រចំ សុខា ជាយុវជនវ័យ ១៩ឆ្នាំម្នាក់ បានសម្រេចចិត្តឈប់សិក្សាត្រឹមថ្នាក់ទី៨ កាលពីឆ្នាំមុន។ បច្ចុប្បន្ន សុខា ជួយធ្វើស្រែចម្ការឪពុកម្ដាយនៅស្រុកកំណើតដើម្បីទ្រទ្រង់ជីវភាពគ្រួសារ ខណៈប្អូនៗបួននាក់ផ្សេងទៀតកំពុងនៅសិក្សានៅឡើយ។
សុខា ជាកូនទីពីរក្នុងគ្រួសារមួយរបស់ជនជាតិដើមភាគតិចចារ៉ាយ និងកំពុងរស់នៅស្រុកបកែវ ខេត្តរតនគិរី។ សុខា ជាសិស្សប្រុសម្នាក់ក្នុងចំណោមសិស្សប្រុសជាច្រើនទៀតនៅកម្ពុជា ដែលត្រូវបង្ខំចិត្តបោះបង់ការសិក្សាដោយសារតែមានការលំបាកផ្នែកសេដ្ឋកិច្ចគ្រួសារ។
សុខា និយាយថា៖ «ខ្ញុំបានសម្រេចចិត្តឈប់រៀនកាលពីឆ្នាំទៅ មុនពេលកូវីដ–១៩ រាលដាលខ្លាំង ដោយសារតែពេលនោះខ្ញុំអត់មានម៉ូតូជិះទៅរៀន…ខ្ញុំបានខិតខំរៀនសូត្រ និងសង្ឃឹមថានឹងមានអនាគតប្រសើរ ប៉ុន្តែគួរឲ្យស្តាយក្ដីសង្ឃឹមនេះបានរលាយបាត់ ព្រោះតែបញ្ហាថវិកា»។
ក្នុងរបាយការណ៍សកលមួយស្ដីពីការមិនបានចូលរៀនរបស់ក្មេងប្រុសបានចុះផ្សាយនៅខែនេះ អង្គការយូណេស្កូ បានរកឃើញថាថ្វីបើសិស្សស្រីប្រឈមនឹងការលំបាកច្រើនក្នុងការទទួលបានការអប់រំ និងមានចំនួនច្រើនសម្រេចចិត្តបោះបង់ការសិក្សានៅកម្រិតបឋមសិក្សា សិស្សប្រុសឯណោះវិញក៏មានការប្រឈមច្រើនដែរនៅកម្រិតអនុវិទ្យាល័យ។
លោក Danny Padilla ប្រធានផ្នែកអប់រំរបស់អង្គការយូណេស្កូប្រចាំប្រទេសកម្ពុជា បានប្រាប់ខេមបូចាថា ចំនួនក្មេងប្រុសបោះបង់ការសិក្សានៅថ្នាក់អនុវិទ្យាល័យមានច្រើនជាងក្មេងស្រីនៅកម្ពុជា។ ទោះបីជាចំនួនសិស្សប្រុសច្រើនបានចុះឈ្មោះចូលរៀន និងបញ្ចប់ថ្នាក់បឋមសិក្សា តែចំនួននេះមិនដូចគ្នាទេនៅកម្រិតអនុវិទ្យាល័យ។
លោកឱ្យដឹងថា៖ «បើប្រៀបធៀបទៅនឹងក្មេងស្រីជំទង់ និងក្មេងប្រុសជំទង់អាយុចន្លោះពី ១៤ ទៅ១៨ឆ្នាំត្រូវគេឃើញថាបានចូលរួមក្នុងកម្លាំងពលកម្មច្រើន។ បញ្ហាធំសម្រាប់ក្មេងប្រុសៗទាំងនេះ គឺកត្តាសេដ្ឋកិច្ចគ្រួសារ។ យ៉ាងណា ក៏មានកត្តារួមផ្សំផ្សេងទៀតផងដែរ…បន្ថែមពីនេះក្មេងប្រុសជំទង់ មានឱកាសទទួលបានប្រាក់ឈ្នួលការងារខ្ពស់ និងមានការងារច្រើនសម្រាប់ពួកគេដែរ»។
លោក Danny Padilla មានប្រសាសន៍ទៀតថា នេះក៏ព្រោះតែវាជាការងារធ្ងន់ គ្មានជំនាញ ត្រូវធ្វើដំណើរឆ្ងាយ ឬធ្វើវេនយប់ ដែលវាស័ក្ដិសមសម្រាប់តែក្មេងប្រុស ឬបុរសពេញវ័យ។ លោកបន្តថា៖ «យើងត្រូវតែយកចិត្តទុកដាក់អំពីសមភាពយេនឌ័រនៅក្នុងកម្មវិធីសិក្សា និងគោលនយោបាយ។ វាមានសារៈសំខាន់ណាស់ ដែលត្រូវរួមបញ្ចូលក្មេងប្រុសក្នុងផែនការគោលនយោបាយ»។
លោកបន្តថា កម្ពុជាត្រូវធ្វើឱ្យប្រាកដថាគ្រប់គោលនយោបាយ និងកម្មវិធីអប់រំផ្សេងៗមានការតាមដានដល់វឌ្ឍនភាពរបស់ក្មេងប្រុស ឲ្យបានច្រើនដូចក្មេងស្រីដែរ ហើយតម្រូវការរបស់ក្មេងប្រុសក៏គួរត្រូវពិចារណាដែរ។ បើតាមតួលេខរបស់ក្រសួងអប់រំក្នុងឆ្នាំ២០២០-២០២១ លោកថា អត្រាសិស្សស្រីបោះបង់ការសិក្សានៅថ្នាក់អនុវិទ្យាល័យមានប្រហែល១៦,៩ភាគរយ ខណៈសិស្សប្រុសវិញមានដល់ទៅជា១៩ភាគរយ។
ដើម្បីលើកកម្ពស់ការយល់ដឹងពីបញ្ហានេះ អង្គការយូណេស្កូ ក្នុងកិច្ចសហការជាមួយក្រសួងអប់រំ យុវជន និងកីឡា និងក្រសួងការងារ បានផ្ដួចផ្ដើមឲ្យមានគម្រោងមួយឈ្មោះថា កម្មវិធីសមមូលអប់រំកម្រិតមូលដ្ឋាន តាមអនឡាញ ហៅថាBEEP ដើម្បីផ្ដល់ឱកាសឲ្យយុវជនអាចសិក្សាតាមអនឡាញ ទោះពួកគេមិនបានចូលរៀននៅសាលា ដើម្បីជួយឲ្យពួកគេអាចបញ្ចប់កម្មវិធីសិក្សាសមមូលត្រឹមថ្នាក់ទី៩។
លោកបានបន្ថែមថា៖ «កម្មវិធីនេះគាំទ្រដល់សិស្សបោះបង់ការសិក្សា ឱ្យបានបញ្ចប់កម្រិតអប់រំមូលដ្ឋានតាមរយៈការសិក្សាអនឡាញ ដែលការសិក្សានេះមិនប៉ះពាល់ដល់ការងារប្រចាំថ្ងៃរបស់ពួកគេ ហើយអាចទទួលបានសញ្ញាបត្រ និងអាចចុះឈ្មោះចូលរៀនវគ្គជំនាញបច្ចេកទេសនៅវិទ្យាស្ថានបណ្ដុះបណ្ដាលជំនាញវិជ្ជាជីវៈរបស់ក្រសួងការងារបាន»។
លោក រស់ សុវាចារ អ្នកនាំពាក្យក្រសួងអប់រំ ប្រាប់ខេមបូចា ថាកម្មវិធី BEEP បានផ្ដល់ជាផ្លែផ្កាវិជ្ជមានក្នុងកិច្ចសហការជាមួយក្រសួង ស្ថាប័ន និងអ្នកពាក់ព័ន្ធផ្សេងៗ ដើម្បីបង្កើនគុណភាពអប់រំដល់សិស្សជាគោលដៅ។
លោកមានប្រសាសន៍ថា នៅឆ្នាំ២០១៩ ក្រសួងអប់រំ និងក្រសួងការងារ ក៏ដូចជាអង្គការយូណេស្កូ បានសហការគ្នាអនុវត្តកម្មវិធី BEEP នៅមណ្ឌលសិក្សាចំនួន១៣ មានប្រាំមួយសាលានៅសៀមរាប ប្រាំមួយសាលានៅភ្នំពេញ និងមួយសាលានៅបាត់ដំបង និងថាមណ្ឌលសិក្សាចំនួនប្រាំបីទៀត បានបង្កើតបន្ថែមនៅឆ្នាំ២០២០។
លោកបានឲ្យដឹងថា៖ «យើងសង្ឃឹមថានឹងមានមណ្ឌលសិក្សារហូតដល់៣៥ នៅត្រឹមឆ្នាំ២០២៣ ទាំងនៅភ្នំពេញ និងខេត្តចំនួន១៤ផ្សេងទៀត» ៕
ប្រែសម្រួលពីអត្ថបទភាសាអង់គ្លេស៖ Boys more at risk of dropping out of school at secondary levels
