សមត្ថកិច្ចប៉ូលិសខេត្តក្រចេះនៅរសៀលថ្ងៃពុធនេះ បានឃាត់ខ្លួនមន្ត្រី និងសមាជិកសមាគមសម្ព័ន្ធសហគមន៍កសិករកម្ពុជាជិត៤០នាក់ ដើម្បីសួរនាំជុំវិញករណីឯកសារបើកវគ្គបណ្តុះបណ្តាលមួយ។
មន្ត្រីជាន់ខ្ពស់ម្នាក់នៃសមាគមសម្ព័ន្ធសហគមន៍កសិករកម្ពុជា សុំមិនបញ្ចេញឈ្មោះដោយព្រួយបារម្ភពីសុវត្ថិភាពផ្តាល់ខ្លួន បានឱ្យដឹងថា រូបលោកនិងអ្នកផ្សេងទៀតធ្វើដំណើរពីខេត្តរតនគិរីទៅភ្នំពេញ តែត្រូវសមត្ថកិច្ចខេត្តក្រចេះឃាត់នៅម៉ោងប្រមាណជា១រសៀល។ មន្ត្រីម្នាក់នោះបន្តថា ឧបករណ៍អេឡិចត្រូនិច និងឯកសារផ្សេងៗ ត្រូវសមត្ថកិច្ចដកហូតយកទៅត្រួតពិនិត្យ។
មន្ត្រីរូបនោះបញ្ជាក់ថា គឺរហូតដល់ម៉ោង៨និង១០នាទីយប់ថ្ងៃទី១៧ ខែឧសភានេះ សមត្ថកិច្ចនៅបន្តសាកសួរលោកថេង សាវឿន ប្រធានសមាគម លោក ញិល ភាព មន្ត្រីសមាគម លោក មឿន រតនា មន្ត្រីសមាគម រួមទាំងមន្ត្រី១៤នាក់ផ្សេងទៀត។
មន្ត្រីសមាគមរូបនោះបន្ថែមថា រហូតដល់ម៉ោងជាង៨និង៤០នាទីយប់ថ្ងៃទី១៧ ខែឧសភានេះ សមត្ថកិច្ចបានបន្តនីតិវិធីសាកសួរលើប្រធានសមាគម និងមន្ត្រីសមាគមចំនួន១៧ និងក្រៅពីនោះ សមត្ថកិច្ចបានអនុញ្ញាតឱ្យពួកគាត់ទៅផ្ទះ ប៉ុន្តែពួកគាត់ទាំងនោះនៅបន្តរងចាំមន្ត្រីសមាគមទាំង១៧នាក់នៅខាងមុខស្នងការនគរបាលខេត្តក្រចេះ។
ស្នងការខេត្តក្រចេះ លោក អ៊ូ សុបុណ្ណា ថ្លែងថា សមត្ថកិច្ចកំពុងសាកសួរមន្ត្រីសង្គមស៊ីវិលទាំងនេះ ដូច្នេះលោកមិនអាចផ្តល់ព័ត៌មានអ្វីបានទេ។
ចំណែកអ្នកនាំពាក្យសមាគមការពារសិទ្ធិមនុស្សអាដហុក លោក ស៊ឹង សែនករុណា បញ្ជាក់ថា អង្គការលោក និងអង្គការសង្គមស៊ីវិលផ្សេងទៀតកំពុងតាមដានករណីនេះ៕
