សមាគមសម្ព័ន្ធអ្នកសារព័ត៌មានកម្ពុជា

សមត្ថកិច្ចបញ្ជូនខ្លួនលោក ថេង សាវឿន និងសហការី២រូបនៃសមាគម​សម្ព័ន្ធសហគមន៍កសិករកម្ពុជាពីខេត្តក្រចេះ​ទៅខេត្តរតនគិរី ដើម្បីបន្តនីតិវិធី

លោក ថេង សាវឿន ប្រធានសមាគមសម្ព័ន្ធសហគមន៍កសិករកម្ពុជា(CCFC) និងមន្ត្រីរបស់គាត់២នាក់ទៀត ត្រូវបានបញ្ជូនពីខេត្តក្រចេះទៅកាន់ស្នងការខេត្តរតនគិរីវិញ ដើម្បីបន្តនីតិវិធី នៅរសៀលថ្ងៃទី១៨ ខែឧសភា ឆ្នាំ២០២៣ ខណៈមេធាវីអង្គការកំពុងដាក់ពាក្យសុំជួបកូនក្តីនៅស្នងការខេត្តរតនគិរី។ រូបភាពពីហ្វេសប៊ុកអង្គការអាដហុក
លោក ថេង សាវឿន ប្រធានសមាគមសម្ព័ន្ធសហគមន៍កសិករកម្ពុជា(CCFC) និងមន្ត្រីរបស់គាត់២នាក់ទៀត ត្រូវបានបញ្ជូនពីខេត្តក្រចេះទៅកាន់ស្នងការខេត្តរតនគិរីវិញ ដើម្បីបន្តនីតិវិធី នៅរសៀលថ្ងៃទី១៨ ខែឧសភា ឆ្នាំ២០២៣ ខណៈមេធាវីអង្គការកំពុងដាក់ពាក្យសុំជួបកូនក្តីនៅស្នងការខេត្តរតនគិរី។ រូបភាពពីហ្វេសប៊ុកអង្គការអាដហុក

សមត្ថកិច្ចបានបញ្ជូនលោក ថេង សាវឿន ប្រធានសមាគមសម្ព័ន្ធសហគមន៍កសិករកម្ពុជា(CCFC) និងមន្ត្រី២នាក់ទៀតពីខេត្តក្រចេះទៅខេត្តរតនគិរិវិញនៅរសៀលថ្ងៃទី១៨ ខែឧសភា ដើម្បីបន្ត​នីតិវិធី​ស្រាវជ្រាវខ្លឹមសារ​នៃ​វគ្គបណ្តុះ​បណ្តាល​របស់សមាគមនេះ។

អភិបាលខេត្តរតនគិរីលោក ញ៉ែម សំអឿន ឱ្យដឹងថា ការបញ្ជូនលោក ថេង សាវឿន និងសហការី២​រូបទៀតពីខេត្តក្រចេះទៅរតនគិរីវិញនៅរសៀលនេះគឺនាំទៅស្នងការដ្ឋាននគរបាលសិន ដើម្បីសាក​សួរ​បន្ត។ ​លោកបន្តថា ចំណុចដែលត្រូវសាកសួរបន្តគឺខ្លឹមសារ នៃវគ្គបណ្តុះបណ្តាល​របស់​សមាគម​នេះ។

លោក ញ៉ែម សំអឿន ថ្លែងថា៖ «យើងបានរកឃើញ ហើយគាត់ក៏បានឆ្លើយដែរនូវអ្វីដែលពួកគាត់​ជួប​ជុំគ្នាមានភាពមិនប្រក្រតីមួយ។ នៅក្នុងកិច្ចប្រជុំរបស់គាត់ហ្នឹងមានលាក់ការច្រើន»

​សមាគមសម្ព័ន្ធសហគមន៍កសិករកម្ពុជា មានវគ្គសិក្ខាសាលាបណ្តុះបណ្តាលបុគ្គលិកពីថ្ងៃទី១៤​ដល់​ថ្ងៃទី១៧ខែឧសភានៅក្នុងខេត្តរតនគិរីមានអ្នកចូលរួម៣៩នាក់។ កម្មវិធីនេះបានបញ្ចាប់នឹង​ធ្វើ​ដំណើរ​វិលត្រលប់ទៅភ្នំពេញវិញ ក៏ត្រូវសមត្ថកិច្ចខេត្តក្រចេះឃាត់រថយន្តក្រុងជិះរួមគ្នានេះ​តាមការ​ស្នើពីសមត្ថកិច្ចខេត្តរតនគិរី។​

បើតាមលោក ម៉ី វុទ្ធី មន្ត្រីរបស់សមាគមឱ្យដឹងថា ក្នុងចំណោម៣៩នាក់នេះ គឺ១៧នាក់ ជាថ្នាក់ដឹក​នាំ​និងបុគ្គលិករបស់សមាគម ចំណែកអ្នកផ្សេងទៀតជាក្រុមគ្រួសារ ឬកូនៗ របស់បុគ្គលិកដែល​ធ្វើ​ដំណើរទៅជាមួយក្នុងគោលបំណងកម្សាន្ត។ សមត្ថកិច្ចខេត្តក្រចេះ និងរតនគិរីបានសាកសួរ​មន្ត្រី​របស់​សមាគមតាំងពីម៉ោងប្រមាណ១រសៀលថ្ងៃទី១៧ រហូតដល់ម៉ោងជាង១០ព្រឹកថ្ងៃទី១៨ ខែឧសភា គឺមន្ត្រីផ្លាស់វេនគ្នាសួរទាំងយប់ដោយមិនសម្រាក។​

លោក ម៉ី វិទ្ធី ជាបុគ្គលិកម្នាក់ក្នុងចំណោម១៧នាក់ដែលសមត្ថកិច្ចសាកសួរ ឱ្យដឹងថា លោកត្រូវ​បានសមត្ថកិច្ចសាកសួរដោយផ្តោត លើខ្លឹមសារបង្រៀននៅកន្លែងបណ្តុះបណ្តាល។

​លោក ម៉ី វុទ្ធីឱ្យ​ទៀតថា កិច្ចប្រជុំពិភាក្សានេះគឺជាគម្រោងរបស់ស្ថាប័នតែងតែធ្វើឡើង១ឆ្នាំ២ដង។ ចំណែកខ្លឹមសារជជែកនោះគ្រាន់តែឆ្លុះបញ្ចាំពីគម្រោងរបស់ស្ថាប័ន និងការតស៊ូមតិតែប៉ុណ្ណោះ។

លោក ម៉ី វុទ្ធី បន្ថែមថា៖ «នៅក្នុងស្ថាប័នយើងហៅថា កម្មវិធីកសាងក្រុមទេ ស្វែងយល់ពីអភិក្រម ដើម្បីតស៊ូមតិអ៊ីចឹងទៅ។ ​គោលបំណងកសាងក្រុមហ្នឹងគ្រាន់តែយើងឆ្លុះបញ្ចាំង ពីការងារគម្រោង កន្លងមកហ្នឹងយើងមានចំណុចខ្សោយត្រង់ណា? ចំណុចខ្វះខាតត្រង់ណា?»។

លោក ថេង សាវឿន ប្រធាន និងមន្ត្រីសមាគមសម្ព័ន្ធសហគមន៍កសិករកម្ពុជាជាច្រើននាក់ត្រូវបានសមត្ថកិច្ច​ប៉ូលិស​ខេត្តក្រចេះឃាត់ខ្លួនសាកសួរកាលពីរសៀលថ្ងៃទី១៧ ខែឧសភា ឆ្នាំ២០២៣។ រូបភាពផ្តល់ឱ្យ

អ្នកនាំពាក្យសមាគមការពារសិទ្ធិមនុស្សអាដហុក លោក ស៊ឹង សែន ករុណា ដែលកំពុងតាមដាន​ករណី​នេះ មានប្រសាសន៍ថា បើគ្រាន់តែការប្រជុំពីគម្រោង និងលើកឡើងពីទិដ្ឋភាព​ប្រវត្តិសាស្ត្រ​ខ្លះ ពាក់ព័ន្ធការតស៊ូមតិនោះមិនមានអ្វីខុសច្បាប់ទេ។

លោក សែនករុណា លើកឡើងថា៖ «បើជុំវិញបញ្ហានេះពិភាក្សាលើប្រវត្តិសាស្ត្រអីអស់នេះ ខ្ញុំថា មិនមានរឿងអីដែលខុសទាស់ទៅនឹងផ្លូវច្បាប់ទេ»

បើតាមលោក ម៉ី វុទ្ធី កុំព្យួទ័រ និងឯកសារមួយចំនួនរបស់សមាគមនេះសមត្ថកិច្ចដកហូត នាំយក​ទៅ​ខេត្តរតនគិរីជាមួយថ្នាក់ដឹកនាំសមាគម៣រូបរួមមានលោក ថេង​ សាវឿន ប្រធានសមាគម លោក ញិល ភាព បុគ្គលិកជាន់ខ្ពស់ និងលោក ថាច់ ហាច បុគ្គលិក​គម្រោង។ ចំណែកបុគ្គលិក និងអ្នករួម​ដំណើរ​ផ្សេងទៀតសមត្ថកិច្ចដោះលែងឱ្យត្រលប់មកផ្ទះវិញ។

ស្នងការនគរបាលខេត្តក្រចេះលោក អ៊ូ សុបុណ្ណា ថ្លែងថា លោកមិនបានដឹងអំពីមូលហេតុ​នៃការ​ឃាត់​ខ្លួននេះ ព្រោះថាស្ថិតនៅក្នុងការងារជំនាញ។

លោក អ៊ូន សុបុណ្ណា បញ្ជាក់យ៉ាងខ្លីថា៖ «ពាក់ព័ន្ធនឹងការងារជំនាញខ្ញុំអត់ដឹងផង។ បើចង់ច្បាស់​ទាល់តែ​សួរ​មេៗ»

ដោយឡែកអ្នកនាំពាក្យអគ្គស្នងការនគរបាលជាតិលោក ឆាយ គឹមខឿន មានប្រសាសន៍ថា អាជ្ញាធរ​ខេត្ត​ក្រចេះធ្វើការឃាត់ខ្លួនប្រធាន ​និងបុគ្គលិករបស់សមាគមតាមសំណើរ​របស់​អាជ្ញាធរ​ខេត្ត​រតនគិរី ហើយលោកឱ្យខេមបូចាសួរទៅអាជ្ញាធរខេត្តរតនគិរី។

លោក គឹមខឿន ថ្លែងថា៖ «រឿងនេះតាមខ្ញុំដឹងខេត្តក្រចេះគ្រាន់តែឃាត់តាមសំណើរ​ខេត្ត​រតនគិរី អ៊ីចឹងប្អូនអាចសួរទៅខេត្តរតនគិរីបាន។ គេឃាត់រឿងអី? មូលហេតុអីខ្លះ? ផ្អែកលើអីខ្លះ? អាហ្នឹង​សួរទៅខេត្តរតនគិរីទៅ»

រីឯលោក អឹម ផានី ស្នងការរងនគរបាលខេត្តរតនគិរី ថ្លែងថា លោកមិនបានដឹងអំពីរឿងនេះទេ។

លោក អឹម ផានី ថ្លែងថា៖ «ពីណាប្រាប់បានដឹង? ពីណាថាឃាត់ខ្លួន? ខ្ញុំអត់ដឹងដែរ»

ខេមបូចា ព្យាយាមទាក់ទងលោក អ៊ុង សុភាព ស្នងការនគរបាលខេត្តរតនគិរី​តាមទូរសព្ទ​និង​ប្រព័ន្ធតេឡេក្រាមរបស់គាត់ ប៉ុន្តែមិនអាចសុំការពន្យល់ពីគាត់​បានទេនៅរសៀលថ្ងៃទី១៨ ខែឧសភានេះ៕

498 views

ព័ត៌មានទាក់ទង

ព័ត៌មានថ្មីៗ

អត្ថបទពេញនិយម