នាយករដ្ឋមន្ត្រីកម្ពុជា លោក ហ៊ុន ម៉ាណែត និងប្រធានាធិបតីកូរ៉េខាងត្បូង លោក Lee Jae Myung បានព្រមព្រៀងកាលពីថ្ងៃចន្ទថា នឹងបង្កើតក្រុមការងារចំពោះកិច្ចចម្រុះកម្ពុជា-កូរ៉េ នៅខែក្រោយ ដើម្បីដោះស្រាយបទឧក្រិដ្ឋដែលពាក់ព័ន្ធនឹងជនជាតិកូរ៉េ នៅកម្ពុជា ក្រោយពីមានជំនួបពិភាក្សាទ្វេភាគីក្រៅកិច្ចប្រជុំកំពូលអាស៊ាន នៅទីក្រុងកូឡាឡាំពួ។
កិច្ចព្រមព្រៀងនេះធ្វើឡើងបន្ទាប់ពីករណីនិស្សិតកូរ៉េម្នាក់បានស្លាប់នៅកម្ពុជា ដោយមានការចោទប្រកាន់ថា និស្សិតនោះត្រូវបានធ្វើទារុណកម្មរហូតដល់ស្លាប់ ដែលបណ្តាលឱ្យមានប្រតិកម្មយ៉ាងខ្លាំងពីរដ្ឋាភិបាលកូរ៉េខាងត្បូង រួចមានទាំងការបញ្ជូនក្រុមអធិការកិច្ចមកកម្ពុជានៅខែនេះផងដែរ ក៏ដូចជាការចេញសេចក្តីប្រកាសណែនាំអំពីការធ្វើដំណើរនៅក្នុងតំបន់មួយចំនួន។
តាមលោកនាយករដ្ឋមន្ត្រី ហ៊ុន ម៉ាណែត ប្រទេសទាំងពីរបានបញ្ជាក់ជាថ្មីនូវការប្តេជ្ញាចិត្តក្នុងការពង្រឹងកិច្ចសហប្រតិបត្តិការក្នុងការទប់ស្កាត់ បង្ក្រាប និងប្រយុទ្ធប្រឆាំងនឹងបទឧក្រិដ្ឋ ជាពិសេសឧក្រិដ្ឋកម្មឆ្លងដែន និងតាមប្រព័ន្ធអ៊ីនធឺណិត ដែលពាក់ព័ន្ធនឹងជនជាតិកូរ៉េ នៅកម្ពុជា ក្នុងគោលបំណងរក្សាសណ្តាប់ធ្នាប់សាធារណៈ និងសុវត្ថិភាពសង្គម។ មេដឹកនាំប្រទេសទាំងពីរក៏បានពិភាក្សាអំពីសុវត្ថិភាពរបស់ប្រជាពលរដ្ឋ ភ្ញៀវទេសចរ និងវិនិយោគិន រួមទាំងជនជាតិខ្មែរដែលកំពុងធ្វើការនៅកូរ៉េ និងជនជាតិកូរ៉េដែលកំពុងរស់នៅកម្ពុជាផងដែរ។
Both sides further pledged to enhance information sharing and public communication to prevent misunderstandings and ease public concerns related to travel and safety.
ភាគីទាំងពីរក៏បានសន្យាបន្ថែមទៀតក្នុងការបង្កើនការចែករំលែកព័ត៌មាន និងការទំនាក់ទំនងជាសាធារណៈ ដើម្បីទប់ស្កាត់ការយល់ច្រឡំ និងបន្ធូរបន្ថយការព្រួយបារម្ភរបស់សាធារណជនដែលទាក់ទងនឹងការធ្វើដំណើរ និងសុវត្ថិភាព។
លោក ហ៊ុន ម៉ាណែត បានសង្កត់ធ្ងន់ថា៖ «ការប្រយុទ្ធប្រឆាំងនឹងការឆបោកតាមប្រព័ន្ធបច្ចេកវិទ្យា គឺជាអាទិភាពរបស់រាជរដ្ឋាភិបាល តាំងពីអាណត្តិកន្លងទៅ និងបន្តរហូតមកទល់នឹងពេលបច្ចុប្បន្ន ហើយកម្ពុជាជឿជាក់ថា កិច្ចសហប្រតិបត្តិការរវាងប្រទេសទាំងពីរនឹងផ្ដល់ជាកម្លាំងដ៏មុតស្រួច និងមានប្រសិទ្ធភាព ដែលនឹងធានាបាននូវសុវត្ថិភាពជូនប្រជាជននៃប្រទេសទាំងពីរ»។
អ្នកនាំពាក្យប្រធានាធិបតីកូរ៉េខាងត្បូង លោកស្រី Kang Yu-jung បានថ្លែងថា ក្រុមការងារចំពោះកិច្ចចម្រុះកម្ពុជា-កូរ៉េ ដែលគ្រោងនឹងបង្កើតឡើងក្នុងពេលឆាប់ៗនេះ នឹងមានការបញ្ជូនមន្ត្រីប៉ូលិសកូរ៉េមកកាន់កម្ពុជាផងដែរ ដោយទំហំនៃកងកម្លាំងនិងព័ត៌មានលម្អិតផ្សេងៗទៀតនៃប្រតិបត្តិការនឹងត្រូវបានសម្រេចក្នុងពេលឆាប់ៗនេះ។
ក្នុងអំឡុងពេលកិច្ចប្រជុំកំពូលរបស់កូរ៉េខាងត្បូងជាមួយអាស៊ាន ប្រធានាធិបតី លី បានបញ្ជាក់ជាថ្មីថា រដ្ឋាភិបាលរបស់លោកនឹងបង្កើតកិច្ចសហប្រតិបត្តិការជាមួយប្លុកនេះ ដើម្បីប្រយុទ្ធប្រឆាំងនឹងឧក្រិដ្ឋកម្មឆ្លងដែននៅអាស៊ីអាគ្នេយ៍។
លោកបានកត់សម្គាល់ថា មជ្ឈមណ្ឌលឆបោកបានរីករាលដាលនៅតាមតំបន់ព្រំដែន «ដែលអនុវត្តច្បាប់មានភាពធូររលុង ការកេងប្រវ័ញ្ចនិងធ្វើបាបយុវជន»។ ដើម្បីដោះស្រាយបញ្ហានេះ ភ្នាក់ងារនគរបាលជាតិកូរ៉េគ្រោងនឹងសហការយ៉ាងជិតស្និទ្ធជាមួយប្រធាននគរបាលអាស៊ាន (ASEANAPOL) ដើម្បីកម្ចាត់បណ្តាញឧក្រិដ្ឋកម្មទាំងនោះ។
អាជ្ញាធរកូរ៉េខាងត្បូងប៉ាន់ប្រមាណថា ប្រជាជនរបស់ខ្លួនប្រហែល ១ ០០០ នាក់បានចូលរួម ទាំងការជួញដូរ ឬដោយស្ម័គ្រចិត្ត ក្នុងប្រតិបត្តិការឧក្រិដ្ឋកម្មដែលបានរៀបចំនៅទូទាំងប្រទេសកម្ពុជា។ ទីតាំងបោកបញ្ឆោតរាប់រយកន្លែង ដែលភាគច្រើនត្រូវបានគេចោទប្រកាន់ថាដំណើរការដោយក្រុមឧក្រិដ្ឋជនចិន ត្រូវបានគេជឿថាបានជួញដូរមនុស្សជាង ១៥០ ០០០ នាក់មកពីប្រទេសផ្សេងៗ។
អាជ្ញាធរកម្ពុជាធ្វើមាតុភូមិនិវត្តន៍ជនជាតិកូរ៉េ ៦៤នាក់ ដែលជាប់ពាក់ព័ន្ធនឹងប្រតិបត្តិការបោកឆបោកតាមប្រព័ន្ធអ៊ិនធឺណិត។ រូបថតនៅថ្ងៃទី១៨ ខែតុលា ឆ្នាំ២០២៥។ (AKP)
កាលពីថ្ងៃទី១៨ ខែតុលា ជនជាតិកូរ៉េខាងត្បូងចំនួន ៦៤ នាក់ដែលត្រូវបានឃុំខ្លួននៅកម្ពុជាពីបទសង្ស័យថាបានប្រព្រឹត្តការឆបោកតាមអនឡាញ ត្រូវបានបញ្ជូនត្រឡប់ទៅកូរ៉េវិញ ជាកន្លែងពួកគេភាគច្រើនកំពុងប្រឈមមុខនឹងការស៊ើបអង្កេតឧក្រិដ្ឋកម្ម។ ការវិលត្រឡប់របស់ពួកគេបានធ្វើឡើងបន្ទាប់ពីការបញ្ជូនក្រុមឆ្លើយតបរបស់រដ្ឋាភិបាលកូរ៉េខាងត្បូងដើម្បីជួយជនជាតិខ្លួនដែលជាប់ពាក់ព័ន្ធក្នុងប្រតិបត្តិការបោកបញ្ឆោតតាមអនឡាញដែលដំណើរការដោយក្រុមឧក្រិដ្ឋជនក្នុងស្រុក។
ជាមួយគ្នានេះ ក្នុងកិច្ចប្រជុំកំពូលនេះ ក៏មានការឯកភាពគ្នារវាងប្រធានាធិបតី ដូណាល់ ត្រាំ និងលោកនាយករដ្ឋមន្ត្រី ហ៊ុន ម៉ាណែត ក្នុងការពង្រីកកិច្ចសហប្រតិបត្តិការប្រឆាំងនឹងឧក្រិដ្ឋកម្មឆ្លងដែន រួមទាំងការជួញដូរគ្រឿងញៀន និងការឆបោកតាមអនឡាញ ដែលបានធ្វើឱ្យជនជាតិអាមេរិកខាតបង់អស់ជាង ១០ពាន់លានដុល្លារ។
ការណ៍នេះកើតមានឡើងបន្ទាប់ពីសហរដ្ឋអាមេរិក និងចក្រភពអង់គ្លេសដាក់ទណ្ឌកម្មលើក្រុមហ៊ុនព្រីនស៍របស់កម្ពុជា ដែលជាហេតុធ្វើឱ្យអង្គភាពចំនួន ១៤៦ ត្រូវបានបង្កកទ្រព្យសម្បត្តិ។
អាជ្ញាធរអង់គ្លេសបានរឹបអូសទ្រព្យសម្បត្តិជាង ១៧២លានដុល្លារ ខណៈដែលរដ្ឋអាជ្ញាសហរដ្ឋអាមេរិកបានរឹបអូសប្រាក់ Bitcoin មានតម្លៃ ១៥ពាន់លានដុល្លារ ដែលមានជាប់ពាក់ព័ន្ធនឹងក្រុមហ៊ុន និងថ្នាក់ដឹកនាំរបស់ក្រុមហ៊ុននេះ ដែលត្រូវបានចោទប្រកាន់ពីបទធ្វើប្រតិបត្តិការឆបោកប្រើប្រាស់ទាសភាពសម័យទំនើប ដោយកំណត់គោលដៅលើជនរងគ្រោះនៅទូទាំងពិភពលោក។
លោក អំ សំអាត នាយកទទួលបន្ទុកកិច្ចការទូទៅនៃអង្គការ លីកាដូ បានស្វាគមន៍ចំពោះការបង្កើតក្រុមការងារនេះ ដោយហៅវាថា ជាការចាំបាច់សម្រាប់កម្ពុជាចំពេលមានការរិះគន់យ៉ាងខ្លាំងពីអន្តរជាតិជុំវិញសកម្មភាពឆបោក ដែលប៉ះពាល់ដល់វស័យទេសចរណ៍ វិនិយោគ និងសណ្តាប់ធ្នាប់សង្គមផងដែរ។
លោក អំ សំអាត បានថ្លែងថា ប្រទេសកម្ពុជាត្រូវតែប្រើប្រាស់ឱកាសនេះដើម្បីបង្ហាញពីការប្តេជ្ញាចិត្តរបស់ខ្លួនក្នុងការទប់ស្កាត់ និងប្រយុទ្ធប្រឆាំងនឹងឧក្រិដ្ឋកម្មឆ្លងដែន ឧក្រិដ្ឋកម្មតាមប្រព័ន្ធអ៊ីនធឺណិត និងការជួញដូរមនុស្ស ជាពិសេសតាមរយៈការបង្កើនកិច្ចសហប្រតិបត្តិការជាមួយប្រទេសជិតខាង និងក្នុងតំបន់។
លោកបានលើកឡើងថា៖ «ដើម្បីកសាងទំនុកចិត្ត និងបង្ហាញពីការប្តេជ្ញាចិត្តក្នុងការដោះស្រាយឧក្រិដ្ឋកម្មឆ្លងដែន និងឧក្រិដ្ឋកម្មតាមប្រព័ន្ធអ៊ីនធឺណិត កម្ពុជាត្រូវតែលុបបំបាត់អំពើពុករលួយ និងអនុវត្តច្បាប់ឱ្យមានប្រសិទ្ធភាពដោយមានតម្លាភាពអំពីលទ្ធផលនៃកិច្ចសហប្រតិបត្តិការ»៕
ប្រែសម្រួលពីអត្ថបទភាសាអង់គ្លេស៖ Cambodia and South Korea to Set Up Joint Task Force to Tackle Rising Crimes
