សមាគមសម្ព័ន្ធអ្នកសារព័ត៌មានកម្ពុជា

ភាសាខ្មែរ
  • English
  • ភាសាខ្មែរ

តុលាការ​ធម្មនុញ្ញថៃសម្រេចដកតំណែង​នាយករដ្ឋមន្ត្រីពី​លោកស្រី ផែថងថាន ស៊ីណាវ៉ាត្រា

លោកស្រីផែថងថាន ស៊ីណាវ៉ាត្រា កាលនៅជានាយករដ្ឋមន្ត្រី ថ្លែងក្នុងសន្និសីទសារព័ត៌មានមួយក្នុងប្រទេសកម្ពុជាកាលពីខែមេសា ឆ្នាំ២០២៥ ប៉ុន្មានខែមុនលោកស្រីត្រូវបានដកតំណែង។ (រូបភាព៖ ផ្សាយក្នុងហ្វេសប៊ុករបស់លោកនាយករដ្ឋមន្ត្រីកម្ពុជា ហ៊ុន ម៉ាណែត)
លោកស្រីផែថងថាន ស៊ីណាវ៉ាត្រា កាលនៅជានាយករដ្ឋមន្ត្រី ថ្លែងក្នុងសន្និសីទសារព័ត៌មានមួយក្នុងប្រទេសកម្ពុជាកាលពីខែមេសា ឆ្នាំ២០២៥ ប៉ុន្មានខែមុនលោកស្រីត្រូវបានដកតំណែង។ (រូបភាព៖ ផ្សាយក្នុងហ្វេសប៊ុករបស់លោកនាយករដ្ឋមន្ត្រីកម្ពុជា ហ៊ុន ម៉ាណែត)

តុលាការធម្មនុញ្ញថៃ​នៅថ្ងៃទី២៩ ខែសីហា បាន​សម្រេច​ដក​តំណែង​លោក​ស្រី ផែថងថាន ស៊ីណាវ៉ាត្រា ពី​តំណែង បន្ទាប់ពី​តំណែង​លោក​ស្រី​ត្រូវ​បាន​ព្យួរ​មួយ​រយៈ​​។ តុលាការ​ធម្មនុញ្ញថៃ​បាន​រក​ឃើញ​ថា ​លោក​ស្រី​បាន​បំពាន​ទៅ​នឹង​ក្រម​សីលធម៌​ក្នុង​ការ​ដឹក​នាំ​ទាក់​ទង​នឹង​ការ​និយាយ​ទូរសព្ទ​ជាមួយ​អតីត​នាយក​រដ្ឋមន្ត្រីកម្ពុជា លោក ហ៊ុន សែន​ ដែលបច្ចុប្បន្ន​ជា​ប្រធានព្រឹទ្ធសភា​។​

ក្នុង​សេចក្ដី​សម្រេច​៦ទល់​នឹង​៣ តុលាការ​បាន​លើក​ឡើង​ថា​លោក​ស្រី​ផែថងថាន ស៊ីណាវ៉ាត្រា ​បាន​គិត​ពី​ប្រយោជន៍​បុគ្គល​ច្រើនជាង​ប្រយោជន៍​ជាតិ និង​បាន​បំផ្លាញ​មុខ​មាត់​ប្រទេស តាម​រយៈ​​ការ​បែក​ធ្លាយ​សារសន្ទនា​តាម​ទួរសព្ទ​ជាមួយ​​ប្រធាន​ព្រឹទ្ធសភា លោក ហ៊ុន សែន​ ដោយ​ទំនងជា​លោក​ស្រី​បាន​បន្ទន់​ឥរិយាបទ​នៅពេល​នោះ​។ តំណែង​នាយក​រដ្ឋមន្ត្រី​របស់​លោក​ស្រី​ត្រូវ​បាន​ព្យួរ​ ខណៈ​ដែល​ភាព​តាន​តឹង​​អាច​នាំ​ឲ្យ​មាន​​​ជម្លោះ​ព្រំដែន​នៃប្រទេស​ទាំងពីរ​ស្ទើរ​តែ​កើត​មាន​។​

ប៉ុន្មាន​សប្ដាហ៍​ក្រោយ​មក​ជម្លោះ​ប្រដាប់​អាវុធរយៈពេល​​ប្រាំថ្ងៃ​វាង​ប្រទេស​ទាំង​ពីរ​បាន​ផ្ទុះ​ឡើង ដែល​បណ្ដាល​ឲ្យ​មាន​ទាហាន និងពលរដ្ឋ​ស្លាប់ និង​របួស​ជា​ច្រើន​​នាក់​។​

​លោក​ស្រី ​ផែថងថាន ដែលជា​នាយក​រដ្ឋមន្ត្រីវ័យ​ក្មេង​ជាង​គេ​របស់​ថៃ គឺ​ជា​នាយក​រដ្ឋ​មន្ត្រីទី​ប្រាំ​មួយ​ហើយដែល​គាំទ្រ​ដោយ​មហាសេដ្ឋីត្រកូល​ស៊ីណាវ៉ាត្រា ​និង​​ត្រូវ​បាន​ដក​ចេញពី​តំណែង​​ដោយ​ក្រុម​យោធាថៃ ឬ​ដោយប្រព័ន្ធ​យុត្តិធម៌។ គ្រួសារ​ស៊ីណាវ៉ាត្រា បាន​តស៊ូយក​អំណាច​ផ្នែក​នយោបាយ​ពីរទសវត្សរ៍​មក​ហើយ​ជាមួយ​នឹង​គូរ​ប្រជែង​របស់​ខ្លួន​នៅ​ក្នុង​ប្រទេស​ថៃ​​។​

លោក​ស្រីជា​នាយក​រដ្ឋមន្ត្រី​ទីប្រាំ​ក្នុង​រយៈពេល​១៧​ឆ្នាំ ដែល​ត្រូវ​ដក​តំណែង​ដោយ​តុលាការ​ធម្មនុញ្ញ​។​

បេក្ខភាព​នាយក​រដ្ឋមន្ត្រី​ថ្មី​កំពុង​ស្ថិត​ក្នុង​ភាព​មិន​ច្បាស់​លាស់ គណបក្សភឿថៃ​របស់​លោក​ស្រី​ កំពុង​បាត់​បង់អំណាច​នៃការ​ចរចារ ខណៈ​ដែល​ឪពុក​លោកស្រី គឺ​លោក​ថាក់ស៊ីន ដែល​ជាអតីតនាយក​រដ្ឋមន្ត្រី និង​ជា​មហាសេដ្ឋី​មួយ​រូប និង​មាន​ឥទ្ធិពល​នៅ​ក្នុង​បក្ស​កំពុង​តែ​រួម​រឹត​ដោយ​បណ្ដឹង​នៅ​តុលាការ។​​

នាយក​រដ្ឋមន្ត្រី​ស្ដីទី​លោក Phumtham Wechayachai ដែល​បាន​កាន់តំណែង​ជំនួស​លោក​ស្រី​ផែថងថាន​ នាពេល​កន្លង​មក​នឹង​នៅ​បន្ត​​ដឹក​នាំ​រដ្ឋាភិបាល​ចាំផ្ទះ​រហូត​រដ្ឋសភាបោះ​ឆ្នោត​ជ្រើស​រើស​មេដឹកនាំថ្មី ប៉ុន្តែ​ពេល​វេលាជ្រើស​រើស​មិន​ទាន់​កំណត់​នៅ​ឡើយ​។​

អ្នក​វិភាគ​នយោបាយ​កម្ពុជា​លោក ឯម សុវណ្ណារ៉ា មានប្រសាសន៍​ថា ​ការ​ដកតំណែងនេះ​ទំនង​ជា​មិន​ធ្វើ​ឲ្យ​មានការ​ប្រែប្រួល​អ្វីច្រើន​នៅ​ក្នុង​ប្រទេស​ថៃ​នោះទេ​​ ខណៈ​ដែល​រាជវង្ស យោធា និង​តុលាការ​បន្ត​ពង្រីកឥទ្ធិពល​របស់ខ្លួន​មក​លើ​អំណាច​នីតិប្រតិបត្តិ​។​

លោក​បន្ថែម​ថា ​រហូត​ដល់​មានការ​ជ្រើស​រើស​មេដឹកនាំ​ថ្មី លោក​នឹង​ផ្ដោត​សំខាន់​តាមដាន​មើល​ថា​តើ​មេដឹកនាំ​បន្ទាប់​អាច​នឹង​បន្ធូរបន្ថយ​ភាព​តាន​តឹង​រ​វាង​រដ្ឋាភិបាល​ថៃ និង​រដ្ឋាភិបាល​ក្រុង​កម្ពុជាបាន​ឬយ៉ាងណា​។​

អ្នកនាំពាក្យ​រដ្ឋាភិបាល​កម្ពុជា​លោក​ ប៉ែន បូណា បដិសេធអត្ថាធិប្បាយ​លើ​រឿង​នេះ ដោយថា​ក្រមសីលធម៌​ដឹក​នាំ​គឺ​ជា​រឿង​ផ្ទៃក្នុង​របស់​ថៃ​។​

នៅ​ល្ងាច​ថ្ងៃសុក្រ និងព្រឹកថ្ងៃសៅរ៍​នេះ ថ្នាក់ដឹកនាំកម្ពុជា រួម​ទាំង​លោក​នាយក​រដ្ឋមន្ត្រី ហ៊ុន ម៉ាណែត និង​លោក ហ៊ុន សែន ដែល​ជាតួអង្គសំខាន់​​នាំ​ឲ្យ​មានការ​ដក​តំណែង​លោក​ស្រី ​​ផែថងថាន នៅ​មិន​ទាន់​មាន​ការ​បញ្ចេញ​មតិជាសាធារណៈណា​មួយ​នៅ​ឡើយ​។

នៅព្រឹកថ្ងៃសៅរ៍នេះដែរ លោកនាយករដ្ឋមន្ត្រី ហ៊ុន ម៉ាណែត បានដឹកនាំគណៈប្រតិភូរាជរដ្ឋាភិបាលកម្ពុជា ចូលរួមកិច្ចប្រជុំកំពូលនៃអង្គការសហប្រតិបត្តិការសៀងហៃបូក នៅទីក្រុងធានជីន សាធារណរដ្ឋប្រជាមានិតចិន ពីថ្ងៃទី៣០ ខែសីហា ដល់ថ្ងៃទី១ ខែកញ្ញា ឆ្នាំ២០២៥៕

ប្រែសម្រួលពីអត្ថបទភាសាអង់គ្លេស៖ Thailand Court Ousts Paetongtarn Shinawatra, Premiership and Cambodia Relations in Flux

ព័ត៌មានថ្មី

អត្ថបទពេញនិយម