ក្រសួងអភិវឌ្ឍន៍ជនបទបានចេញប្រកាសស្តីពីការ«កំណត់លក្ខណៈសម្បត្តិភូមិគំរូ» ជាភូមិដែលមានវិបុលភាព បរិយាបន្ន នវានុវត្តន៍ ឌីជីថល និងមានភាពធន់ទាំងផ្នែកសេដ្ឋកិច្ចសង្គមដោយក្នុង១ឆ្នាំត្រូវបង្កើតឱ្យបាន៥០ភូមិ បន្ទាប់ពីបានបង្កើតភូមិគំរូចំនួន៣០។ សមាគមសម្ព័ន្ធសហគមន៍កសិករកម្ពុជាស្វាគមន៍ចំពោះការបន្តបង្កើតភូមិគំរូ ប៉ុន្តែលើកទឹកចិត្តឱ្យមានការបង្កើតភូមិគំរូនៅតំបន់តាមព្រំដែនដើម្បីលើកកម្ពស់ការការពារបូរណភាពទឹកដី។
ប្រកាសរបស់ក្រសួងអភិវឌ្ឍន៍ជនបទចុះថ្ងៃទី៧ ខែសីហា ឆ្នាំ២០២៤នេះ ធ្វើឡើងស្របពេលដែលក្រសួងនេះកំពុងរៀបចំចុះស្រង់ទិន្នន័យស្ថានភាពភូមិ ដើម្បីបង្កើតជាចលនាភូមិគំរូឱ្យបាន២៥០បន្ថែមទៀត ដើម្បីធ្វើការអភិវឌ្ឍលើហេដ្ឋារចនាសម្ព័ន្ធ ផ្តល់ប្រាក់កម្ចីក្នុងអត្រាកាប្រាក់ទាបដល់ប្រជាពលរដ្ឋនៅតាមភូមិគំរូទាំងនោះយកទៅពង្រីកមុខរបរបន្ថែម។ នេះបើតាមក្រសួងអភិវឌ្ឍន៍ជនបទ។
ក្រសួងនេះឱ្យដឹងថា ភូមិគំរូចំនួន៣០ត្រូវបានបង្កើតឡើងក្នុងរយៈពេល១០ឆ្នាំចុងក្រោយក្នុងខេត្តគោលដៅចំនួន៣ ដោយទទួលបានការជួយឧបត្ថម្ភពីទីភ្នាក់ងារសហប្រតិបត្តិការអន្តរជាតិកូរ៉េ កូយកា។ ភូមិទាំងនោះមាននៅក្នុងខេត្តត្បូងឃ្មុំ ចំនួន១០ភូមិ ខេត្ត តាកែវ មាន១០ភូមិ និងខេត្តកំពង់ស្ពឺ មាន១០ភូមិ ដែលភូមិនីមួយៗមានសក្តានុពលផ្សេងៗគ្នា។
បច្ចុប្បន្នក្រសួងកំពុងអភិវឌ្ឍភូមិគំរូ ចំនួន៣៤ភូមិផ្សេងទៀត នៅក្នុងខេត្តកំពង់ស្ពឺ បាត់ដំបង ប៉ៃលិន និងខេត្តបន្ទាយមានជ័យ តាមរយៈគម្រោងអភិវឌ្ឍន៍ភូមិសន្តិភាព និងគម្រោងអភិវឌ្ឍភូមិតាមវិធីសាស្រ្តចលនាភូមិថ្មី។
បើយោងតាមឯកសាររបស់ក្រសួងមហាផ្ទៃបានឱ្យដឹងថា បច្ចុប្បន្នកម្ពុជាមានរាជធានី-ខេត្ត ចំនួន២៥ ក្រុងចំនួន២៧ ស្រុកចំនួន១៦២ ខណ្ឌចំនួន១៤ ឃុំចំនួន ១ ៤០៥ សង្កាត់ចំនួន២៤១ និងភូមិចំនួន១៤ ៣៩៤។
លោក អឿន ធារិទ្ធ ប្រធាននាយកដ្ឋានអភិវឌ្ឍន៍សហគមន៍ បានថ្លែងប្រាប់ ខេមបូចា កាលពីថ្ងៃទី២៦ ខែសីហា ថា ក្រុមការងារអភិវឌ្ឍន៍ភូមិគំរូ បានរៀបចំលក្ខណៈវិនិច្ឆ័យភូមិគំរូចំនួន៥ចំណុចក្នុងនោះរួមមាន ១សេដ្ឋកិច្ច ២សង្គម និងវប្បធម៌ ៣សុខភាព និងបរិស្ថានរស់នៅ ៤ហេដ្ឋារចនាសម្ព័ន្ធ និង៥អភិបាលកិច្ច។
លោកបញ្ជាក់ថា៖ «គោលបំណងនៃការកំណត់លក្ខណៈវិនិច្ឆ័យនេះ គឺដើម្បីឱ្យគ្រប់ភាគីពាក់ព័ន្ធចូលរួមគាំទ្រដល់គ្រប់សកម្មភាពអភិវឌ្ឍន៍នៅក្នុងភូមិ ដើម្បីបង្កើនជីវភាព និងប្រាក់ចំណូលរបស់ប្រជាពលរដ្ឋប្រកបដោយចីរភាព»។
នៅក្នុងប្រកាសរបស់ក្រសួងអភិវឌ្ឍន៍ជនបទត្រង់ជំពូក១ ប្រការ៣បានបញ្ជាក់ថា «ភូមិគំរូ»សំដៅដល់ភូមិឋានដែលមានសុខុដុមនីយកម្ម និងការចូលរួមរបស់ប្រជាជនក្នុងភាពជាម្ចាស់ធានាបាននូវចរន្តសេដ្ឋកិច្ច និងនិរន្តរភាពកំណើនប្រាក់ចំណូលគ្រួសារ ទទួលបានប្រសិទ្ធភាពនៃសេវាសង្គមកិច្ច មានសុខភាព និងបរិស្ថានរស់នៅល្អ ហេដ្ឋារចនាសម្ព័ន្ធសមស្រប និងអភិបាលកិច្ចល្អជាដើម។ សេដ្ឋកិច្ចគឺសំដៅដល់លក្ខខណ្ឌដែលប្រជាពលរដ្ឋនៅក្នុងភូមិទទួលបានប្រាក់ចំណូលប្រចាំខែសមរម្យ មានការងារធ្វើ និងមានការប្រើប្រាស់សេវាមីក្រូហិរញ្ញវត្ថុជាដើម។
ទាក់ទងសង្គម និងវប្បធម៌នៅក្នុងភូមិគំរូ ប្រកាសរបស់ក្រសួងអភិវឌ្ឍន៍ជនបទបានលើកឡើងថា គឺសំដៅដល់លក្ខខណ្ឌដែលប្រជាពលរដ្ឋនៅក្នុងភូមិទទួលបានកម្រិតអប់រំមូលដ្ឋានរបស់កុមារ និងយុវជន ជំនាញមូលដ្ឋាននិងបំណិនជីវិត ស្មារតីសមូហភាព និងសាមគ្គីភាពក្នុងសហគមន៍។ ភូមិគំរូថែមទាំងធ្វើឱ្យប្រជាពលរដ្ឋនៅក្នុងភូមិទទួលបានសេវាទឹកស្អាត សេវាអនាម័យ សេវាសុខភាពមូលដ្ឋាន ការអភិវឌ្ឍបៃតងក្នុងភូមិ និងការគ្រប់គ្រងទុកដាក់កាកសំណល់ផ្សេងៗ។
ក្រៅពីនេះក្នុងភូមិគំរូទទួលបានការអភិវឌ្ឍផ្លូវ ការផ្គត់ផ្គង់អគ្គិសនី មានប្រព័ន្ធទឹកស្រោចស្រពដំណាំដាំដុះនៅគ្រប់រដូវកាល ការសាងសង់សំណង់អគារសាធារណៈរបស់ភូមិ និងការប្រើប្រាស់បច្ចេកវិទ្យាឌីជីថល។ ក្រសួងអភិវឌ្ឍន៍ជនបទលើកឡើងទៀតថា ចំណែកអភិបាលកិច្ចនៅក្នុងភូមិគំរូវិញ គឺប្រជាពលរដ្ឋទទួលបានការដឹកនាំ និងសម្របសម្រួលការងារអភិវឌ្ឍន៍ភូមិ ការរៀបចំផែនការអភិវឌ្ឍន៍ភូមិ ការចងក្រងនិងបង្កើតសហគមន៍មូលដ្ឋាន ការផ្តល់សេវាសាធារណៈបានល្អ និងការអនុវត្តគោលនយោបាយភូមិឃុំមានសុវត្ថិភាព ជាដើម។
លោក ពិត ករុណា អនុរដ្ឋលេខាធិការ និងជាអ្នកនាំពាក្យក្រសួងអភិវឌ្ឍន៍ជនបទបានថ្លែងថា ការអភិវឌ្ឍភូមិគំរូ សំដៅជួយលើកកម្ពស់ជីវភាពប្រជាពលរដ្ឋនៅជនបទឱ្យកាន់តែប្រសើរឡើង តាមរយៈការជួយបណ្តុះបណ្តាលជំនាញបន្ថែមជូនពួកគាត់ និងពង្រឹងសមត្ថភាពគណៈកម្មការអភិវឌ្ឍន៍ភូមិ។
លោកបញ្ជាក់ថា៖ «សមិទ្ធផលនៃការអភិវឌ្ឍភូមិគំរូ គឺបានធ្វើឱ្យប្រជាពលរដ្ឋនៅក្នុងសហគមន៍មានសាមគ្គីភាព និងថែមទាំងធ្វើឱ្យប្រាក់ចំណូលរបស់ពួកគាត់មានការកើនឡើងទៀតផង»។
លោកបានឱ្យដឹងទៀតថា ជាមួយគ្នានេះក្រសួងអភិវឌ្ឍន៍ជនបទបានធ្វើការបណ្តុះបណ្តាលជំនាញជូនដល់ប្រជាពលរដ្ឋនៅតាមភូមិគំរូ ដូចជាជំនាញជួសជុលម៉ាស៊ីន វិធីសាស្ត្រក្នុងការចិញ្ជឹមសត្វ និងការធ្វើកសិកម្មឱ្យទទួលបានទិន្នផលខ្ពស់ដោយក្រសួងអភិវឌ្ឍន៍ជនបទមានវិទ្យាស្ថានអភិវឌ្ឍន៍ជនបទនៅខេត្តកំពង់ស្ពឺ។
អ្នកនាំពាក្យក្រសួងអភិវឌ្ឍន៍ជនបទលើកឡើងថា៖ «ជាទិសដៅដើម្បីចូលរួមសម្រេចបានចក្ខុវិស័យរបស់រាជរដ្ឋាភិបាលកម្ពុជាជាប្រទេសមានប្រាក់ចំណូលកម្រិតខ្ពស់ឆ្នាំ២០៥០ ក្រសួងអភិវឌ្ឍន៍ជនបទបានផ្តោតយកចិត្តទុកដាក់ទៅលើការអភិវឌ្ឍភូមិគំរូនៅទូទាំងប្រទេស ដោយដាក់ទិសដៅរបស់ខ្លួនគឺអភិវឌ្ឍភូមិគំរូ ៥០ភូមិ ក្នុងមួយឆ្នាំ»។
ជាមួយគ្នានេះគម្រោងភូមិសន្តិភាពដែលជាផ្នែកមួយនៃភូមិគំរូ បានទទួលហិរញ្ញប្បទានពីទីភ្នាក់ងារសហប្រតិបត្តិការអន្តរជាតិកូរ៉េ (KOICA) ដែលក្នុងគោលដៅខេត្តបន្ទាយមានជ័យ បានជ្រើសរើសមេក្រុមកសិករគំរូចំនួន២០ក្រុម និងកសិករគំរូចំនួន៥៣៧គ្រួសារ ដើម្បីបណ្ដុះបណ្ដាល និងផ្ទេរចំណេះដឹងបច្ចេកទេសកសិកម្មឆ្លាតវៃ ឬកសិកម្មល្អកម្ពុជា (CamGAP) ដើម្បីផលិតផលផ្លែឈើ និងផលិតកម្មបន្លែសុវត្ថិភាព។ គម្រោងនេះក៏បន្តចុះផ្ដល់ប្រឹក្សាបច្ចេកទេសដល់សមាជិកជាបន្ដបន្ទាប់ និងលើកទឹកចិត្តឱ្យកសិករដាំដុះបន្ថែមទៀត និងរៀបចំផែនការដើម្បីបង្កើត និងប្រមូលចងក្រងជាបណ្តុំបន្លែ។ នេះបើយោងតាមក្រសួងអភិវឌ្ឍន៍ជនបទ កាលពីថ្ងៃទី១៣ ខែសីហា ឆ្នាំ២០២៤។
តាមក្រសួងអភិវឌ្ឍន៍ជនបទ ភូមិគំរូត្រូវបង្កើតឱ្យមានគណៈកម្មាការអភិវឌ្ឍន៍ភូមិមួយ ដោយមន្ត្រីជំនាញធ្វើការជំរុញបង្រៀនអ្នកភូមិឱ្យឧស្សាហ៍ព្យាយាម បណ្តុះបណ្តាលបំនិនជីវិត ដើម្បីមានចំណេះដឹងបន្ថែម។ មន្ត្រីជំនាញជួយអភិវឌ្ឍន៍ក្នុងភូមិ ជួយរក និងភ្ជាប់ទីផ្សារឱ្យអ្នកភូមិ។ បន្ថែមពីនេះគណៈកម្មាការអភិវឌ្ឍន៍ភូមិមានតួនាទីដឹកនាំសម្របសម្រួល លើផែនការអភិវឌ្ឍន៍ប្រចាំឆ្នាំជូនដល់ប្រជាពលរដ្ឋ ហើយរៀបចំផ្សព្វផ្សាយពីភូមិគំរូ ដើម្បីទាក់ទាញទេសចរណ៍ថែមទៀត។ គណៈកម្មាការអភិវឌ្ឍភូមិក៏ជួយជំរុញឱ្យមានការចងក្រងជាសហគមន៍ ដែលអាចបង្កើតសេដ្ឋកិច្ចមាត្រដ្ឋានផងដែរ។
លោកស្រី គឹម លាង មេឃុំចំប៉ា បានឱ្យដឹងថា ឃុំចំប៉ា ដែលស្ថិតនៅក្នុងស្រុកព្រៃកប្បាស ខេត្តតាកែវ មានភូមិចំនួន៥ ត្រូវបានជ្រើសរើសធ្វើជាភូមិគំរូក្នុងចំណោមភូមិសរុបចំនួន៩។ ភូមិគំរូទាំងនោះរួមមានភូមិជម្ពូព្រឹក ប្ញស្សីថ្មី ពន្សាំង ចំប៉ា និងភូមិរនាមពេជ្រ។ លោកស្រីមេឃុំបានប្រាប់ ខេមបូចា កាលពីថ្ងៃទី២០ ខែសីហា ថា គ្រាន់តែនៅភូមិពន្សាំងទទួលបានឥណទានដែលមានសាច់ប្រាក់ ១៣ ០៥០ដុល្លារ ជួយប្រជាពលរដ្ឋតម្បាញហូល១៤កី ជួយប្រជាពលរដ្ឋដាំដំណាំត្រសក់២១គ្រួសារ សាងសង់បង្គន់អនាម័យសម្រាប់ប្រជាពលរដ្ឋ១៣គ្រួសារ សាងសង់បង្គន់សាធារណៈចំនួន៣ សាងសង់សាលាមត្តេយ្យ១ខ្នងមាន២បន្ទប់ សាងសង់ទីស្នាក់ការភូមិចំនួន១ ជួសជុលផ្លូវក្នុងភូមិ៥ខ្សែ ជីកស្រះទឹកបានចំនួន២ ដាំកូនឈើ និងជួសជុលផ្លូវផងដែរ។
លោកស្រីលើកឡើងថា ចលនាភូមិគំរូនេះទទួលបានអត្ថប្រយោជន៍ជាច្រើនពីក្រសួងអភិវឌ្ឍន៍ជនបទ និងពីទីភ្នាក់ងារអភិវឌ្ឍន៍កូរ៉េកូយកា ដូចជាការផ្តល់ប្រាក់កម្ចីមានអត្រាកាប្រាក់ទាប ដើម្បីយកទៅបង្កើត និងពង្រីកមុខរបរជីកស្រះចិញ្ចឹមត្រី ដាំដំណាំ តម្បាញ ចិញ្ចឹមគោ ជួយផ្នែកបច្ចេកទេស និងគំនិតយោបល់ក្នុងការគ្រប់គ្រងគម្រោងជាដើម។
លោកស្រីមេឃុំបញ្ជាក់ថា៖ «ប្រជាពលរដ្ឋនៅក្នុងឃុំចំប៉ាប្រកបរបរធ្វើកសិកម្ម តម្បាញហូល ទៅធ្វើកម្មករកាត់ដេរនៅរោងចក្រ និងមានមុខរបរបន្ទាប់បន្សំដូចជាចាក់ជើងជណ្តើរ ធ្វើតុ ទូ កៅអី កាត់សក់ ជួសជុលម៉ូតូ និងឡើងត្នោត។ បច្ចុប្បន្នឃុំចំប៉ាយើងអាចធ្វើស្រែ១ឆ្នាំបាន៣ដង»។
លោក ហាស់ ស្រេង អាយុ៨០ឆ្នាំ ជាកសិករនៅភូមិជម្ពូព្រឹក បានប្រាប់ខេមបូចា កាលពីថ្ងៃទី២៦ ខែសីហា ថា ក្រសួងអភិវឌ្ឍន៍ជនបទ ដោយមានកិច្ចសហការជាមួយទីភ្នាក់ងារអភិវឌ្ឍន៍កូរ៉េកូយកាក្នុងរយៈពេល៣ឆ្នាំកន្លងមក គឺបានជួយថវិកាដល់ភូមិជម្ពូព្រឹកមានទឹកប្រាក់ប្រមាណជា៨ម៉ឺនដុល្លារលើគម្រោងចំនួន១២។
លោកបញ្ជាក់ថា៖ «ក្នុងនោះមានគម្រោងចិញ្ចឹមត្រី ចិញ្ចឹមជ្រូក ចិញ្ចឹមមាន់ ទិញគោឱ្យប្រជាពលរដ្ឋចិញ្ចឹម ជំរុញឱ្យមានការធ្វើស្រែ១ឆ្នាំ៣ដង ជួសជុលផ្លូវក្នុងភូមិ សាងសង់សាលាបុណ្យ សាងសង់សាលាមត្តេយ្យ សាងសង់ទីស្នាក់ការភូមិ ធ្វើសួនកុមារ និងជួយគ្រួសារតម្បាញហូលជាដើម»។
លោក ហាស់ ស្រេង បានឱ្យដឹងទៀតថា ចាប់តាំងពីភូមិជម្ពូព្រឹកត្រូវបានអភិវឌ្ឍន៍ជាភូមិគំរូមក ប្រជាពលរដ្ឋក្នុងភូមិទទួលបានការបណ្តុះបណ្តាលជំនាញបច្ចេកទេសផ្សេងៗ ដូចជាជំនាញខាងចិញ្ចឹមសត្វ ជំនាញធ្វើស្រែនិងដាំដំណាំឱ្យទទួលបានទិន្នផលច្រើនជាងមុនជាដើម។ ក្រៅពីនេះក្រុមមន្ត្រីជំនាញក្រសួងអភិវឌ្ឍន៍ជនបទនិងមន្ត្រីជំនាញអង្គការកូយកាបានធ្វើការអប់រំបណ្តុះផ្នត់គំនិតឱ្យប្រជាពលរដ្ឋក្នុងភូមិចេះជួយខ្លួនឯងចេះរួបរួមសាមគ្គីគ្នា ចេះចូលរួមជួយសហគមន៍ធ្វើឱ្យសហគមន៍មានបរិស្ថានស្អាតមានអនាម័យល្អ។
លោកនិយាយថា៖ «ចាប់តាំងពីភូមិជម្ពូព្រឹកត្រូវបានបង្កើតឡើងជាភូមិគំរូដោយមានការជួយបណ្តុះបណ្តាលជំនាញ ជួយជាគំនិត រួមទាំងការជួយជាថវិកាមក ជីវភាពគ្រួសារខ្ញុំ និងជីវភាពបងប្អូនយើងក្នុងភូមិមានភាពល្អប្រសើរជាងមុន»។
បើតាមក្រសួងអភិវឌ្ឍន៍ជនបទ នៅក្នុងភូមិគំរូប្រជាពលរដ្ឋក្នុងមួយគ្រួសារអាចខ្ចីកម្ចីយកទៅពង្រីកមុខរបរបានចំនួន២ពាន់ដុល្លារដែលមានអត្រាកាប្រាក់ ១,៥ភាគរយក្នុង១ខែ។ប៉ុន្តែមុននឹងសម្រេចឱ្យខ្ចីក្រសួងធ្វើការណែនាំកសិករពីការប្រើប្រាស់ និងគ្រប់គ្រងថវិកា ឬពីហានិភ័យជាដើម ដើម្បីកុំឱ្យកសិករយកទៅប្រើប្រាស់ខុសគោលដៅ។
ប្រជាពលរដ្ឋចង់ឱ្យភូមិរបស់ខ្លួនក្លាយជាភូមិគំរូ
អ្នកស្រី ម៉ៅ ណាន ជាកសិកររស់នៅភូមិដូង ស្រុករមាសហែក ខេត្តស្វាយរៀង ដែលស្ថិតនៅជាប់ព្រំដែនវៀតណាមបានថ្លែងថា អ្នកស្រីចង់ឱ្យភូមិរបស់អ្នកស្រី និងភូមិផ្សេងទៀតនៅជាប់ព្រំដែនក្លាយទៅជាភូមិគំរូដើម្បីអាចរួមចំណែកជួយលើកស្ទួយជីវភាពរបស់អ្នកស្រីនិងអ្នកភូមិដទៃទៀតឱ្យបានល្អប្រសើរ។
អ្នកស្រីនិយាយថា៖ «បើភូមិយើងនៅជាប់ព្រំដែនមានផ្លូវថ្នល់ខ្វាត់ខ្វែងល្អ មានការបណ្តុះបណ្តាលជំនាញក្នុងការដាំដុះដំណាំផ្សេងៗ មានការបណ្តុះបណ្តាលជំនាញចិញ្ចឹមសត្វនិងមានការផ្តល់ប្រាក់កម្ចីដែលមានកាប្រាក់ទាបដល់អ្នកភូមិយើងគឺល្អណាស់ពីព្រោះនឹងជួយធ្វើឱ្យអ្នកស្រុកយើងនឹងមានជីវភាពល្អប្រសើរ»។
ចំណែកលោក ផល្លា ផានិត អាយុ៣០ឆ្នាំ ជាកសិកររស់នៅភូមិពោធិ៍អណ្តែត សង្កាត់ព្រែកស្តី ក្រុងសំពៅពូន ខេត្តកណ្តាល បានឱ្យដឹងថា លោកពិតជាចង់ឱ្យភូមិរបស់លោកក្លាយទៅជាភូមិគំរូ គឺភូមិអត់មានគ្រឿងញៀន ភូមិអត់មានល្បែងស៊ីសង ភូមិមានដំណាំដាំដុះហូរហៀរ ផ្លូវក្នុងភូមិល្អ មានភ្លើងបំភ្លឺផ្លូវនៅពេលយប់ មានប្រព័ន្ធទឹកស្រោចស្រពសម្រាប់ធ្វើកសិកម្មទាំងប្រាំងទាំងវស្សាដើម្បីធ្វើកសិកម្ម និងដាំដំណាំផ្សេងៗ ថែមទាំងចង់ឃើញប្រជាពលរដ្ឋនៅក្នុងភូមិសប្បាយចិត្តមានជីវភាពធូរធារដោយសារដំណាំរបស់ពួកគាត់មានទីផ្សារលក់ដូរទទួលបានកម្រៃសមរម្យ។
លោក ផានិត និយាយថា៖ «បច្ចុប្បន្នក្នុងភូមិពោធិ៍អណ្តែត សង្កាត់ព្រែកស្តី មានយុវជនប្រើប្រាស់គ្រឿងញៀនកាន់តែច្រើន ប្រជាជននៅក្នុងភូមិក៏ជំពាក់បំណុលគេច្រើន មានល្បែងស៊ីសងជល់មាន់តាមអនឡាញអីមានច្រើន ហើយបន្លែដែលអ្នកភូមិដាំមិនសូវមានទីផ្សារទេ»។
លោករៀបរាប់ថា ដូចជាត្រសក់១គីឡូក្រាមលក់បានពី៣០០ទៅ៤០០រៀល ត្រឡាច១គីឡូក្រាមលក់បានពី៧០០ទៅ៨០០រៀលទេ។ លោកបន្តថា៖ «និយាយទៅអត់រស់ស្រួលទេមានការពិបាក។ បើនិយាយពីចោរកម្មវិញមានការបាត់ម៉ូតូ លួចកាប់ត្រយូងចេក លួចកាប់ដកយកដំណាំផ្សេងៗគឺកើតមានច្រើន»។
ដោយសារតែផលដំណាំមិនសូវមានទីផ្សារ លក់បានតម្លៃថោកមិនរួចថ្លៃដើម ឬក៏ទទួលបានប្រាក់ចំណេញតិចតួចពេក ធ្វើឱ្យកសិករមួយចំនួនលែងដាំដំណាំដោយទុកដីចម្ការចោលក្នុងនោះចម្ការស្វាយមួយចំនួនក្នុងភូមិពោធិ៍អណ្តែតត្រូវបានកាប់ចោល។ យ៉ាងណាក្តីលោក ផានិត លើកឡើងថា បច្ចុប្បន្ននៅក្នុងសង្កាត់ព្រែកស្តី មានផ្លូវក្នុងភូមិមួយចំនួនត្រូវបានចាក់បេតុង តែផ្លូវមួយចំនួនទៀតជាពិសេសផ្លូវទៅចម្ការមិនទាន់ត្រូវបានឈូសឆាយឱ្យបានល្អប្រសើរនៅឡើយទេដែលនៅតែធ្វើឱ្យកសិករជួបការលំបាកក្នុងការធ្វើដំណើរ និងដឹកផលិតផលកសិកម្មផ្សេងៗ។
លោកបញ្ជាក់ថា៖ «ចំណែកប្រឡាយទឹកវិញ កាយខ្លះនៅខ្លះតែកាយហើយអត់មានទឹកហូរចូលទេ ហើយបើកសិករយើងចង់បូមទឹកចូលស្រែ គឺត្រូវបូម២-៣តង់ទើបបានទឹកចូលដល់ក្នុងស្រែ ដល់អ៊ីចឹងទៅកសិករត្រូវចំណាយច្រើនមិនរួចថ្លៃដើមបានតែ១ហូបៗ»។
កសិកររូបនេះបន្តទៀតថា៖ «ខ្ញុំពិតជាចង់ឱ្យភូមិខ្ញុំក្លាយជាភូមិគំរូណាស់ ពីព្រោះអ្នកភូមិខ្ញុំឥឡូវវេទនាណាស់រក១ថ្ងៃស៊ី១ថ្ងៃ ហីឥឡូវធនាគារចាប់ផ្តើមរិតបន្តឹងក្នុងការទារបំណុលហើយអ្នកខ្លះក៏លក់ទ្រព្យសម្បត្តិដែលម៉ែឪចែកឱ្យដីកេរអីអស់ហើយដើម្បីបង់ធនាគារតែបង់អត់គ្រាន់។ អ្នកភូមិខ្ញុំមានការចាញ់បោកគេច្រើនចង់កន្លះភូមិ»។
លោក ផានិត បានឱ្យដឹងទៀតថា អ្នកភូមិបានចាញ់បោកកម្មវិធីវិនិយោគទិញដីបានលុយអស់២-៣ម៉ឺន៤-៥ម៉ឺនដុល្លារក្នុង១គ្រួសារ១គ្រួសារគឺច្រើនណាស់ «ហីនៅស្រុកស្រែនេះលុយប៉ុនណឹងអីរក១ជាតិអីណោះព្រោះអត់ដឹងរកអីបានទេឥឡូវ»។
បើតាមលោក ផល្លា ផានិត បច្ចុប្បន្ននៅក្នុងសង្កាត់ព្រែកស្តីយុវជនជាច្រើនបានធ្វើចំណាកស្រុកទៅរកការងារធ្វើនៅខាងក្រៅឡើងចង់ស្ងាត់ភូមិហើយនៅសល់តែយុវជនដែលប្រើប្រាស់គ្រឿងញៀន។
លោក ឃុយ គា ចៅសង្កាត់ព្រែកស្តីបានបដិសេធធ្វើអត្ថាធិបាយលើបញ្ហាទាំងនេះដោយជំរុញឱ្យសួរទៅស្មៀនសង្កាត់ដែល ខេមបូចា មិនអាចទាក់ទងបាន។
នៅក្នុងជំនួបសំណេះសំណាលជាមួយថ្នាក់ដឹកនាំ និងមន្រ្ដីរាជការ នៃមន្ទីរអភិវឌ្ឍន៍ជនបទខេត្តស្វាយរៀង កាលពីថ្ងៃទី១៥ ខែមិថុនា ឆ្នាំ២០២៤ លោកឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ បានថ្លែងថា ការអភិវឌ្ឍភូមិគំរូនៅតំបន់ជនបទ គឺជាកិច្ចការមួយដ៏សំខាន់ដើម្បីជួយជំរុញការលើកកម្ពស់ជីវភាពរស់នៅរបស់ប្រជាពលរដ្ឋដោយផ្ទាល់។
លោកបញ្ជាក់ថា៖ «មន្ទីរត្រូវខិតខំអនុវត្តជំរុញការអភិវឌ្ឍភូមិគំរូ ដើម្បីចូលរួមចំណែកអនុវត្តយុទ្ធសាស្រ្តបញ្ចកោណដំណាក់កាលទី១ របស់រាជរដ្ឋាភិបាល ឱ្យសម្រេចបានជោគជ័យ»។
លោក ថេង សាវឿន ប្រធានសមាគមសម្ព័ន្ធសហគមន៍កសិករកម្ពុជា (CCFC) បានប្រាប់ខេមបូចា កាលពីថ្ងៃទី២០ ខែសីហា ឆ្នាំ២០២៤ ថា លោកស្វាគមន៍ចំពោះការបង្កើតភូមិគំរូពីព្រោះវា គឺជាទម្រង់មួយដែលបង្ហាញអំពីការលើកទឹកចិត្តដល់ភូមិផ្សេងៗទៀតដែលមានភូមិសាស្ត្រខុសគ្នាអាចយកគំរូតាម។ នៅពេលដែលមានភូមិគំរូបង្កើតឡើងក្រសួងអភិវឌ្ឍន៍ជនបទ និងអាជ្ញាធរត្រូវតែយកចិត្តទុកដាក់ក្នុងការសិក្សាប្រមូលចងក្រងក៏ដូចជាបង្កើតឱ្យមានការចែករំលែកទស្សនទាន ការចែករំលែកបទពិសោធន៍ និងការចែករំលែកអំពីដំណើរការនៃការចូលរួមឱ្យមានការបង្កើតឡើងនូវភូមិគំរូនេះផងដែរ។
លោកបន្តថា នៅតាមប្រទេសមួយចំនួនក៏មានការបង្កើតឡើងនូវភូមិគំរូនេះផងដែរដោយគេឈរនៅលើកក្តាភូមិសាស្ត្ររួមជាមួយនឹងធនធានធម្មជាតិ និងអំណោយផលជាក់ស្តែងនៃភូមិនីមួយៗហ្នឹង តួយ៉ាងដូចជានៅថៃ នៅឥណ្ឌូនេស៊ី និងនៅស្រីលង្កាអីជាដើម។
លោក ថេង សាវឿន បន្តថា៖ «នៅកម្ពុជាបើរដ្ឋាភិបាលតាមរយៈក្រសួងអភិវឌ្ឍន៍ជនបទលោកបន្តបង្កើតភូមិគំរូ ខ្ញុំសូមលើកទឹកចិត្តឱ្យបង្កើតនៅភូមិទាំងឡាយណាដែលនៅតំបន់ដាច់ស្រយាលក៏ដូចជានៅតំបន់តាមបណ្តាយព្រំដែនដើម្បីធ្វើយ៉ាងម៉េច ទី១យើងអាចលើកកម្ពស់ទាក់ទងបូរណភាពទឹកដី និងការពារដែនដី»។ ទី២ជំរុញឱ្យព្រំដែននៃប្រទេសកម្ពុជាមានការអភិវឌ្ឍ និងទី៣ ធ្វើឱ្យជីវភាព និងសេដ្ឋកិច្ចរបស់ប្រជាពលរដ្ឋនៅតាមបណ្តោយព្រំដែនរិតតែល្អប្រសើរ។
យ៉ាងណាក្តីលោក អឿន ធារិទ្ធ បានឱ្យដឹងកាលពីថ្ងៃទី២៦ ខែសីហា ថា ក្នុងផែនការដែលក្រសួងបានកំណត់ក្នុងឆ្នាំ២០២៥ខាងមុខ គឺនឹងបង្កើតភូមិគំរូឱ្យបាន៥០ភូមិទៀត«ហើយក្នុងហ្នឹងក៏មានភូមិនៅតាមព្រំដែនផងដែរ ដោយសារយើងយក១ខេត្ត២ភូមិ ដល់អ៊ីចឹងមានគ្រប់រាជធានីខេត្ត»៕
