សមាគមសម្ព័ន្ធអ្នកសារព័ត៌មានកម្ពុជា

តុលាការខេត្តបាត់ដំបងសម្រេចឱ្យស៊ើបអង្កេតបន្ថែមលើសំណុំរឿងសកម្មជនបក្សភ្លើងទៀន

លោក ឡី សុខុន សកម្មជនគណបក្សភ្លើងទៀនដែលផេកអគ្គនាយកដ្ឋានពន្ធនាគារនៃក្រសួងមហាផ្ទៃ ផ្សព្វផ្សាយកាលពីថ្ងៃទី៣០ ខែកក្កដា ឆ្នាំ២០២២។ រូបភាពពីផេកអគ្គនាយកដ្ឋានពន្ធនាគារនៃក្រសួងមហាផ្ទៃ
លោក ឡី សុខុន សកម្មជនគណបក្សភ្លើងទៀនដែលផេកអគ្គនាយកដ្ឋានពន្ធនាគារនៃក្រសួងមហាផ្ទៃ ផ្សព្វផ្សាយកាលពីថ្ងៃទី៣០ ខែកក្កដា ឆ្នាំ២០២២។ រូបភាពពីផេកអគ្គនាយកដ្ឋានពន្ធនាគារនៃក្រសួងមហាផ្ទៃ

សាលាដំបូងខេត្តបាត់ដំបងសម្រេចឱ្យស៊ើបអង្កេតបន្ថែមលើសំណុំរឿងសកម្មជនគណបក្សភ្លើងទៀន លោក ឡី សុខុន កាលពីថ្ងៃទី២៤ ខែសីហា ដោយសារខ្វះសំដី​សាក្សី​មួយ​ចំនួន ខណៈភរិយាជនជាប់ចោទថាវាជារឿងអយុត្តិធម៌សម្រាប់ប្តីរបស់គាត់​ដែលគ្មានកំហុស ព្រោះ​រឿងនេះពាក់ព័ន្ធនឹងនយោបាយ។

ក្នុងបន្ទប់សវនាការ លោកស្រីចៅក្រមជំនុំជម្រះ ហៃ ណៃហេង បានសម្រចបង្វិលសំណុំរឿង​ឱ្យ​​ធ្វើការស៊ើបសួរបន្ថែម ព្រោះមានភាពចាំបាច់​ត្រូវ​ស្រាវជ្រាវជាថ្មី ដោយសំអាងថា​ដើម​បណ្តឹង ឈ្មោះ ឡាញ់ ជុន មានមុខរបរលក់ត្រីរស់នៅ​ភូមិ​កំពង់សំបួរ មិនមែនជាម្ចាស់​លំនៅឋាន ដែលមុនដំបូងប្តឹងលោក ឡី សុខុន បន្ទាប់មកដក​ពាក្យ​បណ្តឹងវិញ។

លោកស្រីចៅក្រមបន្ថែមថា ដោយតម្រូវឱ្យចៅក្រមស៊ើប​បន្តសាកសួរ​ឈ្មោះ សុខ លីម ជា​ម្ចាស់លំនៅឋានដែលអវត្តមាននាពេលសវនាការព្រោះទៅប្រទេសថៃ (ដែលមិនបានប្តឹង) និងសាកសួរ សមត្ថកិច្ចជំនាញដើម្បីរកឱ្យឃើញព្រំប្រទល់រវាង​បរិវេណ​ផ្ទះឈ្មោះ សុខ លីម និងចំណីផ្លូវសាធារណៈ។

លោក ឡី សុខុន ត្រូវបានសមត្ថកិច្ចចាប់ឃាត់ខ្លួននៅថ្ងៃទី៨ ខែមិថុនា ឆ្នាំ២០២២ ពីបទ​រំលោភ​លើលំនៅឋាន ដែលពាក់ព័ន្ធនឹងលោកបានចុះទៅថតរូបមន្រ្តី​គណបក្សប្រជាជន​ដែលកំពុង​អង្គុយកត់ឈ្មោះប្រជាពលរដ្ឋដែលទៅបោះឆ្នោត ក្រុមប្រឹក្សាឃុំសង្កាត់​ដែលប្រព្រឹត្តិនៅ​ភូមិ​កំពង់សំបួរ ឃុំសំរោង ស្រុកឯកភ្នំ ខេត្តបាត់ដំបង កាលពីថ្ងៃទី០៥ ខែមិថុនា ឆ្នាំ២០២២។

អ្នកស្រី លីន លីដា អាយុ២៩ឆ្នាំ ជាភរិយារបស់លោក ឡី សុខុន បាននិយាយដោយលាយ​ឡំ​ទឹកភ្នែកជោកថ្ពាល់ ខណៈដើរចេញពីបន្ទប់សវនាការថា វាជារឿងអយុតិធម៌ណាស់​សម្រាប់​ប្តី​អ្នកស្រីដែលតុលាការនៅបន្តឃុំខ្លួនគាត់ទៀតទាំងដែលគ្មានកំហុសអ្វីធំដុំ បើទោះជាម្ចាស់​ពាក្យ​បណ្តឹងគេដកហើយក្តី។

អ្នកស្រី លីដា ឱ្យដឹងថា៖ «វាអយុត្តិធម៌សម្រាប់គ្រួសារខ្ញុំខ្លាំងណាស់ តុលាការមិនគួរបន្តឃុំខ្លួន​គាត់គ្មានថ្ងៃកំណត់បន្តទៀតទេ ហើយថាបន្តស៊ើបសួរម្ចាស់ផ្ទះទៀត តែម្ចាស់ផ្ទះគាត់អត់នៅ​ផ្ទះ​ទេ​ គាត់ទៅថៃ ហើយម្ចាស់ ផ្ទះគាត់មិនបានដាក់ពាក្យបណ្តឹងអីដែរ! អ្នកដាក់ពាក្យបណ្តឹង​គេដកវិញអស់ហើយតុលាការនៅតែបន្តឃុំគ្រួសារខ្ញុំបន្តទៀត តើហេតុអី?»

អ្នកស្រីបានត្អូញត្អែដោយទឹកភ្នែកបន្ថែមថា សព្វថ្ងៃអត់ពីប្តីរបស់គាត់ទៅគ្រួសាររបស់គាត់ មាន​ការលំបាកខ្លាំងណាស់ផ្នែកសេដ្ឋកិច្ច ដោយត្រូវមើលថែម្តាយក្មេកចាស់ជរា​មានជំងឺ​ជាប់​ខ្លួន និងកូនពីរនាក់ក្នុងបន្ទុកត្រូវមើលថែផង។ អ្នកស្រីបន្ថែមថា ពីមុនប្តីរបស់អ្នកស្រីធ្វើ​គ្រូ​បង្រៀន​នៅ​សកលវិទ្យាល័យមួយគ្រាន់បានចំណូលផ្គត់ផ្គង់គ្រួសារ តែបច្ចុប្បន្ននេះ​អត់ពី​ប្តី​ទៅគាត់ខំលក់ដូរតាមអនឡាញតិចតួចគ្រាន់ចិញ្ចឹមគ្រួសារស្ទើរមិនគ្រប់ ។

អ្នកស្រី លីដា បន្ថែមថា៖ «ខ្ញុំសូមឱ្យតុលាការដោះលែងប្តីរបស់នាងខ្ញុំមកវិញផង ព្រោះសាច់​រឿង​ប្តីរបស់ខ្ញុំគឺ ជារឿងនយោបាយច្រើនជាង សូមរកភាពយុត្តិធម៌ដល់គ្រួសារខ្ញុំផង»។

សូមរំលឹកថា បន្ទាប់ពីសាកសួរដេញដោលក្នុងអង្គសវនាការកាលពីថ្ងៃទី១១ ខែសីហា ឆ្នាំ២០២២ កន្លងទៅ តំណាងអយ្យការសាសាលដំបូងខេត្ត​បាត់ដំបងបានធ្វើការសន្និឋានរួច​ដោយរក្សាការចោទប្រកាន់ដដែលពីបទរំលោភលើលំនៅឋាន ដោយលើកហេតុផលថា​លោក ឡី សុខុន បានចូលទៅក្នុងលំនៅឋានគេ គឺហួសពីព្រំរបងទៅគៀកផ្ទះគេ (ផ្ទះឈ្មោះ សុខ លីម)។

អ្នកស្រី លីន លីដា ភរិយារបស់លោក ឡី សុខុន ផ្តល់បទសម្ភាសន៍នៅមុខ​សាលាដំបូង​ខេត្តបាត់ដំបង បន្ទាប់ចេញពីសវនាការ។ រូបថតថ្ងៃនៅទី២៤ ខែសីហា ឆ្នាំ២០២២។ ខេមបូចា/ សុខ សាវី

ចំណែកលោកមេធាវី សំ សុគង់ ស្នើសុំលោកស្រីចៅក្រមជម្រះលើកលែងឱ្យកូនក្តីគាត់ រួចផុតពីបទចោទ ព្រោះមិនបានចូលទៅក្នុងលំនៅឋានឈ្មោះ សុខ លីមទេ ។ ក្រៅពីនេះ​មិនបានប្រើពាក្យសំដីគំរាមកំហែង ប្រើហិង្សា បង្ខិតបង្ខំ និងប្រើឧបាយកល​អ្វីឡើយ​គឺកូនក្តី​ទៅបំពេញការងារតាមអ្វីដែល គជប តម្រូវ។

ចំណែកលោក ឡី សុខុន ស្នើឱ្យលោកស្រីចៅក្រម លើកលែងទោសឱ្យរួចផុត​ពីបទចោទខាង​លើ ដោយហេតុថាពេលនោះបានខ្លួនដើរល្បាត និងឃ្លាំមើលភាពមិនប្រក្រតី​ក្នុងពេលបោះ​ឆ្នោត ព្រោះមានប្រជាពលរដ្ឋរាយការណ៍មកថា នៅខាងមុខការិយាល័យបោះឆ្នោត​វត្តកែវ​មាន​ការទិញសន្លឹកឆ្នោតដូច្នេះគាត់ទៅថតរូបទុកជាភស្តតាងទុកឱ្យ គជប ប៉ុណ្ណោះ។

លោក ឡី សុខុន បាននិយាថា ខ្លួនមិនបានចូលទៅក្នុងលំនៅឋានឈ្មោះ សុខ លីម នោះទេ  គ្រាន់តែសួរថា ប្រាក់នៅនឹងដៃឈ្មោះ ឡាញ់ ជុន ជាប្រាក់អ្វី ? ដោយឈ្មោះ ឡាញ់ ជុន ឆ្លើយ​ថា ជាប្រាក់ខ្លួនលក់ត្រី ខ្លួនក៏សុំទោស និងថាមិនអីទេរួចក៏ចាកចេញ។

លោក ឡាញ់ ជុន បានសរសេរក្នុងលិខិតសុំដកពាក្យបណ្តឹងកាលពីថ្ងៃទី៩ ខែមិថុនា ថា លោក​ខឹងនឹងលោក ឡី សុខុន ដោយសារតែគាត់ចូលទៅផ្ទះអ្នកជិតខាងហើយថតវីដេអូ​បង្ហោះលើបណ្តាញសង្គម នឹងបានសុំមើលលុយ របស់ខ្លួនដែលកាន់នៅនឹងដៃ ដោយ​លោក​យល់ថាវាប៉ះពាល់សិទ្ធិរបស់ខ្លួន។ តែនៅពេលដែលលោក ឡី សុខុន និងគ្រួសារបានសន្យា ធ្វើវីដេអូសុំទោសជាសាធារណៈនៅពេលបាននៅក្រៅឃុំនិងយល់ឃើញថា វាជា កំហុសតិច​តួច​ហើយ លោក ឡី សុខុន យល់ព្រមលប់វីដេអូនោះចេញវិញផង លោកក៏សម្រេចចិត្តដក​ពាក្យ​បណ្តឹងវិញ។

ក្នុងមាត្រា ២៩៩នៃក្រមព្រហ្មទ័ណ្ឌ ទាក់ទងនឹងបទរំលោភលើលំនៅឋាន បានចែងថា អំពើ ប្រព្រឹត្តដោយមានហិង្សា បង្ខិតបង្ខំ ការគំរាមកំហែងរឺឧបាយកលចូលទៅក្នុងលំនៅឋាន​អ្នក​ដទៃនោះ ត្រូវផ្តន្ទា ទោសដាក់ពន្ធនាគារពីមួយខែទៅមួយឆ្នាំ និងពិន័យជាប្រាក់​១០ម៉ឺន​រៀល ទៅ២លានរៀល លើកលែងករណីដែលច្បាប់អនុញ្ញាត។

ខេមបូចា មិនអាចទំនាក់ទំនងលោកស្រី ជា ច័ន្ទរស្មី អ្នកនាំពាក្យសាលាដំបូងខេត្តបាត់ដំបង​ដើម្បីបំភ្លឺបន្ថែម បាននៅឡើយទេ ។

លោក អ៊ិន គង់ជិត មន្រ្តីស៊ើបអង្កេតអង្កការសិទ្ធមនុស្សលីកាដូរប្រចាំខេត្តបាត់ដំបង​និង​ប៉ៃលិន បានលើកឡើងថា ករណីខាងលើលោកចៅក្រមជំនុំជម្រះមិនគួរ​សម្រេចស៊ើប​សួរ​បន្ថែមទេ គួរតែឱ្យលោក ឡី សុខុន រួចផុតពីបទចោទរំលោភសិទ្ធិលំនៅឋានអ្នកដទៃ ដោយ​ហេតុ​ថាគាត់មិនបានរំលោភដូចការចោទប្រកាន់នោះទេ ហើយមិនបានប្រើហិង្សា មិនបានបង្ខិតបង្ខំ មិនបានគំរាមកំហែងនិងប្រើឧបាយកលទុច្ចរិត ទៅលើម្ចាស់លំនៅឋាន ឈ្មោះសុខ លីម នោះ​ឡើយ ។

លោក គង់ជិត បន្ថែមថា៖ «ឈ្មោះ សុខ លីម ជាម្ចាស់ផ្ទះ គាត់ទៅប្រទេសថៃតាំងពីមុន​ថ្ងៃ​កើតហេតុទី៥ ខែមិថុនា ម៉្លេះ។ លោក ឡី សុខុន គ្រាន់តែសួរនាំឈ្មោះ ឡាញ់ ជុន រឿងឃើញ​គាត់កាន់សាច់ប្រាក់១ដុំ ដែលបានមកពីការ លក់ត្រីប៉ុណ្ណោះ ហើយនៅថ្ងៃទី៩ មិថុនា ឈ្មោះ​ឡាញ់ ជុន បានដកពាក្យបណ្តឹងវិញដែរ ដូច្នេះរឿងត្រូវចប់»។

លោក គង់ជិត បន្ថែមថា ម្យ៉ាងទៀត នៅក្នុងដំណាក់ការស៊ើបសួរលោកចៅក្រមស៊ើបសួរ​គួរតែ​ចុះទៅពិនិត្យអង្កេតជាក់ស្តែងដោយឱ្យមន្ត្រីជំនាញពាក់ព័ន្ធដូចជាមន្ត្រីផ្នែកសុរិយោដី ផ្នែកសាធារណៈការ ចុះទៅពិនិត្យវាយតម្លៃលើបរិវេណទីតាំងលំនៅឋានរបស់ឈ្មោះ សុខ លីម នោះ មុននឹងរុញសំណុំរឿងទៅជំនុំជំម្រះ៕

480 views

ព័ត៌មានទាក់ទង

ព័ត៌មានថ្មីៗ

អត្ថបទពេញនិយម