សមាគមសម្ព័ន្ធអ្នកសារព័ត៌មានកម្ពុជា

ការចរចាត្រីភាគី ករណីក្រុមហ៊ុនណាហ្គាវើលដ៍បញ្ឈប់បុគ្គលិកបានបរាជ័យ

តំណាងសហជីព​​ប្រចាំ​កាស៊ីណូ​ណាហ្គាវើលដ៍ បាន​ឲ្យ​ដឹង​នៅ​ថ្ងៃពុធ​នេះ​ថា ការ​ជួប​ចរចា​រវាង​បុគ្គលិក និង​ថ្នាក់គ្រប់​គ្រងក្រុម​ហ៊ុន​ ដែលរៀបចំ​ដោយ​ក្រសួងការងារ​បាន​បរាជ័យ​ក្នុង​ការ​ទប់​ស្កាត់​ការ​បញ្ឈប់​បុគ្គលិក​ជាង​១៣០០​នាក់​។​

ភាគី​ទាំង​បី​បាន​ជួ​បប្រជុំ​គ្នា​​ បន្ទាប់​ពីបុគ្គលិក​ណាហ្គាវើលដ៍ រួម​មាន​មេដឹក​នាំ​សហជីព​ផង កាលពី​ខែ​មេសា បាន​បរាជ័យ​ក្នុង​ការ​ចរចា​ជំហាន​ដំបូង​ជាមួយ​តំណាង​ក្រុម​ហ៊ុន​។​ នៅ​ដើម​ខែ​នេះ បុគ្គលិក​ជា​​ច្រើន​បាន​ដាក់​ពាក្យ​បណ្ដឹង​ទៅ​ក្រ​សួង​ការងារ ដើម្បី​ជួយ​អន្តរាគមន៍​ឲ្យ​បុគ្គលិក​ដែល​នឹង​ត្រូវ​បញ្ឈប់​ពីការ​ងារបាន​ចូល​ធ្វើ​ការ​វិញ​។

សហជីពទ្រទ្រង់សិទ្ធិការងារបុគ្គលិកកម្មករខ្មែរនៃក្រុមហ៊ុនណាហ្គាវើលដ៍(LRSU)ម្ដង​ហើយ​ម្ដង​ទៀត​បាន​ច្រាន​ចោល​គម្រោង​បញ្ឈប់​បុគ្គ​លិក​​នេះ។ សហជីព​​បាន​និយាយ​ថា​បុគ្គលិក​ចំនួន​១ ៣២៩ នាក់ ដែល​ត្រូវ​បញ្ឈប់​ពី​ការងារ​ បាន​ទទួល​សារ​ជាអក្សរ​ចាប់តាំងពី​ថ្ងៃទី​២៩ ខែឧសភា ដើម្បី​ចរចា​ពី​គម្រោង​បញ្ឈប់​ពួកគេ ដោយ​មិនមាន​តំណាង​ពី​ខាង​សហជីព​ចូល​រួម​។​

​យោងតាម​​សមាជិក​សហជីព​​ដែលបាន​ចូល​រួម​កិច្ច​ប្រជុំ​កាលពី​ថ្ងៃពុធ​បានឲ្យដឹងថា ថ្នាក់​គ្រប់​គ្រង​ក្រុម​ហ៊ុន​បាន​ប្រាប់អង្គប្រជុំ​ថា ​បុគ្គលិក​​៧០​ភាគ​រយ​ ក្នុងចំណោម​អ្នក​ត្រូវ​បញ្ឈប់​នោះបានបញ្ឈប់​ពី​ការងារ​ហើយ និងមាន​ប្រហែល​ជា​៤០០​នាក់​ផ្សេង​ទៀត​នៅ​បន្ត​ទាម​ទារ​​ចូល​ធ្វើ​ការ​វិញ​។

កញ្ញា ឈឹម ស៊ីថរ ប្រធាន​សហជីព​ LRSU ដែល​បាន​ចូល​រួម​កិច្ច​ប្រជុំ​ដែរ​នោះ បាន​ប្រាប់​ខេមបូចាថា​​ តំណាង​ក្រុម​ហ៊ុន​ណាហ្គាវើលដ៍ បាន​និយាយ​ថា​បុគ្គលិក​ដែល​នៅ​សល់​ជាសមាជិក​សហជីព និង​ជាថ្នាក់​ដឹក​នាំ​សហជីព​។

កញ្ញា ស៊ីថរ​ និយាយថា៖ «​តាម​ការ​ប្រជុំ​ព្រឹក​មិញ​នេះ យើង​ឃើញ​ថា​ខាង​ក្រុម​ហ៊ុន​នៅ​ប្រកាន់​ជំហរ​បញ្ឈប់​បុគ្គលិក​តាម​គម្រោង»។ កញ្ញា​បន្ថែម​ថា៖ «និយាយ​រួម គ្មាន​ដំណោះ​ស្រាយអ្វី​ទេ​លើ​ជម្លោះ​នេះ»។

កញ្ញា​លើកឡើង​ថា៖ «​ក្រុម​ហ៊ុន​បាន​បំពាន​ច្បាប់​ស្ដីពី​ការងារ ហើយ​វា​មិន​សមហេតុ​ផល​ទេ​ក្នុង​ការ​បញ្ឈប់​បុគ្គលិក​ជាង​១ ០០០​នាក់។ [ណាហ្គាវើលដ៍] បាន​បង្ហាញ​យ៉ាង​ច្បាស់​ថានឹង​បំបាត់​សំឡេង​សហជីព​»។​

បើ​តាម​កញ្ញា ស៊ីថរ តំណាង​សហជីព​បាន​ចោទ​ជា​សំណួរ​ទៅ​កាន់​មន្ត្រី​ក្រ​សួង​ការងារ​​ក្នុង​កិច្ច​ប្រ​ជុំ​ថា​​ តើ​ជំហរ​របស់​ក្រុម​ហ៊ុន​ណាហ្គាវើលដ៍​ស្រប​ទៅ​តាម​ច្បាប់​ស្ដីពី​ការងារ​ឬយ៉ាងណា​។ ប៉ុន្តែ​កញ្ញា​ថា មន្ត្រី​មិន​បាន​ឆ្លើយ​នឹង​សំណួរ​នេះទេ ជំនួស​មក​វិញ​បាន​បង្វែរ​ឲ្យ​សហជីព​ទៅ​សិក្សា​ច្បាប់​ពាក់ព័ន្ធផ្សេង​ទៀត​។​

កញ្ញា ឲ្យដឹង​ដែរ​ថា​កិច្ច​ប្រជុំ​ត្រីភាគី​នឹង​ធ្វើ​ឡើង​ម្ដង​ទៀត​នៅថ្ងៃទី​៣០ ខែមិថុនា​។​

​ក្រុម​ហ៊ុន​កាស៊ីណូ និង​សណ្ឋាគារ​ណាហ្គាវើលដ៍ បាន​ប្រកាស​កាលពីថ្ងៃទី​៨ ខែមេសា ថា​ខ្លួន​គ្រោង​នឹង​កាត់​បន្ថយ​ចំនួន​បុគ្គលិក​ ដោយសារ​តែ​បញ្ហាហិរញ្ញវត្ថុ​បង្ក​ឡើង​ដោយ​វិបត្តិ​កូវីដ១៩។ បញ្ហា​នេះ​​ធ្វើ​ឲ្យ​ប៉ះពាល់​ធ្ងន់​ធ្ងរ​ដល់​ដំណើរ​ការ​អាជីវកម្ម​អស់ជិត​មួយ​ឆ្នាំ មុន​ពេល​បង្ខំ​ចិត្ត​បិទ​ដំណើរ​ការ​បណ្ដោះអាសន្ន​នៅ​ខែមីនា។​ បុគ្គលិក​ជា​ច្រើន​បាន​ទទួល​សារ​ជូន​ដំណឹង​ មិន​យូរ​ប៉ុន្មាន​បន្ទាប់​ពី​សេចក្ដី​ជូន​ដំណឹង​នេះ និង​បាន​ស្នើ​ឲ្យ​បុគ្គលិក​ម្នាក់ៗ​ចាប់​ផ្ដើម​ចរចា​ក្នុង​ការ​បញ្ចប់​កិច្ច​សន្យាការងារ​។​

​​អ្នក​នាំ​ពាក្យ​ក្រ​សួង​ការងារ លោក ហេង សួរ បាន​បដិសេធ​អត្ថាធិប្បាយ​លម្អិត​លើ​លទ្ធផល​នៃ​កិច្ច​ប្រជុំ​នៅថ្ងៃពុធ​នេះ។

លោក​មាន​ប្រ​សាសន៍​ថា៖ «វាគឺជា​នីតិវិធី​ដែល​ត្រូវ​ការពេល​ច្រើន​សប្ដាហ៍​ដើម្បី​​បាន​លទ្ធផល​នៃ​ជម្លោះ​នីមួយៗ»។​

យុទ្ធនាការ​តស៊ូមតិ​តាម​អនឡាញ

បន្ទាប់​ពី​ការ​បរាជ័យ​ក្នុងការចរ​ចា​លើក​ដំបូង​ សមាជិក​សហជីព និង​បុគ្គលិក​ផ្សេង​ទៀត​បាន​ចាប់​ផ្តើម​ការ​តស៊ូមតិតាម​ប្រព័ន្ធ​អនឡាញ ដើម្បី​ទាម​ទារ​ការងារ​មក​វិញ​ ដោយ​យុទ្ធនាការ​នេះធ្វើ​ឡើង​ដោយ​បង្ហោះ​រូប​ភាព​ពួកគេកាន់​បដា​​លើ​បណ្ដាញ​សង្គម​។​

នៅ​លើ​បដាមាន​សរសេរថា៖ «​អ្នក​ណាមិន​ឈឺ​ចាប់ ពីព្រោះ​ពួក​យើង​បាន​ធ្វើ​ការ​ឲ្យ​ក្រុម​ហ៊ុន​អស់ជា​ច្រើន​ឆ្នាំ ហើយ​ចុងក្រោយ​[យើង]បានទទួល​សារ​បញ្ចប់​កិច្ច​សន្យា​ការងារ​ពី​ខាង​ក្រុម​ហ៊ុន»។ សំណេរ​លើ​បដា​សរសេរ​ទៀត​ថា៖ «ខ្ញុំ​បាន​ធ្វើ​ការ​ឲ្យ​ក្រុម​ហ៊ុន​មិន​ថា​ភ្លៀង ក្ដៅ ឈឺ ឬ​អស់​កម្លាំង ខ្ញុំ​មិន​ហ៊ាន​ឈប់​សម្រាក ហើយ​ចុងក្រោយ​យើង​ត្រូវ​គេ​បញ្ឈប់​ទៅ​វិញ​»។​

លោក ទុយ ខេងពលរិទ្ធ វ័យ​៥២​ឆ្នាំ ជាបុគ្គលិក​ម្នាក់​ដែល​​ចូល​រួម​ក្នុង​យុទ្ធនាការនេះ​ដែរ បានប្រាប់​ខេមបូចាថា បុគ្គលិក​នឹង​បន្ត​តស៊ូមតិ​តាម​ប្រព័ន្ធ​អនឡាញ​រហូត​បានទទួល​ដំណោះស្រាយ​មួយ​។​

លោក​ដាក់​ជា​សំណួរ​ថា៖ «​ណាហ្គាវើល​ដ៍​ប្រាប់​ពួក​យើង​ថា​ក្រុម​ហ៊ុន​ក្ស័យធន ដូច​នេះ​គេ​ត្រូវ​តែ​កាត់​បន្ថយ​បុគ្គលិក ប៉ុន្តែ​ហេតុ​អ្វី​ពួកគេ​សាងសង់​ណាហ្គា៣? » ដោយលោក​សំដៅ​គម្រោង​អភិវឌ្ឍន៍​របស់​ក្រុម​ហ៊ុន​ដែល​មាន​ទឹក​ប្រាក់​៤ពាន់​លាន​ដុល្លារ​។

ក្រុម​ហ៊ុនណាហ្គាវើលដ៍​មានបុគ្គលិក​ប្រហែល​​៨ ០០០​នាក់ បាន​បាត់​បង់​ប្រាក់ចំណូល និង​អត្ថប្រយោជន៍​ដោយ​សារ​ផល​ប៉ះពាល់​ពីវិបត្តិកូវីដ១៩ លើ​កាស៊ីណូ​។ ប៉ុន្តែ​ខណៈ​ដែល​បុគ្គលិក​ខ្លះ​បាន​យល់​ព្រម​កាត់​បន្ថយ​​ម៉ោង​ធ្វើ​ការ និង​ទទួល​ប្រាក់​ខែ​តិច​ជាង​មុន ក្រុម​ហ៊ុន​នៅ​តែ​បន្ត​ទទួល​បាន​ប្រាក់​ចំណេញ​។ ក្នុង​របាយការណ៍​ហិរញ្ញវត្ថុ​ចុងក្រោយ​របស់​ខ្លួន ក្រុម​ហ៊ុន​ណាហ្គា​វើលដ៍ បាន​បង្ហាញពី​ប្រាក់​ចំណេញ​១០២​លាន​ដុល្លារ​ក្នុង​ឆ្នាំ​២០២០ ធ្លាក់ពី​៥២១​លាន​ដុល្លារ​ដែល​រក​បាន​កាល​ពី​ឆ្នាំ​កន្លង​ទៅ​។​

លោក​ពលរិទ្ធ មាន​ប្រសាសន៍​ដែរថា លោក​​មិនប្រាកដ​ថាយុទ្ធនាការ​របស់​សហជីព​អាច​ជួយ​ឲ្យ​លោក​រក្សា​ការងារ​បាន​ជោគជ័យ​ឬយ៉ាងណា តែ​ថា​ការ​ខិត​ខំនេះ​ធ្វើ​ឡើង​ជំរុញ​ឲ្យ​មាន​ការ​គោរព​ច្បាប់ និង​មិន​ធ្វើ​ឲ្យ​អ្នកណា​ម្នាក់​​ឈឺ​ចាប់​។​

លោក​បន្ថែម​ថា​៖ «​យើង​សង្ឃឹម​ថា​ក្រុម​ហ៊ុន​នឹង​ផ្ដល់​ការងារ​ឲ្យ​យើង​វិញ…វា​មាន​ការ​លំបាក​ណាស់​ក្នុង​ការ​រក​ការងារ​ថ្មី ព្រោះ​ខ្ញុំ​ចាស់​ហើយ​»។​

បុគ្គលិក​ម្នាក់​ទៀត អ្នកស្រី​ លាង​ ម៉ៅម៉ាណែត វ័យ​៥២​ឆ្នាំ អ្នកគ្រប់​គ្រង​វេន​ការងារ​នៅ​ណាហ្គាវើល​ដ៍ ក៏​បាន​ទទួល​ការ​ជូនដំណឹង​ពី​ការ​បញ្ឈប់​ការងារ​នេះ​ដែរ​។

អ្នកស្រី​ឲ្យ​ដឹង​ថា៖ «​យើង​ជឿ​ថា​រដ្ឋាភិបាល អង្គការ​សង្គម​ស៊ីវិល និង​ដៃគូពាក់ព័ន្ធ​នឹង​ជួយ​ពួក​យើង»។

អ្នកស្រី​បន្ថែម​ថា៖ «​ខ្ញុំ​បាន​ធ្វើ​ការ​ឲ្យ​ក្រុម​ហ៊ុន​អស់​២៦​ឆ្នាំ​ហើយ…​ខ្ញុំ​បាន​ចំណាយ​ពេល​ស្ទើរ​ពាក់​កណ្ដាល​ជីវិត​ធ្វើ​ការ​សម្រាប់​ក្រុម​ហ៊ុន ហើយ​ឥឡូវ​ពេល​ខ្ញុំ​ជួប​ការលំបាក​ច្រើន​ដោយ​សារ​កូវីដ១៩ ក្រុម​ហ៊ុន​បញ្ឈប់​ខ្ញុំ​ពី​ការងារ»។​

លោក ឃុន ថារ៉ូ អ្នក​គ្រប់​គ្រង​កម្ម​វិធី​ការ​ងារ​ នៃ​មជ្ឈ​មណ្ឌល​សម្ព័ន្ធ​ភាព​ការងារ និង​សិទ្ធិ​មនុស្ស របស់អង្គការសង់ត្រាល់ មាន​ប្រ​សានស៍​ថា នីតិវីធី​ដោះ​ស្រាយ​ជម្លោះ​តម្រូវ​ឲ្យ​មន្ត្រី​បកស្រាយ​ច្បាប់​ឲ្យភាគី​ទាំងសងខាង​យល់​ស្រប​គ្នា​​។ ក្នុង​ករណី​ភាគីទាំងពីរ​មិន​អាច​ផ្សះ​ផ្សា​បាន សំណុំ​រឿង​នឹង​ត្រូវ​បញ្ជូន​ទៅ​ក្រុម​ប្រឹក្សា​អាជ្ញាកណ្ដាល​។​

លោកមានប្រសាសន៍​ថា៖ «​ខ្ញុំ​គិត​ថា​ក្រ​សួង​ការងារ គួរ​តែ​ប្រើ​សិទ្ធិ​អំណាច​ខ្លួន​ជំរុញ​ឲ្យ​និយោជក​គោរព​ច្បាប់»។ លោក​បន្ត​ថា​ កន្លង​មក​ណាហ្គាវើលដ៍​មិន​បាន​បង្ហាញពី​ចេតនា​ដោះស្រាយ​ជម្លោះ​នៅ​កម្រិត​ក្រ​សួង​នោះទេ​។​

​លោក ថារ៉ូ លើកឡើងថា បើ​សិនជា​ក្រុម​ប្រឹក្សា​អាជ្ញាកណ្ដាល​​មិន​អាច​​ដោះ​ស្រាយ​រឿង​នេះ ភាគីទាំង​ពីរ​អាច​ប្រើ​សិទ្ធិ​តាម​ច្បាប់​ដើម្បី​រក​ដំណោះ​ស្រាយ​ផ្សេង។ មេដឹក​នាំ​សហជីព​ និង​បុគ្គលិក​​អាច​ធ្វើ​កូដ​កម្ម ស្រប​ទៅ​តាម​ច្បាប់ ដើម្បី​ដាក់​សម្ពាធ​ឲ្យ​ក្រុម​ហ៊ុន​ចរចា​។ បើ​មិន​ដូចនេះទេ លោក​ថា ក្រុម​ហ៊ុន​ណាហ្គាវើលដ៍​ អាច​នឹង​មិន​ដោះ​ស្រាយ​តាម​ច្បាប់​រឿង​សហជីព និង​ថ្នាក់ដឹក​នាំ​សហជីព​រួ​ម​ទាំង កញ្ញា ស៊ីថរ ផង​។

លោក​​​បន្ថែម​ទៀត​ថា៖ «វា​នឹង​មាន​រូប​ភា​ព​អាក្រក់ បើ​សិនជា​ក្រុម​ហ៊ុន​ធ្វើ​តាម​ចិត្ត​ខ្លួន​លុប​បំបាត់​សហជីព​នៅ​កន្លែងធ្វើ​ការ»។ (រាយការណ៍​បន្ថែម​ដោយ សំ សុពេជ្រ)

ប្រែសម្រួលពីអត្ថបទភាសាអង់គ្លេស៖ Three-way NagaWorld negotiations fail to halt mass layoff

1,917 views

ព័ត៌មានថ្មីៗ

អត្ថបទពេញនិយម