អាជ្ញាធរថៃបានចេញដីកាចាប់ខ្លួនសមជិកព្រឹទ្ធសភាកម្ពុជា លោក លី យ៉ុងផាត់ និងមនុស្សបួននាក់ផ្សេងទៀត ដែលមានទាំងជនជាតិចិនផង ដោយចោទប្រកាន់ថាបានជាប់ពាក់ព័ន្ធនឹងអំពើលាងលុយកខ្វក់ និងអំពើឆបោកតាមអនឡាញ។
សារព័ត៌មានថៃបានដកស្រងសម្ដីលោក Surapol Prembut ស្នងការនៃការិយាល័យស៊ើបអង្កេតបទល្មើសតាមប្រព័ន្ធបច្ចេកវិទ្យា កាលពីថ្ងៃអាទិត្យថា តុលាការព្រហ្មទណ្ឌបានចេញដីកាចាប់ខ្លួនលោក លី យ៉ុងផាត់ អាយុ៦៧ឆ្នាំ កាលពីថ្ងៃអង្គារសប្ដាហ៍មុន ព្រមទាំងមនុស្សស្និទ្ធនឹងលោកម្នាក់ឈ្មោះថា Chokchai Supapha វ័យ៣៧ឆ្នាំ និងជនជាតិចិនបីនាក់ផ្សេងទៀត។
កាលពីខែមុនរដ្ឋាភិបាលថៃបានសម្រេចដកសញ្ជាតិថៃពីលោក លី យ៉ុងផាត់ និងបានបង្កកទ្រព្យសម្បត្តិជាង២លានដុល្លារ ក្នុងចេតនាដាក់គោលដៅលើមន្ត្រីជាន់ខ្ពស់របស់កម្ពុជា ដោយចោទថាបានជាប់ព័ន្ធនឹងអំពើឆបោកតាមអនឡាញ។
លោក លី យ៉ុងផាត់ ដែលមានងារជាអ្នកឧកញ៉ា គឺជាសមាជិកព្រឹទ្ធសភារបស់គណបក្សប្រជាជនកម្ពុជា លោកធ្លាប់រងការចោទប្រកាន់ពីការរំលោភបំពានសិទ្ធិមនុស្ស រួមមានការជួញដូរមនុស្សក្នុងអគារឆបោកអនឡាញ។
លោក លី យ៉ុផាត់ បានចុចបិទទូរសព្ទពេលទាក់ទងសុំការអត្ថាធិប្បាយនៅថ្ងៃចន្ទនេះ ប៉ុន្តែកន្លេងទៅលោកបានបដិសេធការជាប់ពាក់ព័ន្ធទៅនឹងអំពើឆបោកតាមអនឡាញ និងអំពើជួយដូរមនុស្ស។ លោកបានប្រាប់ សារព័ត៌មានខេមបូចា នាពេលនោះថា លោក «ប្រកបរបរស្របច្បាប់» និងថារដ្ឋាភិបាលកម្ពុជានឹងចាត់វិធានការផ្លូវច្បាប់លើលោកបើសិនជាលោកប្រព្រឹត្តបទល្មើស។
អ្នកវិភាគនយោបាយលោក ឯម សុវណ្ណារ៉ា មានប្រសាសន៍ថា ក្នុងនាមជាអ្នកនយោបាយជាន់ខ្ពស់កម្ពុជា លោក លី យ៉ុងផាត់ គួរចេញសេចក្ដីថ្លែងការណ៍បញ្ជាក់ពីភាពស្អាតស្អំរបស់លោក និងបញ្ជាក់ថាលោកមិនមានកំហុសដូចការចោទប្រកាន់។
លោកបានថ្លែងថា៖ «យើងជារដ្ឋឯករាជ្យ និងត្រូវតែការពារប្រជាពលរដ្ឋរបស់យើងបើសិនជាពួកគាត់ស្អាតស្អំ និងការពារទ្រព្យសម្បត្តិពលរដ្ឋខ្មែរពេលដែលការចោទប្រកាន់មិនមែនជារឿងពិត»។
លោកបានបន្តថា បទល្មើសឆបោកតាមអនឡាញប៉ះពាល់ជាអវិជ្ជមានដល់មុខមាត់កម្ពុជា ទេសចរណ៍អន្តរជាតិ និងការវិនិយោគ ដោយសារតែការផ្សាយព័ត៌មានរបស់ប្រទេសជិតខាង ជាពិសេសតាំងពីកម្ពុជាខ្វះខាតប្រព័ន្ធផ្សព្វផ្សាយឯករាជ្យ ដើម្បីទាក់ទងឲ្យមានប្រសិទ្ធភាពជាមួយសហគមន៍អន្តរជាតិ។
លោកបន្ថែមថា៖ «កម្ពុជាត្រូវពង្រឹងកិច្ចសហការជាមួយប្រទេសនានាដែលមានកង្វល់នឹងអំពើឆបោកតាមអនឡាញ ដើម្បីដោះស្រាយបញ្ហា និងការពារមុខមាត់ជាតិ»។
អ្នកជំនាញឧក្រិដ្ឋកម្មឆ្លងដែនបានឲ្យដឹងថា សហរដ្ឋអាមេរិកបានដាក់ទណ្ឌកម្មលើលោក លី យ៉ុងផាត់ កាលពីឆ្នាំមុន ដែលការណ៍នេះនាំឲ្យមានកិច្ចខិតខំប្រឹងប្រែងគេចវេះពីការដាក់ទណ្ឌកម្មលើក្រុមហ៊ុនដែលជាប់ទាក់ទងនឹងលោក និងគ្រួសារលោក ហើយក្រុមហ៊ុនទាំងនោះ«ត្រូវបានបាត់ពីកំណត់ត្រាសាធារណៈ»។
ការិយាល័យប្រឆាំងការលាងលុយកខ្វក់របស់ថៃបានរឹបអូសទ្រព្យសម្បត្តិរបស់លោក លី យ៉ុងផាត់ នៅថៃប្រមាណជា២,១លានដុល្លារ ខណៈព័ត៌មានលម្អិតមិនទាន់ដឹងច្បាស់។
វិធានការប្រឆាំងនឹងលោក លី យ៉ុងផាត់ គឺជាការកំណត់គោលដៅថ្មីបំផុតមួយលើមន្ត្រីជាន់ខ្ពស់កម្ពុជាដោយចោទថាជាប់ពាក់ព័ន្ធនឹងអំពើឆបោកតាមអនឡាញ ខណៈភាពតានតឹងរវាងកម្ពុជា-ថៃ បានកើតឡើងកាលពីខែឧសភា និងកក្កដា ដែលបណ្ដាលឲ្យមានអ្នកស្លាប់ និងរបួសជាច្រើន។
កាលពីខែកក្កដា កន្លងទៅ អាជ្ញាធរថៃបានចុះបង្ក្រាបទីតាំងចំនួន១៩កន្លែងនៅក្នុង និងជុំវិញទីក្រុងបាងកក ដែលជាប់ពាក់ព័ន្ធនឹងលោក កុក អាន ដែលសមាជិកព្រឹទ្ធសភាកម្ពុជា និងជាអ្នកជំនួញផង។ បន្ថែមពីនេះអាជ្ញាធរថៃក៏បានចេញដីកាចាប់ខ្លួនលោក កុក អាន ផងដែរ។
អ្នកនាំពាក្យរដ្ឋាភិបាល លោក ប៉ែន បូណា និងអ្នកនាំពាក្យក្រសួងមហាផ្ទៃ លោក ទូច សុខៈ មិនអាចទាក់ទងសុំការអត្ថាធិប្បាយលើករណីលោក លី យ៉ុងផាត់ បានទេនៅថ្ងៃនេះ៕
ប្រែសម្រួលពីអត្ថបទភាសាអង់គ្លេស៖ Thailand Issues Arrest Warrant for Senator Ly Yong Phat for Alleged Money Laundering, Online Scams
