សមាគមសម្ព័ន្ធអ្នកសារព័ត៌មានកម្ពុជា

កិច្ចប្រជុំរដ្ឋមន្ត្រីការបរទេសអាស៊ានផ្តោតលើវិបត្តិមីយ៉ាន់ម៉ា

មេដឹកនាំមកពីប្រទេសអាស៊ានចំនួនប្រាំពីរឈរថតរូបជាក្រុមអំឡុងកិច្ចប្រជុំកាលពីថ្ងៃព្រហស្បតិ៍នៅក្នុងទីក្រុងភ្នំពេញ។ រាប់ពីឆ្វេង រដ្ឋមន្ត្រីការបរទេសមកពីម៉ាឡេស៊ី ហ្វីលីពីន សិង្ហបុរី កម្ពុជា ឥណ្ឌូនេស៊ី និងឡាវ រួមទាំងអគ្គលេខាធិការអាស៊ាន លីម ចុកហយ។ ខេមបូចា/បញ្ញា ឆព័ណ្ណ
មេដឹកនាំមកពីប្រទេសអាស៊ានចំនួនប្រាំពីរឈរថតរូបជាក្រុមអំឡុងកិច្ចប្រជុំកាលពីថ្ងៃព្រហស្បតិ៍នៅក្នុងទីក្រុងភ្នំពេញ។ រាប់ពីឆ្វេង រដ្ឋមន្ត្រីការបរទេសមកពីម៉ាឡេស៊ី ហ្វីលីពីន សិង្ហបុរី កម្ពុជា ឥណ្ឌូនេស៊ី និងឡាវ រួមទាំងអគ្គលេខាធិការអាស៊ាន លីម ចុកហយ។ ខេមបូចា/បញ្ញា ឆព័ណ្ណ

បន្ទាប់ពីកិច្ចប្រជុំរដ្ឋមន្ត្រីការបរទេសអាស៊ានកាលពីថ្ងៃព្រហស្បតិ៍នៅទីក្រុងភ្នំពេញ សមាជិកប្លុកនេះ បានអះអាងជាថ្មីនូវការប្តេជ្ញាចិត្តរបស់ខ្លួនចំពោះកិច្ចព្រមព្រៀងជាឯកច្ឆន្ទប្រាំចំណុចរបស់អាស៊ាន ដើម្បីដោះស្រាយវិបត្តិនៅមីយ៉ាន់ម៉ា។

បន្ទាប់ពីជំនួបនោះ លោក លោក ប្រាក់ សុខុន រដ្ឋមន្ត្រីក្រសួងការបរទេសបានធ្វើសន្និសីទសារព័ត៌មានមួយ ហើយបានអះអាងថា មេដឹកនាំអាស៊ានបានពិភាក្សាអំពីការវិវត្តន៍ថ្មីៗនៅក្នុងប្រទេសមីយ៉ាន់ម៉ា និងបានសម្តែងការព្រួយបារម្ភអំពីស្ថានភាពនៅទីនោះ។

នាពេលថ្មីៗនេះ ប្រទេសមីយ៉ាន់ម៉ាប្រារព្ធខួបមួយឆ្នាំនៃរដ្ឋប្រហារថ្ងៃទី១ ខែកុម្ភៈ ដែលពួកយោធាក្រោមការដឹកនាំរបស់ឧត្តមសេនីយ៍ មីន អោងឡាំង បានផ្តួលរំលំមេដឹកនាំស៊ីវិលរបស់ប្រទេសនេះនិងលើកបន្តុបរបបយោធាថ្មី។

លោក ប្រាក់ សុខុន បានមានប្រសាសន៍នៅក្នុងសន្និសីទសារព័ត៌មានថា៖ «យើងអំពាវនាវឲ្យអាជ្ញាធរមីយ៉ាន់ម៉ាចាត់វិធានការច្បាស់លាស់ ដើម្បីពន្លឿនការអនុវត្តពេញលេញនូវកិច្ចព្រមព្រៀងជាឯកច្ឆន្ទប្រាំចំណុច » «យើងទទូចឲ្យភាគីទាំងអស់រក្សាការអត់ធ្មត់ជាទីបំផុត និងចូលរួមក្នុងកិច្ចសន្ទនាក្នុងន័យស្ថាបនា [ដើម្បីស្វែងរក] ដំណោះស្រាយដោយសន្តិវិធីនិងប្រកបដោយបរិយាបន្ន ដើម្បីផលប្រយោជន៍របស់ប្រជាជនមីយ៉ាន់ម៉ា»

ក្រៅពីបញ្ហានៅមីយ៉ាន់ម៉ា លោក សុខុន បានមានប្រសាសន៍ថា រដ្ឋមន្ត្រីការបរទេសអាស៊ានបានពិភាក្សាអំពីបញ្ហាទូទៅបន្ថែមទៀតក្នុងការពង្រឹងឯកភាពនៅក្នុងតំបន់ និងការចូលរួមពីខាងក្រៅ។

កិច្ចប្រជុំនេះក៏បានគូសបញ្ជាក់អំពីសារៈសំខាន់នៃការអនុវត្តពេញលេញនិងប្រកប ដោយប្រសិទ្ធភាពនៃសេចក្តីថ្លែងការណ៍ស្តីពីការប្រតិបត្តិរបស់បណ្តាភាគីនៅសមុទ្រចិនខាងត្បូងនិងការសម្រេចក្រមប្រតិបត្តិនៅសមុទ្រចិនខាងត្បូង។

លោក ជុំ សុន្ទរី អ្នកនាំពាក្យក្រសួងការបរទេសក៏បានបញ្ជាក់កាលពីថ្ងៃព្រហស្បតិ៍ថា មីយ៉ាន់ម៉ាមិនបានបញ្ជូនអ្នកតំណាងដែលមិនមែននយោបាយទៅចូលរួមកិច្ចប្រជុំនេះទេ។

តំណាងមកពីប្រ៊ុយណេនិងថៃបានចូលរួមតាមអនឡាញ ខណៈរដ្ឋមន្ត្រីការបរទេសវៀតណាមបានចូលរួមតាមអនឡាញពីបន្ទប់របស់លោកក្នុងទីក្រុងភ្នំពេញដោយសារលោកធ្វើតេស្តវិជ្ជមានជំងឺកូវីដ-១៩ នៅពេលអញ្ជើញមកដល់ប្រទេសកម្ពុជា។ រដ្ឋមន្ត្រីការបរទេសផ្សេងទៀតបានចូលរួមកិច្ចប្រជុំដោយផ្ទាល់។

លោក សុន្ទរី បានប្រាប់ខេមបូចាកាលពីសប្តាហ៍មុនថា រដ្ឋមន្ត្រីការបរទេសមីយ៉ាន់ម៉ាមិនត្រូវបានអញ្ជើញឲ្យចូលរួមកិច្ចប្រជុំកាលពីថ្ងៃព្រហស្បតិ៍ទេ ដោយកត់សម្គាល់ថាមេដឹកនាំយោធានៅទីនោះបានច្រានចោលសំណើរបស់កម្ពុជាក្នុងការបញ្ជូនតំណាងដែលមិនមែននយោបាយមកចូលរួម។

លោក មីន អោងឡាំង ត្រូវបានរារាំង៼មិនឲ្យចូលរួមកិច្ចប្រជុំនៅខែតុលារបស់ប្លុកនេះ បន្ទាប់ពីប្រេសិតពិសេសអាស៊ានត្រូវបានរារាំងមិនឲ្យជួបជាមួយលោកស្រី អ៊ុងសាន ស៊ូជី ជាទីប្រឹក្សារដ្ឋមីយ៉ាន់ម៉ា ដែលមេដឹកនាំរបបយោធាបានផ្តួលរំលំពីអំណាច។ លោកស្រី ស៊ូជី ត្រូវបានឃុំខ្លួននៅពន្ធនាគារ អំឡុងពេលធ្វើរដ្ឋប្រហារហើយកំពុងស្ថិតក្រោមការកាត់ក្តីពីបទឧក្រិដ្ឋផ្សេងៗ ដែលពួកយោធាចោទប្រកាន់ជាផ្នែកមួយនៃការគ្រប់គ្រងរដ្ឋរបស់ខ្លួន។

ចាប់តាំងពីកិច្ចប្រជុំកាលពីថ្ងៃទី៧ ខែមករានៅទីក្រុងណៃពិដោរវាងលោក ហ៊ុន សែន និងលោក មីន អោងឡាំង មេដឹកនាំទាំងពីរបានទាក់ទងគ្នាតាមទូរសព្ទដែលក្នុងនោះ តាមព័ត៌មានថា លោកនាយករដ្ឋមន្រ្តីបានស្នើឲ្យប្រមុខរបបយោធាគោរពកិច្ចព្រមព្រៀងជាឯកច្ឆន្ទប្រាំចំណុច អនុវត្តបទឈប់បាញ់និងអនុញ្ញាតឲ្យប្រេសិតពិសេសអាស៊ានចូលទៅប្រទេសមីយ៉ាន់ម៉ា។

លោក សុខុន បានថ្លែងកាលពីថ្ងៃព្រហស្បតិ៍ថា ក្នុងនាមជាប្រេសិតពិសេសបច្ចុប្បន្ន លោកមានបំណងប្រើប្រាស់តួនាទីនេះ ដើម្បីបំពេញតាមអាណត្តិ ដើម្បីជួបជាទាំងលោក មីន អោងឡាំង និងមន្ត្រីដទៃទៀត ជាពិសេសអ្នកដែលស្ថិតនៅក្នុងរដ្ឋាភិបាលរួបរួមជាតិស៊ីវិល (NUG)។ សមាជិក​នៃ​រដ្ឋាភិបាល​ស៊ីវិល​ដែល​ត្រូវ​បាន​គេ​ទម្លាក់​ចេញ​ពីអំណាចបាន​បង្កើតរដ្ឋាភិបាលរួបរួមជាតិស៊ីវិល បន្ទាប់​ពី​រដ្ឋប្រហារ ហើយ​អះអាងថា ខ្លួនគឺជា​ថ្នាក់​ដឹកនាំ​ជាតិ​ពិត​ប្រាកដ។

លោក សុខុន មាន​ប្រសាសន៍​ថា៖ «យើង​ជឿថាគ្រប់​ភាគី​មាន​ការ​ព្រួយ​បារម្ភ»។ «បញ្ហានៅត្រង់ពេលវេលាប៉ុណ្ណោះ ប៉ុន្តែនៅពេលនេះ យើងចង់រក្សាក្តីសង្ឃឹមក្នុងការបន្តទំនាក់ទំនងជាមួយទីក្រុងណៃពីដោ ជាពិសេសក្តីសង្ឃឹមក្នុងការរក្សាការជឿជាក់និងទំនុកចិត្តពីសម្ព័ន្ធមិត្ត»។

លោកបន្ថែមថា៖ «ដូច្នេះហើយនៅពេលនេះ យើងមិនទាន់បានជួបទំនាក់ទំនងណាមួយជាមួយ NUG នៅឡើយទេ ដោយសារតែទីក្រុងណៃពីដោបានហៅក្រុមនេះថា ជាក្រុមភេរវករ»។

លោក ឯម សុវណ្ណារ៉ា អ្នកវិភាគនយោបាយមានប្រសាសន៍ថា កម្ពុជានិងប្រទេសសមាជិកអាស៊ានដទៃទៀតមិនអាចដោះស្រាយវិបត្តិមីយ៉ាន់ម៉ាដោយខ្លួនឯងបានទេ។

លោកបានមានប្រសាសន៍ថា៖ «ខ្ញុំគិតថា [កម្ពុជា] មិនអាចដោះស្រាយបញ្ហាមីយ៉ាន់ម៉ាបានទេ ហើយបញ្ហាមីយ៉ានម៉ានឹងត្រូវដោះស្រាយដោយក្រុមប្រឹក្សាសន្តិសុខអង្គការសហប្រជាជាតិ» ដោយគូសបញ្ជាក់ថា ពួកយោធាមិនគោរពតាមកិច្ចព្រមព្រៀងឯកច្ឆន្ទប្រាំចំណុចនោះទេ។

លោក សុវណ្ណារ៉ា បាន​មានប្រសាសន៍​ថា កិច្ច​ប្រជុំ​របស់​រដ្ឋ​មន្ត្រី​អាស៊ាន​ក៏​ហាក់​ដូច​ជា​មិន​បាន​ប្រព្រឹត្ត​ទៅ​ដោយ​រលូន​ដែរ ដោយសារ​តែ​គ្មាន​ការចូលរួមដោយផ្ទាល់​ពី​តំណាង​មួយ​ចំនួន។

លោក សុវណ្ណារ៉ា បាន​មានប្រសាសន៍ថា៖ «មិន​សូវមាន​ភាព​ស្និទ្ធស្នាល​ច្រើន​ទេ [​ក្នុង​កិច្ចប្រជុំ​តាម​អនឡាញ] ហើយ​គោលដៅ​ជំរុញ​ទេសចរណ៍​ក្នុង​ស្រុកនិង​តំបន់​មិន​ទាន់ខ្លាំង​គ្រប់គ្រាន់​ទេ ដោយសារ​កិច្ចប្រជុំ​មិន​អាច​ប្រព្រឹត្ត​ទៅ​ដោយ​រលូន»។

អ្នកវិភាគម្នាក់ទៀត គឺលោក គិន ភា ប្រធានវិទ្យាស្ថានទំនាក់ទំនងអន្តរជាតិនៃរាជបណ្ឌិត្យសភាកម្ពុជាមានប្រសាសន៍ថា ព្រះរាជាណាចក្រកម្ពុជាចាំបាច់ត្រូវជំរុញការអនុវត្តកិច្ចព្រមព្រៀងជា៼ឯកច្ឆន្ទប្រាំចំណុចជាមួយយោធាមីយ៉ាន់ម៉ា។

លោក គិន ភា បាន​មាន​ប្រសាសន៍​ថា៖ «កម្ពុជា​ត្រូវ​ប្រើ​ប្រាស់កិច្ច​ខិត​ខំ​ប្រឹង​ប្រែង​ការ​ទូត​របស់​ខ្លួន ​ដើម្បី​បញ្ចុះ​បញ្ចូល​ក្រុម​យោធា​ឲ្យ​អនុវត្ត [កិច្ចព្រមព្រៀងជាឯកច្ឆន្ទ]

ប្រែសម្រួលពីអត្ថបទភាសាអង់គ្លេស៖ Asean foreign ministers meeting centers on Myanmar crisis

571 views

ព័ត៌មានថ្មី

អត្ថបទពេញនិយម