សមាគមសម្ព័ន្ធអ្នកសារព័ត៌មានកម្ពុជា

ធនាគារអភិវឌ្ឍន៍អាស៊ីព្រមានថាកំណើនសេដ្ឋកិច្ចកម្ពុជាអាចនៅទ្រឹងដោយសារបម្រែបម្រួលអាកាសធាតុ

វាលស្រែនៅខេត្តកណ្តាល ថ្ងៃទី១០ ខែមេសា ឆ្នាំ២០២៣។ ខេមបូចា/ព្រីង សំរាំង
វាលស្រែនៅខេត្តកណ្តាល ថ្ងៃទី១០ ខែមេសា ឆ្នាំ២០២៣។ ខេមបូចា/ព្រីង សំរាំង

កំណើនសេដ្ឋកិច្ចរយៈពេលវែងរបស់កម្ពុជាប្រឈមមុខនឹងការគំរាមកំហែងខ្លាំងពីបម្រែបម្រួល​អាកាសធាតុ ហើយអាចបង្អាក់ការរំពឹងទុករបស់ខ្លួន​ក្នុងការ​ក្លាយជាប្រទេសដែលមានប្រាក់ចំណូលមធ្យមកម្រិតខ្ពស់រយៈពេលប៉ុន្មានឆ្នាំខាងមុខ។ នេះបើយោងតាមរបាយការណ៍របស់ធនាគារអភិវឌ្ឍន៍អាស៊ី (ADB) ដែលបានចេញផ្សាយកាលពីសប្តាហ៍មុន។

ADB បានព្យាករថា យ៉ាងហោចណាស់១០% នៃផលិតផលក្នុងស្រុកសរុបរបស់កម្ពុជានឹងត្រូវបានខាតបង់នៅឆ្នាំ២០៥០ ដោយសារតែបញ្ហាអាកាសធាតុធ្ងន់ធ្ងរ និងការកើនឡើងសីតុណ្ហភាព។

របាយការណ៍បន្ត​ថា​៖ «​ប្រទេស​កម្ពុជា​ងាយ​រងគ្រោះ​ខ្លាំង​ចំពោះមុខនៃ​ការ​ប្រែប្រួល​អាកាសធាតុ​ដោយ​ សារកត្តា​ភូមិសាស្ត្រ និងអភិបាលកិច្ច​ខ្សោយជាដើម​»​

របាយ​ការណ៍ដដែល​បាន​បញ្ជាក់​ថាប្រជាជន​ដែល​ពឹង​ផ្អែក​លើ​វិស័យ​កសិកម្ម និង​នេសាទ គឺ​ងាយ​រង​គ្រោះ​បំផុត​ចំពោះ​ផល​ប៉ះ​ពាល់​សេដ្ឋកិច្ច​នៃ​ការ​ប្រែ​ប្រួល​អាកាស​ធាតុ។

យោងតាមទីភ្នាក់ងារអភិវឌ្ឍន៍អាមេរិក ប្រជាជនកម្ពុជា ៦នាក់ក្នុងចំណោម ១០នាក់រស់នៅក្នុងតំបន់ជនបទ ហើយ ៧៧% នៃគ្រួសារនៅជនបទពឹងផ្អែកលើវិស័យកសិកម្ម នេសាទ និងអនុផល​ពី​ព្រៃឈើសម្រាប់ទ្រទ្រង់ជីវភាពរស់នៅរបស់ពួកគេ។ កម្ពុជាមាន​ពលរដ្ឋ​ប្រមាណ ១,៧ លាន​គ្រួសារ ដែលធ្វើកសិកម្ម។ នេះ​បើ​តាមរបាយការណ៍​​អង្កេត​ចន្លោះជំរឿនកសិកម្មកម្ពុជាឆ្នាំ២០១៩។​

សេដ្ឋកិច្ច​កម្ពុជា​ត្រូវ​បាន​​ព្យាករ​ថា​នឹង​កើន​ឡើង​នៅ​ឆ្នាំ​នេះ​ក្នុង​អត្រា ៥,៥% និង ៦% ក្នុង​ឆ្នាំ ២០២៤ ដែល​ជំរុញ​ដោយ​ការ​ស្ទុះ​ងើប​ឡើង​វិញ​នៃ​វិស័យ​ទេសចរណ៍។​ ប៉ុន្តែ ADB បានកត់សម្គាល់ថា ឥទ្ធិពលនៃការប្រែប្រួលអាកាសធាតុលើហេដ្ឋារចនាសម្ព័ន្ធដូចជាផ្លូវថ្នល់ក៏គំរាមកំហែងដល់ឧស្សាហកម្មស្នូលរបស់កម្ពុជាផងដែរ​តួយ៉ាងដូចជាវិស័យទេសចរណ៍ជាដើម។​

លោក​ សែន សាវ៉េត  ប្រជានេសាទ មកពីសហគមន៍នេសាទកំពង់ត្រឡាចលើ ខេត្តកំពង់ឆ្នាំង បាន​ឲ្យដឹង​ថា ការប្រែប្រួលអាកាសធាតុដែលមិនអាចដឹងមុន និងការថយចុះនៃទឹកទន្លេសាប ដោយសារការអភិវឌ្ឍវារីអគ្គិសនីនៅផ្នែកខាងលើ និងការប្រែប្រួលអាកាសធាតុ បានធ្វើឱ្យលោក និងអ្នកជិតខាងកាន់តែពិបាក។

លោក សាវ៉េត មាន​ប្រសាសន៍​ថា​៖ «​នៅ​ពេល​ភ្លៀង​មិន​គ្រប់​គ្រាន់ កសិករ​ត្រូវ​បូមទឹកពីទន្លេ​ដាក់​ស្រែ​ ដូច្នេះ​វា​ធ្វើ​ឱ្យ​ទឹក​រាក់​ដែល​ពិបាក​ឱ្យត្រីមានជីវិតរស់នៅ»។

លោក​បាន​បន្ថែម​ថា​៖ «​ឆ្នាំ​មុនពួក​យើង​ចាប់​ត្រី​បាន​ច្រើន​ដោយសារ​​មាន​ភ្លៀង​ធ្លាក់​ច្រើន ប៉ុន្តែ​យើង​មិន​អាច​ទាយ​បាន​ទេ​នៅ​​ឆ្នាំ​នេះ។​ ​ហើយ​យើង​​ថាឆ្នាំហ្នឹងពិបាក​ដោយសារ​អាកាសធាតុ​កាន់តែ​ក្តៅ​»​

ប្រឡាយ​រីងទឹកមួយនៅក្បែរ​វាល​ស្រែ​ក្នុង​ខេត្ត​កំពង់ចាម។ ថតកាល​ពី​ថ្ងៃ​ទី​១០ ខែ​មេសា ឆ្នាំ​២០២៣។ (ខេមបូចា/ព្រីង សំរាំង)

លោក ឡុង សុចែត ប្រធាន​សម្របសម្រួលបណ្តាញសម្ព័ន្ធអ្នកនេសាទកម្ពុជា ដែលធ្វើការជាមួយសហគមន៍បឹងទន្លេសាប និង​ទឹកប្រៃ ចំនួន ១១៦ មានប្រសាសន៍ថា បើទោះបីជាទិន្នផលនេសាទកើនឡើងនៅឆ្នាំ ២០២២យ៉ាងណាក្តី ប៉ុន្តែវាមិនមាននិរន្តរភាពទេ ដោយសាររដូវប្រាំង​អូសបន្លាយ  និងការអភិវឌ្ឍន៍ទំនប់វារីអគ្គិសនី​តាមដងទន្លេមេគង្គ រួមជាមួយនឹងការនេសាទខុសច្បាប់។​

លោក​បាន​ថ្លែងបន្ត​ថា​៖ «​ប្រសិន​បើ​ឆ្នាំ​នេះ​ទឹក​តិច វា​នឹង​ពិបាក​សម្រាប់​អ្នក​នេសាទ។ ការកាប់បំផ្លាញព្រៃលិចទឹក ធ្វើឱ្យបាត់បង់ទីជម្រកត្រី និងទិន្នផលនេសាទធ្លាក់ចុះ ដោយសារទន្លេមានទឹករាក់។ បម្រែបម្រួល​អាកាសធាតុ​បង្ក​ឱ្យ​មាន​ការ​កើនឡើង​នៃ​សីតុណ្ហភាព ធ្វើ​ឱ្យ​ទឹក​កាន់តែ​ក្តៅ ធ្វើឲ្យត្រីពិបាករស់​និង​មិនអាច​ពងបាន​»​

កាសែតភ្នំពេញប៉ុស្តិ៍បានរាយការណ៍ថាកាលពីឆ្នាំមុនថាភ្លៀងធ្លាក់ខ្លាំងបានធ្វើឱ្យប្រសើរឡើងដល់ឧស្សាហកម្មនេសាទដែលកំពុងតែជួបការលំបាក ប៉ុន្តែក៏វាក៏បានបណ្តាលឱ្យមានការកើនឡើងនូវទឹកជំនន់ដែលបានធ្វើឱ្យខូចខាតស្រូវជាង ២០០ ​០០០ ហិកតាផងដែរកាលពីឆ្នាំមុន។

ADB ឱ្យដឹងទៀតថា៖ «ការប្រែប្រួលអាកាសធាតុត្រូវបានគេរំពឹងថានឹងបង្កើនប្រេកង់ និងអាំងតង់ស៊ីតេ​ទឹកជំនន់ និងគ្រោះរាំងស្ងួត បង្កើនសីតុណ្ហភាពមធ្យម និងបង្កើនកម្រិតទឹកសមុទ្រ ក៏ដូចជាការជ្រៀតអំបិលចូលដីក្នុងតំបន់ទឹកសាបផងដែរ»។  ស្ថាប័នដដែលក៏បានកត់សម្គាល់ថា ប្រទេសកម្ពុជាមានហានិភ័យទឹកជំនន់ខ្ពស់ ដោយសារតំបន់វាលទំនាបធំទូលាយ។

លោក សយ ចាន់ណា កសិករ​នៅ​ខេត្ត​កំពង់ឆ្នាំង បាន​និយាយ​ថាកាលពីឆ្នាំមុន ស្រូវ​របស់​លោក​មួយ​ហិកតា និង​ដំណាំ​ផ្សេង​ទៀត​បាន​រង​ការ​ខូច​ខាត​ដោយ​ទឹក​ជំនន់។ លោក​ប្រមូល​ផល​ស្រូវ​បាន​តែ​ពីរ​តោន​ប៉ុណ្ណោះ គឺ​តិច​ជាង​ពាក់កណ្តាលនៃ​ទិន្នផល​ជាមធ្យមដែលលោកធ្វើបាន​។

លោក​បាន​បន្ត​ថា​៖ «​ខ្ញុំ​ពឹង​ផ្អែក​លើ​ការ​ធ្វើ​ស្រែ​ចម្ការ និង​ដាំ​ដំណាំ​សម្រាប់​ចិញ្ចឹម​ជីវិត។កាលពីឆ្នាំទៅ ទឹក​ជំនន់​បាន​កើត​ឡើង​ក្នុង​ខែ​វិច្ឆិកា ដែល​ជា​រដូវ​ច្រូត​កាត់ ដែល​ធ្វើ​ឱ្យ​ខ្ញុំ​ខាត​លុយ​អស់ជាង ២ លានរៀល​ » ។

កសិករ​ម្នាក់​ទៀត​មក​ពី​ខេត្ត​កំពង់ឆ្នាំងដែរ លោកស្រី ចាន់ សុផល បានប្រាប់​ថា ស្រែ​របស់​លោកស្រី​​មិន​ប្រឈមនឹង​ទឹក​ជំនន់ទេ ប៉ុន្តែ​វាប៉ះពាល់​ដោយ​គ្រោះ​រាំង​ស្ងួតទៅវិញ។

លោកស្រីបាន​បន្ត​ថា​៖«​សព្វ​ថ្ងៃ​នេះ​កាន់​តែ​លំបាក​ដោយ​សារ​បម្រែបម្រួល​អាកាសធាតុ​ដែល​បង្ក​ឱ្យ​មាន​គ្រោះ​ទឹក​ជំនន់ និង​គ្រោះ​រាំង​ស្ងួត»។  លោកស្រីបានបន្ថែមថា៖ «កសិករ​ក៏​ប្រឈម​នឹង​បំណុល​ដែរ​ព្រោះ​យើង​ត្រូវ​ខ្ចី​លុយគេ​ធ្វើ​ស្រែ​ចម្ការ ហើយ​ចំណាយ​ទាំង​អស់​ពេលប្រមូលផល។​ មិនមែនតែខ្ញុំទេ ពេលនេះការធ្វើស្រែចម្ការចំណាយច្រើន បានផលមកត្រូវសងគេអស់ ហើយពេលខ្លះយើងនៅតែជំពាក់ [បំណុល]គេទៀត»។

ក្របី​លេង​ទឹក​នៅ​ប្រឡាយ​ក្បែរ​វាល​ស្រែ​ក្នុង​ខេត្ត​កំពង់ចាម កាល​ពី​ថ្ងៃ​ទី​១០ ខែ​មេសា ឆ្នាំ​២០២៣។ (ខេមបូចា/ព្រីង សំរាំង)

ខណៈ ប្រទេសកម្ពុជាបានធ្វើឱ្យកាន់ប្រសើរក្នុងការលើកកម្ពស់ភាពធន់នឹងអាកាសធាតុ​ កាលពីឆ្នាំមុន​ ធនាគារអភិវឌ្ឍន៍អាស៊ី​បានដាក់កម្ពុជានៅចំណាត់ថ្នាក់ទី១៤៩ ក្នុងចំណោម១៨២ប្រទេស។ ភាគច្រើននៃចំណាត់ថ្នាក់នេះក៏អាស្រ័យលើកិច្ចសហប្រតិបត្តិការជាមួយប្រទេសជិតខាងក្នុងការតវ៉ានឹងការអភិវឌ្ឍន៍ដែលនឹងធ្វើឱ្យផលប៉ះពាល់នៃការប្រែប្រួលអាកាសធាតុដែលមានកាន់តែធ្ងន់ធ្ងរទៅលើអ្នកនេសាទ និងកសិករ។

នៅក្នុងកិច្ចប្រជុំកំពូលប្រចាំឆ្នាំលើកទីបួនរបស់ខ្លួននៅប្រទេសឡាវកាលពីសប្តាហ៍មុន គណៈកម្មការទន្លេមេគង្គបានជំរុញឱ្យមានការរក្សាការពារទន្លេមេគង្គឱ្យបានប្រសើរជាងនេះ ដោយបានប្រកាសថា៖ «វាដល់ពេលដែលត្រូវប្តូរពីពាក្យថាចង់ឃើញ ហើយផ្តោតលើវិធានការ ដែលធ្វើឱ្យមានការផ្លាស់ប្តូរ ប្រកបដោយអត្ថន័យ»។​

គណៈកម្មការដែលរួមមានកម្ពុជា ឡាវ ថៃ និងវៀតណាម បានលើកឡើងថា ខណៈដែលវារីអគ្គិសនី ផលិត​កម្ម​ស្រូវ ​និងផលិតកម្មវារីវប្បកម្ម មានការកើនឡើង ដែលបានធ្វើឱ្យស្ថានភាពសេដ្ឋកិច្ចសង្គមប្រសើរឡើងនោះ គ្រួសារប្រជានេសាទ និងកសិកររាប់លាននាក់ក្នុងប្រទេសជាសមាជិកគណៈកម្មការទន្លេមេគង្គដែលពឹងផ្អែកលើទន្លេនេះសម្រាប់ម្ហូបអាហារ និងជីវភាពរស់នៅ កំពុងរងផលប៉ះពាល់ខ្លាំងជាងគេដែរ។ ប្រទេសនៅប្រភពខ្សែ​ទឹកខាងលើដូចជា ចិន និងមីយ៉ាន់ម៉ា គ្រប់គ្រងទំនប់ចំនួន ១១ ដែលប៉ះពាល់ដល់ប្រទេសជាសមាជិកគណៈកម្មការនេះ។

លោក Bounkham Vorachit រដ្ឋមន្ត្រីក្រសួងធនធានធម្មជាតិ និងបរិស្ថានឡាវ បានមានប្រសាសន៍ថា៖ «ការប្រមូលផ្តុំឆន្ទៈនយោបាយនៅតែមានសារៈសំខាន់។ មានសារៈសំខាន់គឺការគិតឆ្ពោះទៅមុខ និងមានឆន្ទៈក្នុងការពិចារណារកវិធីប្រកបដោយភាពច្នៃប្រឌិត ដើម្បីទៅរកកិច្ចសហប្រតិបត្តិការក្នុងស្រុក តំបន់ និងអន្តរជាតិ»។​

ការលាតសន្ធឹងនៃទន្លេមេគង្គនៅជិតរាជធានីភ្នំពេញមានសារៈសំខាន់សម្រាប់ត្រី ដែលផ្លាស់ទីក្នុងរដូវត្រីពង ពីទន្លេមេគង្គក្រោមចូលទៅ បឹងទន្លេសាប។ ត្រីទាំងនេះចូលរួមចំណែកយ៉ាងសំខាន់សម្រាប់ចិញ្ចឹមមនុស្សរាប់សិបលាននាក់ ប៉ុន្តែការផ្លាស់ប្តូររបបទឹកទន្លេរារាំងការផ្លាស់ទីរបស់ពួកវា។

អ្នក​នេសាទ​ម្នាក់​ជួសជុល​សំណាញ់​​នៅ​ទន្លេសាប។ រូបភាពថតថ្ងៃទី ១៤ ខែ សីហា ឆ្នាំ ២០១៦។ ខេមបូចា/ព្រីងសំរាំង

ខណៈដែលអ្នកនេសាទនៅបឹងទន្លេសាបជាជនរងគ្រោះនៃការអភិវឌ្ឍតាមដងទន្លេភាគខាងលើក្រៅព្រំដែនកម្ពុជា កម្ពុជាខ្លួនឯងផ្ទាល់ក៏បានកែប្រែទន្លេមេគង្គសម្រាប់ការអភិវឌ្ឍ និងទទួលបានផលចំណេញផ្នែកហិរញ្ញវត្ថុសម្រាប់ពួកឥស្សរជនមួយចំនួនផងដែរ។

ក្រៅពីការចោទប្រកាន់ថាបានបើកការនាំចេញខ្សាច់ទៅកាន់ទីផ្សារអន្តរជាតិឡើងវិញកាលពីឆ្នាំមុនបន្ទាប់ពីហាមឃាត់ជាអចិន្ត្រៃយ៍ក្នុងឆ្នាំ២០១៧ ការអភិវឌ្ឍទីក្រុងរណបកោះនរា កំពុងបង្រួមផ្ទៃទន្លេមេគង្គ ដោយយមានការចាក់បំពេញដីយ៉ាងច្រើនដើម្បី​អភិវឌ្ឍទីក្រុងរណបមួយនេះ។

រដ្ឋាភិបាលក៏បានប្តេជ្ញាចិត្តក្នុងការបន្តការអភិវឌ្ឍបៃតង តាមរយៈផែនការយុទ្ធសាស្រ្តជាតិអភិវឌ្ឍន៍បៃតង ឆ្នាំ ២០១៣-២០៣០ ដោយផ្តោតលើការប្រើប្រាស់ប្រកបដោយប្រសិទ្ធភាពនៃធនធានធម្មជាតិ និរន្តរភាពបរិស្ថាន រួមទាំងការវិនិយោគនិងការងារបៃតង។

របាយការណ៍របស់ ADB បង្ហាញថា ការកាប់បំផ្លាញព្រៃឈើ ការពង្រីកការដាំដុះស្រូវ និងការកើនឡើងនៃតម្រូវការថាមពលពីផលិតកម្មឧស្សាហកម្ម បានធ្វើឱ្យការបញ្ចេញកាបូនរបស់កម្ពុជាកើនឡើង បើទោះបីជាកម្ពុជានៅតែជាប្រទេសបញ្ចេញឧស្ម័នផ្ទះកញ្ចក់ទាបបើធៀបនឹងប្រទេសដទៃក៏ដោយ។

ADB បាន​រាយការណ៍​ថា​៖ «​ការ​ពង្រីក​ការ​វិនិយោគ​បៃតង​ក្នុង​វិស័យ​អាទិភាព​នឹង​ជួយ​កម្ពុជា​​បង្កើនសក្តានុពល​កំណើន​រយៈពេល​វែង​របស់​ខ្លួន​»​

អ្នកនាំពាក្យក្រសួងបរិស្ថាន លោក នេត្រ ភក្ត្រា បានប្រាប់ខេមបូចាថា៖ «កម្ពុជាបានធ្វើឱ្យមានរីកចម្រើនក្នុងការទប់ស្កាត់ការប្រែប្រួលអាកាសធាតុ» ដោយផ្តោតលើការការពារព្រៃឈើ ការគ្រប់គ្រងកាកសំណល់និងប្រសិទ្ធភាពថាមពល ខណៈអ្នកនាំពាក្យក្រសួងកសិកម្ម កញ្ញា អ៊ឹម រចនា មានប្រសាសន៍ថាក្រសួងសិកម្មកំពុងដាក់ឱ្យប្រើប្រាស់គ្រាប់ពូជស្រូវដែលធន់នឹងការបម្រែបម្រួល​អាកាសធាតុ ក៏ដូចជាផ្តល់បច្ចេកទេសកសិកម្មដែលប្រកបដោយភាពធន់។​

កញ្ញា រចនា បានលើកឡើងថា៖ «អ្វីដែលយើងកំពុងជំរុញខ្លាំងនាពេលនេះ គឺការលើកកម្ពស់ការធ្វើ​កសិកម្ម​ផ្ទះសំណាញ់ និងការបង្កាត់ពូជដំណាំថ្មី ដែលអាចជួយកសិករមានភាពធន់នឹងការប្រែប្រួលអាកាសធាតុ»។

ប៉ុន្តែ​អ្នកនាំពាក្យ​ក្រសួង​ទាំងពីរ​មិនបាន​ឆ្លើយតប​នឹង​សំណួរ​ថាតើ​​ការកាប់​បំផ្លាញ​ព្រៃឈើ​នឹង​ធ្វើ​​ឱ្យ​ផលប៉ះពាល់​នៃ​ការប្រែប្រួល​អាកាសធាតុ​កាន់តែ​អាក្រក់​មកលើ​ប្រទេស​កម្ពុជា​ក្នុង​កម្រិតណាស់​នោះទេ។

ការកាប់បំផ្លាញព្រៃឈើនៅកម្ពុជា​នៅតែមាន​អត្រាខ្ពស់ ដែល​បណ្តាលមកពី​ក្រុម​អ្នកមានអំណាច​មួយចំនួនចាប់​យក​ដី​នៅ​ក្នុង​តំបន់​ការពារ។ 

កំណាត់ឈើធំៗនៅសេសសល់ ដែលគេស្គាល់ថាជាដើមគគីរ ដុះនៅតាមមាត់ស្ទឹងអារ៉ែង ក្នុងភូមិប្រឡាយ ឃុំប្រឡាយ ស្រុកថ្មបាំង ខេត្តកោះកុង ត្រូវបានគេកាប់បំផ្លាញ។ រូបថត ថ្ងៃទី ២៨ ខែមីនា ឆ្នាំ២០២២។ ខេមបូចា/ សុវណ្ណ ស្រីពេជ្រ
កំណាត់ឈើធំៗនៅសេសសល់ ដែលគេស្គាល់ថាជាដើមគគីរ ដុះនៅតាមមាត់ស្ទឹងអារ៉ែង ក្នុងភូមិប្រឡាយ ឃុំប្រឡាយ ស្រុកថ្មបាំង ខេត្តកោះកុង ត្រូវបានគេកាប់បំផ្លាញ។ រូបថត ថ្ងៃទី ២៨ ខែមីនា ឆ្នាំ២០២២។ ខេមបូចា/ សុវណ្ណ ស្រីពេជ្រ

អ្នកគ្រប់គ្រងកម្មវិធីបណ្តាញយុវជនកម្ពុជា លោក ហេង គឹមហុង មានប្រសាសន៍ថា ការកាប់បំផ្លាញព្រៃឈើគឺជាកត្តារួមចំណែកដ៏សំខាន់មួយក្នុងការធ្វើឱ្យមានបម្រែបម្រួលអាកាសធាតុ ដោយកត់សម្គាល់ថាក្នុងរយៈពេលពីរទស្សវត្សចុងក្រោយនេះ គម្របព្រៃឈើធម្មជាតិ ១៤% ត្រូវបានបំផ្លាញ និងជំនួសមកវិញដោយចម្ការ។ លោកបន្តថា ខណៈការអភិវឌ្ឍព្រៃឈើឥណទានកាបូនរ៉េដបូក (REDD+) របស់កម្ពុជាអាចផ្តល់នូវមធ្យោបាយដ៏សំខាន់មួយដើម្បីការពារ និងរកប្រាក់ពីព្រៃឈើដែលនៅសេសសល់ គម្រោងបែបនេះនៅតែ «ផុយស្រួយ ប្រសិនបើការកាប់បំផ្លាញព្រៃឈើនៅតែបន្ត»។

លោក គឹមហុង ថ្លែងថា៖ «យើងមិនអាចបដិសេធបានទេ​ ដែលថាការកាប់បំផ្លាញព្រៃឈើបានកើនឡើងក្នុងរយៈពេលពីរទសវត្សរ៍ចុងក្រោយនេះ ដោយសារតែ [សម្បទានដីសេដ្ឋកិច្ច] និងការទន្ទ្រានយកដីព្រៃខុសច្បាប់ ដែលបណ្តាលមកពីអំពើពុករលួយខ្ពស់»៕​

ប្រែសម្រួលពីអត្ថបទភាសាអង់គ្លេស៖ ADB Warns Cambodia’s Growth Will Be Stunted by Climate Change

314 views

ព័ត៌មានទាក់ទង

ព័ត៌មានថ្មីៗ

អត្ថបទពេញនិយម