សមាគមសម្ព័ន្ធអ្នកសារព័ត៌មានកម្ពុជា

ឃុំមួយនៅខេត្តបាត់ដំបងខ្វះថវិកាក្នុងការជីកប្រឡាយទឹកសម្រាប់ពលរដ្ឋស្រោចស្រពដំណាំ

ប្រឡាយដែលគ្មានទឹកតភ្ជាប់គ្នាតាមបណ្ដាភូមិនៃឃុំតាក្រី ស្រុកកំរៀង ខេត្តបាត់ដំបង។ រូបថតនៅថ្ងៃទី ១១ ខែមីនា ឆ្នាំ២០២៣។ រូបភាពថតដោយ វ៉ា សុភានុត
ប្រឡាយដែលគ្មានទឹកតភ្ជាប់គ្នាតាមបណ្ដាភូមិនៃឃុំតាក្រី ស្រុកកំរៀង ខេត្តបាត់ដំបង។ រូបថតនៅថ្ងៃទី ១១ ខែមីនា ឆ្នាំ២០២៣។ រូបភាពថតដោយ វ៉ា សុភានុត

ខេត្តបាត់ដំបង៖ ស្លឹកឈើនិងជញ្ជ្រាំងជ្រុះធ្លាក់រាយប៉ាយលើផ្ទៃដីរាប់សិបហិកតាដែលមាន​សភាព​​ស្ងួត​​ហួតហែង ហើយមាន​ស្នាមប្រេះបែកក្រហែង ដែលធ្វើឱ្យកូនឈើដែលដុះតាមភ្លឺ​និង​កណ្តាល​វាលស្រែក្រៀមស្វិត។ ពលរដ្ឋ​រស់នៅ​ទីនោះបាន​រៀបរាប់ថា តំបន់នេះមានភាព​រាំង​​ស្ងួត​ខ្លាំង ​​និងពុំមានទឹកសម្រាប់​ស្រោច​ស្រព​ដំណាំ​អ្វី​ឡើយ។

កសិករមួយ​រូប​ដែល​ទុកដីចោលក្លាយ​ជាវាលមើលឃើញតែគល់ជញ្ជ្រាំងដែល​ងាប់​ពាសពេញ​ដី បានឱ្យដឹងថា សព្វថ្ងៃនេះលោក​និងអ្នកភូមិផ្សេង​ទៀតតស៊ូ​ធ្វើ​ស្រែ​​និង​ដាំ​ដំណាំតាមបែប​ផ្សង​​​ព្រេង​ជាមួយ​នឹង​ធម្មជាតិ។

លោក​ ឆន ហុល​ ជាកសិករមួយរូប លើកឡើងថា៖ «បើសិនជាមានដីហើយអត់មានទឹក​ធ្វើ​ស្រែ​ខ្ញុំ​ដល់ចឹង…សព្វថ្ងៃវាជាការពិត អារម្មណ៍វាស្មុគស្មាញហ្នឹងហើយ យើងទៅធ្វើចំណាក​ស្រុក​ក៏​ពិបាក​យើងនៅក្នុងភូមិក៏គ្មានទឹកធ្វើស្រែចឹងទេមានតែលក់ដីឱ្យអស់ហ្មងស្រួល»

លោក ហុល ជាកសិករម្នាក់ក្នុងចំណោមកសិកររាប់ពាន់នាក់រស់នៅឃុំតាក្រី ស្រុកកំរៀង ខេត្តបាត់ដំបង ដែលប្រឈមនឹងកង្វះទឹកស្រោចស្រពដំណាំផ្សេងៗ​នាពេលរដូវប្រាំង​ចូល​មកដល់។ ចង្អុលប្រាប់អ្នកសារព័ត៌មានបណ្ដើរភ្នែកសម្លឹងមើល​ទៅ​ដីស្រែចម្ការរបស់គាត់​ចំនួន​៥ហិកតាឃើញតែគល់​ជញ្ជ្រាំង​​ងាប់ទាំងអស់។ លោកបន្តថា លោកបានត្រឹមប្រមូលផល​ស្រូវ​ក្នុងរដូវវស្សា បន្ទាប់មកដីស្រែ​ចម្ការនេះត្រូវទុកចោលអស់រយៈពេលជាច្រើន​ខែរហូតទាល់តែ​ចូលដល់រដូវភ្លៀងធ្លាក់ទើបលោកចាប់ផ្ដើមធ្វើសកម្មភាពព្រោះស្រូវសាឡើងជាថ្មី។

លោក ហុល មានវ័យ៥០ឆ្នាំ ជាពលរដ្ឋម្នាក់រស់នៅភូមិតាក្រី ឃុំតាក្រី លោកមាន​ប្រពន្ធ​ជា​អ្នកលក់ដូរ និងមានកូនចំនួន៤នាក់។ គ្រួសាររបស់លោកអាចរកប្រាក់ចំណូលបាន​ជាង​២ម៉ឺន​រៀល និងចំណាយជិត២ម៉ឺនរៀលក្នុងមួយថ្ងៃ។ ដោយសារប្រាក់ចំណូលទាប លោក ហុល សម្រេចឱ្យកូនចំនួន២នាក់ឈប់សិក្សា រួចទៅរៀនបណ្ដុះបណ្ដាលវិជ្ជាជីវៈ​ជាជាងកាត់សក់​នៅឯក្រុងបាត់ដំបង។

លោកបានប្រាប់ថា តាំងពីចាប់ផ្ដើមធ្វើស្រែចម្ការមកជាញឹកញយលោកប្រឈម​នឹងបញ្ហាកង្វះ​ទឹកដែលនាំឱ្យទិន្នផលមិនទទួលបានគ្រប់ចំនួនឡើយ។

លោក ហុល និយាយថា៖ «តាំងខ្ញុំធ្វើស្រែអត់ជោគជ័យអីផង ឆ្នាំណាអត់ទឹកក៏អត់បានស្រូវទៅ ពេលទឹកខ្លាំងក៏លិចអស់ទៅ ចឹងហើយទិន្នផល១ហិកតាបាន១៥បាវ វាអត់គ្រប់ផង»

លោក ឆន ហុល កំពុងចង្អុលទៅកាន់ដីស្រែរបស់គាត់ដែលស្ងួតហួតហែង នៅ​ភូមិទួលទិល ឃុំតាក្រី ស្រុកកំរៀង ខេត្តបាត់ដំបង។ រូបថតនៅថ្ងៃទី១១ ខែមីនា ឆ្នាំ២០២៣។ រូបភាពថតដោយ វ៉ា សុភានុត

កសិករម្នាក់ទៀតនៅឃុំតាក្រី អ្នកស្រី ចាន់ ម៉ារីយ៉ា វ័យ៣២ឆ្នាំ និយាយថា អ្នកស្រីមាន​ដីទំហំ​២០ហិកតា​សម្រាប់ធ្វើស្រែ និងដាំដំឡូងដោយពឹងផ្អែកទាំងស្រុងលើទឹកភ្លៀង។ អ្នកស្រី ម៉ារីយ៉ា បន្ថែមថា ជារៀងរាល់ឆ្នាំភ្លៀងធ្លាក់មិនទៀងទាត់នោះទេ កង្វះទឹកស្រោចស្រព​ដំណាំ​ជារឿយៗនៅតែកើតមានឡើង ទោះបីជាធ្វើស្រែចម្ការតែក្នុងរដូវវស្សាក៏ដោយ។ ការកង្វះទឹក​នេះបណ្ដាលឱ្យអ្នកស្រីទទួលបានទិន្នផលទាបពីផលដំណាំរបស់ខ្លួន ហើយឈ្មួញបាន​លើក​យកចំណុចនេះមកសង្កត់តម្លៃឱ្យធ្លាក់ថ្លៃជាងមុន។ 

អ្នកស្រី ម៉ារីយ៉ា និយាយថា៖ «គេទិញអត់ពេញតម្លៃ ដូចថាគ្រាប់វារាងគ្រិន ដូចថា​ស្រូវ​រំដួល​អាល្អ​ចឹង​ បាន៩០បាន៨០ជាង បើអត់ល្អបានត្រឹម៧០ជាងចឹងទៅ​(លុយបាត)។ ដំឡូងវាគ្រិន​វាអត់រីក​មើម បើមានភ្លៀងថ្លៃវាធំ អាហ្នឹងលក់បានច្រើន ដល់ពេលអត់ភ្លៀងវាគ្រិន​អាហ្នឹង​យើង​លក់​បានតិច វាតិចគីឡូ»

ស្រ្តីវ័យ៥០ឆ្នាំ រស់នៅភូមិតាក្រី ឃុំតាក្រី សុំមិនបញ្ចេញឈ្មោះ និយាយថា សព្វថ្ងៃអ្នកស្រី​ទទួល​បានចំណូល​ពីប្ដី​ និង​កូន​ចំនួន​២នាក់ដែលកំពុងធ្វើការនៅប្រទេសថៃ។ អ្នកស្រីផ្ទាល់​ក៏​ទើប​តែ​ត្រលប់​មកពីចំណាក​ស្រុក​នៅ​ប្រទេសថៃ ដោយសារពុំមានមុខរបរ​និងមានដីតិចតួច​សម្រាប់​ដាំ​ដំណាំ។ 

អ្នកស្រីបញ្ជាក់ថា៖ «នៅនេះវាអត់ដឹងរកអីយើងស្រែអត់ចម្ការមិនទៅ​ថៃ។…អត់មានទេអត់​មាន​ស្រែធ្វើ អត់មានដី មានតែដីផ្ទះទំហំ៤០ម៉ែត្របួនជ្រុង អត់មានដាំអីទេ វាអត់ទឹក ដាំតិចតួច​ដែរ»

ក្រៅពីកង្វះទឹកសម្រាប់ស្រោចស្រពដំណាំ ប្រជាពលរដ្ឋរស់នៅឃុំតាក្រី ក៏ប្រឈមនឹងកង្វះ​ទឹក​សម្រាប់បរិភោគ និងប្រើប្រាស់ប្រចាំថ្ងៃផងដែរ ដោយពួកគេភាគច្រើនបាន​ជីកអណ្ដូង​ស្នប់​តាមផ្ទះរៀងៗខ្លួន និងទិញទឹកសម្រាប់ពិសារ។

មេភូមិដំណាក់សាលា នៃឃុំតាក្រី លោក យក យឿង បានកត់សម្គាល់​ថា ប្រជាពលរដ្ឋ​រស់នៅ​ឃុំតាក្រីសម្រាប់អ្នកមានដីធ្លីតិចក្នុងការបង្កបង្កើនផលភាគច្រើនចំណាកស្រុកទៅធ្វើការនៅឯប្រទេសថៃ។ ចំណែកអ្នកមានដីរាប់សិបហិកតាបាន​ត្រឹមធ្វើស្រែ​ចម្ការមួយដង​ប៉ុណ្ណោះ​ក្នុង​មួយ​ឆ្នាំ ហើយទទួលបានទិន្នផលទាបដោយសារតែពុំមានទឹកគ្រប់គ្រាន់។​

យោងតាមស្ថិតិប្រជាពលរដ្ឋនៅឃុំតាក្រី គិតត្រឹមខែមករា ក្នុងឆ្នាំ២០២៣ ឱ្យដឹងថា ប្រជាពលរដ្ឋ​ចំនួន២៦០៩នាក់ បានធ្វើចំណាកស្រុក ក្នុងចំណោមពលរដ្ឋសរុបចំនួន ១៣ ៩៣៦ នាក់។​​

នៅឃុំតាក្រី ស្រុកកំរៀង ខេត្តបាត់ដំបង ប្រឡាយដែលគ្មានទឹកហើយមានតែដីប្រេះបែក ព្រម​ទាំងមានស្មៅជញ្ជៀនងាប់ដែលបានប្រែក្លាយជាពណ៌ឈើអមសងខាងដែលពត់ពេនតាម​ខ្យល់​​បក់។ ទោះយ៉ាងណា ការមិនមានប្រឡាយមេតភ្ជាប់​ពី​សំណង់​​ស្ទាក់ទឹកមង្គលបុរីដែលស្ថិតនៅឃុំអូរដាដែលនៅជាប់ឃុំតាក្រី បានរាំងស្ទះដល់​ការ​បញ្ជូនទឹកពីសំណង់ស្ទាក់ទឹកទៅកាន់ប្រឡាយទឹករបស់ប្រជាពលរដ្ឋនៅឃុំតាក្រី។

អាជ្ញាធរមូលដ្ឋានៃឃុំតាក្រី ឱ្យដឹងថា ការស្តារប្រឡាយឱ្យតភ្ជាប់គ្នាដែលមានប្រវែង​សរុប​ជិត១០គីឡូម៉ែត្រនេះត្រូវចំណាយថវិកាច្រើនលើសលប់ ខណៈថវិកាអភិវឌ្ឍន៍​ឃុំប្រចាំឆ្នាំ​មានត្រឹម៨០លានរៀល ហើយឃុំពុំមានលទ្ធភាពដាក់ចូលក្នុងគម្រោងអភិវឌ្ឍន៍ឃុំឡើយ។  លោក រស់ កប​ មេឃុំតាក្រី បានបញ្ជាក់ថា ប្រឡាយប្រវែង ៩ ៦០០ម៉ែត្រនេះ​មិនទាន់​កំណត់​ថវិកាចំណាយអស់ប៉ុន្មាននោះទេ ដោយរង់ចាំមន្រ្តីជំនាញពីខាងមន្ទីរធនធានទឹក​ខេត្ត​បាត់ដំបង​មកសិក្សាជាមុនសិន។

លោក ឆន ហុល កំពុងដើរទៅកាន់ដីស្រែរបស់គាត់ដែលស្ងួតហួតហែង នៅ​ភូមិទួលទិល ឃុំតាក្រី ស្រុកកំរៀង ខេត្តបាត់ដំបង។ រូបថតនៅថ្ងៃទី១១ ខែមីនា ឆ្នាំ២០២៣។ រូបភាពថតដោយ វ៉ា សុភានុត

លោក ទូច ចិន្តា​ មេភូមិកំប្រង់ ឃុំតាក្រី ថ្លែងថា ភូមិរបស់លោកមានផ្ទៃដីទំហំ២ពាន់​ហិកតា​ដែលត្រូវការទឹកសម្រាប់ស្រោចស្រពដំណាំ ខណៈប្រជាពលរដ្ឋមួយចំនួនក្នុងភូមិរបស់​លោក បានចំណាកស្រុកទៅប្រទេសថៃតាមរដូវការការងារនិងត្រលប់មកវិញ​អំឡុងពេលរដូវ​ធ្វើស្រែ។

លោក ចិន្តា បានបញ្ជាក់ថា ថវិកាអភិឌ្ឍន៍ឃុំមុនបោះឆ្នោតអាណត្តិ២០២២ មានចំនួន​៨០លាន​រៀល ហើយរដ្ឋបាលឃុំបានបែងចែកសម្រាប់ធ្វើផ្លូវក្រាលក្រួសក្រហម សេវាសុខាភិបាល​​ និង​សម្រាប់ជួយពលរដ្ឋក្រីក្រជាដើម។

លោក ចិន្តា និយាយថា៖ «កាលមុនមួយឆ្នាំគេផ្ដល់ឱ្យ២ម៉ឺនដុល្លារ ៨០លានរៀល អាណត្តិ​មុន​ឆ្នាំ២០២២។ គាត់(មេឃុំ)ភាគច្រើនយកធ្វើផ្លូវដី និងក្រាលក្រួសក្រហម អមប្រឡាយ​តាម​ភូមិ​តូចៗ ខ្ញុំមិនច្បាស់ទេ ផែនការឃុំវាមានគ្រប់បែបគ្រប់យ៉ាងរបស់គេ តាំងពីសុខភាព តាំង​ពី​ប្រជាពលរដ្ឋក្រីក្រ ហើយនឹងឆ្លៀតធ្វើផ្លូវធ្វើអីហ្នឹងចឹង»

ប្រធានភូមិម្នាក់ទៀត បានអះអាងថា ប្រជាពលរដ្ឋសព្វថ្ងៃធ្វើស្រែទាំងប្រថុយ ហើយកង្វះទឹក​នេះបានកើតឡើងជាយូរណាស់មកហើយ។ ចំណែករដ្ឋបាលឃុំបាន​លើកសំណើរ​សុំទៅកាន់​ស្ថាប័នពាក់ព័ន្ធនានាជុំវិញការសាងសង់ប្រឡាយតភ្ជាប់ពីសំណង់ស្ទាក់ទឹកមង្គលបុរីទៅកាន់ប្រឡាយទឹកតាមវាលស្រែរបស់ប្រជាពលរដ្ឋអស់រយៈពេលជាច្រើនឆ្នាំដែរ ប៉ុន្តែមកដល់​ពេល​នេះ​នៅមិនទាន់ទទួលបានដំណឹងអ្វីនោះទេ។

មេភូមិដំណាក់សាលា នៃឃុំតាក្រី លោក យក យឿង និយាយថា៖ «យើងបានស្នើសុំរហូត​ដល់​ទៅថ្នាក់ដឹកនាំកំពូលខាងលើ ប្រហែលជា២ឆ្នាំមុន។ ដំបូងយើងសុំតាមរយៈស្រុក ខេត្ត (ចុងបញ្ចប់)ថ្នាក់ជាតិក៏មិនទាន់ឆ្លើយតបជាមួយយើង»

ចំណែកឯជំទប់ទី២នៃឃុំតាក្រី លោក ឆើន ឆុន បានគូសបញ្ជាក់ថា ប្រជាពលរដ្ឋជាង​មួយម៉ឺន​នាក់​ដែលរស់នៅឃុំតាក្រីនេះ ប្រកបមុខរបរធ្វើស្រែ ដាំដំឡូង និងពោតជាដើម។

លិខិតមួយរបស់រដ្ឋបាលឃុំតាក្រី ចុះថ្ងៃទី០៤ ខែមករា ឆ្នាំ២០២៣ ស្នើសុំទៅប្រធានមន្ទីរ​ធនធាន​ទឹកខេត្តបាត់ដំបង ឱ្យជួយស្ដារប្រឡាយមេ និងប្រឡាយរងពីសំណង់​ស្ទាក់ទឹក​មង្គលបុរី ដើម្បីចែកចាយទឹកដល់មូលដ្ឋានឃុំតាក្រីដែលមានចំនួន៨ខ្សែ​ ប្រវែង៩៦០០ម៉ែត្រ ដោយឆ្លងកាត់៧ភូមិនៃឃុំតាក្រី ហើយប្រជាពលរដ្ឋចំនួន៨៧១២នាក់ដែលរស់នៅ​ក្នុងភូមិ​ទាំង៧នេះ​​នឹងទទួលបានផលពីការស្ដារប្រឡាយ។

មន្ត្រីសាលាឃុំតាក្រី កំពុងធ្វើការក្នុងសាលាឃុំ ស្ថិតក្នុងឃុំតាក្រី ស្រុកកំរៀង ខេត្តបាត់ដំបង។ នៅថ្ងៃ​ទី១១ ខែមីនា ឆ្នាំ២០២៣។ រូបភាពថតដោយ វ៉ា សុភានុត

សារព័ត៌មានខេមបូចា បានព្យាយាមទាក់ទង លោក ឡុង ផលគុណ ប្រធានមន្ទីរធនធានទឹក​ខេត្ត​បាត់ដំបង និង លោក ហួត ច័ន្ទតារារិទ្ធ អនុប្រធានមន្ទីរធនធានទឹក ខេត្តបាត់ដំបង ខល​ចូលពុំមានអ្នកលើកទូរសព្ទនិងផ្ញើសំណួរតាមប្រព័ន្ធតេលេក្រាមចូលមើលតែមិនមានការឆ្លើយតប។

សេចក្ដីជូនដំណឹងមួយរបស់មន្ទីរធនធានទឹកខេត្តបាត់ដំបង ឱ្យដឹងថា ក្នុងឆ្នាំ២០២៣នេះ ការ​ចាប់​ផ្ដើមនូវរដូវវស្សាឆ្នាំនេះអាចយឺតជាងឆ្នាំមុន ហើយមានបរិមាណទឹកភ្លៀងមធ្យម រួមទាំង​អាចមានកូនរដូវប្រាំងក្នុងខែកក្កដា ខាងមុខ។ សេចក្ដីជូនដំណឹង ក៏បានអំពាវនាវឱ្យ​ប្រជាពលរដ្ឋ​ក្នុងខេត្តបាត់ដំបងសន្សំសំចៃទឹក និងត្រៀមជួយសង្រ្គោះ​សម្រាប់​គ្រោះរាំង​ស្ងួត​នាពេលខាងមុខ។

យោងតាមសេចក្ដីព្រាងច្បាប់ស្ដីពីហរិញ្ញវត្ថុសម្រាប់ការគ្រប់គ្រងឆ្នាំ២០២៣ របស់​ក្រសួង​សេដ្ឋកិច្ច ឱ្យដឹងថា ថវិកាជាតិឆ្នាំ២០២៣សរុបត្រូវចំណាយចំនួន ៣៩ ២០៦ ២០៥លានរៀល ដែលមានកំណើន១៣ភាគរយធៀបនឹងឆ្នាំ២០២២។ ក្នុងនោះចំណាយថវិកាថ្នាក់ជាតិចំនួន ៣៦ ៦០៣ ៦៩៨លានរៀល និងចំណាយថវិកាថ្នាក់ក្រោមជាតិចំនួន ៤ ០៦១ ៧៩៧លាន​រៀល។

ប្រាក់ឧបត្ថមដល់ថ្នាក់ក្រោមជាតិចំនួន ១ ៤៥៩ ២៩០លានរៀលដែលដកចេញ​ពីខ្ទង់​ចំណាយ​ថវិកាថ្នាក់ជាតិក្នុងនោះត្រូវបានបែងចែកទៅ ឧបត្ថមឃុំ-សង្កាត់ចំនួន ៧៥៣៣៥០លានរៀល និង​ឧបត្ថម​មូលនិធិអភិវឌ្ឍនន៍ឃុំ-សង្កាត់ចំនួន ២២១​ ៥៧៣លានរៀល​មានកំណើន​១២,៤​ភាគ​រយ​​ធៀប​នឹងច្បាប់ឆ្នាំ២០២២ ដែលជាថវិកាសម្រាប់អភិវឌ្ឍន៍មូលដ្ឋានឃុំ-សង្កាត់នីមួយៗ។

នៅឆ្នាំ២០២៣នេះ រដ្ឋាភិបាលក្រុងភ្នំពេញបានកំណត់ទំហំ​នៃការខ្ចីប្រាក់ពីដៃគូអភិវឌ្ឍន៍​សម្រាប់​​​ឆ្នាំ២០២៣ ក្នុងកម្រិត ១៧០០លាន​SDR គឺកើនឡើង១០០លានSDR ធៀប​នឹង​ច្បាប់​ថវិកាឆ្នាំ២០២២ ដោយផ្អែកលើទិដ្ឋភាពចំនួន៥ ក្នុងនោះក៏មាន ការបន្តបង្កើន​ប្រសិទ្ធិភាព​ប្រសិទ្ធភាពខ្ពស់ក្នុងការគ្រប់គ្រង និងអនុវត្តគម្រោង ដែលរួមបញ្ចូល​វិស័យ​ធារាសាស្រ្ត​ចំនួន​៥គម្រោងផងដែរគឺ៖ គម្រោងអភិវឌ្ឍន៍អាងទឹកដងកាំបិត ខេត្តកំពង់ធំ គម្រោងកាត់​បន្ថយ​គ្រោះ​ទឹកជំនន់ ​និង​អភិវឌ្ឍន៍​ធារាស្រ្តបរវេល ខេត្តបាត់ដំបង កម្មវិធីគ្រប់គ្រងធនធានទឹក និង​ការ​ផ្លាស់ប្ដូរ​វិស័យ​កសិកម្ម​សម្រាប់ប្រទេសកម្ពុជា ជំហានទី២ គម្រោងគ្រប់គ្រងធនធាន​ទឹក​ចម្រុះ គម្រោង​អភិវឌ្ឍន៍​ប្រព័ន្ធធារាស្រ្ត និងកសិកម្មដែលធន់នឹងការប្រែប្រួលអាកាសធាតុ។

យោងតាមសេចក្ដីជូនដំណឹងខាងលើដដែល ឱ្យដឹងថា ក្រសួងធនធានទឹកទទួល​បានថវិកា​សរុបចំនួន ៧៦​៨ ៨៣៦លានរៀល​សម្រាប់ទំហំចំណាយក្នុងឆ្នាំ២០២៣។

សំណង់ស្ទាក់ទឹកស្ទឹងមង្គលបុរី ស្ថិតនៅឃុំតាក្រី ស្រុកកំរៀង ខេត្តបាត់ដំបង។ រូបថតនៅថ្ងៃទី ១១ ខែមីនា ឆ្នាំ២០២៣។ រូបភាពថតដោយ វ៉ា សុភានុត

កាលពីថ្ងៃទី២៧ ខែមីនា ឆ្នាំ២០២៣ ក្រសួងធនធានទឹក បានរៀបចំវេទិកាសាធារណៈស្ដីពីការ​​ផ្សព្វផ្សាយថវិកាប្រចាំឆ្នាំ២០២៣ របស់ក្រសួងធនធានទឹក ឱ្យដឹងថា ថវិកា​ឆ្នាំ២០២៣​នេះ ក្រសួង​ធនធានទឹក នឹងយកទៅអនុវត្តកម្មវិធីទាំង៥ ដើម្បីសម្រេចលទ្ធផល​ដែលបានរំពឹងទុក​ និងបំពេញសេចក្ដីត្រូវការរបស់ប្រជាពលរដ្ឋ។ កម្មវិធីទាំងនោះរួមមាន ការធានាការ​ផ្គត់ផ្គង់ទឹក​គ្រប់គ្រាន់សម្រាប់ការបង្កបង្កើនផលស្រូវ និងដំណាំគ្រប់ប្រភេទ ​រក្សានិរន្តរភាព​ និងបង្កើន​ការ​ការពារផ្ទៃដីកសិកម្មដំណាំគ្រប់ប្រភេទ ធ្វើឲ្យប្រសើរឡើង​នៃការគ្រប់គ្រង​អភិរក្ស​អាងទន្លេ​បឹង​បួរ​ធម្មជាតិ ផ្សព្វផ្សាយឱ្យទាន់ពេលវេលានូវស្ថានភាពជលសាស្រ្ត ស្ថានភាពឧតុនិយម ការ​បង្កើន​​ប្រសិទ្ធភាពនៃការគ្រប់គ្រងស្ថាប័នឱ្យបានល្អប្រសើរ។

អ្នកនាំពាក្យក្រសួងធនធានទឹក និងឧតុនិយម លោក ចាន់ យុត្ថា មានប្រសាសន៍ថា ក្រសួង​ធនធាន​ទឹកមានផែនការដាក់គម្រោងស្ដារប្រឡាយមេដើម្បីទាញយកទឹកពីសំណង់​ស្ទាក់ទឹក​ស្ទឹង​មង្គលបុរី នៅស្រុកកំរៀង ខេត្តបាត់ដំបង នៅឆ្នាំ២០២៤ខាងមុខ។

លោក យុត្ថា ថ្លែងថា៖ «តំបន់ណុង ឃុំតាក្រីកន្លងមកយើងបាន សំណង់ស្ទាក់ម្នាស់កាលមួយ ដែលជាក្បាលស្ទឹងមង្គលបុរី ហើយបន្ទាប់ពីស្ទឹងហ្នឹងរួចយើងក៏មានគម្រោង​ធ្វើប្រឡាយមេ​ដើម្បីទាញទឹកយកពីស្ទឹងមង្គលបុរីសម្រាប់ឃុំតាក្រីក៏ដូចជាអំពិលប្រាំដើមដែលយើងឃើញតែងតែមានការប្រឈម។ ក្រសួងមានផែនការអាចនឹងដាក់បញ្ចូល​នៅក្នុងឆ្នាំ២០២៤ខាង​មុខ​នេះ»

លោក សន ជ័យ ប្រធានអង្គការសម្ព័ន្ធគណនេយ្យភាពសង្គមកម្ពុជា​ ថ្លែងថា កង្វះប្រព័ន្ធ​ប្រឡាយ​ទឹកនេះមិនគួរត្រូវបានអូសបន្លាយអស់រយៈពេលរាប់សិបឆ្នាំនោះឡើយ។ លោកថា រដ្ឋបាលឃុំ ត្រូវដាក់បញ្ហានេះជាអាទិភាពក្នុងកម្មវិធីអភិវឌ្ឍរបស់ឃុំ និងកៀរគរថវិកា​ពីប្រភព​នានាដើម្បីបានជីកប្រឡាយទឹក។

លោក ជ័យ និយាយថា៖ «យើងឃើញថាមានតម្រូវការជាច្រើនដែលកើតមានឡើង​នៅ​មូលដ្ឋាន តែអាជ្ញាធរមូលដ្ឋានហាក់បីដូចជាមានចំណុចខ្វះខាតផ្នែកកសាងផែនការ។ ចឹង​កាល​ណាពួកគាត់អាចធ្វើផែនការអភិវឌ្ឍបានច្បាស់លាស់ បញ្ហាខ្វះទឹកប្រើប្រាស់ទាំង​ទឹក​ស្អាត​និងប្រព័ន្ធស្រោចស្រពខ្ញុំគិតថាអាចដោះស្រាយបាន»

ត្រលប់ទៅកាន់លោក ឆន ហុល ដែលជាកសិករមួយរូបវិញ និយាយថា ការមានទឹកស្រោច​ស្រពដំណាំសម្រាប់រដូវប្រាំងនឹងជួយឱ្យជីវភាពគ្រួសាររបស់លោកធូធារជាងមុន ព្រមទាំង​មានលទ្ធភាពក្នុងការបញ្ជូនកូនស្រីដែលកំពុងសិក្សាថ្នាក់ទី១២ទៅរៀនបន្តបាន ដោយគេច​ផុតពីការធ្វើចំណាកស្រុក។

លោក ហុល និយាយថា៖ «បើយើងមានទឹកស្រោចស្រពយើងអាចរកចំណូលបានតាមទីផ្សារ យើងអាចរក[ចំណូលបន្ថែម]បានត្រឹមមួយខែ១០០ទៅ១៥០ ទៅ២០០ដុល្លារ អាស្រ័យលើ​តម្លៃ​ទីផ្សារ»

626 views

ព័ត៌មានទាក់ទង

ព័ត៌មានថ្មីៗ

អត្ថបទពេញនិយម