រដ្ឋាភិបាលបានបើកការដ្ឋានសាងសង់ព្រែកជីកហ្វូណនតេជោជាផ្លូវការតម្លៃ១,៧ពាន់លានដុល្លារ ក្នុងគោលបំណងជំរុញសេដ្ឋកិច្ចតាមរយៈការដឹកជញ្ជូនតាមផ្លូវទឹក ខណៈដែលលោកនាយករដ្ឋមន្ត្រី ហ៊ុន ម៉ាណែត បានអះអាងថា នេះជាគម្រោងស្មារតីជាតិនិយម និងមិនបាត់បង់អធិបតេយ្យភាពទឹកដីនោះទេ។
នៅម៉ោង៩៖០៩នាទីព្រឹកថ្ងៃទី៥ ខែសីហា លោក ហ៊ុន ម៉ាណែត បានអញ្ជើញជាអធិបតីក្នុងពិធីចុចប៊ូតុងក្រហម ជុំវិញការបើកការដ្ឋានសាងសង់ព្រែកជីកហ្វូណនតេជោ ខណៈដែលបងប្អូនជនរួមជាតិទាំងអស់អបអរសាទរដោយវាយស្គរ។
លោក ហ៊ុន ម៉ាណែត មានប្រសាសន៍ថា ការកសាងព្រែកជីកហ្វូណនតេជោ គឺជាភស្តុតាងយ៉ាងច្បាស់លាស់ថា កម្ពុជាមានសន្តិភាព និងសេរីភាពពេញលេញ ក្នុងការកំណត់ជោគវាសនារបស់ខ្លួន រួមទាំងការគាំទ្ររបស់ប្រជាពលរដ្ឋទូទាំងប្រទេស ព្រែកជីកនេះនឹងលើកស្ទួយសេដ្ឋកិច្ចកម្ពុជា តាមរយៈការពង្រឹងឯករាជ្យភាព និងភាពជាកម្មសិទ្ធិនៃការដឹកជញ្ជូនតាមផ្លូវទឹក ដើម្បីលើកកម្ពស់ពាណិជ្ជកម្ម ឧស្សាហកម្ម កសិកម្ម ភស្តុភារ និងតំបន់គ្រប់គ្រងផ្លូវទឹកដែលមានសក្តានុពល។
លោកបានបញ្ជាក់ថា៖ «គម្រោងនេះមិនត្រឹមតែជាគម្រោងហេដ្ឋារចនាសម្ព័ន្ធផ្លូវទឹក ដែលអាចជួយសម្រួលទៅដល់ការដឹកជញ្ជូន និងកំណើនសេដ្ឋកិច្ច ហើយគម្រោងនេះ គឺមានលក្ខណៈពិសេសដែលភ្ជាប់ជាមួយនឹងលក្ខណៈភូមិសាស្ត្រ និងលក្ខណៈប្រវត្តិសាស្ត្ររបស់យើងតែម្តង»។
លោក ហ៊ុន ម៉ាណែត បានឱ្យដឹងថា ប្រទេសកម្ពុជាធ្លាប់គម្រោងជាច្រើនដូចជាគម្រោងកសាងស្ពាន គម្រោងព្រលានយន្តហោះ និងផ្លូវជាច្រើន ដោយប្រើប្រាស់ថវិការាប់ពាន់លានដុល្លារកន្លងមក ប៉ុន្តែគម្រោងព្រែកជីកហ្វូណនតេជោនេះ គឺខុសពីគម្រោងមុនៗ ជាគម្រោងចលនាជាតិនិយមមួយនៅក្រោយគម្រោងមួយនេះ ដូច្នេះប្រជាពលរដ្ឋគ្រប់ទីកន្លែងនៅទូទាំងប្រទេសបានប្រារព្ធពិធីអបអរសាទរ។
លោក ហ៊ុន ម៉ាណែត ថ្លែងថា៖ «មិនត្រឹមជាគម្រោងមួយហេដ្ឋារចនាសម្ព័ន្ធ ប៉ុន្តែជាគម្រោងមួយដែលមានលក្ខណៈជាតិនិយមខ្ពស់បំផុតនៅក្នុងរជ្ជកាលនេះ»។ លោនបន្តថា៖ «ខ្ញុំប្តេជ្ញាបន្តនូវគម្រូវីរភាពដ៏ឧត្តុង្គឧត្តមរបស់បុព្វបុរស និងវីរជនស្នេហាជាតិនិងស្នេហាសន្តិភាពរបស់យើង»។
លោកបានបន្តថា ទោះបីមានប្រជាពលរដ្ឋយ៉ាងច្រើនគាំទ្រ និងអបសាទរការកសាងព្រែកជីកហ្វូណនតេជោនេះ ប៉ុន្តែនៅមានមួយចំនួនតូចណាស់មិនគាំទ្រ ហើយនៅមានការព្រួយបារម្ភ និងមានបន្ទិលសង្ស័យខ្លាចបាត់បង់ទឹកដី និងអធិបតេយ្យភាព ដោយសារការកសាងព្រែកជីក។
លោក ហ៊ុន ម៉ាណែត បានលើកឡើងថា៖ «ខ្ញុំសូមសន្យាថា នឹងបន្តធ្វើអ្វីគ្រប់យ៉ាង ដើម្បីការពារនិងថែរក្សាសន្តិភាព ព្រមទាំងពង្រឹងសាមគ្គីភាព និងការឯកភាពជាតិ ជាពិសេសស្មារតីជាតិនិយម នៅក្នុងស្មារតីខ្មែរតែមួយ ឱ្យកាន់តែរឹងមាំ និងស្ថិតស្ថេរ ដើម្បីបន្តកសាង និងអភិវឌ្ឍន៍ប្រទេសឱ្យរីកចម្រើនរុងរឿង និងស្តារកិត្យានុភាពកម្ពុជាឡើងវិញ»។
លោកបានបន្តថា ការបាត់បង់ទឹកដីមិនអាចកើតឡើង ព្រោះបានបោះបង្គោលព្រំដែនមានមនុស្សរាប់លាននាក់រស់នៅទីនោះ ហើយគ្មានការប្រគល់ឲ្យអ្នកដទៃ ហើយក៏គ្មានអ្នកណាយកខេត្តភាគខាងកើត និងខាងត្បូងនៃព្រែកនោះដែរ។ លោកបន្តថា ការកសាងគម្រោងនេះ គឺមិនបាត់បង់ទឹកដីទេ ហើយគម្រោងនេះកសាងដោយក្រុមហ៊ុនកូនខ្មែរភាគច្រើន និងក្រុមហ៊ុនបរទេសមានភាគហ៊ុនតិចតួចប៉ុណ្ណោះ។
លោក ហ៊ុន ម៉ាណែត បន្ថែមថា ដើម្បីដោះស្រាយកង្វល់ និងមន្ទិលសង្ស័យនេះ រដ្ឋាភិបាលត្រូវតែកសាងព្រែកជីកនេះបង្ហាញដល់ប្រជាពលរដ្ឋទាំងអស់គ្នា ព្រោះការមានមន្ទិលសង្ស័យនេះឯង ដែលធ្វើឱ្យបែកបាក់ជាតិ។
លោកថ្លែងទៀតថា៖ «ធ្វើឱ្យបែកបាក់ជាតិ គឺកើតឡើងពីការមន្ទិលសង្ស័យគ្នានេះឯង»។
លោក ស៊ុន ចាន់ថុល អនុប្រធានទី១នៃក្រុមប្រឹក្សាអភិវឌ្ឍន៍កម្ពុជា ថ្លែងរាយការណ៍ថា ព្រែកជីកហ្វូណនតេជោនេះ កសាងដោយក្រុមបច្ចេកទេស និងជំនាញពីក្រសួងធារណការ និងដឹកជញ្ជូន និងអ្នកជំនាញក្រុមហ៊ុនឯកជនផងដែរ។
លោកបានបន្តថា ព្រែកជីកហ្វូណននេះមានមុខកាត់ខាងលើចំនួន១០០ម៉ែត្រ និងមុខកាត់ខាងក្រោមចំនួន៨០ម៉ែត្រ ដែលមានប្រវែង១៨០គីឡូម៉ែត្រដោយតភ្ជាប់រាជធានីភ្នំពេញទៅខេត្តកែប ដោយកាត់តាមផ្លូវទឹកក្នុងខេត្តកណ្តាល តាកែវ កំពត និងខេត្តកែប។
លោក ចាន់ថុល លើកឡើងថា ព្រែកជីកនេះអាចឱ្យនាវាដឹកទម្ងន់ទំនិញចន្លោះពី១ពាន់តោនទៅ៣ពាន់តោនបាន ហើយទឹកក្នុងព្រែកជីក គឺមានទាំងខែប្រាំង និងខែវស្សា ដែលខែប្រាំអាចមានជម្រៅ៥ម៉ែត្រ៤តឹក និងខែវស្សាអាចមានជម្រៅចន្លោះពី១០ម៉ែត្រទៅ១៥ម៉ែត្រ។
លោក ចាន់ថុល បន្ថែមថា ព្រែកជីកហ្វូណនតេជោ ត្រូវបានចំណាយថវិកាកសាងអស់ប្រមាណ១ពាន់៧លានដុល្លារសហរដ្ឋអាមេរិក។
លោក ស៊ុន ចាន់ថុល អនុប្រធានទី១នៃក្រុមប្រឹក្សាអភិវឌ្ឍន៍កម្ពុជា មានប្រសាសន៍កន្លងមកថា គម្រោងព្រែកជីកនេះ នឹងប៉ះពាល់ប្រជាពលរដ្ឋចំនួន ១,៥៨៥ គ្រួសារ ដីលំនៅដ្ឋាន ១៤៩.៥ហិកតា និងដីស្រែ និងដីចំការចំនួន ២,៩០០ ហិកតា។
ទំហំនៃផលប៉ះពាល់ គឺតិចតួច បើធៀបនឹងគម្រោងផ្សេងទៀត។ លោក ចាន់ថុល មានប្រសាសន៍ថា៖ «ផលប៉ះពាល់សង្គម គឺតិចតួចណាស់។ យើងអាចធ្វើ [ដោះស្រាយ] បាន»។
លោកបានបន្ថែមថា តាមពិត ព្រែកជីកនេះ នឹងផ្តល់អត្ថប្រយោជន៍ដល់ប្រជាពលកម្ពុជា រួមទាំងការបង្កើតការងារ ប្រាក់ចំណូលពីការដឹកជញ្ជូនតាមផ្លូវទឹក ការបង្កើតតំបន់ពាណិជ្ជកម្ម មជ្ឈមណ្ឌលដឹកជញ្ជូន កសិកម្ម និងកាត់បន្ថយការបំពុលបរិយាកាស។
ទោះបីជាយ៉ាងណា លោកមិនបានបញ្ជាក់អំពីសំណងជាក់លាក់សម្រាប់អ្នករងផលប៉ះពាល់នោះទេ៕
