សមាគមសម្ព័ន្ធអ្នកសារព័ត៌មានកម្ពុជា

ពលករខ្មែរចំណាកស្រុកបានរៀបរាប់ពីការចាញ់​បោកមេខ្យល់ដើម្បីទៅធ្វើការនៅបរទេស

អង្គការសង់ត្រាល់ បានដឹកនាំប្រារព្ធទិវាពលករចំណាកស្រុកអន្តរជាតិលើកទី២៣ ក្រោមប្រធានបទ៖ ផ្តល់ភាពស្របច្បាប់ និងកិច្ចគាំពារសង្គមដល់ពលករចំណាកស្រុកក្រោយកូវីដ-១៩ នៅថ្ងៃទី១៨ ខែធ្នូ ឆ្នាំ២០២២។ សង់ត្រាល់-CENTRAL
អង្គការសង់ត្រាល់ បានដឹកនាំប្រារព្ធទិវាពលករចំណាកស្រុកអន្តរជាតិលើកទី២៣ ក្រោមប្រធានបទ៖ ផ្តល់ភាពស្របច្បាប់ និងកិច្ចគាំពារសង្គមដល់ពលករចំណាកស្រុកក្រោយកូវីដ-១៩ នៅថ្ងៃទី១៨ ខែធ្នូ ឆ្នាំ២០២២។ សង់ត្រាល់-CENTRAL

ពលករខ្មែរចំណាកស្រុកបានរៀបរាប់ពីបញ្ហាប្រឈមផ្សេងៗ និងការចាញ់បោកមេខ្យល់​ដោយសារតែ​គ្មានឯកសារគ្រប់គ្រាន់ដើម្បីអាចទៅធ្វើការនៅបរទេសក្នុងពេលកន្លងមក។

លោក​ ឃន​ ឡី អតីតពលករមកពីខេត្តកំពង់ធំបានរៀបរាប់ថា លោកត្រូវបានចាញ់បោក​មេខ្យល់​​ចំនួន២ដងដោយគេសន្យាថាធ្វើលិខិតឆ្លងដែនឱ្យដើម្បីអាចឆ្លងដែនទៅធ្វើការ​នៅ​ប្រទេសថៃដោយស្របច្បាប់។ លោកបានបន្តថា ក្រោយមកទៀតលោកធ្វើលិខិតឆ្លងដែន​និង​ស្វែងរកការងារដោយខ្លួនឯងផ្ទាល់តាមរយៈបងប្អូនដែលធ្វើការនៅថៃប៉ុន្តែដោយសារកូវីដ១៩ លោកត្រូវត្រឡប់មកស្រុកកំណើតវិញក៏ព្រោះតែប្រទេសថៃមិនសូវមានការយកចិត្តទុកដាក់លើពលករខ្មែរ។

លោក ឃន​ ឡី បាននិយាយថា៖ ‌«ធ្វើលិខិតឆ្លងដែនប៉ះតែក្រុមហ៊ុនបោក លើកទីមួយ​អស់ជិត​១លាន​រៀលជាង លើកក្រោយទៀតពីរនាក់ប្តីប្រពន្ធខ្ញុំអស់៥០០‌$​ កាលហ្នឹងបាន​ទៅតែឱ្យ​លិខិត​​ឆ្លងដែន​ក្លែងក្លាយ។ លើកនេះបានប្អូននៅថៃថា​មានក្រុមហ៊ុនគេរើសបុគ្គលិហើយ​ថៅកែ​​​​ក៏បាន​យក​លិខិតឆ្លងដែនទៅតវីសាឱ្យរយៈពេល២ឆ្នាំ​ ដល់ធ្វើបានមួយឆ្នាំ​កូវីដ១៩​មក​ដល់ នាំបងប្អូនមកវិញ បើយើងឆ្លងកូវីដ១៩នៅថៃគេមិនមើលទេគេមិនសូវខ្វល់ទេ​ តែ​ប្រជាជនគេ គេមើលមិនទាន់​ផង»

ក្នុងអំឡុងពេលកូវីដ១៩ ប្រហែល ២៧០ ០០០នាក់បានត្រឡប់មកកម្ពុជាវិញដោយផ្អែកលើ របាយការណ៍របស់អង្គការ IOM ដូច្នេះពួកគេភាគច្រើនត្រូវត្រឡប់ទៅប្រទេសថៃវិញ ដោយ​សារ​ភាពក្រីក្រ ការបាត់បង់ប្រាក់ចំណូល និងជំពាក់បំណុលគេ។

លោក រ៉ុម រ៉េត ជាជនរងគ្រោះចាញ់បោកមេខ្យល់ទៅ​ម៉ាឡេស៊ីមកពីខេត្តសៀមរាប​បាន​លើក​ឡើង​ថា លោកបានស្គាល់មេខ្យល់តាមរយៈមិត្តភក្តិក្នុង​ហ្វេសប៊ុកបានណែនាំ។ លោក​បាន​ចំណាយ​ប្រាក់​១២០០​$ទៅកាន់មេខ្យល់ដោយមេខ្យល់បាននិយាយថា​លុយ​ទាំង​អស់នោះ​យក​ទៅបង់​ឱ្យប៉ូលិសតាមផ្លូវដែលធ្វើដំណើរ។​

លោកបានបន្តថា​ ពេលដែលទៅដល់ប្រទេសម៉ាឡេស៊ីភ្លា​មមិនទាន់ចុះទូកបាន១៥​នាទីផង​ប៉ូលិសបានឃាត់ខ្លួនហើយបានបញ្ចូនទៅតុលាការដោយអនុវត្តទោស៦ខែបន្តាប់ពី​ចេញពី​អនុវត្តទោសចប់ប៉ូលិសបានទាក់ទងមកកាន់ស្ថានទូតកម្ពុជា និងទទួលបានជំនួយ​ពីអង្គការ​សង់ត្រាល់ដើម្បីត្រឡប់ទៅប្រទេសវិញ។

លោក​ រ៉ុម រ៉េត​​ បាននិយាយថា៖ «ខ្ញុំបានស្គាល់មេខ្យល់តាមមិត្តភក្តិក្នុងហ្វេសប៊ុកគេប្រាប់​អ៊ីចឹង​​ហើយគាត់ក៏មិនស្គាល់មេខ្យល់នេះដែរ ខ្ញុំបង់ឱ្យគេអស់១២០០$។ មេខ្យល់ថាយកលុយ​ហ្នឹង​ឱ្យប៉ូលិសតាមផ្លូវតែគាត់បោកយើងសោះ»

អង្គការសង់ត្រាល់ បានដឹកនាំប្រារព្ធទិវាពលករចំណាកស្រុកអន្តរជាតិលើកទី២៣ ក្រោមប្រធានបទ៖ ផ្តល់ភាព​ស្រប​ច្បាប់ និងកិច្ច​គាំពារ​សង្គមដល់ពលករ​ចំណាក​ស្រុកក្រោយកូវីដ-១៩ នៅថ្ងៃទី១៨ ខែធ្នូ ឆ្នាំ២០២២។ សង់ត្រាល់-CENTRAL

លោក ឌី ថេហូយ៉ា ជាប្រធានកម្មវិធីប្រឆាំងការជួញដូរមនុស្ស​និង​ទេសន្តប្រវេសន៍​នៃអង្គការ​សង់ត្រាល់ មានប្រសាសន៍ថា ការប្រារព្ធកម្មវិធីនេះឡើងក្នុងគោលបំណងផ្តល់ភាព​ស្របច្បាប់ និងកិច្ចគាំពារសង្គមដល់ពលករចំណាកស្រុកក្រោយកូវីដ១៩។​ មូលហេតុ​ក្នុង​ការ​ប្រារព្ធ​កម្មវិធី​នេះឡើងព្រោះចង់ទាញចំណាប់អារម្មណ៍ ជាពិសេសរដ្ឋាភិបាលឱ្យយកចិត្តទុក​បន្ថែមលើ​ពលករ​ខ្មែរចំនួន​ជា២លាននាក់នៅឯបរទេស។​

លោក ថេហូយ៉ា បន្ត​ថា អ្នកចំណាកស្រុកទៅបរទេសប្រឈមនឹងបញ្ហាធំៗ​ក្រោយ​កូវីដ១៩​​ដូចជាគ្មានឯកសារ​គ្រប់​គ្រាន់​សម្រាប់ធ្វើការស្របច្បាប់នៅឯបរទេស ចាញ់បោក​មេខ្យល់​​ត្រូវគេធ្វើបាប​ជាកម្មវត្ថុមួយ​នៃការជួញដូរ។

លោក ថេហូយ៉ា បានឱ្យដឹងថា៖ «ពួកគាត់ប្រឈងនឹងបញ្ហា​ធំៗ​​ក្រោយកូវីដ១៩ គឺប្រឈម​នឹង​អត់ឯកសារស្របច្បាប់សម្រាប់ធ្វើការនៅក្រៅប្រទេស គាត់ចំណាយច្រើន ចាញ់បោកគេ ត្រូវ​បាន​គេ​ធ្វើបាបជាកម្មវត្ថុនៃការជួញដូរជាដើម កើតចេញពីគាត់មិនមានឯកសារ​ស្រប​ច្បាប់»។​ លោក ថេហូយ៉ា បន្តថា៖ «ការ​ចាញ់​បោកគេមានទម្រង់ច្រើន​។​ ការចំណាយច្រើន​និង​នីតិវិធី​ហាក់បីដូចស្មុគស្មាញ​ធ្វើឱ្យ​គាត់​មិនអាចបានឯកសារស្របច្បាប់​បាន»

លោកបានបន្ថែមថា មិនមែនពួកគាត់ចង់ចំណាកស្រុកដោយគ្មានច្បាប់ទេ​តែ​មាន​ហេតុ​ផល​ជាច្រើនដូចជាផុតសុពលភាពលិខិតឆ្លងដែន​នឹងដំណើរការ​សុំសិទ្ធិធ្វើការ​ត្រូវ​ការ​ឯកសារច្រើន​មានលក្ខណៈស្មុគស្មាញធ្វើឱ្យគាត់​មិនអាចរៀបចំឯកសារបាន​គ្រប់​គ្រាន់។

លោក​ ព្រិច រ៉ុប មេឃុំអូរដា ស្រុកកំរៀង​ ខេត្តបាត់ដំបង បានថ្លែងថា សម្រាម់ឃុំលោក មាន​អ្នក​ចំណាកស្រុក​ទៅកាន់ប្រទេសថៃចំនួនជាង៥០០នាក់​ អ្នកមានច្បាប់ភាគច្រើន​ធ្វើការនៅ​ទីក្រុង​ ឬក្នុងប្រទេស ចំពោះពលករដែល​នៅធ្វើការខេត្តជាយព្រំដែន​មិនចាំបាច់មានច្បាប់​ក៏​បាន​ដែរ។​ អ្នកមានច្បាប់ភាគច្រើនមកធ្វើឯកសារនៅច្រកចេញចូលតែ​​មួយនៅការិយាល័យ។ ចំពោះបណ្ណក្រីក្រអ្នកចំណាកស្រុកនៅប្រទេសថៃអាចមកធ្វើនៅពេលទំនេរនឹងអាចផ្ទេរឱ្យ​សាច់ញាតិនៅខ្មែរបើកលុយបាន។

លោក​ ព្រិច​ រ៉ុប បានបញ្ជាក់ថា៖ «នៅខ្ញុំនេះមានអ្នកចំណាកស្រុក​៥០០នាក់ជាង។ គេទៅថៃ​ភាគច្រើនមានច្បាប់ អ្នកអត់ច្បាប់ធ្វើនៅជាយខេត្តតែអាចចេញចូលបាន គេមកធ្វើនៅច្រក​ចេញ​​ចូលតែមួយ។ បណ្ណក្រីក្រខ្ញុំសម្ភាសរហូតហ្នឹង បណ្ណក្រីក្រអាចផ្ទេរទៅសាច់ញាតិឱ្យបើក​លុយ​បាន»

អង្គការសង់ត្រាល់ បានដឹកនាំប្រារព្ធទិវាពលករចំណាកស្រុកអន្តរជាតិលើកទី២៣ ក្រោមប្រធានបទ៖ ផ្តល់ភាព​ស្រប​ច្បាប់ និងកិច្ច​គាំពារ​សង្គមដល់ពលករ​ចំណាក​ស្រុកក្រោយកូវីដ-១៩ នៅថ្ងៃទី១៨ ខែធ្នូ ឆ្នាំ២០២២។ សង់ត្រាល់-CENTRAL

លោក​ ណំ   សុត   មេឃុំរុងរឿង ស្រុកស្ទោង ខេត្តកំពង់ធំបានលើកឡើងថា ឃុំគាត់មាន​អ្នក​ចំណាកស្រុកត្រឹមតែ៦៥​​នាក់ប៉ុណ្ណោះ​ អ្នកចំណាកស្រុកសុទ្ធតែមានច្បាប់ត្រឹមត្រូវមុនចេញ​ទៅធ្វើការនៅប្រទេសថៃ អត់មានច្បាប់​ក៏ពួកគាត់មិនទៅដែរព្រោះតែមានការ​ផ្សព្វផ្សាយ​ពី​អង្គការ​សង់ត្រាល់។

លោក ណំ​ សុត​ បានបញ្ជាក់ថា៖ «នៅឃុំខ្ញុំមាន៦៥​នាក់ បច្ចុប្បន្នមានច្បាប់ទើបអាចទៅបាន ភាគច្រើនទាល់តែមានបងប្អូននៅហ្នឹងបានគាត់ហ៊ានទៅដែរ ដោយសារមានការ​ផ្សព្វផ្សាយពី​អង្គការសង់ត្រាល់»

លោក សិទ្ធិ ឡោះ ស្នងការនគរបាលខេត្តបន្ទាយមានជ័យ មានប្រសាសន៍ថា ករណីឆ្លងដែន​ខុសច្បាប់នៅតែមានតាមព្រំដែនទៅកាន់ប្រទេសថៃចំពោះចំនួនជាក់លាក់លោកមិនទាន់បាន​ប្រាប់បានទេព្រោះមិនទាន់បានបូកសរុប។

លោក សិទ្ធិ ឡោះ បានថ្លែងថា៖ «ករណីឆ្លងដែននៅតែមាន សម្រាប់ចំនួនជាក់លាក់មិនទាន់អាច​និយាយបានព្រោះមិនទាន់បានបូកសរុប»

លោក អំ សំអាត​ នាយកទទួលបន្ទុកកិច្ចការទូទៅនៃអង្គការ លីកាដូ បានថ្លែងថា ដើម្បីកុំឱ្យ​ចាញ់បោកមេខ្យល់ ពលរដ្ឋខ្មែរដែលមានបំណងចំណាកស្រុកគប្បីស្វែងរកព័ត៌មានឱ្យបាន​ច្បាស់លាស់មុននឹងសម្រេចចិត្ត។ កុំទុកចិត្តលើនរណាដែលគ្រាន់តែសន្យាថានឹងជួយ ព្រមទាំងសន្យាថានឹងផ្តល់ការងារឱ្យ។

លោក សំអាត មានប្រសាសន៍ថា​៖ «ដើម្បីកុំឱ្យចាញ់បោកមេខ្យល់ ប្រជាជនខ្មែរគួរតែស្វែងរក​ព័ត៌មាន​ឱ្យបានច្បាស់លាស់មុននឹង​សម្រេចចិត្តធ្វើចំណាកស្រុក កុំប្រថុយប្រថានធ្វើ​ចំណាកស្រុក​ដោយមិនមានព័ត៌មានគ្រប់គ្រាន់ ត្រូវធ្វើចំណាកស្រុកដោយស្របច្បាប់។ កុំធ្វើចំណាកស្រុក​ដោយ​ខុសច្បាប់តាមរយៈមេខ្យល់។ កុំទុក​ចិត្តមនុស្សដែលយើងមិនស្គាល់ហើយយល់ព្រមធ្វើ​ចំណាក​ស្រុក​តាម​គេ»។ លោក សំអាត បន្ថែម​ថា៖ «កុំទុកចិត្តមេខ្យល់​ ស្វែង​យល់ពីអ្នកដែល​នៅជុំវិញខ្លួន​ព្រោះ​អ្នកដែលយើងស្គាល់​ក៏អាច​បញ្ឆោត​យើងបានដែរ»

298 views

ព័ត៌មានទាក់ទង

ព័ត៌មានថ្មីៗ

អត្ថបទពេញនិយម