ញាធរ​រុះ​រើ​ចោល»។ លោក​បន្ថែម​ថា៖ «​អាជ្ញាធរ​បាន​គំរាម​មិន​ឲ្យ​ប្រ​ជា​ពល​រដ្ឋ​ចូល​មក​ទី​នេះ​ទៀត បើ​មិន​​អីចឹង​នឹង​ត្រូវ​ចាប់​ខ្លួន​»។​

អ្នក​នាំ​ពាក្យ​រដ្ឋបាល​ខេត្ត​ព្រះ​សីហនុ លោក ឃាង​ ភារម្យ មាន​ប្រសាសន៍​ថា​អាជ្ញាធរ​មិន​បាន​បំផ្លាញ​ខ្ទម​ ឬ​ក៏​គំរាម​កំហែង​ប្រជា​ពល​រដ្ឋ​ទេ​ ប៉ុន្តែ​បាន​អំពាវ​នាវ​ឲ្យ​ពួក​គាត់​ស្ម័គ្រ​ចិត្ត​រុះ​រើ​ចេញ​ដោយ​ខ្លួន​ឯង​។

លោក​​បន្ថែម​ថា៖ «ឥឡូវ​​ពួក​គាត់​យល់ជាងមុន ហើយ​ស្ម័គ្រ​ចិត្ត​ប្រគល់​ដី​ឲ្យ​ទៅក្រុម​ហ៊ុន​វិញ និង​យល់​ព្រម​ចាក​ចេញពី​ដី​​នោះ​ដោយ​គ្មាន​ការ​តវ៉ា»។​

លោក​ឲ្យ​ដឹង​ទៀត​ថា អាជ្ញាធរ​បាន​អំពាវ​នាវ​ឲ្យ​ប្រជា​ពល​រដ្ឋ​ទាំង​នោះ​ចាកចេញ​ពី​ទី​តាំង​ដី​ដោយ​ស្ម័គ្រ​ចិត្ត និងមិន​ត្រូវ​ជឿមេក្លោងណាមួយ​ទៅ​​​ប្រព្រឹត្ត​បទ​ល្មើស​នោះ​ទេ​។​

លោក​បានបន្តថា៖​ «[​យើង] សូម​បញ្ជាក់​ជា​ថ្មី​ថា​យើង​​នឹង​ប្រើ​ប្រាស់​វិធានការ​ច្បាប់​តឹង​រឹង ដោយ​គ្មាន​ការ​លើក​លែងចំពោះ​អ្នក​នៅ​ពីក្រោយញុះញង់​បង្ក​ឲ្យ​មាន​អស្ថេរភាព និង​អនាធិបតេយ្យ​ក្នុង​សង្គម»។

មួយ​ថ្ងៃ​មុន​ដែល​ខ្ទម​របស់​ប្រ​ជា​ពល​រដ្ឋ​ត្រូវ​បាន​បំផ្លាញ អ្នក​យក​ព័ត៌​មាន​ខេមបូចា បាន​ទៅ​ដល់​ទី​តាំង​ជម្លោះនោះ​ និង​បាន​ឃើញខ្ទម​ជាច្រើន​​រយ​ខ្នង​បាន​សាងសង់​នៅ​ជំរាល​​​ភ្នំខាងក្រោយ​តំបន់​សេដ្ឋកិច្ច​ពិសេស​។​

ប្រ​ជា​ពល​រដ្ឋ​និយាយ​ថា ពួកគាត់​​មកពី​ខេត្ត​ផ្សេងៗ​គ្នា​នៅ​ប៉ុន្មាន​ឆ្នាំ​ចុង​ក្រោយ​នេះ ដោយ​ជឿ​ថា​នេះ​ជា​ដី​របស់​រដ្ឋ ដែល​ពួកគាត់​អាច​រស់​នៅ​បាន​។​

អ្នក​ភូមិម្នាក់​ឈរ​មុខ​ខ្ទមរបស់​គាត់​ដែល​ត្រូវ​រុះ​រើ​ចោល​ក្នុង​ដីជម្លោះ​ក្នុង​ស្រុក​ស្ទឹង​ហាវ ខេត្ត​ព្រះ​សីហនុ។ រូបភាព​ថត​កាលពី​ថ្ងៃទី​២៤ ​ខែសីហា ឆ្នាំ​២០២២។ ខេមបូចា/ ព្រីង​ សំរាំង

លោក ទឹម​ ភឿន វ័យ​ ៥១​ឆ្នាំ មកពី​ខេត្តកំពត លើក​ឡើង​ថា​លោក​បាន​មក​រស់​នៅ​តំបន់នេះ​​ជា​ច្រើន​ឆ្នាំ​មក​ហើយ​។ លោក​ប្រាប់​ខេមបូចាថា ពេល​លោក​មក​ដល់​ដំបូង លោក​បាន​កាប់​ឆ្ការ​ព្រៃ​ ហើយ​ក៏​គ្មាន​ការ​ហាម​ឃាត់​ពី​អាជ្ញាធរ​អ្វី​ដែរ ហើយ​លោក​ជឿ​ថា​លោក​គួរ​តែទទួលបាន​ដី​ដែល​បាន​បាន​កាប់​ឆ្ការ​នេះ។​​

លោក​បន្ថែម​ថា៖ «ខ្ញុំ​មិន​បាន​គិត​ថា​វា​ជា​ដីឯកជន​នោះ​ទេ ពេល​ខ្ញុំ​មក​ដល់​ទី​នេះ​ដំបូង ខ្ញុំ​គិត​ថា​វា​ជា​ទ្រព្យ​សម្បត្តិ​របស់​រដ្ឋ យើង​ជា​អ្នក​ក្រ ដូច​នេះ​យើង​កាប់​ឆ្ការ​ដី​នេះ​ដើម្បី​រស់​នៅ»។​

អ្នក​ស្រី សុខ សុគន្ធ ជា​ពល​រដ្ឋ​ម្នាក់​មកពី​ខេត្ត​កំពត​ដែរ និង​​បាន​ឆ្ការ​ព្រៃ​បាន​ដី ៤០០​ម៉ែត្រ​ការ៉េ។ អ្នកស្រី​​ឲ្យ​ដឹង​ថា​ គាត់​បាន​មក​រស់​នៅ​ទី​នេះជាច្រើន​ឆ្នាំ​មក​ហើយ​ដើម្បី​ធ្វើ​ការ និង​មក​តាម​អ្នក​ផ្សេង​ដែរដើម្បី​កាប់​ឆ្ការ​ដី​ព្រៃនេះ។​

អ្នកស្រី​បន្ថែម​ថា៖ «​រស់​នៅ​ទី​នេះ​ពិបាក​ណាស់ ពីព្រោះ​យើង​ប្រើ​ទឹក​ពីជ្រលង​ភ្នំ ហើយ​យើង​មិន​មាន​អគ្គិសនី​ប្រើ​ប្រាស់​ដែរ​»។ អ្នកស្រី​បន្ត​ថា៖ ​«ប៉ុន្តែ​ដោយសារ​តែ​យើង​ចង់​បាន​ដី​មួយ​កន្លែង​សម្រាប់​រស់​នៅ យើង​ត្រូវ​បង្ខំ​ចិត្តមក​កាប់​ឆ្ការ​​ដី​នៅទី​នេះ។ យើង​គិត​ថា​វាជា​ដី​របស់​រដ្ឋ យើង​ចង់​ឲ្យ​រដ្ឋ​ផ្ដល់​ដី​នេះ​មក​ឲ្យ​ប្រជា​ពល​រដ្ឋ​ក្រី​ក្រដូច​យើង»។​

អ្នកភូមិ​កំពុង​ជិះ​ម៉ូតូ និង​ដើរ​ក្បែរ​ខ្ទម​ដែល​រង​ការ​បំផ្លាញ។ រូបភាព​ថត​កាលពី​ថ្ងៃទី​២៤ ខែកញ្ញា ឆ្នាំ​២០២២។ ខេមបូចា/ព្រីង សំរាំង

ដំបូង​ឡើយ​ ក្នុង​ឆ្នាំ​២០២១ អាជ្ញាធរ​បាន​បញ្ជា​ឲ្យ​ប្រជា​ពល​រដ្ឋ​ចាក​ចេញ​ពី​ដី​ទាំងនោះ ប៉ុន្តែ​ថា​នៅ​ពេល​ថ្មីៗ​នេះ​មាន​ប្រជា​ពល​រដ្ឋ​កាន់​តែ​ច្រើន​បាន​ទន្ទ្រាន​ចូល​កាន់​កាប់​ដី​បន្ថែម​ទៀត​។​

មក​ដល់​ថ្ងៃទី១៦ ខែសីហា អាជ្ញាធរ​ដែល​ចុះ​មក​រុះ​រើ​ខ្ទម​ប្រជា​ពល​រដ្ឋ​ក៏​បាន​ប្រឈម​​​នឹង​ការ​តវ៉ា​ហិង្សា​ផង​ដែរ​។​

វីឌីអូ​ឃ្លីប​ដែល​បាន​ផ្សព្វ​ផ្សាយ​តាម​បណ្ដាញ​សង្គម បង្ហាញ​ថា​មាន​មនុស្ស​កាន់​​កាំបិត ជំពាម​កៅស៊ូ និង​ដបសាំង ការពារ​មិន​ឲ្យ​អជ្ញាធរ​ចូលទៅ​រុះរើ​ផ្ទះ​របស់​ពួកគេ​។​

អ្នកនាំពាក្យ​សាលា​ដំបូង​ខេត្ត​ព្រះ​សីហនុ លោក លី ចាន់ដារ៉ា មាន​ប្រសាសន៍​ថា មនុស្ស​បួន​នាក់​ត្រូវ​បាន​ចាប់​ខ្លួន​កាលពី​ថ្ងៃទី​១៦ ខែសីហា ឆ្នាំ២០២២ និង​បាន​ចោទ​ប្រកាន់​ពី​បទហិង្សាដោយ​ចេតនា​លើ​អ្នក​កាន់​កាប់​អចលនាទ្រព្យសុចរិត  និងរារាំង​​មន្ត្រី​សាធារណៈ។ លោក​ថា​អ្នក​ទាំង​បួន​ត្រូវ​បានឃុំ​ខ្លួន​បណ្ដោះ​អាសន្ន។ អាជ្ញាធរ​ថា​ ខ្លួន​កំពុង​ស្វែង​រក​អ្នក​ផ្ដើម​គំនិត​នៅ​ពីក្រោយ​ការ​ទន្ទ្រាន​កាន់​កាប់​ដី​នេះ​។​

ការ​ចោទ​ប្រកាន់​នេះ​តាម​មាត្រា២៥៣ និង​២៥៥ តាមច្បាប់​ស្ដី​ពី​ដីធ្លី​ និង​តាម​មាត្រា៥០៣ នៃ​ក្រម​ព្រហ្មទណ្ឌ ដែល​អាច​ត្រូវ​ជាប់​ពន្ធនាគារ​ពី​ប្រាំមួយខែ​​ទៅ​ពីរ​ឆ្នាំ ពីប្រាំមួយ​ខែទៅ​បី​ឆ្នាំ និង​មួយ​ខែ ទៅ​បី​ខែ​​ នេះ​បើ​ផ្អែម​តាម​មាត្រានីមួយៗ​។​

អ្នកស្រី ជាប សុធារី មន្ត្រី​សម្រប​សម្រួល​ផ្នែក​សិទ្ធិមនុស្ស​របស់​អង្គការ​អាដហុក​ប្រចាំ​ខេត្ត​ព្រះ​សីហនុ​​ដែល​បាន​តាម​ឃ្លាំមើល​ករណីនេះ មាន​ប្រសាសន៍ថា​សមាគម​កំពុង​សិក្សា​ករណី​នេះ​ជាមុន​សិន​មុននឹង​សម្រេច​ថា​ជួយ​គាំទ្រផ្នែក​ច្បាប់​ឬអត់​ដល់​អ្នក​ជាប់ឃុំទាំងបួននាក់នោះ​។​

អ្នក​ស្រី​ថា​ប្រជា​ពល​រដ្ឋ​ភាគ​ច្រើន​ដែល​មក​កាន់​​តំបន់​នេះ​គឺ​មកពី​ខេត្ត​កំពត និង​កំពង់​ស្ពឺ ហើយ​ថា​មក​ខេត្ត​ព្រះ​សីហនុ​ដើម្បី​រក​ការងា​រធ្វើ​។​

អ្នកស្រី​បន្ថែម​ថា៖ «ពួកគាត់​លើក​ឡើង​ថា​អាជ្ញាធរ​បាន​ហាមឃាត់​​ពី​រ​បី​ដង​មក​ហើយ​មិន​ឲ្យ​រស់នៅ​ទីនេះ ប៉ុន្តែ​ថា​ពួកគេ​នៅ​តែ​បន្ត​កាប់​ឆ្ការ​ដី​ និង​អះអាង​ថា​ពួកគេគ្មាន​កន្លែង​រស់​នៅ​»។ អ្នកស្រី​បន្ត​ថា៖ «​កន្លែង​នេះ​ងាយ​ស្រួល​សម្រាប់​ពួកគាត់​ ពីព្រោះ​អាច​ធ្វើ​ការ​នៅ​ក្នុងតំបន់​សេដ្ឋកិច្ចពិសេស​នៅ​ក្បែរ​នោះ»។​

អ្នកស្រី​ឲ្យ​ដឹង​ទៀត​ថា៖ «​ពួកគាត់មិន​ដឹ​ងថា​​ដី​នេះ​មាន​ម្ចាស់។ ពួកគាត់មកទី​នេះដោយសារ​​​ពួកគាត់យល់​​​ថាដី​នេះ​គ្មាន​មនុស្ស​រស់​នៅ និង​ជា​កន្លែង​ពួកគាត់​អាច​រស់​នៅ​បាន»។​

អ្នក​ភូមិ​ជិះ​ម៉ូតូ​នៅ​កន្លែង​ដី​ជម្លោះ​នៅ​ក្នុងស្រុក​ស្ទឹង​ហាវ ខេត្ត​ព្រះសីហនុ។ រូបភាព​ថត​កាលពី​ថ្ងៃទី​២៤ ខែសីហា ឆ្នាំ​២០២២​។ ខេមបូចា/ ព្រីង សំរាំង​

អ្នកស្រី សុធារី បន្ថែម​ទៀត​ថា បើ​តាម​ឯកសារ​របស់​អាជ្ញាធរ​ខេត្តព្រះ​សីហនុ​បាន​បង្ហាញ គឺដី​នោះ​ត្រូវ​បាន​ប្រគល់ទៅ​ឲ្យ​ក្រុម​ហ៊ុន​ឯកជន​។ យ៉ាងណា​អ្នកស្រី​ថា ការ​ទុក​ដី​ទំនេរ​ច្រើន​ឆ្នាំ​ដោយ​មិន​ប្រើ​ប្រាស់​អាច​ធ្វើ​ឲ្យ​មាន​ការ​ភាន់​ច្រឡំ​។​

អ្នកស្រី​បន្ត​ថា៖ «​ក្រុម​ហ៊ុន​មិន​បាន​សាងសង់​ហេដ្ឋារចនាសម្ព័ន្ធ​អ្វី​នៅ​ទីនោះទេ​។ បើសិន​ជា​ក្រុម​ហ៊ុន​អភិវឌ្ឍហេដ្ឋារចនាសម្ព័ន្ធ ឬ​ដាក់​សញ្ញា​បញ្ជាក់​អត្តសញ្ញាណនៅទី​តាំង ប្រ​ជា​ពល​រដ្ឋ​នឹង​មិន​មក​រស់​នៅ​លើ​ទីតាំង​នោះទេ​»។​

អ្នកស្រី​បន្ត​ថា​ក្រុម​ហ៊ុន​ដែល​ទទួល​បាន​ដី​សម្បទាន​ត្រូវ​តែ​អភិវឌ្ឍ​នៅ​លើ​ទីតាំង​ក្នុង​រយៈពេល​សមស្រប​​ណា​មួយ​។​​

កាល​ពី​ឆ្នាំ​២០០៨ ​រដ្ឋាភិបាល​បាន​ចេញ​អនុក្រឹត្យ​កាត់​ដី​ជាង​ ២ ០០០​ហិកតា​នៃដីគំរប​ព្រៃ​ឈើ​ឲ្យ​ទៅ​ ​តំបន់​សេដ្ឋកិច្ចពិសេស​ខេត្តព្រះសីហនុ ទោះ​បី​ជា​ពេល​នេះ​តំបន់​សេដ្ឋកិច្ច​ពិសេស​នេះ​ប្រើ​ប្រាស់​តែ​ផ្ទៃ​ដី​មួយ​ផ្នែក​ប៉ុណ្ណោះ​ ៕

ប្រែសម្រួលពីអត្ថបទភាសាអង់គ្លេស៖ Sihanoukville residents evicted after four charged with encroaching private land

218 views

ព័ត៌មានទាក់ទង

ព័ត៌មានថ្មីៗ

អត្ថបទពេញនិយម