សមាគមសម្ព័ន្ធអ្នកសារព័ត៌មានកម្ពុជា

រោងចក្រក្រដាសជនជាតិចិនមួយក្នុងខេត្តកណ្តាលត្រូវបានបញ្ជា​ឱ្យផ្អាក ក្រោយរកឃើញថាបានបង្ហូរសារធាតុពុលចូលទឹកព្រែកដែលពលរដ្ឋប្រើប្រាស់

ពលរដ្ឋជិះម៉ូតូឆ្លងកាត់ផ្លូវចូលមន្ទីរបរិស្ថានខេត្ដកណ្ដាល ស្ថិតនៅក្រុងតាខ្មៅ។ រូបថតនៅថ្ងៃ១០ ខែតុលា ឆ្នាំ២០២២។ ខេមបូចា/ ឃាង សុខមាន
ពលរដ្ឋជិះម៉ូតូឆ្លងកាត់ផ្លូវចូលមន្ទីរបរិស្ថានខេត្ដកណ្ដាល ស្ថិតនៅក្រុងតាខ្មៅ។ រូបថតនៅថ្ងៃ១០ ខែតុលា ឆ្នាំ២០២២។ ខេមបូចា/ ឃាង សុខមាន

មន្ទីរបរិស្ថានខេត្តកណ្ដាល​បានសម្រេចផ្អាកដំណើរការបណ្ដោះអាសន្នលើរោងចក្រ កំពង់​កន្ទួត​ មេនូហ្វេកធីរីង​ (ខេមបូឌា)​ ខូ អិលធីឌី ជារោងចក្រផលិតក្រដាសរបស់ជនជាតិចិន ស្ថិត​នៅភូមិត្បូងក្ដី ឃុំបារគូ ស្រុកកណ្ដាលស្ទឹង ដែលរកឃើញថា​បានបង្ហូរ​សារធាតុពុលចូល​ទឹក​ព្រែក​ដែលពលរដ្ឋកំពុងប្រើប្រាស់។ មន្ទីរបរិស្ថានក៍បានពិន័យ​ជាទឹក​ប្រាក់​៦០លានរៀលកាល​ពី​ថ្ងៃទី៧ ខែតុលា ឆ្នាំ២០២២។

លោក ពៅ សោមាណាក់ ប្រធានមន្ទីរបរិស្ថានខេត្ដកណ្ដាលបានថ្លែង​ដោយផ្ទាល់ជា​មួយ​ខេមបូចាថា មូលហេតុឈានដល់ការផ្អាកដំណើរការចង្វាក់ផលិតកម្មរោងចក្រ កំពង់​កន្ទួត​ មេនូហ្វេកធីរីង​ (ខេមបូឌា)​ ខូ អិលធីឌី ហ្នឹង ដោយសារតែរោងចក្រតែងតែបង្ហូរទឹកស្អុយដែល​ចេញពីការផលិតរបស់ខ្លួនបង្ហូរចូលព្រែកដែលពលរដ្ឋតែងតែប្រើប្រាស់ ហើយការបង្ហូរ​នេះ​បានធ្វើឱ្យប៉ះពាល់ដល់ពលរដ្ឋផ្ទាល់ចំនួន៣ភូមិនិងប្រយោលច្រើនភូមិផ្សេងទៀត។

លោកបន្តថា មុននឹងផ្អាកខាងរដ្ឋបាលស្រុកកណ្ដាលស្ទឹងបានធ្វើការណែនាំនិងតម្រូវឱ្យ​ខាង​រោងចក្រត្រូវធ្វើអាងប្រព្រឹតិ្ដកម្មមួយដើម្បីទប់ស្កាត់ក៏ដូចជាកែច្នៃទឹកស្អុយឱ្យក្លាយជាទឹកស្អាតសិនចាំបង្ហូរចូលព្រែក និងតម្រូវឱ្យស្ដារកាកសំណល់ប្លាស្ទិកចេញពីព្រែកដែលខាងរោងចក្រ​បានចាក់ចូល និងមួយទៀតគឺតម្រូវឱ្យយកទឹកស្អុយទៅពិនិត្យឱ្យបានច្បាស់លាស់សិន​ថាវា​ឈប់មានជាតិពុលទើបអាចដំណើរការវិញបាន  ប៉ុន្ដែខាងរោងចក្រមិនបានអនុវត្តតាម​និង​ព្យាយាមប្រឆាំងនិងប្រមូលមនុស្សដើម្បីតវ៉ាសុំបើកវិញ។

ប្រធានមន្ទីរបរិស្ថានថ្លែងថា៖ «ខាងខេត្ដមិនមែនជាអ្នកផ្អាកទេគឺខាងរដ្ឋបាលស្រុក​កណ្ដាលស្ទឹង​​អ្នកឱ្យផ្អាក គ្រាន់តែខេត្តចេញលិខិតគាំទ្រទៅសេចក្ដីណែនាំ​របស់រដ្ឋបាល​ស្រុក​កណ្ដាលស្ទឹងតែប៉ុណ្ណោះ។ ហើយចំណុចដែលខាងស្រុកផ្អាកខាងគាត់​ដោយសារគាត់​មិន​បានអនុវត្តទៅតាមការណែនាំរបស់អាជ្ញាធរដែលតម្រូវឱ្យខាងគាត់ធ្វើអាងប្រព្រឹត្ដិកម្មនិង​សម្របសម្រួលជាមួយប្រជាពលរដ្ឋ ប៉ុន្ដែគាត់មិនព្រមធ្វើ ហើយបែរជាហៅមនុស្សមកពីណា​មកតវ៉ា​មុខរោងចក្រគាត់ថែមទៀត»

លោក សោមាណាក់ បានឱ្យដឹងទៀតថា ការពិន័យនេះមិនមែនជាលើកទី១នោះទេ វាជា​លើក​ទី២ កាលពីលើកទី១ពិន័យ១០លានរៀលពីការបំពាន​ដែលពលរដ្ឋ​៣ភូមិប្ដឹង​រដ្ឋបាលស្រុក​នឹង​ខេត្តពីផលប៉ះពាល់ហ្នឹង ក្រោយមកខាងរោងចក្រក៏បានយល់ព្រមថានឹងធ្វើ​តាមការណែនាំ​របស់​មន្ទីរបរិស្ថានខេត្តកណ្ដាល ប៉ុន្ដែជាក់ស្ដែងខាងរោងចក្រធ្វើមិនបានរួចក៏លួចបើកទាំង​ដែលខាងរដ្ឋបាលស្រុកកំពុងឱ្យសាងសងអាងប្រព្រឹតិ្ដកម្មនិងធ្វើវិធានការផ្សេងៗ ហើយការ​ពិន័យចំនួន៦០លានរៀលជាការពិន័យលើកទី២ដោយសារតែលួចបើកនិងមិនព្រមស្ដារប្លា​ស្ទិកនិងបន្ដបង្ហូរទឹកចូលដដែល។

លោកបញ្ជាក់ថា៖ «ក្រោយពីមានការកោះហៅដោះស្រាយគ្នាជាមួយអាជ្ញាធរស្រុកនិងមន្ទីរ​បរិស្ថានខេត្ដកាលពីថ្ងៃទី៧ ខែតុលា ឆ្នាំ២០២២មក ខាងគាត់[រោងចក្រ កំពង់​កន្ទួត​ មេនូហ្វេកធីរីង​ (ខេមបូឌា)​ ខូ អិលធីឌី]យល់ព្រមទទួលកំហុសថានឹងព្រមបង់​ការផាក​ពិន័យ​ហ្នឹង ប៉ុន្ដែបានមួយថ្ងៃគាត់ប្រមូលមនុស្សធ្វើបាតុកម្មមុខរោងចក្រគាត់អីណា ហើយ​ធ្វើទាំងគាត់យល់ព្រមទទួលកំហុសហើយ»

ប្រធានមន្ទីរបរិស្ថានរូបនេះអះអាងបន្ដថា រោងចក្រ កំពង់​កន្ទួត មិនមែនត្រូវផ្អាក​រហូត​នោះ​ទេ នឹងអាចបើកដំណើរការវិញក្នុងករណីពួកគាត់​បានបំពេញតាមការណែនាំ​របស់​រដ្ឋបាល​ស្រុកកណ្ដាលស្ទឹងបាននោះនឹងបើកវិញបាន​ហើយ។

លោកបន្ដថា៖ «យើងមិនមែនបិទគាត់រហូតឯណា យើងគ្រាន់តែផ្អាកសិនតើ ពេលណាគាត់​បំពេញតាមការណែនាំ គាត់បើកវិញបានហើយ សុំកុំយល់ច្រឡំថាយើងបិទគាត់រហូត»

លោកក៏បានបញ្ជាក់បន្ថែមថា ករណីដែលផ្អាកដំណើរការរោងចក្រ កំពង់​កន្ទួត​ មេនូហ្វេកធីរីង​ (ខេមបូឌា)​ នេះ មិនមែនពាក់ព័ន្ធនឹងរឿងស៊ីសំណូកសូកប៉ាន់អ្វីមួយឬក៏បញ្ហា​មិនត្រូវ​រូវគ្នា​ដោយមានបញ្ហានៅពីក្រោយខ្នងណាមួយនោះទេ លោកថាវាពាក់ព័ន្ធការមិនគោរពច្បាប់​ដែលខាងរោងចក្រមិនបានធ្វើ ដូច្នេះលោកថាសុំកុំឱ្យពលរដ្ឋមានការយល់ច្រឡំ​លើរដ្ឋបាល​ស្រុក​ឬក៏ខេត្តឱ្យសោះ។

នៅក្នុងលិខិតមួយរបស់មន្ទីរបរិស្ថានខេត្តកណ្ដាលដែលខេមបូចាបានទទួលដោយបានចុះ​កំណត់ហេតុត្រួតពិនិត្យទីតាំងថ្ងៃទី២៧ ខែសីហា ឆ្នាំ២០២២ បញ្ជាក់ថា រោងចក្រ កំពង់​កន្ទួត​ មេនូហ្វេកធីរីង​ (ខេមបូឌា)​ ខូ​ អិលធីឌី មានទីតាំងស្ថិតនៅភូមិត្បូងក្ដី ឃុំបាគូរ ស្រុក​កណ្ដាលស្ទឹង ខេត្ដកណ្ដាល មានភាពខ្វះខាតដោយដំណើរការផលិតកម្ម​មិនមានបំពាក់អាង​ប្រព្រឹតិ្ដកម្ម​សំណល់រាវតាមលក្ខណៈបច្ចេកទេស ហើយបានបង្ហូរសំណល់រាវដែលមានពណ៌ និងក្លិនស្អុយចូលក្នុងដីកម្មសិទ្ធិឯកជនរបស់ប្រជាពលរដ្ឋមានលំនៅឋានក្បែរទីតាំងរោងចក្រ បង្កផលប៉ះពាល់ដល់ការរស់នៅប្រជាពលរដ្ឋនិង ការបំពុលប្រភពទឹក​សាធារណៈនិង​ទឹក​ប្រឡាយ​ស្រោចស្រព។

កន្លងមកក្រុមការងារមន្ទីរបរិស្ថានខេត្តកណ្ដាលបានចុះអប់រំណែនាំ និងបានដាក់​នូវវិធានការ​កែប្រែនូវចំណុចខ្វះខាតរបស់រោងចក្រចំនួន២លើក ប៉ុន្ដែនៅថ្ងៃទី២៦ ខែឧសភា ឆ្នាំ២០២២ ក្រុមការងារបានចុះពិនិត្យឃើញថា រោងចក្រមិនបានយកចិត្តទុកដាក់អនុវត្ដតាមវិធានការ​របស់ក្រុមការងារឡើយ ហើយនៅតែបង្ហូរសំណល់រាវបង្កឱ្យមានការបំពុលជាថ្មីបន្ថែមទៀត។

នៅក្នងលិខិតដដែលមាន៧ចំណុចដែលខាងមន្ទីរតម្រូវឱ្យខាងរោងចក្រធ្វើនិងអនុវត្ត ប៉ុន្ដែ​ក្នុង​នោះមាន៤ចំណុចដែលខាងរោងចក្រធ្វើបាន និងសល់៣ចំណុចដែលរោងចក្រធ្វើ​មិនបាន​ដូចជា ទី១ ត្រូវសម្របសម្រួលនិងដោះស្រាយឱ្យបានសមស្រប​ជាមួយប្រជាពលរដ្ឋ​ដែលរង​ផលប៉ះពាល់ពីការបង្ហូរសំណល់រាវមានពណ៌និងក្លិនស្អុយរបស់រោងចក្រ។ ទី២ ត្រូវប្រមូល​សំណល់បា្លស្ទិកដែលរោងចក្របានយកទៅចាក់ចោលនៅលើដីកម្មសិទ្ធិឯកជនរបស់​ប្រជាពលរដ្ឋចេញឱ្យអស់ និងត្រូវរៀបចំរោងទុកដាក់សំណល់រឹង(សំរាម) ឱ្យបានត្រឹមត្រូវ​រួចរាល់​ឱ្យបានមុនថ្ងៃ២៥ ខែមិថុនា ឆ្នាំ២០២២ ជាកំហិត។ ទី៣ ត្រូវរៀបចំសាងសង់​អាង​ប្រព្រឹតិ្ដកម្មសម្អាតសំណល់រាវស្របតាមលក្ខណៈបច្ចេកទេសឱ្យបានរួចរាល់មុនថ្ងៃទី១៥ ខែសីហា ឆ្នាំ២០២២ ជាកំហិត។ នេះបើយោងតាមការអះអាងរបស់លោក ពៅ សោមាណាក់ ប្រធានមន្ទីរបរិស្ថានខេត្ដកណ្ដាល។

ខេមបូចាមិនអាចសុំការអធិប្បាយពីលោក អ៊ូច សាវឿន អភិបាលស្រុកកណ្ដាលស្ទឹងបានទេ ជុំវិញបញ្ហាបិទផ្អាករោងចក្រ កំពង់​កន្ទួត​ មេនូហ្វេកធីរីង​ (ខេមបូឌា)​ ខូ អិលធីឌី ​នៅថ្ងៃ​ពុធ​នេះ​។ ប៉ុន្ដែលោក ស្វាយ សេងលី  អភិបាលរងស្រុកកណ្ដាលស្ទឹងបានថ្លែងប្រាប់ព័ត៌មានក្នុង​ស្រុក​មួយថា បញ្ហាបាតុកម្មរបស់កម្មករដែលបានធ្វើកាលពីថ្ងៃទី៨ ខែតុលា កន្លងទៅ គឺពួក​គាត់​មិន​បានជូនដំណឹងមកឱ្យខាងរដ្ឋបាលស្រុកនោះទេ ពួកគាត់ធ្វើខ្លួនឯង។

អភិបាលរងរូបនេះបញ្ជាក់ថា៖ «ថៅកែរោងចក្រខាងលើ គាត់ធ្វើដោយខ្លួនគាត់ទេ គឺអត់មាន​សុំស្រុកទេ»

លិខិតរបស់រដ្ឋបាលស្រុកកណ្ដាលស្ទឹងចុះថ្ងៃទី៥ ខែសីហា ឆ្នាំ២០២២ ដោយរដ្ឋបាល​ស្រុក​បានផ្អាករោងចក្រ កំពង់​កន្ទួត​ មេនូហ្វេកធីរីង​ (ខេមបូឌា)​ ខូ អិលធីឌី ជាបណ្ដោះ​អាសន្ន​រាល់អាជីវកម្មផលិតក្រដាសដែលបានប៉ះពាល់ដល់ការរស់នៅរបស់ប្រជាពលរដ្ឋនិងការប៉ះ​ពាល់ដល់ប្រភពទឹកអូរ ទឹកប្រឡាយសាធារណៈនៅទីនោះ។ ដោយរងចាំការដោះស្រាយ​និងអនុវត្ដតាមគោលការណ៍២ចំណុចមានដូចជា ទី១ បញ្ចប់បញ្ហានឹងប្រជាពលរដ្ឋ​ដែលរង​ផលប៉ះពាល់ និងទី២ សាងសង់អាងប្រព្រឹត្ដិកម្មឱ្យ​បានត្រឹមត្រូវតាមបច្ចេកទេស គឺអាច​ដំណើរ​ការវិញបាន។

លិខិតដដែលបញ្ជាក់បន្ថែមថា៖ «ករណីរោងចក្រ កំពង់​កន្ទួត​ មេនូហ្វេកធីរីង​ (ខេមបូឌា)​ ខូ អិលធីឌី ពុំអនុវត្ដតាមវិធានការខាងរដ្ឋបាលស្រុកកណ្ដាលស្ទឹង​នឹងចាត់វិធានការ​តាមនីតិវិធីច្បាប់ជាធរមាន»

កម្មកររោងចក្រ កំពង់កន្ទួត មេនូហ្វេកធីរីង(ខេមបូឌា)ខូ អិលធីឌី នាំគ្នាតវ៉ាស្នើសុំអាជ្ញាធរ​ពាក់ព័ន្ធ​មេត្ដាជួយបើករោងចក្រឡើងវិញ ស្ថិតនៅភូមិត្បូងក្ដី ឃុំបាគូរ ស្រុកកណ្ដាលស្ទឹង ខេត្តកណ្ដាល។  រូបថតនៅថ្ងៃទី៨ ខែតុលា ឆ្នាំ២០២២។ រូបភាពផ្ដល់ឱ្យ

បើតាម លោក ខែម ធឿន មេឃុំបាគូរ អាយុ៦២ឆ្នាំ បានប្រាប់អ្នកសារព័ត៌មានខេមបូចា​ដោយ​ផ្ទាល់ថា រោងចក្រហ្នឹងបាន​បង្កបញ្ហា​ជាច្រើន​ដល់អាជ្ញាធរនិងមន្ទីរបរិស្ថានខេត្ដកណ្ដាល​ដូចជា​ការបង្ហូរទឹកស្អុយចូលព្រែកដែលពលរដ្ឋ​កំពុងប្រើប្រាស់ និងបានចោលបា្លស្ទិក​ចូលក្នុងទឹកនិង​ជាតិពុលក៏ដូចបញ្ហាផ្សេងទៀត។

លោកមេឃុំលើកឡើងថា៖ «ក្រោយរកឃើញថាមានជាតិពុលអាជ្ញាធរខេត្តនិងស្រុកសម្រេច​ផ្អាកអស់រយៈជាង៥ខែហើយប៉ុន្ដែគាត់នៅតែលួចបើក។ ខ្ញុំអាណិតកម្មករដែលគ្នា​ធ្វើការនៅ​ហ្នឹង តែធ្វើម៉េចបើថៅកែរោងចក្រមិនស្ដាប់តាមការណែនាំរបស់មន្ទីរបរិស្ថានខេត្ដ ប៉ុន្ដែ​គេបិទ​បណ្ដោះអាសន្នតើ កាលណាគាត់គោរពតាមការណែនាំគេឱ្យបើកវិញ»

លោកមេឃុំបន្ដថា ក្នុងនាមជាអាជ្ញាធរគឺជាអាជ្ញាកណ្ដាលកាលណាពលរដ្ឋមកប្ដឹងផ្ដល់ ត្រូវ​ដោះ​ស្រាយជូនពួកគាត់ហើយ ណាមួយលោកថាមុនថ្ងៃផ្ទុះការតវ៉ាមួយថ្ងៃ អាជ្ញាធរ​ស្រុក​ និង​ខាងមន្ទីរបរិស្ថានខេត្តបានបើកកិច្ចប្រជុំមួយនៅសាលាស្រុកកណ្ដាលស្ទឹង ដើម្បីដោះស្រាយ​បញ្ហាអស់ហ្នឹងប៉ុន្ដែការសម្រេចបែបណាគឺខាងខេត្តជាអ្នកសម្រេច លោកថាខាងមូលដ្ឋានបាន​ត្រឹមសម្របសម្រួលទេ។

លោកមេឃុំបានថ្លែងថា៖ «យើងមានសិទ្ធិសម្របសម្រួលទាំងសងខាងទេ បើម្ខាងទៀត​គេមិនឯកភាពខ្ញុំក៏មិនដឹងធ្វើម៉េចដែរ? ហើយបិទក៏មិនមែនអាជ្ញាធរឃុំបិទដែរ គឺអាជ្ញាធរ​របស់ស្រុកអ្នកបិទ»

បើតាមលោក ផូ សឿន នាយប៉ុស្តិ៍រដ្ឋបាលនគរបាលឃុំបារគូបានថ្លែងថា កម្មករដែល​មក​ធ្វើបាតុកម្មនៅមុខរោងចក្រ​ កំពង់​កន្ទួត​ របស់ថៅកែជនជាតិចិននេះ ភាគច្រើនគឺមិនមែន​ជាកម្មករ​ដែលបម្រើការងារនៅក្នុងរោងចក្រហ្នឹងទេ គឺពួកគាត់ត្រូវបានថៅកែរោងចក្រ​យក​មកពីកន្លែងផ្សេងមកបាតុកម្ម ដើម្បីឱ្យបើករោងចក្រវិញ។

លោកបន្ដថា៖ «មិនដឹងពួកគាត់មកពីណាទេ ដោយសាររោងចក្រហ្នឹងបាន​បង្ហូរទឹកស្អុយ​ចូលព្រែកពលរដ្ឋប្រើប្រាស់បានជាគេបិទ»

បើយោងតាមការលើកឡើងរបស់លោក សំ ចាន់ធី មេភូមិត្បូងក្ដីបានឲ្យដឹងទៀតថា កន្លង​មក​រោងចក្របានបង្ហូរទឹកស្អុយចូលអូរ ប្រឡាយខាងមុខវត្តព្រៃរូង បង្កឲ្យទឹកឡើងខ្មៅ ប៉ះពាល់​ដល់​ប្រជាពលរដ្ឋផ្ទាល់មានចំនួន៣ភូមិ និងដោយប្រយោលច្រើន​ឃុំពីព្រោះព្រែកវាវែង​និង​បន្ដ​គ្នារហូត ការណ៍នេះបានជាប្រជាពលរដ្ឋធ្វើពាក្យបណ្តឹងប្ដឹងទៅស្រុកនិងមន្ទីរបរិស្ថាន​ខេត្ត​កណ្ដាល។

លោកបន្តថា៖ «ពីមុនប្រជាពលរដ្ឋបានយកទឹកក្នុងអូរមុខវត្តព្រៃរូងសម្រាប់ប្រើប្រាស់ជា​ប្រចាំ​ថ្ងៃ ក្រោយមកដោយសារឃើញទឹកខ្មៅពេកពួកគាត់ក៏ឈប់ប្រើ»

លោក គង់ ឡុង ជាប្រជាពលរដ្ឋដែលរងផលប៉ះពាល់ម្នាក់រស់នៅភូមិត្បូងក្ដី ឃុំបាគូរ ស្រុក​កណ្ដាលស្ទឹង បានឱ្យដឹងថា ដាច់ខាតមិនឱ្យខាងរោងចក្រ​ កំពង់​កន្ទួត​ ពន្យារពេល​ដោះ​ស្រាយ​ទេ ត្រូវតែយកសំរាមផ្លាស្ទិកចេញ​ពីដី​របស់​លោកឱ្យអស់។ យកទឹកស្អុយ និង​ភក់​ដែល​មានសារធាតុពុលទាំងអស់ចេញ​ពីដីរបស់លោក​រួមទាំងដីប្រជាជន។

លោក  ឡុង បន្ដថា​៖ «តម្រូវឱ្យថៅកែរោងចក្រត្រូវតែសងសំណងចំពោះផលប៉ះពាល់​ដី​កន្លងមក ដីធ្វើស្រែចំការមិនបាន សងថ្លៃដើមឈើដែលបានងាប់ដែលមាន​រយៈពេល​ប្រមាណជា៧ឆ្នាំមកនេះ ទើបខ្ញុំសុខចិត្ត»

ខេមបូចាមិនអាចទាក់ទងទៅខាងថៅកែរោងចក្រ​ កំពង់​កន្ទួត​ មេនូហ្វេកធីរីង​ (ខេមបូឌា)​ ខូ អិលធីឌី លោក YE  QINGQUAN បានទេ​។

ចំណែកឯលោក ឌី ថា ជាអ្នកបកប្រែឱ្យថៅកែរោងចក្រ កំពង់​កន្ទួត​ មេនូហ្វេកធីរីង​ (ខេមបូឌា)​ ខូ អិលធីឌី បានប្រាប់ខេមបូចាថា មូលហេតុដែលកម្មករនាំគ្នាបាតុកម្ម​កាលពីថ្ងៃទី៨​ ខែតុលា ដោយ​សារ​បញ្ហាក្រពះ ពីព្រោះពួកគាត់ដែលជាកម្មកររោងចក្រក៏ត្រូវការហូបចុក និងការ​ចំណាយ​អ្វីៗ​ផ្សេងទៀតដែរ បើរោងចក្របិទមិនឱ្យដំណើរការតើបានលុយឯណាចឹញ្ចឹម​គ្រួសារ។

លោកបន្ដថា៖ «ខ្ញុំអត់បាននៅកន្លែងបាតុកម្មហ្នឹងទេ ប៉ុន្ដែបញ្ហាសំខាន់គឺក្រពះគ្នា បានជាគ្នា​បាតុកម្មហ្នឹង ណាមួយខាងស្រុកនិងមន្ទីរបរិស្ថានបានពិន័យគាត់៦០លានហើយ ធម្មតា​គាត់​[ថៅកែរោងចក្រ]បរទេសកាលណាបង់ពិន័យហើយគឺសង្ឃឹមថាអាចបើកបានវិញ ប៉ុន្ដែបែរ​អត់វិញ  អ៊ីចឹងបានកម្មករគ្នាបាតុកម្មសុំឱ្យបើកហ្នឹង»

លោកបន្ថែមថា អ្វីដែលខាងរដ្ឋបាលស្រុកនិងមន្ទីរបរិស្ថានបានតម្រូវឱ្យធ្វើគឺធ្វើអស់ហើយ ប៉ុន្ដែនៅតែថាខាងរោងចក្រមិនទាន់បានធ្វើ ដូចជាអាងស្ដុកទឹកធ្វើហើយ ការបង្ហូរ​ទឹកក៏​លែង​មានដែរ លោកថានិយាយរួមទៅធ្វើបាបខាងរោងចក្រមិនឱ្យរកស៊ីកើតហ្មង។

លោកឱ្យដឹងថា៖ «ធ្វើទុក្ខគ្នាណាស់ និយាយរួមគ្នាពិបាកនៅកន្លែងហ្នឹងណាស់ តាមខ្ញុំមើល​ពិបាកប្រកបអាជីវកម្មហ្នឹងតទៅទៀតណាស់ណាមួយវាមានរឿងច្រើននៅពីក្រោយខ្នងនៃការបិទ​រោងចក្រហ្នឹងដែលមិនអាចនិយាយបាន»

លោក  សាន់ ម៉ាឡា ជាមន្រ្តីជាន់ខ្ពស់ផ្នែកតស៊ូមតិនៃបណ្តាញយុវជនកម្ពុជា(CYN) បាន​លើក​ឡើងថា មានអនុក្រឹត្យមួយស្ដីពីរបាយការណ៍វាយតម្លៃផលប៉ះពាល់បរិស្ថាន​ដែលត្រូវឱ្យ​រោងចក្រ​សហគ្រាសនិងអ្នកប្រកបអាជីវកម្មទាំងអស់អនុវត្ដតាម ជាពិសេសមុននឹងមាន​ការ​សាង​សង់រោងចក្រឬក៏អាជីវកម្មខ្នាតធំណាមួយ​រដ្ឋតម្រូវឱ្យក្រុមហ៊ុនធ្វើការសិក្សា​អំពីទំហំ​និង​កម្រិតផលប៉ះពាល់និងផែនការបញ្ចៀសកាត់បន្ថយផលប៉ះពាល់លើប្រជាពលរដ្ឋនិងបរិស្ថាននៅលើកម្រិតមួយដែលតូចបំផុត។ យ៉ាងណាក្ដីលោកថាលោកមានការគាំទ្រ​ចំពោះចំណាត់​ការ​របស់អាជ្ញាធរដែលបានផ្អាកដំណើរការរោងចក្រហ្នឹងបានទាន់ពេលវេលា។

លោក ម៉ាឡា បន្ដថា៖ «ខ្ញុំគាំទ្រចំពោះការសម្រេចរបស់រដ្ឋបាលខេត្ដកណ្ដាលដែលតម្រូវ​ឱ្យ​រោងចក្រត្រូវតែសាងសង់នូវអាងប្រព្រឹត្ដិកម្មទឹកកខ្វក់មុនពេលអនុញ្ញាត្ដឱ្យដំណើរការឡើង​វិញ ដោយសារតែទឹកដែលរោងចក្របង្ហូរចេញទៅលើប្រភពប្រជាពលរដ្ឋប្រើប្រាស់វាអាច​មាន​សារធាតុគីមីអាក្រក់ សារធាតុដែលបង្កផលប៉ះពាល់មកលើជីវិតរបស់ប្រជាជនដែលរស់​នៅ​តាមបណ្ដោយដងព្រែក»

គួររបញ្ជាក់ថា កាលពីថ្ងៃទី០៧ ខែតុលា ឆ្នាំ២០២២ រដ្ឋបាលស្រុកកណ្តាលស្ទឹងបានបើក​កិច្ច​ប្រជុំ​ផ្សព្វផ្សាយ​ ពាក់ព័ន្ធនិងផលប៉ះពាល់រវាងរោងចក្រ​ កំពង់​កន្ទួត​ មេនូហ្វេកធីរីង​ (ខេមបូឌា)​ ខូ អិលធីឌី និងប្រជាពលរដ្ឋរងគ្រោះ ក្រោមអធិបតីភាពលោក ស្វាយ សេងលី អភិបាលរង​ស្រុកកណ្តាលស្ទឹង និង លោក ឡុង ចាន់វាសនា អនុប្រធានការិយាល័យគាំពារបរិស្ថាន នៃមន្ទីរបរិស្ថានខេត្តកណ្តាល។

ក្នុងកិច្ចប្រជុំ ប្រជាពលរដ្ឋដែលរងផលប៉ះពាល់បានធ្វើ​ការ​សំណូមពរ​ឱ្យអាជ្ញាធរ​ក៏ដូចជា​ស្ថាប័ន​ពាក់ព័ន្ធជួយអន្តរាគមន៍ឱ្យថៅកែរោងចក្រ ចេញថ្លៃសងលើផលប៉ះពាល់​ទាំងស្រុង​ដល់​ប្រជាពលរដ្ឋ​ដែលបានរងផលប៉ះពាល់ទាំងអស់ និងសូមឱ្យអាជ្ញាធរស្រុកកណ្តាលស្ទឹង ជា​ពិសេស​លោក អ៊ូច សាវឿន អភិបាលស្រុកកណ្តាលស្ទឹងគួរមានវិធានការ​យ៉ាងតឹងរ៉ឹង​ម៉ឺងម៉ាត់​បំផុត​មិនត្រូវបណ្ដែតបណ្ដោយឱ្យខាងថៅកែរោងចក្រ កំពង់​កន្ទួត​ លួចដំណើរធ្វើ​អាជីវកម្ម​ឡើយ គឺត្រូវរងចាំការដោះស្រាយឱ្យបានចប់សព្វគ្រប់​ជាមួយប្រជាពលរដ្ឋ​ដែល​រងគ្រោះ​ទាំង​អស់ជាមុនសិន។

រោងចក្រ កំពង់​កន្ទួត​ មេនូហ្វេកធីរីង​ (ខេមបូឌា)​ ខូ អិលធីឌី ជារោងចក្រមួយដែលបង្កើត​ឡើង​បាន​ជាង៧ឆ្នាំហើយ និងជារោងចក្រផលិតក្រដាសមានទីតាំងស្ថិតនៅភូមិត្បូងក្ដី ឃុំបាគូរ ស្រុកកណ្ដាលស្ទឹង ខេត្តកណ្ដាល និងមានថៅកែជាជនជាតិចិនមានឈ្មោះ YE  QINGQUAN កើតថ្ងៃទី១០ ខែមេសា ឆ្នាំ១៩៧២ ដែលបានជួលដីមាន​ទំហំទទឹង៤០ម៉ែត្រ ​និង​បណ្ដោយ​១០០ម៉ែត្រពីឈ្មោះ គង់ អៀក រស់នៅភូមិតាខ្មៅ សង្កាត់តាខ្មៅ ក្រុងតាខ្មៅ  ខេត្ដកណ្ដាល។ នៅក្នុងកិច្ចសន្យាជួលដីចំនួន១០ឆ្នាំចាប់ពីថ្ងៃទី៩ ខែមីនា ឆ្នាំ២០១៥ ដល់ថ្ងៃទី៩ ខែមីនា ឆ្នាំ២០២៥ ក្នុងតម្លៃ៥០០ដុល្លារក្នុង១ខែ។

​ផែនការ​ជាតិ​ និង​ផែនការ​សកម្មភាព​បរិស្ថាន​ឆ្នាំ​ ២០១៦-២០២៣​​ ត្រូវ​បាន​អនុម័ត​ដោយ​រាជរដ្ឋាភិបាល​ក្នុង​ឆ្នាំ​ ២០១៧​ ស្រប​តាម​មាត្រា​៥៩​នៃ​រដ្ឋធម្មនុញ្ញ​«ដើម្បី​ជួយ​ប្រទេស​កម្ពុជា​ឱ្យ​សម្រេច​បាន​គោលដៅ​អភិវឌ្ឍន៍​ប្រកបដោយ​ចីរភាព​ និង​ពង្រឹង​កិច្ច​សហប្រតិបត្តិការ​រវាង​ក្រសួង​ស្ថាប័ន​ និង​អ្នក​ពាក់ព័ន្ធ​ដែល​ទទួលខុសត្រូវ​ចំពោះ​គោលដៅ​អភិវឌ្ឍន៍​ប្រកបដោយ​ចីរភាព​ដោយសារ​បញ្ហា​បរិស្ថាន​ គឺជា​បញ្ហា​អន្តរ​វិស័យ​»។​

ផែនការ​ជាតិ​ និង​ផែនការ​សកម្មភាព​បរិស្ថាន​ គឺជា​ការ​ប្តេជ្ញា​ចិត្ត​ដើម្បី​ការ​អភិវឌ្ឍ​ប្រកបដោយ​ចីរភាព​។​ ចក្ខុវិស័យ​របស់​ផែនការ​ជាតិ​ និង​ផែនការ​សកម្មភាព​បរិស្ថាន​គឺ​ដើម្បី​«​ពង្រឹង​លក្ខន្តិកៈ​ និង​អនុភាព​សម្រាប់​បរិស្ថាន​ និង​ការ​គ្រប់គ្រង​ធនធានធម្មជាតិ​ និង​ការ​អភិរក្ស​សម្រាប់​ការ​អភិវឌ្ឍ​សេដ្ឋកិច្ច​ សង្គម​ប្រកបដោយ​ចីរភាព​ និង​ស្ថេ​រ​ភាព​នៅ​កម្ពុជា​»៕​

140 views

ព័ត៌មានទាក់ទង

ព័ត៌មានថ្មីៗ

អត្ថបទពេញនិយម