សមាគមសម្ព័ន្ធអ្នកសារព័ត៌មានកម្ពុជា

ធនាគារពិភពលោកថា កំណើនសេដ្ឋកិច្ចកម្ពុជានឹងកើនឡើង តែអតិផរណាក៏កើនឡើងដូចគ្នា

ស្រ្តីម្នាក់កំពុងអង្គុយលក់បន្លែនៅផ្សារមួយកន្លែងក្នុងរាជធានីភ្នំពេញកាលពីខែកុម្ភៈ ឆ្នាំ២០២១។ ខេមបូចា/ ព្រីង សំរាំង
ស្រ្តីម្នាក់កំពុងអង្គុយលក់បន្លែនៅផ្សារមួយកន្លែងក្នុងរាជធានីភ្នំពេញកាលពីខែកុម្ភៈ ឆ្នាំ២០២១។ ខេមបូចា/ ព្រីង សំរាំង

ធនាគារពិភពលោកបាន​​ប៉ាន់​​ប្រមាណ​ថាកំណើនសេដ្ឋកិច្ច ឬផលិត​ផល​ក្នុ​ងស្រុក​សរុប (GDP) ​កម្ពុជា​នឹង​កើន​ដល់​ ៤,៨​ភាគ​រយ​នៅ​ឆ្នាំ​នេះ ហើយ​នឹង​បន្ត​កើន​ឡើង​ទៀត​នៅ​ពីរ​ឆ្នាំ​បន្ទាប់ ប៉ុន្តែ​ថា​កំណើន​នេះ​នៅ​តែ​​ទាប​ជាង​កាលពី​មុន​មាន​វិបត្តិកូវីដ-១៩។​ ជាមួយ​គ្នា​នេះ​ដែរ ធនគារ​ពិភព​លោក​ក៏​លើក​ឡើង​ដែរ​ថា​អតិផរណា​កម្ពុជា​ក៏​នឹង​កើន​ឡើង​ដល់​ទៅ​ ៦ភាគ​រយ គឺ​កើន​ទ្វេដង​បើ​ធៀប​នឹង​ពីរ​ឆ្នាំ​កន្លង​ទៅ​។​

«​ការ​កើន​ឡើង​អតិផរណា​នេះ​នឹង​ធ្វើ​ឲ្យ​សុខុមាលភាព​របស់​ប្រ​ជា​ពល​រដ្ឋ​កាន់​តែ​អាក្រក់​» នេះ​បើ​តាម​​​របាយការណ៍​របស់​ធនាគារ​ពិភព​លោក​ចេញ​ផ្សាយ​កាល​ពី​ថ្ងៃអង្គារ​។

របាយការណ៍នេះបានលើកឡើងថា៖ «​អតិផរណា​នឹង​ធ្វើ​ឲ្យ​តម្លៃ​ម្ហូប​អាហារ ​ប្រេង​ឥន្ធនៈ ​និង​តម្លៃ​ទំនិញ​ប្រើ​ប្រាស់​ប្រចាំ​ថ្ងៃ​​កើនឡើង»​។ អតិផរ​ណា​កើន​​ដល់​ ៧,៨​ភាគ​រយ កាលពី​ខែ​មិថុនា មុន​ពេល​ធ្លាក់​ចុះ​មក​នៅ​៥,៤​ភាគ​រយ​នៅ​ខែ​កក្កដា។​

បើ​តាម​របាយការណ៍​ដដែល សេដ្ឋកិច្ច​កម្ពុជា​នឹង​កើន​ឡើង​ដល់​ ៥,២ភាគរយ​នៅ​ឆ្នាំ​ក្រោយ និង​កើន​ដល់​៦,៣​ភាគរយ​នៅ​ឆ្នាំ​២០២៤​។​

ទិន្នន័យ​ធនាគារពិភព​លោកឲ្យ​ដឹង​ថា ការព្យាករពីកំណើននេះ បានបង្ហាញ​ពី​សញ្ញា​នៃ​ការស្ទុះងើបឡើងវិញ​តាំង​ពី​ឆ្នាំ​២០២០ ជា​ឆ្នាំ​ដំបូង​នៃ​វិបត្តិកូវីដ-១៩ និង​ការ​ធ្លាក់ចុះនៃ​សេដ្ឋកិច្ច​សកល​ផង​ដែរ។ វា​ក៏ជា​​​ឆ្នាំ​ដំបូង​គិត​តាំងពី​ឆ្នាំ​១៩៩៤ មក​ដែល​កម្ពុជា​មាន​កំណើន​អវិជ្ជមាន​​បែប​នេះ​។ កម្ពុជា​មាន​កំណើន​សេដ្ឋកិច្ច​ថេរ​ជិត ៧ភាគ​រយ​តាំងពី​ឆ្នាំ​២០១១ ដល់​ឆ្នាំ​២០១៩​។​

ចំណែក​ធនាគារ​អភិវឌ្ឍន៍​អាស៊ី ហៅ​កាត់​ថា ADB​​ វិញ បាន​ប៉ាន់​ប្រមាណ​ដែរថា​ GDP កម្ពុជា​ក្នុង​ឆ្នាំ​នេះ​មាន​កំណើន​​៥,៣ភាគ​រយ និង​៦,២ភាគរយ​នៅ​ឆ្នាំ​ក្រោយ ហើយ​ថា​អតិផរណា​នៅ​ឆ្នាំ​នេះមាន​៥ភាគរយ និង​២,២​ភាគ​រយ​នៅ​ឆ្នាំ​២០២៣​។​

អ្នក​នាំ​ពាក្យ​ក្រ​សួង​ពាណិជ្ជកម្ម​លោក​ ប៉ែន សុវិជាតិ មាន​ប្រសាសន៍​ថា​ ខណៈ​អតិផរណា​មាន​ការ​កើន​ឡើងតាម​ការ​ពិនិត្យ​របស់​ក្រ​សួង​ផ្ទាល់​តម្លៃ​ទំនិញ​លក់​រាយ​នៅ​មាន​តម្លៃ​ទាប​។​

លោក​បន្ត​ថា៖ «​វា​នៅមិនទាន់ជាក្តីបារម្ភនៅឡើយទេ ខណៈ​ អត្រា​[អតិផរណា] ស្ថិត​​នៅ​ក្រោម​ អត្រា​៥ភាគ​រយ និង​អាច​​​គ្រប់​គ្រង​បាន ស្រប​ពេល​ដែល​ការ​កើន​ឡើង​នេះ​កើត​មាន​តាម​រដូវ​កាល ហើយ​វា​កើន​ឡើង​ជា​ធម្មតា»។​​

បើ​តាម​លោក សុវិជាតិ កម្ពុជា​នាំ​ទំនិញ​ប្រើ​ប្រាស់​ភាគ​ច្រើន​ពី​ប្រទេស​ចិន ថៃ វៀតណាម និង​នាំចេញ​ភាគ​ច្រើន​ទៅ​កាន់​ប្រទេស​នៅ​សហភាព​អឺរ៉ុប និង​សហរដ្ឋអាមេរិក។ លោក​បន្ថែម​ថា ក្រ​សួង​បាន​ជួយ​លើក​កម្ពស់​ផលិត​ផល​ក្នុង​ស្រុក ដើម្បីកាត់​បន្ថយ​ការ​នាំ​ចូល​ទំនិញ​មួយ​ចំនួន​។​

លោក​បញ្ជាក់​ថា៖ «​ដូច​នេះ​យើង​នឹង​មិន​ពឹង​ផ្អែក​ទាំង​ស្រុង​លើ​ទំនិញ​នាំ​ចូល ដែល​នេះ​ធ្វើ​ឲ្យ​តម្លៃ​ទំនិញ​លក់​រាយ​មាន​តម្លៃ​ទាប»។ លោក​បន្តថា៖ «​សម្រាប់​បញ្ហា​ពី​ខាង​ក្រៅ​វិញ ក្រ​សួង​បាន​សម្រួល​ដល់​ការ​ធ្វើ​ពាណិជ្ជកម្ម​ដោយ​បាន​កាត់​បន្ថយ​ពេល​វេលា និង​តម្លៃ​ដឹក​ជញ្ជូន​»។​

លោក​ឲ្យ​ដឹង​ទៀត​ថា៖ ​«​សម្រាប់​បញ្ហា​ខ្លះ​យើង​មិន​អាច​គ្រប់​គ្រង​បាន​ទេ ដោយសារវាជា​វិបត្តិ​អន្តរជាតិ​ ដូច​ជា​វិបត្តិកូវីដ១៩ និង​សង្គ្រាម​រវាង​អ៊ុយក្រែន និង​រុស្ស៊ី ដែល​ធ្វើ​ឲ្យ​តម្លៃ​ទំនិញ​កើន​ឡើង​»។​         

យ៉ាងណា​លោក​ឲ្យ​ដឹង​ដែរ​ថា ក្រសួង​ក៏​បាន​ធ្វើបច្ចុប្បន្ន​ភាព​តម្លៃ​ប្រេង​ឥន្ធនៈ​រៀង​រាល់​ ១០​ថ្ងៃ​ម្ដង ដោយ​ផ្អែក​លើ​តម្លៃទី​ផ្សារ​អន្តរជាតិ ហើយ​រដ្ឋាភិបាល​ក៏​បាន​បង្កើន​ការ​ជួយ​ឧបត្ថម្ភ​ពី ៤​សេន​​ទៅ​ ៦,៥សេន​មួយលីត្រ​​​ តាំង​ពី​តម្លៃ​ប្រេង​ឥន្ធនៈ​បាន​ហក់​ឡើង​ក្នុង​អំឡុង​វិបត្តិ​នៅអ៊ុយ​ក្រែន​។​

បើ​តាម​របាយការណ៍​របស់​ធនាគារ​ពិភព​លោក​ដដែល រដ្ឋាភិបាល​ក៏​បាន​បន្ត​កម្មវិធី​ផ្ដល់​សាច់​ប្រាក់​​ដល់​អ្នក​រង​ផល​ប៉ះ​ពាល់​ពី​តម្លៃ​ម្ហូប​អាហារ និង​ប្រេងឥន្ធនៈ រហូត​ដល់​ដាច់​ឆ្នាំ​នេះ​ផង​ដែរ​។​ គម្រោង​នេះ​បាន​ជួយ​ប្រជា​ពល​រដ្ឋ​ក្រីក្រ​ប្រហែល ២,​៧​លាន​នាក់​ ឬ​ប្រហែល​ ១៧​ភាគ​រយ​នៃ​ប្រ​ជា​ជន​សរុប ខណៈ​កម្ពុជា​មាន​អ្នក​រស់នៅ​ក្រោម​បន្ទាត់​នៃភាព​ក្រីក្រ​ដែល​កំណត់​ដោយ​​រដ្ឋាភិបាល​មាន​ចំនួន​ ១៧,​៨​ភាគ​រយ​។ គិត​ត្រឹម​ខែ​កក្កដា កន្លងទៅ កម្មវិធី​ផ្ដល់​សាច់​ប្រាក់​នេះ​បាន​ចំណាយ​ប្រាក់​អស់​ ៧១៤​លាន​ដុល្លារ គិត​តាំងពី​ពេល​អនុវត្ត​គម្រោង​តាំងពីខែ​មិថុនា ឆ្នាំ​២០២០ មក​។​

កាល​ពី​ខែ​មុន​ថ្លៃ​ចំណាយ​លើ​​ម្ហូប​អាហារ​ចាំ​បាច់របស់​មនុស្ស​ម្នាក់​​បាន​កើន​ឡើង​ខ្ពស់ ពោល​គឺ​ខ្ពស់​បំផុត​ក្នុង​ឆ្នាំ​២០២២ សូម្បី​តែត្រកួន​ក៏​ឡើង​ថ្លៃ​ខ្លាំង​​ ដែល​តម្លៃ​នេះ​កើន​ដល់​ទៅ​ ២៥​ភាគ​រយ បើ​ធៀប​ទៅ​នឹង​ខែ​មុន​មួយ​ទៀត​។ នេះ​បើ​តាម​របាយការណ៍​តម្លៃ​ម្ហូប​អាហារសម្រាប់​ខែ​សីហា ​របស់​កម្មវិធី​ស្បៀង​អាហារ​ពិភព​លោក​ និង​ក្រ​សួង​កសិកម្ម​កម្ពុជា។​ ថ្លៃ​ចំណាយ​លើ​​ម្ហូប​អាហារ​ចាំ​បាច់របស់​មនុស្ស​ម្នាក់​​ គឺ​​សំដៅ​ដល់​ការ​ចំណាយ​ប្រចាំ​ខែ​លើ​ម្ហូប​អាហារ​ដែល​អាច​ទទួល​បាន​សារជាតិ​ចិញ្ចឹម​កម្រិត​អប្បបរមា និង​ក៏​ជា​សូចនាករ​សម្រាប់​វាស់​វែង​កម្រិត​សេដ្ឋកិច្ច​ផង​ដែរ​។​

ថ្លៃ​ចំណាយ​លើ​​ម្ហូប​អាហារ​ចាំ​បាច់របស់​មនុស្ស​ម្នាក់​​កាល​ពី​ខែ​សីហា គឺ​ ១១១ ១៦៧​រៀល ក្នុង​មួយ​ខែ គឺច្រើន​ជាង​ ៣​ភាគ​រយ បើ​ធៀប​ទៅ​នឹង​រយៈ​ពេល​ដូច​គ្នា​កាលពី​ឆ្នាំ​មុន​។​ អាហារ​ចាំ​បាច់​ទាំង​នោះ​មាន​ដូច​ជា​ អង្ករ ត្រី សាច់ជ្រូក ពងទា ប្រេងឆា ដំឡូងជ្វា និង​ត្រកួន​​ជា​ដើម​។​

ខណៈ​តម្លៃ​ម្ហូប​អាហារ​ចាំ​បាច់​ផ្សេង​ទៀត​ក្រៅពី​ត្រកួន​មាន​ការ​ប្រែ​ប្រួល​តិច​តួច របាយការណ៍​បញ្ជាក់ថា​ទំនិញ​ប្រើ​ប្រាស់​ខ្លះទៀត​បានកើន​ឡើង រួម​មាន​ប្រេង​ឆា ដែល​ភាគ​ច្រើន​នាំ​ចូល កើន​២៣​ភាគ​រយ​បន្ថែម​ទៀត ស៊ុត​ក៏​ឡើង​ថ្លៃ​១៩​ភាគរយ​ដែរ ហើយ​តម្លៃ​ត្រកួន​វិញ​ខ្ពស់​ជាង​ឆ្នាំ​២០២១ ដល់ទៅ​៤០​ភាគរយ​។​​

របាយការណ៍​បន្ត​ថា៖ «​ចំណូល​ពល​រដ្ឋ​បាន​ធ្លាក់ចុះ​ដោយ​សារវិបត្តិកូវីដ១៩ ព្រម​ជាមួយ​នឹងការ​ឡើង​ខ្ពស់​​តម្លៃទំនិញ​ ម្ហូបអាហារ ប្រេងឥន្ធនៈ និង​ជីកសិកម្ម រឹត​តែ​ធ្វើ​ឲ្យ​ប្រ​ជាពល​រដ្ឋ​ក្រីក្រ និង​គ្រួសារ​ងាយ​រង​គ្រោះ​កាន់​តែ​ពិបាក​ខ្លាំង​»។​ បើ​តាម​របាយការណ៍​ដដែល៖ «​តម្លៃទំនិញ​ឡើង​ខ្ពស់​ធ្វើ​ឲ្យ​ការ​រស់​នៅ​ត្រូវ​ការចំណាយ​កាន់​តែ​ច្រើនទៅ​ហើយ តែ​​ក៏​ទំនង​ជា​ប៉ះពាល់​អវិជ្ជមាន​ដល់​ផលិត​កម្ម​ម្ហូប​អាហារ​ក្នុង​ស្រុកដែរ​​ ខណៈ​វត្ថុ​ធាតុ​ដើម​សម្រាប់​វិស័យ​កសិកម្ម​​ថ្លៃ​មិន​អាច​ឲ្យ​កសិករ​ទប់​ទល់​បាន»។​

លោក វ៉ន ពៅ ប្រធាន​សមា​គម​ប្រជា​ធិប​តេយ្យ​ឯក​រាជ្យ សេដ្ឋ​កិច្ច​ក្រៅ​ប្រព័ន្ធ មាន​ប្រសាសន៍​ថា បើ​ទោះ​បី​ជា​រដ្ឋាភិបាល​បាន​បើក​ប្រទេស​ឡើងវិញ ក្រោយ​វិបត្តិ​កូវីដ-១៩​ ធ្ងន់ធ្ងរ​នាប៉ុន្មាន​ខែ​កន្លង​មក​ក៏​ដោយ ក៏​តម្លៃ​ទំនិញ​ឡើង​ថ្លៃ​បាន​ធ្វើ​ឲ្យ​អ្នក​មាន​ចំណូល​ទាប​កាន់​តែជួប​ការ​លំបាក​។​​

លោក​ឲ្យ​ដឹង​ថា៖ «​ចំណូលពួកគាត់​នៅ​តែទាប ដែល​មិន​សមាមាត្រ​ទៅ​នឹង​តម្លៃ​ទំនិញ​ដែល​ឡើង​ខ្ពស់ ហើយ​ពួកកាត់​ក៏​ជំពាក់​បំណុល​គ្រឹះស្ថាន​មីក្រូហិរញ្ញវត្ថុ​ទៀត​ផង​»។ លោក​បន្ថែម​ថា៖ «​ដូច​នេះ បញ្ហា​ទាំង​នេះ​វា​ប៉ះពាល់​ដល់​​ការ​ទទួល​បាន​អាហារហូបដែលមានគុណភាព និង​ធ្វើ​ឲ្យ​ប៉ះពាល់​សុខភាព​ផង​ដែរ»

ប្រែសម្រួលពីអត្ថបទភាសាអង់គ្លេស៖ Cambodia’s GDP and Inflation to Rise This Year, World Bank Says

204 views

ព័ត៌មានទាក់ទង

ព័ត៌មានថ្មីៗ

អត្ថបទពេញនិយម