ក្ដីបារម្ភទាក់ទងនឹងតម្លាភាពលើវិស័យធនាគារនៅកម្ពុជាបានធ្វើឲ្យមានការរំជើបរំជួលមួយរយៈខ្លី ក្រោយពីធនាគារមួយនៅរាជធានីភ្នំពេញ បានផ្អាកសេវាកម្មរបស់ខ្លួនបណ្ដោះអាសន្ន និងបានកំណត់ចំនួនសាច់ប្រាក់ដែលអាចដកបាន។ អ្នកជំនាញលើកឡើងថា ភាពរអាក់រអួលផ្នែកប្រតិបត្តិការរបស់ធនាគារអាចបង្កជាក្ដីបារម្ភខ្លាំងដល់អតិថិជនផ្ញើប្រាក់ ខណៈដែលថ្មីៗនេះមានធនាគារមួយចំនួនត្រូវបានដកអាជ្ញាប័ណ្ណ និងបិទអាជីវកម្ម។
កាលពីថ្ងៃចន្ទ អតិថិជនរបស់ធនាគារអេស៊ា-ប៉ាស៊ីហ្វិក ឌីវេឡុបមេន ហៅកាត់ថា APD នៅរាជធានីភ្នំពេញ បានប្រមូលផ្ដុំគ្នានៅមុខស្នាក់ការកណ្ដាលដើម្បីចាំដកប្រាក់ បន្ទាប់ពីធនាគារបានកំណត់ចំនួនសាច់ប្រាក់ដែលអាចដកបានត្រឹម៣០០ដុល្លារក្នុងមួយថ្ងៃ ស្របពេលដែលសេវាវីសាកាតនៅតែមិនទាន់ដំណើរការ ក្រោយមិនអាចប្រតិបត្តិការបានប្រាំថ្ងៃ និងខាងធនាគារអះអាងថាដោយសារ«ធ្វើការថែទាំប្រព័ន្ធ»។
បើតាមរបាយការណ៍ប្រចាំឆ្នាំ២០២៤ ធនាគារមួយនេះបានទទួលប្រាក់បញ្ញើជាង១ពាន់លានដុល្លារ។ លោក វង្ស ពេជ្រ ជាប្រធានក្រុមប្រឹក្សាភិបាលនៃធនាគារ ដែលជាអ្នកកាន់ហ៊ុន៩៩ភាគរយ។ អ្នកជំនាញលើកឡើងថាភាពជាម្ចាស់កម្មសិទ្ធិនេះហាក់មិនប្រក្រតី ជាពិសេសធនាគារអាចមានទ្រព្យកើនឡើងរហូតដល់ជាង១ពាន់លានដុល្លារគិតត្រឹមឆ្នាំ២០១៦ មក។
ភាពរអាក់រអួលរបស់ធនាគារនេះ បានបង្កឲ្យមានការភ្ញាក់ផ្អើលដល់អតិថិជនជាខ្លាំង ស្របពេលដែលថ្មីៗនេះមានគ្រឹះស្ថានហិរញ្ញវត្ថុមួយចំនួនដែលជាប់ក្នុងបញ្ជីខ្មៅរបស់អាមេរិកត្រូវបានដកអាជ្ញាប័ណ្ណ និងធនាគារផ្សេងទៀតជាប់សង្ស័យថាមានទំនាក់ទំនងនឹងបណ្ដាញឆបោកអនឡាញ។ គ្រឹះស្ថានហិរញ្ញវត្ថុទាំងនោះមានធនាគារព្រីនស៍ និង Huione Pay ដែលក្រោយមកប្ដូរជា H-Pay។ ទាំងក្រុមហ៊ុនផ្ទាល់ និងក្រុមហ៊ុនមេរបស់ស្ថាប័នទាំងនេះបានបដិសេធថា មិនជាប់ពាក់ព័ន្ធនឹងអំពើឆបោកតាមអនឡាញ ឬការលាងលុយកខ្វក់ណាមួយទេ។
ធនាគារផេនដា មិនធ្លាប់រងការចោទប្រកាន់ណាមួយពីអាមេរិកនោះទេ ប៉ុន្តែថ្នាក់ដឹកនាំជាន់ខ្ពស់របស់ធនាគារមានជាប់ពាក់ព័ន្ធនឹងគ្រឹះស្ថានហិរញ្ញវត្ថុ Huione និងធនាគារព្រីនស៍។ អាជ្ញាប័ណ្ណធនាគារនេះក៏ត្រូវបានដកហូតដូចគ្នា និងត្រូវបង្ខំឲ្យបិទអាជីវកម្មកាលពីខែកុម្ភៈ ទាក់ទងនឹង «ស្ថានភាពហិរញ្ញវត្ថុរបស់ធនាគារធ្លាក់ចុះជាបន្តបន្ទាប់»។ នេះបើតាមសេចក្ដីប្រកាសរបស់ធនាគារជាតិនៃកម្ពុជា។
ធនាគារ APD បាននិយាយថា ពាក្យចចាមអារ៉ាមដែលថាអាជ្ញាប័ណ្ណរបស់ធនាគារត្រូវបានដក គឺជារឿងមិនពិត។ ធនាគារបញ្ជាក់ថាខ្លួននឹងបន្តចាត់វិធានការផ្លូវច្បាប់លើអ្វីដែលធនាគារចាត់ទុកថាបានផ្សាយព័ត៌មានមិនពិតលើប្រព័ន្ធអនឡាញ។
ធនាគារជាតិនៃកម្ពុជាបានចេញមករំងាប់ភាពរំជើបរំជួលរបស់សាធារណជន និងបញ្ឈប់ប្រជាពលរដ្ឋកុំឲ្យប្រណាំងគ្នាដកប្រាក់។ ទេសាភិបាលធនាគារជាតិ អ្នកស្រី ជា សិរី បានជំរុញឲ្យសាធារណជនរក្សាភាពស្ងប់ស្ងាត់ ខណៈខ្លួនកំពុងធ្វើការជាមួយធនាគារដោះស្រាយបញ្ហាប្រាក់បញ្ញើ និងបន្តអះអាងថាប្រព័ន្ធធនាគារនៅកម្ពុជា«នៅតែមានភាពរឹងមាំ»។
អ្នកវិភាគហិរញ្ញវត្ថុក្នុងស្រុកលើកឡើងថា ករណីធនាគារ APD បានបង្ហាញពីប្រសិទ្ធភាពនៃការគាំពារអតិថិជន។
លោក ង៉ែត ជូ អ្នកជំនាញសេដ្ឋកិច្ច និងការវិនិយោគនៅ F.I Vision Capital បាននិយាយថា៖ «វាអាចជាបញ្ហាបច្ចេកទេសដែលធនាគារមិនបានជូនដំណឹងដល់អតិថិជនជាមុន។ ជាធម្មតា ការថែទាំគឺដឹងពេលវេលាជាមុន។ វាមិនមានចៃដន្យទេ»។
លោកបន្ថែមថា ការមិនជូនដំណឹងជាមុន ដូចជាករណីនេះ អាចបង្កជាក្ដីកង្វល់ដល់អតិថិជន និងប៉ះពាល់ដល់ជីវភាពប្រចាំថ្ងៃ ខណៈប្រជាពលរដ្ឋជាច្រើននៅបច្ចុប្បន្ននេះទូទាត់ប្រាក់តាមប្រព័ន្ធឌីជីថលនិងមានសាច់ប្រាក់តិចតួចនៅក្នុងដៃ។
ធនាគារ APD ទើបចាប់ផ្ដើមជូនដំណឹងដល់អតិថិជនអំពីការថែទាំប្រព័ន្ធរបស់ខ្លួនលើបណ្ដាញសង្គមកាលពីថ្ងៃទី១១ ខែមីនា។
តាមគោលការណ៍របស់ធនាគារជាតិស្ដីពីការគ្រប់គ្រងហានីភ័យ តម្រូវឲ្យធនាគារទាំងអស់គ្រប់គ្រងប្រព័ន្ធរបស់ខ្លួន និងកំណត់កំហូចរបស់ប្រព័ន្ធឲ្យបានរហ័ស និងឆ្លើយតបឲ្យបានលឿនបំផុតដើម្បីកាត់បន្ថយការរំខានដល់សេវាកម្ម។
ធនាគារ APD មិនបានឆ្លើយតបភ្លាមៗតាមសំណើសុំអត្ថាធិប្បាយរបស់អ្នកសារព័ត៌មានតាមអ៊ីម៉ែលនោះទេ។ ធនាគារជាតិនៃកម្ពុជាក៏មិនបានឆ្លើយតបភ្លាមៗតាមសំណើសុំអត្ថាធិប្បាយនេះដែរ។
លោក ង៉ែត ជូ មិនអាចវាយតម្លៃពីមូលហេតុដែលនាំឲ្យមានភាពរអាក់រអួលរបស់ធនាគារ APD នោះទេ ប៉ុន្តែលោកបានជំរុញឲ្យធនាគារ APD និងធនាគារជាតិមានតម្លាភាពចំពោះសាធារណជន។ លោកបន្ថែមថា បើគ្មានព័ត៌មានច្បាស់លាស់ពីអាជ្ញាធរ ពាក្យចចាមអារ៉ាមនៅតែបង្កជាក្ដីកង្វល់ដល់សាធារណជន។
ក្រៅពីក្ដីបារម្ភថាមានជាប់ពាក់ព័ន្ធនឹងឧស្សាហកម្មឆបោកតាមអនឡាញ ដែលរដ្ឋាភិបាលប្ដេជ្ញាថានឹងលុបបំបាត់ត្រឹមខែមេសា វិស័យធនាគារក៏កំពុងតែប្រឈមនឹងការកើនឡើងនៃកម្ចីខូច ដែលបានធ្វើឲ្យធនាគារជាតិកាលពីខែមុន បានបង្កើតប្រព័ន្ធមួយសម្រាប់គ្រប់គ្រងទ្រព្យរបស់ស្ថាប័នទាំងនោះ។
ទាក់ទងនឹងភាពរំជើបរំជួលរបស់សាធារណជននេះ គ្រឹះស្ថានហិរញវត្ថុមួយចំនួនបានចេញមុខមកធានាអះអាងចំពោះអតិថិជនខ្លួន។ ធនាគារ Philip និង LOLC បានចេញសេចក្ដីថ្លែងការណ៍មួយថាគ្រឹះស្ថានរបស់ខ្លួននៅតែមានស្ថិរភាពហិរញ្ញវត្ថុង និងប្រតិបត្តិការរឹងមាំ។
ដូចគ្នាដែរ សមាគមធនាគារកម្ពុជា និងសមាគមគ្រឹះស្ថានមីក្រូហិរញ្ញវត្ថុកម្ពុជា បានធានាអះអាងថា វិស័យធនាគារនៅកម្ពុជា«នៅតែមានភាពរឹងមាំ» និងបន្ថែមថាគ្រឹះស្ថានទាំងនោះមានសាច់ប្រាក់គ្រប់គ្រាន់ និងបានអនុវត្តតាមការណែនាំរបស់ធនាគារជាតិបានយ៉ាងខ្ជាប់ខ្ជួន៕
