សមាគមសម្ព័ន្ធអ្នកសារព័ត៌មានកម្ពុជា

កម្ពុជានឹងចាប់ផ្ដើមយុទ្ធនាការចាក់វ៉ាក់សាំងរបស់ចិនដើម្បីបង្ការកូវីដ-១៩ លើកុមារអាយុបីឆ្នាំដល់ប្រាំឆ្នាំនៅសប្តាហ៍ក្រោយ

កុមារអាយុចន្លោះពី៦ទៅ១២ឆ្នាំទទួលវ៉ាក់សាំងបង្ការកូវីដ-១៩ ដូសទី១ប្រភេទស៊ីណូវ៉ាក់ នៅរាជធានីភ្នំពេញ។ រូបថតកាលពីថ្ងៃទី១៧ ខែកញ្ញា ឆ្នាំ២០២១។ ខេមបូចា/ព្រីង សំរាំង
កុមារអាយុចន្លោះពី៦ទៅ១២ឆ្នាំទទួលវ៉ាក់សាំងបង្ការកូវីដ-១៩ ដូសទី១ប្រភេទស៊ីណូវ៉ាក់ នៅរាជធានីភ្នំពេញ។ រូបថតកាលពីថ្ងៃទី១៧ ខែកញ្ញា ឆ្នាំ២០២១។ ខេមបូចា/ព្រីង សំរាំង

កម្ពុជា​នឹងចាប់​​ផ្ដើម​យុទ្ធនាការ​ចាក់​វ៉ាក់សាំងបង្ការ​កូវីដ១៩ ប្រភេទ​ស៊ីណូវ៉ាក់ (Sinovac)របស់​ចិន​​ដល់​កុមារ​អាយុ​បី​ឆ្នាំដល់ប្រាំឆ្នាំនៅថ្ងៃទី២៣​ ខែកុម្ភៈ​ ឆ្នាំ២០២២ បន្ទាប់ពីលោក​នាយក​រដ្ឋមន្រ្តី ហ៊ុន សែន បានប្រកាសនៅក្នុងសារជាសំឡេងមួយកាលពីល្ងាចថ្ងៃព្រហស្បតិ៍​ ដោយសម្រេចអនុញ្ញាត​ឱ្យ​បើក​យុទ្ធនាការនេះ។  

ក្រសួងសុខាភិបាលបានចេញសេចក្ដីប្រកាសនៅថ្ងៃទី១៨ ខែកុម្ភៈ ឆ្នាំ២០២២នេះ ថា ការចាក់​វ៉ាក់សាំងការពារជំងឺកូវីដ-១៩ ប្រភេទស៊ីណូវ៉ាក់ លើកុមារអាយុ ៣ឆ្នាំ ដល់ ៥ឆ្នាំ ទូទាំងប្រទេស​កម្ពុជានឹងចាប់ផ្ដើមឡើងនៅថ្ងៃទី២៣​ ខែកុម្ភៈ​ ឆ្នាំ២០២២ ដោយរក្សាគម្លាតសម្រាប់ដូសទី១ និងដូសទី២ រយៈពេល២៨ថ្ងៃ។

លោកនាយករដ្ឋមន្រ្តី ហ៊ុន សែន​ បានចេញសារជាសំឡេងមួយ​នៅល្ងាចថ្ងៃទី១៧ ខែកុម្ភៈ ឆ្នាំ២០២២ ដោយស្នើឱ្យអាណាព្យាបាល និងមាតាបិតានាំកូនអាយុពី៣ឆ្នាំ ដល់ ៥ឆ្នាំ ទៅទទួលយកការចាក់វ៉ាក់សាំងដូសមូលដ្ឋានដើម្បីការពារពីការឆ្លងនូវជំងឺកូវីដ-១៩។ 

លោក ហ៊ុន សែន ឱ្យដឹងទៀតថា ការដាក់ចេញនូវវិធានការចាំបាច់នេះ ដើម្បីកុំឱ្យកុមារ​ទាំងនោះឆ្លងនូវមេរោគកូវីដ-១៩បំប្លែងថ្មីប្រភេទអូមីក្រុង។

លោកនិយាយថា៖ «មូលហេតុសម្រេចបែបនេះដោយសារតែសង្កេតឃើញថា ចាប់ផ្ដើម​អូមីក្រុងរុករាន នៅក្នុងប្រទេសរបស់យើង ចំនួនកុមារអាយុក្រោម៥ឆ្នាំ មានប្រមាណ​ជាង​២៥% (នៃ៧០ម៉ឺននាក់)ដែលទទួលនូវជំងឺនេះ រហូតដល់មានការ​[ប្រើ]ម៉ាស៊ីនជំនួយដកដង្ហើម​ផងដែរ។ និយាយដោយត្រង់សូម្បីចៅទី២១របស់ខ្ញុំដែលទើបនឹងមានអាយុមិនទាន់ដល់២ខួប ក៏ទទួលការឆ្លងផងដែរ»

លោកនាយករដ្ឋមន្រ្តី បានបន្ថែមថា ទាល់តែមានការចាក់វ៉ាក់សាំង ដើម្បីធានាថាពួកគេមាន​ភាពស៊ាំ ដើម្បីបញ្ចៀសនូវគ្រោះមហន្តរាយនេះសម្រាប់ពួកគេ ហើយប្រសិនបើឆ្លងក៏មិន​ធ្ងន់​ធ្ងរនាំឱ្យបាត់បង់ជីវិតផងដែរ។

អ្នកស្រី ម៉ុម ថាត មានកូនបីនាក់ រស់នៅភូមិខ្វា​ សង្កាត់ដង្កោ ខណ្ឌដង្កោ រាជធានីភ្នំពេញ និយាយថា អ្នកស្រីនឹងរងចាំមើលឪពុកម្ដាយផ្សេងទៀត ថាតើមានអ្នកយកកូន​អាយុ៣ឆ្នាំ​ទៅដល់​៥ឆ្នាំទៅចាក់វ៉ាក់សាំងដែរឬទេ ហើយប្រសិនបើមាន អ្នកស្រីក៏នាំកូនស្រី​អាយុ៤​ឆ្នាំ​ទៅចាក់​វ៉ាក់សាំងដើម្បីការពារកុំឱ្យឆ្លងនូវជំងឺកូវីដ-១៩នេះផងដែរ។

អ្នកស្រីបន្ថែមថា គ្រួសារអ្នកស្រីទទួលបានការចាក់វ៉ាក់សាំងគ្រប់គ្នា​លើកលែងតែកូនស្រី​អាយុ៤ឆ្នាំម្នាក់នេះប៉ុណ្ណោះ។

អ្នកស្រី និយាយថា «យើងអត់ដឹងថាម៉េចវានៅតូចដែរ គេថាអត់អី តែយើងចេះតែបារម្ភ អ្នកខ្លះថាចាក់ទៅមានផលប៉ះពាល់ តែគេថា ឆ្លងក៏វាស្រាល។ ប៉ុន្តែបើសិនជាចាក់​ទៅល្អដូចការផ្សព្វផ្សាយយើងចាក់ល្អជាង»។

កំពុងឈរលក់លៀសហាលក្រោមកំដៅថ្ងៃក្ដៅជាមួយកូនប្រុស អ្នកស្រី ជាប ផល្លា អាយុ​៤៦ឆ្នាំ រស់នៅភូមិឫស្សី សង្កាត់ស្ទឹងមានជ័យ២ ខណ្ឌមានជ័យ រាជធានីភ្នំពេញ និយាយថា សប្ដាហ៍ក្រោយនេះ អ្នកស្រីនឹងនាំកូនប្រុសអាយុជាង៣ឆ្នាំទៅចាក់វ៉ាក់សាំង បើទោះបីជា​អ្នកស្រីមានមន្ទិលថា ការចាក់សាំងអាចនាំផលរំខានដល់កូនអ្នកស្រីក៏ដោយ។

អ្នកស្រីនិយាយថា៖ «ខ្ញុំចាក់ហើយអត់ដែរអីផង គ្រាន់តែឈឺកន្លែងចាក់ (រងផលរំខាន)។ ខ្ញុំគិតថាប្រហែលជាមិនអីទេមើលទៅ ប៉ុន្តែមិនប្រាកដទេ។

លោក​ មាស ប៊ុនលី មន្ត្រីជំនាញផ្នែកទំនាក់ទំនងនៃអង្គការយូនីសេហ្វប្រចាំកម្ពុជា បានឆ្លើយ​តប​សំណួរអ្នកសារព័ត៌មានខេមបូចាតាមរយៈអ៊ីម៉ែលថា បច្ចុប្បន្ននេះ អង្គការសុខភាពពិភព​លោកបានផ្តល់ការអនុញ្ញាតឲ្យប្រើប្រាស់វ៉ាក់សាំងPfizer ចំពោះកុមារអាយុចាប់ពី៥ឆ្នាំទ្បើង។

លោកបន្តថា សម្រាប់ចម្លើយរបស់យូនីសេហ្វ លោកសូមចែករំលែកនូវសេចក្តីថ្លែងការណ៍​របស់អង្គការយូនីសេហ្វដែលបានចេញផ្សាយកាលពីខែកញ្ញា ឆ្នាំ២០២១។

កុមារអាយុចន្លោះពី​៦​ទៅ​១២​ឆ្នាំ​ទទួល​វ៉ាក់សាំង​បង្ការ​កូវីដ-១៩​ ដូសទី១​ប្រភេទ​ស៊ីណូវ៉ាក់ នៅរាជធានី​ភ្នំពេញ។ រូបថតកាលពី​ថ្ងៃទី១៧ ខែកញ្ញា ឆ្នាំ២០២១​។ ខេមបូចា/ ព្រីង សំរាំង

សេចក្ដីថ្លែងការណ៍របស់អង្គការយូនីសេហ្វដែលចុះថ្ងៃទី១៧ ខែកញ្ញា ឆ្នាំ២០២១ បានបង្ហាញ​ថា ជំងឺកូវីដ-១៩ ពុំសូវបង្កហានិភ័យខ្ពស់លើកុមារ និង​ក្មេង​ជំទង់ឡើយ។ ហើយពួកគេក៏​ប្រហែលមិនងាយឆ្លងជំងឺនេះផងដែរ ប្រសិន​បើប្រៀបធៀបទៅ​នឹងមនុស្សពេញវ័យ។ ក្នុង​ករណីឆ្លង គឺមានអាការស្រាល ឬគ្នានរោគសញ្ញាហើយភាគរយ​តិចណាស់ដែលពួកគេ​អាច​ចម្លងមេរោគនេះទៅកាន់មនុស្សផ្សេងទៀត។

យោងតាមគេហទំព័រអង្គការសុខភាពពិភពលោក ឱ្យដឹងថា ក្រុមអ្នកជំនាញប្រឹក្សាយុទ្ធសាស្ត្រ​របស់អង្គការមួយនេះ សន្និដ្ឋានថា វ៉ាក់សាំងPfizer មានសុវត្ថិភាពក្នុងការប្រើប្រាស់​សម្រាប់​អ្នកដែលមានអាយុចាប់ពី ៥ឆ្នាំឡើងទៅ ហើយវ៉ាក់សាំង Moderna អាចប្រើបានសម្រាប់អ្នក​ដែលមានអាយុចាប់ពី ១២ឆ្នាំឡើងទៅ។

លោក ហុក គឹម ចេង អគ្គនាយកបច្ចេកទេសនៃក្រសួងសុខាភិបាល បដិសេធឆ្លើយសំណួរ​ទាក់ទិននឹងការចាក់វ៉ាក់សាំងលើកុមារនេះ ដោយសារលោករវល់ប្រជុំ។

លោកនិយាយថា៖ «ខ្ញុំចង់ឱ្យប្អូនទំនាក់ទំនងទៅគណៈកម្មការចំពោះកិច្ចវិញដោយសារ ខ្ញុំ​ជាប់​ប្រជុំរឿងកូវីដអូមីក្រុង គណៈកម្មការចំពោះកិច្ចគេជំនាញខាងហ្នឹងតែម្ដង គេកំពុង​រៀបចំ​និតិវិធី​ក្នុងការចាក់ហ្នឹង។(កុមារតម្រូវឱ្យចាក់ប៉ុន្មានដូស) គេកំពុងរៀបចំនិតិវិធីហ្នឹង»

ដោយឡែកលោកស្រី ឱ វណ្ណឌីន  អ្នកនាំពាក្យក្រសួងសុខាភិបាល  មិនអាចសុំការអត្ថា​ធិប្បាយអំពីរឿងនេះបានទេ។

សារាចររបស់រាជរដ្ឋាភិបាលចុះថ្ងៃទី១៧ ខែកុម្ភៈ ឆ្នាំ២០២២ ឱ្យដឹងថា គណៈកម្មការចំពោះកិច្ច​ចាក់វ៉ាក់សាំងកូវីដ-១៩ ទូទាំងប្រទេសត្រូវចាប់ផ្ដើមចាក់វ៉ាក់សាំងដូសជំរុញដល់កុមារអាយុ ៥ឆ្នាំ ដល់ ១២ឆ្នាំ ឱ្យបានឆាប់រហ័ស។ ទន្ទឹមនេះ អាជ្ញាធរពាក់ព័ន្ធត្រូវធានាថា ឱសថមាន​នៅ​ក្នុងស្តុកគ្រប់គ្រាន់ និងមានប្រសិទ្ធភាព ក្នុងការព្យាបាលជំងឺកូវីដ-១៩ ទាំងកម្រិតស្រាល មធ្យម និងកម្រិតធ្ងន់ ព្រមទាំងចែកចាយឱសថដែលមានប្រសិទ្ធភាព ក្នុងការព្យាបាល​ជំងឺ​កូវីដ-១៩ ឱ្យបានគ្រប់គ្រាន់ ទូលំទូលាយ ក្នុងតម្លៃសមរម្យដល់សាធារណជន។

ក្នុងពិធីសម្ពោធដាក់ឱ្យប្រើប្រាស់ស្ពាន៧កន្លែង ស្ថិតនៅក្នុងខេត្តក្រចេះ និងព្រៃវែង កាលពីថ្ងៃ​ពុធសប្ដាហ៍​នេះ លោកនាយករដ្ឋមន្រ្តី ហ៊ុន សែន ថ្លែងថា ប្រជាពលរដ្ឋខ្មែរដែលបានចាក់​វ៉ាក់សាំងចំនួន១៤លាននាក់ក្នុងនោះមាន៦លាននាក់បានចាក់វ៉ាក់សាំងដូសទី៣ និងដូស​ជម្រុញទី៤ ចំនួន៦០ម៉ឺននាក់។

ក្នុងពិធីបើកយុទ្ធនាការចាក់វ៉ាក់សាំងបង្ការជំងឺកូវីដ-១៩ លើកុមារអាយុ ៥ឆ្នាំ កាលពីដើម​ខែវិច្ឆិកា ឆ្នាំ២០២១ លោក ហ៊ុន  សែន មានប្រសាសន៍ថា កម្ពុជាមានវ៉ាក់សាំងក្នុងដៃចំនួន​១០លានដូស ដែលបានស្តុកទុកក្នុងឃ្លាំងតាមបណ្ដារាជធានី-ខេត្ត។ លោក ហ៊ុន សែន ឱ្យដឹងទៀតថា កម្ពុជាមានវ៉ាក់សាំងសរុបចំនួន៣៨លានដូស ក្នុងនោះការបញ្ជាទិញ​ចំនួន​២៨លានដូស ក្រៅពីនេះគឺជាការផ្ដល់ឱ្យពីបណ្ដាប្រទេសដូចជា អាមេរិក ជប៉ុន អង់គ្លេស និងចិន។ ខណៈការសន្យានានាក្នុងការផ្ដល់ជំនួយវ៉ាក់សាំងមានដល់៤៧លានដូស។

សេចក្តីប្រកាសរបស់ក្រសួងសុខាភិបាលនេះ ឱ្យដឹងថា លទ្ធផលចាក់វ៉ាក់សាំងធៀបនឹងប្រជាពលរដ្ឋសរុបចំនួន១៦​លាន​នាក់ គិតត្រឹមថ្ងៃទី១៦ ខែកុម្ភៈ ឆ្នាំ២០២២ មានអ្នកចាក់វ៉ាក់សាំងចំនួន ៨៩,៩១%។ ក្នុងនោះអត្រានៃការចាក់វ៉ាក់សាំង​លើ​ប្រជា​ពលរដ្ឋអាយុ១៨ឆ្នាំឡើង មានចំនួន១០២,២០% ធៀបជាមួយចំនួនប្រជាជន​គោល​ដៅ ១០​លាននាក់។ កុមារអាយុចន្លោះ ១២ឆ្នាំ ដល់១៨ឆ្នាំ មាន៩៩,៦៩% ធៀបជាមួយ​ប្រជាជន​គោលដៅចំនួន១,៨២៧,៣៤៨នាក់។ កុមារអាយុចន្លោះ ០៦ឆ្នាំ ដល់១២ឆ្នាំ  មាន​១០៦,២០% ធៀបជាមួយនឹងប្រជាជនគោលដៅ ចំនួន១,៨៩៧,៣៨២នាក់។ កុមារអាយុ​៥ឆ្នាំ មាន១០៨,០៧% ធៀបជាមួយនឹងប្រជាជនគោលដៅ ចំនួន៣០៤,៣១៧នាក់។

តាមសេចក្តីប្រកាសរបស់ក្រសួងសុខាភិបាលនៅថ្ងៃទី១៨ ខែកុម្ភៈ ឆ្នាំ២០២២នេះ វីរុសអូមីក្រុង​ដែល​ឆ្លង​រាល​ដាលក្នុងសហគមន៍ត្រូវបានរកឃើញមានចំនួន ៤​ ០៦៤ករណី បន្ទាប់ពីរក​ឃើញ​អូមីក្រុង​ដំបូង​ក្នុងសហគមន៍នៅថ្ងៃទី០៨ខែមករា ឆ្នាំ២០២២។ ក្រសួងសុខាភិបាលឱ្យដឹង​ទៀត​ថា ជំងឺកូវីដ-១៩ ក្នុងប្រទេសកម្ពុជាសរុបចំនួន ១២៥​ ២០១ករណី និងស្លាប់សរុបចំនួន​៣០១៥​ករណី ខណៈ​ការជាសះស្បើយចំនួន ១១៩​ ៨៨០ករណី៕

512 views

ព័ត៌មានទាក់ទង

ព័ត៌មានថ្មីៗ

អត្ថបទពេញនិយម