បុគ្គលិកនៃក្រុមហ៊ុនណាហ្គាវើលដ៍ស្នើសុំដល់អាជ្ញាធរកុំឱ្យលាបពណ៌ក្រុមកូដករថា ជាក្រុមធ្វើបដិវត្តពណ៌ឱ្យសោះ ពីព្រោះពួកគេគ្រាន់តែទាមទារឱ្យដោះស្រាយវិវាទការងារដែលជាបញ្ហាក្រពះរបស់ពួកគេតែប៉ុណ្ណោះ។
កញ្ញា ឈឹម ស៊ីថរ ប្រធានសហជីពទ្រទ្រង់កម្មករខ្មែរនៃក្រុមហ៊ុនណាហ្គាវើលដ៍ បានលើកឡើងថា សូមកុំលាបពណ៌ដល់ក្រុមកម្មករ ហើយការធ្វើកូដកម្មនេះ មិនមែនជាការធ្វើបដិវត្តពណ៌ ដូចការចោទប្រកាន់របស់មន្រ្តីជាន់ខ្ពស់របស់ក្រសួងការងារឡើយ ព្រោះនេះជាវិវាទការងាររវាងកម្មករ និងក្រុមហ៊ុន។
កញ្ញ ស៊ីថរ ឱ្យដឹងថា៖ «ច្បាស់ណាស់ថាការធ្វើកូដកម្មដោយសន្តិវិធីនេះ មិនមែនជាការធ្វើបដិវត្តពណ៌ដូចការលាបពណ៌របស់មនុស្សមួយក្រុមនោះទេ! សូមកុំលាបពណ៌ ព្រោះនេះជាបញ្ហាក្រពះ បញ្ហាសិទ្ធិសេរីភាពសហជីព បើគ្មានសមត្ថភាពដោះស្រាយកុំលាបពណ៌»។
នៅព្រឹកថ្ងៃទី២៤ ខែធ្នូ នេះ បុគ្គលិកនៃក្រុមហ៊ុនណាហ្គាវើលដ៍ប្រមាណជា១០០០នាក់ នៅតែរក្សាជំហរបន្តធ្វើកូដកម្មទាមទារឱ្យក្រុមហ៊ុនដ៏ធំមួយនេះ ដោះស្រាយការសំណើររបស់ពួកគេ បើទោះបីកូដករខ្លះរងការគម្រាមកំហែងពីសំណាក់ជនមិនស្គាល់មុខក្ដី។
នៅថ្ងៃទី៧នៃការធ្វើកូដកម្មរបស់បុគ្គលិកក្រុមហ៊ុនណាហ្គាវើលដ៍ កញ្ញា ឈឹម ស៊ីថរ បានធ្វើសន្និសិទ្ធប្រកាសថា ក្រុមកូដករទាំងអស់មិនដកថយក្នុងការធ្វើកូដកម្មឡើយ ប្រសិនបើក្រុមហ៊ុនណាហ្គាវើលដ៍នៅតែមិនព្រមដោះស្រាយបញ្ហាដែលបានលើកឡើងកន្លងមក។
កញ្ញា ស៊ីថរ បានឱ្យដឹងទៀតថា ការប្រជុំចរចារយៈពេល៣ថ្ងៃចាប់ពីថ្ងៃទី២១ដល់ថ្ងៃទី២៣ នៅសាលារាជធានីភ្នំពេញ និងក្រសួងការងារ គឺមិនទាន់អាចរកចំណុចរួមណាមួយឡើយ ដោយសាតែក្រុមហ៊ុនណាហ្គាវើលដ៍ រើសអើងសហជីព និងគ្មានចំណាប់អារម្មណ៍ក្នុងការដោះស្រាយជាមួយកម្មករ និងមិនចង់បញ្ចប់វិវាទមួយនេះ។
កញ្ញាបានថ្លែងថា៖ «គាត់[ក្រុមហ៊ុន] ទៅចូលរួមគ្រាន់តែចាំឆ្លើយថាទេ! ហើយកូដកម្មដែលនៅបន្តមកដល់ថ្ងៃនេះ អ្នកដែលមិនចង់បញ្ចប់កូដកម្មនេះគឺក្រុមហ៊ុនណាហ្គាវើលដ៍»។
កញ្ញាបានស្នើទៅអាជ្ញាធរ ឱ្យជួយការពារក្រុមកម្មករកូដករ ខណៈរយៈពេល៧ថ្ងៃនៃការធ្វើកូដកម្មដោយអហិង្សានេះ មានការគម្រាមកំហែងពីក្រុមមិនស្គាល់មុខមកលើសកម្មជន និងអ្នកចេញមុខតវ៉ាតាមដល់ផ្ទះ។
កញ្ញាបានថ្លែងយ៉ាងដូច្នេះថា៖ «តើប្រទេសសន្តិភាពឯណា ដែលប្រជាពលរដ្ឋត្រូវគេតាមដានដល់ថ្នាក់នេះ? ដូច្នេះសូមអជ្ញាធរជួយការពារក្រុមកូដករផង ព្រោះរយៈពេលកន្លងមកនេះ មានការធ្វើទុក្ខបុកម្នេញមកលើអ្នកសម្ដែងមតិ អ្នកកាន់ក្បាលមេក្រូ គឺត្រូវបានជនស៊ីវិលមិនស្គាល់មុខជិះតាមគម្រាមកំហែងទៅដល់ផ្ទះ»។
លោក ហេង សួរ អ្នកនាំពាក្យក្រសួងការងារ មានប្រសាសន៍នៅលើទំព័រហ្វេកប៊ុករបស់លោកកាលពីថ្ងៃអាទិត្យសប្តាហ៍មុនថា ករណីវិវាទនៅក្រុមហ៊ុនណាហ្គាវើលដ៍នេះ មន្ត្រីផ្សះផ្សាវិវាទការងារ បានខិតខំដោះស្រាយ និងផ្សះផ្សាជាច្រើនលើក តាំងពីនៅកម្រិតក្រុមហ៊ុន ឡើងមកដល់កម្រិតក្រសួង ហើយចុងក្រោយដល់កម្រិតក្រុមប្រឹក្សាអាជ្ញាកណ្តាល។
លោកសួរបានមានប្រសាសន៍ថា៖ «នៅក្នុងលោកនេះមិនមានច្បាប់ ឬអនុសញ្ញាណាមួយ ដែលចែងថា ធ្វើការនៅកន្លែងណាមួយ គឺត្រូវធ្វើមួយជីវិតនោះទេ ឬហាមក្រុមហ៊ុន សហគ្រាសមិនឲ្យកាត់បន្ថយបុគ្គលិកនោះទេ»។ លោកសួរ បន្ថែមថា៖ «ការស្តាប់ការធានាអះអាងរបស់បរទេស ដែលកំពុងរងចាំដុតផ្ទះយើង នឹងនាំមហន្តរាយដល់ខ្លួនយើងវិញដែរ។ ជាលក្ខណបុគ្គល ខ្ញុំគាំទ្រទាំងស្រុងរាល់វិធានការច្បាប់របស់អាជ្ញាធរមានសមត្ថកិច្ច ក្នុងករណី ដែលមានភស្តុតាងអំពីការលូកដៃរបស់បរទេសណាមួយ ឬនៅពេលដែលហេតុផល និងវិជ្ជាជីវៈ ដើរដល់ផ្លូវទាល់»។
កញ្ញា ស៊ីថរ បានបន្តទៀតថា ភាគីក្រុមហ៊ុនបដិសេធដាច់ខាតមិនទទួលយកកម្មករដែលមកធ្វើកូដកម្មឱ្យចូលធ្វើការវិញ ហើយក្នុងចំណោមកម្មករនិយោជិតចំនួន៣៦៥នាក់ គិតត្រឹមថ្ងៃនេះ គឺនៅសល់តែ២៧៦នាក់ទេដែលពួកគេទាមទារចូលធ្វើការវិញ ក្រៅពីនោះប្រសិនបើក្រុមហ៊ុនណាហ្គាវើលដ៍ទូទាត់ប្រាក់សំណងឱ្យបានត្រឹមត្រូវតាមផ្លូវច្បាប់ស្ដីពីការងារ ពួកគេនឹងទទួលសំណងនោះ។
កញ្ញាថ្លែងទៀតថា៖ «ខាងក្រុមហ៊ុនបានបដិសេធដាច់ខាតមិនទទួលយកកម្មករចំនួន២៧៦នាក់ដែលចង់ចូលធ្វើការវិញក្នុងនោះមានថ្នាក់ដឹកនាំសហជីព សកម្មជនសហជីព ប្រតិភូបុគ្គលិក និងសមាជិកសកម្មរបស់សហជីព»។
ថ្វីបើមានការប្រកាសពីសហជីពយ៉ាងនេះក្ដី គេសង្កេតឃើញថា មិនឃើញមានការឆ្លើយតបពីខាងក្រុមហ៊ុនណាហ្គាវើលដ៍ឡើយ ចំណែកខាងអាជ្ញាធរក៏មិនមានការតបតដែរ ក្រៅតែពីការដាក់កងកម្លាំងល្បាតជុំវិញបរិវេណកូដកម្ម។
ប្រធានសហជីពរូបនេះ សម្ដែងការខកចិត្ត និងចាត់ទុកជារឿងបរាជ័យទាំងក្រុមហ៊ុន និងក្រសួងការងារ ពិសេសចំពោះក្រុមហ៊ុន និងក្រសួងការងារក្នុងការអសមត្ថភាពគណនាប្រាក់សំណងជូនកម្មករមិនបានត្រឹមត្រូវតាមច្បាប់ការងារ ។
កញ្ញាស៊ីថរ ឱ្យដឹងទៀតថា៖ «ជារឿងដ៏គួរឱ្យអាម៉ាស់ ដែលក្រុមហ៊ុនណាហ្គាវើលដ៍ មានបុគ្គលិកផ្នែកធនធានមនុស្ស និងផ្នែកជាច្រើនទៀតហើយមានបទពិសោធន៍ការងាររាប់ឆ្នាំ តែមិនចេះចែកលេខរកមធ្យមភាគ ហើយសូម្បីតែក្រសួងការងារក៏មិនចេះចែកលេខដែរ»។
ទាក់ទងនឹងវិវាទដ៏ចម្រូងចម្រាងនេះ លោក ឃុន ថារ៉ូ អ្នកគ្រប់គ្រងកម្មវិធីសិទ្ធិការងារនៃមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស ហៅកាត់អង្គការសង់ត្រាល់ (CENTRAL) បានសម្ដែងមតិថា ថ្វីបើមានការប្រជុំពីសាលាក្រុង និងក្រសួងការងារ តែក្រុមកម្មករនៅតែមិនអាចរកចំណុចរួមមួយដើម្បីដោះស្រាយបញ្ហានេះ ដោយសារតែក្រុមហ៊ុនណាហ្គាវើលដ៍មិនទាន់បានបង្ហាញជំហច្បាស់លាស់ពិសេសគឺការសប្បទាន ដែលជាចំណុចមួយសំខាន់ក្នុងការបញ្ចប់កូដកម្មនេះ។
លោកមានប្រសាសន៍ថា៖ «ចេតនារបស់ក្រុមហ៊ុន ក្រសួងការងារ ហាក់ដូចជាព្យាយាមក្នុងការពន្យាពេលដើម្បីស្វែងរកនូវដំណោះស្រាយ ក្នុងកំឡុងពេលដែលបងប្អូនកម្មករធ្វើកូដកម្ម។ ហើយក្រសួងគួរតែដើរតូនាទីមួយដែលមានឥទ្ធិពលធានាថាក្រុមហ៊ុនបង្ហាញឆន្ទៈ និងភាពស្មោះត្រង់ក្នុងការចរចា»។
លោកថា ទោះបីជាមានកំណត់ហេតុក្រោមការសម្របសម្រួលដោយក្រសួង ជាលទ្ធផលគឹមិនមានដំណោះស្រាយ ដែលហាក់ខុសពីស្មារតីនៃកិច្ចប្រជុំនៅសាលាក្រុងក្នុងលក្ខខណ្ឌពីរ ទីមួយគឺការទទួលយកបុគ្គលិក ទីពីរគឺការទូទាត់សំណង។
ចំណែកលោក ទូច កុសល ប្រធានសហព័ន្ធសហជីពកម្មនិយោជិតវិស័យទេសចរណ៍កម្ពុជា បានឱ្យដឹងដែរថា ការប្រកាសធ្វើកូដកម្មបន្តរបស់កម្មករ គឺជារឿងត្រឹមត្រូវដែលទាមទាររហូតមានដំណោះស្រាយ ព្រោះកន្លងមកមានការបរាជ័យក្នុងការចរចាថ្វីបើមានការសម្របសម្រួលពីក្រសួងការងារ និងសាលាក្រុងក្ដី។
ក្រុមហ៊ុនណាហ្គាវើលដ៍ មិនអាចសុំការអត្ថាធិប្បាយបានឡើយកាលពីថ្ងៃសុក្រ៕
