ពលរដ្ឋកម្ពុជាមួយចំនួនស្វែងរកសេវាកម្មសុខភាពផ្លូវចិត្ត អំឡុងពេលវិបត្តិជំងឺកូវីដ១៩

Motorists drive past the TPO buildingពលរដ្ឋជិះម៉ូតូកាត់អគារចិត្តសង្គម អន្តរវប្បធម៌ (TPO) ក្នុងរាជធានីភ្នំពេញ កាលពីថ្ងៃទី២៨ ខែសីហា។ ខេមបូចា/ បញ្ញា ឆព័ណ្ណ
Motorists drive past the TPO buildingពលរដ្ឋជិះម៉ូតូកាត់អគារចិត្តសង្គម អន្តរវប្បធម៌ (TPO) ក្នុងរាជធានីភ្នំពេញ កាលពីថ្ងៃទី២៨ ខែសីហា។ ខេមបូចា/ បញ្ញា ឆព័ណ្ណ

ពលរដ្ឋ​កម្ពុជា​កាន់​តែ​ច្រើន​បាន​ងាក​ទៅ​ស្វែងរក​​សេវាកម្ម​ពិគ្រោះយោបល់​ផ្លូវ​ចិត្ត ដោយសារ​បញ្ហា​អារម្មណ៍​ភ័យខ្លាច​និង​ស្រេ្តស ដែលបង្ក​ឡើង​ដោយ​វិបត្តិ​ជំងឺ​កូវីដ១៩។ អ្នក​ជំនាញ​និយាយ​ថា ការ​បាត់បង់​ការងារ​ដោយសារ​ការ​ធ្លាក់ចុះ​សេដ្ឋកិច្ច ក៏ដូចជាការ​រឹតត្បិត​ពី​សំណាក់​រដ្ឋាភិបាល និង​ការ​បិទ​សាលារៀន​បាន​នាំ​ឲ្យ​មាន​ការ​កើនឡើង​នូវ​ជំងឺ​បាក់​ទឹកចិត្ត និង​អារម្មណ៍​ភ័យព្រួយ។​

​សុខេន​ អាយុ ២០​ឆ្នាំ គឺ​ជា​ពលរដ្ឋ​ខែ្មរ​វ័យ​ក្មេង​ម្នាក់ ដែល​បាន​ប្រឈម​នឹង​ជំងឺ​បាក់​ទឹកចិត្ត អំឡុងពេល​មាន​ការ​រាតត្បាត​ជំងឺ​កូវីដ១៩។ ដោយ​និយាយ​មក​កាន់ខេមបូចា​  យុវជន​រូប​នេះ​លើកឡើង​ថា ក្នុង​រយៈពេល​ជា​ច្រើន​ខែ​បន្ទាប់​ពី​ព្រឹត្តិការណ៍​ផ្ទុះ​ការ​ឆ្លង​ជំងឺ​កូវីដ១៩ ក្នុង​សហគមន៍ ២០ កុម្ភៈ រូប​គេ​មាន​អារម្មណ៍​មិនចង់​ប្រាស្រ័យ​ទាក់ទង​ទៅ​ខាង​ក្រៅ ហើយ​ចង់​នៅ​​ក្នុង​បន្ទប់​ជួល​ដ៏​តូច​និង​ងងឹត​របស់​ខ្លួន។ ដំបូង​ឡើយ សុខេន​មិន​ដឹង​ថា នឹង​ត្រូវ​ទៅ​រក​ជំនួយ​នៅ​កន្លែង​ណា​នោះ​ទេ។ លោក​មិន​ស្គាល់​កន្លែង​ផ្តល់​សេវាកម្ម​ពិគ្រោះយោបល់​ណា​មួយ ហើយ​ខ្លាច​នឹង​ប្រាប់​អារម្មណ៍​របស់​ខ្លួន​ទៅ​មិត្តភក្តិ និង​ក្រុម​គ្រួសារ។

លោក​និយាយថា៖ «សង្ឃឹម​នឹង​រក​​បាន​ការងារ​សមរម្យ​មួយ​ដើម្បី​ជួយ​ទ្រទ្រង់​ការ​រៀនសូត្រ ​និង​ការ​រស់នៅ​ជា​អ្វី​ដែល​ខ្ញុំ​តែង​ប្រាថ្នា ដើម្បី​ជួយ​សម្រាល​បន្ទុក​គ្រួសារ​ខ្ញុំ​ ដែល​កំពុង​ជួប​ការ​លំបាក​ផ្នែក​លុយ​កាក់​នៅ​ខេត្ត។ ប៉ុន្តែ​ខ្ញុំ​មិន​អាច​រក​ការងារ​បាន​នោះ​ទេ ដោយសារ​តែ​ការ​ធ្លាក់​ចុះ​សេដ្ឋកិច្ច​បង្ក​ឡើង​ដោយ​ជំងឺ​កូវីដ១៩»។

​​ដោយ​មិន​ឃើញ​មាន​ជម្រើស​ច្រើន សុខេន​ក៏​ធ្លាប់​គិត​ពី​រឿង​ធ្វើ​អត្តឃាត​ផង​ដែរ។

​​លោក​បាន​និយាយ​ថា៖«ខ្ញុំ​មាន​អារម្មណ៍​សោកសៅ​ខ្លាំង​ណាស់​កាល​ពី​គ្រា​នោះ។ ខ្ញុំ​មិន​ឃើញអ្វី​មាន​ភាព​ប្រសើរ​ឡើង​នោះ​ទេ​ ដោយសារ​តែ​យល់ឃើញ​ថា ខ្លួន​ឯង​ជា​បញ្ហា​មួយ​សម្រាប់​គ្រួសារ​ទាំងមូល។ ដូច្នេះ ការ​បញ្ចប់​ជីវិត​ប្រហែល​អាច​ជួយ​ដោះស្រាយ​បញ្ហា និង​ជួយ​ទប់ទឹកភ្នែក​ដែល​ស្រក់​រាល់​យប់​បាន»។

ក្រោយមក សុខេន​រក​ការងារ​ធ្វើ​បាន​ ប៉ុន្តែពលរដ្ឋ​កម្ពុជា​ជា​ច្រើន​​នាក់​បាន​រងការ​ប៉ះពាល់​យ៉ាង​ខ្លាំង​ដោយសារ​ការ​រាតត្បាត​ជំងឺ​កូវីដ១៩។ វណ្ណា និស្សិត​អាយុ ២២​ឆ្នាំ ត្រូវ​បង្ខំ​ចិត្ត​ធ្វើ​ចត្តាឡីស័ក​ចំនួន ១៤​ថ្ងៃ បន្ទាប់​ពី​ប៉ះពាល់​ជាមួយ​នឹង​អ្នក​កើត​ជំងឺ​កូវីដ១៩។ លោក​បាន​និយាយ​ថា ទោះ​បី​ជា​នៅ​ដោយ​ឡែក​អស់រយៈពេល​ពីរ​សប្តាហ៍​ក៏ដោយ លោក​នៅ​តែ​ភ័យខ្លាច​នៅ​ក្នុង​ការ​ចាកចេញ​ពី​ផ្ទះ ដោយ​ព្រួយបារម្ភ​ពី​ការ​ឆ្លង​ជំងឺ​នេះ។ ​

លោក​បាន​បញ្ជាក់​ថា៖ «ខ្ញុំ​មាន​អារម្មណ៍​ធុញថប់​ខ្លាំង​ណាស់។ ខ្ញុំ​នៅ​ផ្ទះ​រាល់​ថ្ងៃ។ ខ្ញុំ​មិនអាច​ទៅ​ជួប​នរណា​ម្នាក់​នៅ​ខាង​ក្រៅ​ដូច​មុន​នោះ​ទេ។ ហើយ​ការ​ភ័យខ្លាច​ពី​ជំងឺ​កូវីដ១៩ ក៏​បាន​ប៉ះពាល់​អារម្មណ៍​របស់​ខ្ញុំ​ដោយ​ផ្នែក​ផង​ដែរ»។

​ការ​រាតត្បាត​ជំងឺ​កូវីដ១៩ និង​ការ​រឹតត្បិត​ពី​សំណាក់​រដ្ឋាភិបាល​ជា​លទ្ធផល​ បាន​បង្ក​ផល​ប៉ះពាល់​ធ្ងន់ធ្ងរ​ដល់​សុខភាព​ផ្លូវ​ចិត្ត​ពលរដ្ឋ​កម្ពុជា​វ័យ​ក្មេង​មួយ​ចំនួន។ យោង​តាម​របាយការណ៍​អង្គការយូនីសេហ្វ ចុះ​ផ្សាយ​កាល​ពី​ខែ​តុលា ឆ្នាំ​២០២០ ការ​បិទសាលារៀន​បាន​ធ្វើ​ឲ្យ​កុមារ​និង​មនុស្សពេញវ័យ​បាត់បង់​ការ​ប្រាស្រ័យ​ទាក់ទង​គ្នា​ដោយ​ផ្ទាល់ ហើយ​បាន​បង្ក​ជា​បញ្ហា​ក្នុង​ការ​ទទួល​ទាន​ដំណេក និង​អារម្មណ៍​ភ័យព្រួយ​ ដែល​ជំរុញ​ពី​ក្រោយ​ដោយ​ការ​ហូបចុក​មិន​ទៀងទាត់ ការ​ធ្វើ​លំហាត់ប្រាណ​តិច​ជាង​មុន និង​ការ​ចំណាយ​ពេល​ច្រើន​ជាង​មុន​មើល​ទូរសព្ទ ឬ​ទូរទស្សន៍​ជា​ដើម។ គួប​ផ្សំ​ជាមួយ​នឹង​បន្ទុក​ផ្នែក​សេដ្ឋកិច្ច និង​ការ​ព្រួយបារម្ភ​ជា​ប្រចាំ​ពី​សុខភាព​របស់​ខ្លួន និង​អ្នក​ជិតដិត​នឹង​ខ្លួន បញ្ហា​ស្រេ្តស​នេះ​អាច​នាំ​ឲ្យ​មាន​ជា​ជំងឺ​រ៉ាំរៃ​ ដូចជា បញ្ហា​បាក់ស្បាត (PTSD) ជា​ដើម។

កម្ពុជា​មាន​កំណត់ត្រា​ករណី​​ឆ្លង​ជំងឺ​កូវីដ១៩​ថ្មី​ចំនួន ៥៨៩ និង​ការ​ស្លាប់​ចំនួន​ ១១​ករណី​កាល​ពី​ថ្ងៃ​ព្រហស្បតិ៍ ដោយ​ធ្វើ​ឲ្យ​ចំនួន​ករណី​ឆ្លង​សរុប​កើន​ដល់ ៩៧.៥២៤ និង​ការស្លាប់​ចំនួន ២.០០៧​ករណី។

កុមារ​និង​មនុស្សពេញវ័យ​ជា​អ្នករងគ្រោះ​ខ្លាំង​ជាង​គេ​ដោយសារ​វិធានការ​រដ្ឋាភិបាល​ដើម្បី​ទប់ទល់​នឹង​ការ​ឆ្លង​ជំងឺ​កូវីដ១៩។ ចាប់​តាំង​ពី​ខែ​មីនា​ ឆ្នាំ​២០២០ សាលារៀន​បាន​បិទទ្វារ​អស់រយៈពេល​ជាង ២០០​ថ្ងៃ ដើម្បី​ពន្យឺត​ការ​ឆ្លង​រាលដាល​ជំងឺ​កូវីដ១៩ ដែល​ការណ៍​នេះ​បាន​បង្ក​ផលប៉ះពាល់​ដល់​សិស្ស​ចំនួន​ជាង ៣​លាន​នាក់​នៅ​ទូទាំង​ប្រទេស។ លោក ហឿ សេធុល ប្រធាន​សមាគម​អ្នក​ប្រឹក្សា​យោបល់​និង​អ្នក​ជំនាញ​ផ្នែក​ចិត្តសាស្រ្ត បាន​ប្រាប់​ខេមបូចា ថាចំនួន​អ្នក​ស្វែងរក​សេវាកម្ម​ពិគ្រោះយោបល់​ផ្លូវ​ចិត្ត​បាន​កើនឡើង​បី​ទៅ​បួន​ដង បើបៀប​នឹង​មុន​ពេល​មាន​ការ​រាតត្បាត​ជំងឺ​កូវីដ១៩។ លោក​បាន​បន្ត​ថា នៅ​ស្រប​ពេល​ដែល​អ្នកទាំង​នោះ​មាន​អាយុ និង​លក្ខខណ្ឌ​ជីវប្រវត្តិ​ផ្សេង​គ្នា ក្រុម​ចម្បង​ដែល​មក​រក​សេវាកម្ម​ពិគ្រោះយោបល់​ផ្លូវ​ចិត្ត​​ពី​លោកគឺ​ ឪពុកម្តាយ​នាំ​កូន​របស់​ខ្លួន​មក។

លោក​មានប្រសាសន៍​ថា៖ «[កុមារ] អាយុ​រវាង​ពីរ​ទៅ​ដប់​ឆ្នាំ​កំពុង​ជួប​ការ​លំបាក​នឹង​បញ្ហា​ដែល​មិន​ធ្លាប់​មាន​ពី​មុន​មក​នេះ ដែល​អាច​នាំ​ឲ្យ​មាន​ការ​ធ្លាក់ចុះ​សមត្ថភាព​សិក្សា និង​ការ​ប្រែប្រួល​អាកប្បកិរិយា»។ ដោយលោកបន្ថែមថា៖ «ឪពុកម្តាយ​មួយ​ចំនួន​បាន​មករក​ខ្ញុំ​ឲ្យ​ជួយ​ផ្តល់​ការ​ប្រឹក្សា​ ដើម្បី​អាច​ឲ្យ​យល់​ច្បាស់​ពី​ការ​វិវត្ត​សុខភាព​ផ្លូវ​ចិត្ត​របស់​កុមារ។ ហើយ​ចំនួន​អ្នក​ស្វែង​រក​ការ​ពិគ្រោះយោបល់​បាន​បន្ត​កើនឡើង ចាប់​តាំង​ពី​មាន​ការ​រាតត្បាត​ជំងឺ​កូវីដ១៩​មក​»។

ពលរដ្ឋ​សម្រាក​នៅ​មុខ​ផ្ទះ​របស់​ពួកគេ​នៅ​តំបន់​ក្រហម​អំឡុងពេល​មាន​ការ​បិទខ្ទប់​ក្នុង​សង្កាត់​ចោមចៅ១ ខណ្ឌ​ពោធិ៍សែនជ័យ ក្រុង​ភ្នំពេញ។ រូបថត​កាល​ពី​ថ្ងៃ​ទី១៩ ខែ​ឧសភា ឆ្នាំ​២០២១។ ខេមបូចា/ ព្រីង សំរាំង

លោក​សេធុល ​បាន​លើកឡើង​ថា ដោយ​ផ្អែក​លើ​ការ​ស្រាវជ្រាវ​ធ្វើ​​ឡើង​ដោយ​អង្គការ​ក្រៅ​រដ្ឋាភិបាល កុមារ​ចំនួន ៧០​ភាគរយ កំពុង​ជួប​ប្រទះ​នឹង​បញ្ហា​សុខភាព​ផ្លូវ​ចិត្ត ដោយសារ​សាលារៀន​បាន​បិទទ្វារ​​រយៈពេល​យូរ​ និង​ការ​នៅ​ដាច់​ដោយឡែក​តែ​ឯង។ កាល​ពី​ថ្ងៃ​ទី០៩ ខែ​កញ្ញា រដ្ឋបាល​រាជធានី​ភ្នំពេញ​បាន​ប្រកាស​​បន្ត​វិធានការ​ទប់ស្កាត់​ចំនួន​ ១៤​ថ្ងៃ​ បន្ថែម​ទៀត គិត​ចាប់​ពី​ថ្ងៃ​ទី១០ ខែ​កញ្ញា ដើម្បី​ទប់ទល់​នឹង​ការ​ឆ្លង​វីរុសបំប្លែង​ថ្មី​ដែលតា។ គ្រប់គ្រឹះស្ថាន​អប់រំដែលមិនទាន់មានគោលការណ៍អនុញ្ញាតឱ្យបើកដំណើរការឡើងវិញ ត្រូវបន្តការសិក្សាតាមប្រព័ន្ធអនឡាញ​ ដែល​បាន​ធ្វើ​ឡើង​អស់​រយៈពេល​រាប់​រយ​ថ្ងៃ​មក​ហើយ​គិត​ចាប់តាំង​ពី​មាន​ការ​ផ្ទុះ​ឆ្លង​​ជំងឺ​កូវីដ១៩។ ប៉ុន្តែ​យោង​ទៅ​តាម​របាយការណ៍​មួយ​ទៀត​របស់​អង្គការយូនីសេហ្វ ចុះ​ផ្សាយ​នៅ​ខែ​មិថុនា ឆ្នាំ​២០២១ ការ​រៀន​តាម​ប្រព័ន្ធ​អនឡាញ​មិន​អាច​ជំនួស​ការ​រៀន​ដោយ​ផ្ទាល់​បាន​នោះ​ទេ។

​​របាយការណ៍​បាន​សរសេរ​ថា៖ «កុមារ​ដែល​មិន​បាន​រៀន​នៅ​ក្នុង​ថា្នក់​រៀន​ ប្រឈម​នឹង​ការ​កើនឡើង​នូវ​ភាព​ឯកា ការ​លំបាក​ក្នុង​ការ​ផ្ចង់​អារម្មណ៍ និង​ការ​ភ័យព្រួយ​នៅ​ក្នុង​ការ​សិក្សា។ បញ្ហា​ទាំង​នេះ​នឹង​កាន់​តែ​អាក្រក់​ជាង​មុន ប្រសិន​បើ​សាលារៀន​នៅ​បន្ត​បិទទ្វារ»។

លោក​សេធុល​បាន​និយាយ​ថា បញ្ហា​សុខភាព​ផ្លូវចិត្ត​បាន​ក្លាយ​ជា​ចំណុច​ផ្តោត​នៅ​អំឡុង​ពេលវេលា​ដ៏​លំបាក​នេះ។ ដោយសារ​តែ​ស្ថានភាព​មិន​ច្បាស់លាស់ ការ​ភ័យខ្លាច​ជា​ទូទៅ​ពី​ជំងឺ​កូវីដ១៩ និង​ការ​ប៉ះពាល់​សេដ្ឋកិច្ច មនុស្ស​មួយ​ចំនួន​ហាក់ដូចជា​បាន​តាមដាន​ពី​របៀប​ការពារ​សុខភាព និង​សុខមាលភាព​របស់​ពួកគេ។

លោក​បាន​ថ្លែង​ថា៖ «មុន​ពេល​មាន​ការ​រាតត្បាត​ជំងឺ​កូវីដ១៩ ខ្ញុំ​មាន​វគ្គ​បង្រៀន​ចំនួន​ប្រាំ​ពាក់ព័ន្ធ​នឹង​ការ​ការពារ​សុខភាព​ផ្លូវ​ចិត្ត និង​សុខមាលភាព​សម្រាប់​ក្រុមហ៊ុន​ឯកជន និង​បុគ្គលិក​អង្គការ​ក្នុង​មួយ​ខែ ប៉ុន្តែ​ឥឡូវ​នេះ​ ខ្ញុំ​មាន​រហូត​ដល់​​ដប់ ឬ​ច្រើន​ជាង​នេះ»។

ពលរដ្ឋ​កម្ពុជា​វ័យ​ចំណាស់​ច្រើន​ជាង​មុន​ក៏​បាន​ស្វែងរក​សេវាកម្ម​ពិគ្រោះយោបល់​សុខភាព​ផ្លូវ​ចិត្ត​ផង​ដែរ។ ដោយ​មាន​ជំនួយ​ផ្តល់​ដោយ​អង្គការយូនីសេហ្វ និង​អង្គការ Plan International Cambodia អង្គការ TPO បាន​ផ្តល់​សេវាកម្ម​ពិគ្រោះយោបល់​ផ្លូវ​ចិត្ត​ដល់​ពលរដ្ឋ​ងាយរងគ្រោះ​អំឡុងពេល​មាន​ការ​រាតត្បាត​ជំងឺ​កូវីដ១៩។ លោកស្រី សុខ ផាណែត អ្នក​ពិគ្រោះ​យោបល់​ផ្នែក​សុខភាព​ផ្លូវ​ចិត្ត​ប្រចាំ​អង្គការ​ចិត្តសង្គម និង​អន្តរវប្បធម៌ (TPO) បាន​ប្រាប់ខេមបូចា ថាចាប់​ពី​ខែ​មេសា​ ឆ្នាំ​២០២០ មក​ដល់​ខែ​កក្កដា ឆ្នាំ​២០២១ មាន​ករណី​ស្វែងរក​សេវាកម្ម​ជំនួយ​ផ្នែក​សុខភាព​ផ្លូវ​ចិត្ត​ចំនួន ២.៤៧០ករណី នៅ​អង្គការ TPO។ នៅ​ក្នុង​ចំណោម​អ្នក​ស្វែង​រក​ជំនួយ មនុស្ស​ពេញវ័យ​ស្ថិត​នៅ​ក្នុង​ក្រុម​មនុស្ស​ឈាន​មុខ​គេ ចំនួន ២.៣៣៥ ករណី (ស្រ្តី ១.៤៧៤​ ករណី និងបុរស ៨៦១​ករណី) ចំណែក​ឯ​កុមារ​មាន​ ១៣៥​ករណី (កុមារី ៩១​ ករណី និងកុមារា ៤៤​ករណី)

លោកស្រី​ផាណែត​បាន​ថ្លែង​ថា៖ «អំឡុងពេល​មាន​ការ​រាតត្បាត​ជំងឺ ចំនួន​អ្នក​ស្វែងរក​ការ​ប្រឹក្សា​ផ្នែក​សុខភាព​ផ្លូវ​ចិត្ត​តាម​ប្រព័ន្ធ​អនឡាញ​បាន​កើនឡើង​យ៉ាងខ្លាំង។ ពួកគាត់​មាន​បញ្ហា​ប្រឈម​ផ្លូវចិត្ត​ផ្សេងៗ ហើយ​នៅ​ក្នុង​ចំណោម​​ករណី​ចំនួន ២.៤៧០ អ្នក​ដែល​កំពុង​ធ្វើ​ចត្តាឡីស័ក និង​អ្នក​កំពុង​សម្រាក​ព្យាបាល​ជំងឺ​កូវីដ១៩ ក៏​បាន​ស្នើ​សុំ​ជំនួយ​ផង​ដែរ»។

លោក ងិន រតនរមនា សហស្ថាបនិក Arom Station ដែល​ជា​គេហទំព័រ​អនឡាញ​មួយ មាន​គោលដៅ​លើកកម្ពស់​ការយល់​ដឹង​ពី​សុខភាព​ផ្លូវ​ចិត្ត​ និង​ផ្តល់​ការ​ពិគ្រោះយោបល់​ ដោយ​ឥតគិត​ថ្លៃ​បាន​មានប្រសាសន៍ថា ចាប់​តាំង​ពី​ខែ​មេសា រហូត​មក​ទល់​ពេល​នេះ គេហទំព័រ Arom Station បាន​ផ្តល់​សេវាពិគ្រោះយោបល់​ដល់​មនុស្ស​ចំនួន ១៥០​នាក់ អាយុ​រវាង​ ១៥ ទៅ​៣៥​ឆ្នាំ។ លោក​បាន​និយាយ​ថា អ្នក​ដែល​ស្វែងរក​ជំនួយ​បាន​ជួប​ប្រទះ​បញ្ហា​អារម្មណ៍​ភ័យព្រួយ និង​ជំងឺ​បាក់ទឹកចិត្ត បង្ក​ឡើង​ដោយ​ស្ថានភាព​ដុនដាប​ដោយសារ​វិបត្តិ​ជំងឺ​កូវីដ១៩។ ​​​

លោក​បាន​ថ្លែង​ថា៖ «អ្នក​ជំងឺ​ដែល​មក​រក​ពួក​យើង​ ស្ថិត​នៅ​ក្នុង​ដំណាក់កាល​បញ្ហា​សុខភាព​ផ្លូវ​ចិត្ត​ផ្សេងៗ​គ្នា ដោយ​មាន​ចាប់​ពី​រោគសញ្ញា​កម្រិត​ស្រាល រហូត​ដល់​កម្រិត​ធ្ងន់»។ ដោយលោកបន្ថែមថា៖ «ពួកគាត់​មួយ​ចំនួន​បាន​និយាយ​ថា ពួកគាត់​មិន​អាច​សម្រាន្ត​បាន​ពេល​យប់ ដោយ​សារ​ពួកគាត់​គិត​ច្រើន​ និង​មាន​បញ្ហា​ធុញថប់​អារម្មណ៍​ខ្លាំង។ ហើយ​អ្វី​ដែល​យើង​បាន​រក​ឃើញ​នា​ពេល​ថ្មីៗ​នេះ គឺ​ថា អ្នកជំងឺ​កំពុង​ចូល​ក្នុង​ដំណាក់កាល​លំបាក​មួយ​ដែល​មិនអាច​ឲ្យ​ពួកគេ​បំពេញ​ការងារ​បាន»។

លោក ខាន់ សារ៉េត សាស្រ្តាចារ្យ​ផ្នែក​ចិត្តវិទ្យា ​នៅ​សាកលវិទ្យាល័យ​ភូមិន្ទភ្នំពេញ​ បាន​មានប្រសាសន៍​ថា លោក​បាន​ផ្តល់​ការ​ពិគ្រោះយោបល់​សុខភាព​ផ្លូវ​ចិត្ត​ដោយ​ឥត​គិត​ថ្លៃ​ចំពោះ​និស្សិត​នៅ​សាកលវិទ្យាល័យ​នេះ។

លោក​បាន​ថ្លែង​ថា៖ «និស្សិត​ភាគ​ច្រើន​ អាយុ​រវាង ១៨ ទៅ​២០​ឆ្នាំ បានមករកខ្ញុំដើម្បី​ស្វែង​ការប្រឹក្សា​ផ្នែក​សុខភាព​ផ្លូវ​ចិត្ត ដោយសារ​តែ​ពួកគេ​ជួប​ប្រទះ​ការ​លំបាក​លើបញ្ហានេះខ្លាំង​អំឡុងពេល​វិបត្តិ​ជំងឺ​កូវីដ១៩។ ខ្ញុំ​គិត​ថា មនុស្ស​ដទៃ​ទៀត​ក៏​ត្រូវ​ការ​ជំនួយ​ដូច​នេះ​ដែរ ប៉ុន្តែ​ពួកគេ​មិនដឹង​ថា ត្រូវ​ទៅ​ណា ហើយ​ខ្លាច​ដោយសារ​ព្រួយបារម្ភ​ពី​ការ​រើសអើង»

ប្រែសម្រួលពីអត្ថបទភាសាអង់គ្លេស៖ Cambodians seek mental health services amid COVID-19 crisis

110 views
ព័ត៌មានថ្មីៗ »
អត្ថបទពេញនិយម »