សមាគមសម្ព័ន្ធអ្នកសារព័ត៌មានកម្ពុជា

សមាជគណបក្សភ្លើងទៀន បង្ហាញសារនិងគោលនយោបាយសំខាន់ៗមុនការបោះឆ្នោតជាតិ

អ្នកគាំទ្រគណបក្សភ្លើងទៀនចូលរួមសមាជក្នុងខេត្តសៀមរាបកាលពីថ្ងៃទី១១ ខែកុម្ភៈ ឆ្នាំ២០២៣។ ខេមបូចា/ស៊ន សារ៉ាត
អ្នកគាំទ្រគណបក្សភ្លើងទៀនចូលរួមសមាជក្នុងខេត្តសៀមរាបកាលពីថ្ងៃទី១១ ខែកុម្ភៈ ឆ្នាំ២០២៣។ ខេមបូចា/ស៊ន សារ៉ាត

ខេត្តសៀមរាប៖ ​អ្នកគាំទ្រគណបក្សភ្លើងទៀន ប្រហែល ៨ ០០០​នាក់​បាន​ជួប​ជុំ​គ្នា​កាលពីថ្ងៃ​សៅរ៍​​ក្នុង​សមាជវិសាមញ្ញមួយ​ដើម្បី​រៀប​ចំ​គោលនយោបាយ​ និង​សារ​របស់​គណបក្សសម្រាប់​ត្រៀម​ការ​បោះ​​ឆ្នោត​ថ្ងៃទី​២៣ ខែកក្កដា ឆ្នាំ​២០២៣ ខាង​មុខ​។​​

គណបក្ស​ភ្លើងទៀនបាន​ប្រកាស​ចេញ​នូវ​កម្មវិធីនយោបាយ​ចំនួន​ប្រាំបួន​ចំណុច​ក្នុង​ន័យ​បង្កើន​អត្ថប្រយោជន៍​ផ្នែក​សុខមាលភាព​សង្គម​ដល់​ប្រជាពល​រដ្ឋ​កម្ពុជា​។​ គណបក្ស​ក៏​បាន​បង្ហាញ​សារអាទិភាព​ប្រាំចំណុច​របស់​ខ្លួន​ដែល​រួម​មាន៖​

  • ពិនិត្យ ព្យាបាល​ជំងឺ​នៅ​តាម​មន្ទីរពេទ្យ​រដ្ឋដោយឥតបង់ប្រាក់
  • ចាស់ៗ​មាន​វ័យ​៦៥​ឆ្នាំ​ឡើង​នឹងទទួល​បាន​ប្រាក់​២០​ម៉ឺនរៀល​រាល់ខែ
  • កម្មករ​ប្រាក់ខែ​ទាប​បំផុត​១លាន​២សែនរៀន និងមន្ត្រីរាជការ​ប្រាក់ខែទាប​បំផុត​២លានរៀល​
  • កសិផល​ថ្លៃ ជីថោក ប្រេងថោក ការប្រាក់​ទាប​
  • ការអប់​រំល្អ បង្កើត​ការងារ​សម្រាប់​យុវជន​១​លាន​នាក់​។​

អនុប្រធានគណបក្សភ្លើងទៀន លោក សុន ឆ័យ មានប្រសាសណ៍ថា៖ «លើក​ម្រាម​ដៃ​ប្រាំជា​សញ្ញាថា​គណបក្សកំពុងប្ដេជ្ញាប្រឆាំងអំពើពុករលួយ​ដើម្បី​បម្រើប្រជាពល​រដ្ឋ​ក្នុង​ភាព​ស្អាតសំ និង​ត្រឹម​ត្រូវ»។

សហអនុប្រធានគណបក្សភ្លើងទៀនលោក សុន ឆ័យ​ កំពុង​ថ្លែងក្នុង​សមាជរបស់​ខ្លួន​ក្នុង​ខេត្ត​សៀម​រាប​កាលពី​ថ្ងៃទី​១១ ខែកុម្ភៈ ឆ្នាំ២០២៣។ ខេមបូចា/ស៊ន សារ៉ាត

គណបក្ស​បាន​ធ្វើ​ការ​កែសម្រួល​រចនាសម្ព័ន្ធ​ថ្នាក់​ដឹក​នាំ​ផ្ទៃ​ក្នុង​បក្ស ដោយ​បាន​បង្កើន​ចំនួនគណៈកម្មាធិការនាយកដែលទទួលបន្ទុក​ខាងរៀបចំគោលនយោបាយ​ពី​៤១​នាក់​ទៅ​ដល់​១១៧​នាក់​ និង​បាន​បន្ថែមចំនួនគណៈកម្មាធិការអចិន្ត្រៃយ៍ពី​១៥​ទៅ​៣២​នាក់​។​​ ក្នុង​​នោះដែរ​​គណបក្ស​ភ្លើងទៀន​ក៏​បាន​សម្រេច​តែងតាំង​លោក​ រ៉ុង ឈុន ដែល​បាន​ប្រកាស​ចូល​រួម​នយោបាយ​ជាមួយ​គណបក្ស​នេះ​កាលពីខែមករា ឲ្យ​ក្លាយ​ជា​សមាជិក​គណៈកម្មាធិការ​នាយក​ផង​ដែរ​។​ លោក រ៉ុង ឈុន និង លោក សុខ ហាច ក៏ត្រូវបានជ្រើសរើសជាអនុប្រធានគណបក្សផងដែរ។

អតីត​ប្រធានសមាគម​គ្រូបង្រៀន​ឯករាជ្យ​កម្ពុជា​លោក រ៉ុង ឈុន ត្រូវ​បាន​ជាប់​ឆ្នោតជា​អនុប្រធានគណបក្ស​ភ្លើងទៀន ដែល​ការជ្រើសរើស​នេះ​ធ្វើឡើង​ក្នុង​ខេត្តសៀមរាប កាលពី​ថ្ងៃទី​១១ ខែកុម្ភៈ ឆ្នាំ២០២៣។ ខេមបូចា/ស៊ន សារ៉ាត
លោក សុខ ហាច ក៏​បាន​ជាប់​ឆ្នោត​ជាអនុប្រធានគណបក្ស​ភ្លើងទៀន​តាម​រយៈ​ការ​បោះ​ឆ្នោត​រៀបចំនៅ​ខេត្ត​សៀម​រាប ថ្ងៃទី​១១ ខែកុម្ភៈ ឆ្នាំ២០២៣។ ខេមបូចា/ស៊ន សារ៉ាត

ថ្នាក់​ដឹក​នាំ​ជាន់​ខ្ពស់​របស់​គណបក្ស​នេះ​ជា​ច្រើន​រូប​កំពុង​ជាប់​បណ្ដឹង​តុលាការ និង​រង​ការគំរាម​កំហែង​ពី​លោក​នាយក​រដ្ឋមន្ត្រី​ ហ៊ុន សែន និង​គណបក្ស​កាន់​អំណាច​។​

អគ្គលេខាធិការគណបក្ស​ភ្លើងទៀន លោក លី សុធារ៉ាយុត្តិ មាន​ប្រសាសន៍​ថា គណបក្ស​បាន​រង​គ្រោះ​ពីការ​បំពារបំពាន​ខាង​នយោបាយ និង​ការ​ធ្វើទុក្ខបុកម្នេញ​ដោយ​អ្នកមានអំណាច ដែល​លោក​និយាយ​ដោយមិន​បានបញ្ចេញ​ឈ្មោះ ដោយថា​កំពុង​រក​វិធី​រំខាន​ដល់​ប្រតិបត្តិការ​របស់​គណបក្ស​។​

លោក​បន្ថែម​ថា៖ «យើង​នឹង​បន្ត​ការ​តស៊ូមតិផ្នែក​នយោបាយ​ដើម្បី​ជំរុញ​ឲ្យ​មាន​បរិយាកាស​នយោបាយ​ល្អ​ប្រសើរ​សម្រាប់​ដំណើរ​ការបោះ​ឆ្នោត​ និង​អំពាវ​នាវ​ឲ្យ​មានការ​ដោះលែង​អ្នក​ទោស​មនសិការ​ផ្សេង​ទៀត»​។​

ឧត្តមទីប្រឹក្សា​ជាន់ខ្ពស់​គណបក្ស​ភ្លើង​ទៀន លោក គង់ គាំ បានលាឈប់ពី​តួនាទី​បន្ទាប់ពីប្រឈមមុខ​នឹង​បណ្ដឹង​ដែល​ចោទ​ថា​បាននិយាយបរិហារកេរ្តិ៍។ អនុប្រធាន​គណបក្ស​នេះដែរ គឺ​លោក ថាច់ សេដ្ឋា កំពុង​ជាប់ឃុំ​នៅពន្ធនាគារ​ ក្រោយ​ការចាប់​ខ្លួន​កាល​ពី​ខែ​មករា ដោយ​រង​ការ​ចោទ​បាន​បាន​ចេញ​សែក​ស្អុយ​កាល​ពី​ច្រើន​ឆ្នាំ​មុន។​ តុលាការ​ក៏​បាន​សម្រេច​ឲ្យ​លោក​ សុន ឆ័យ ​ផ្ដល់​សំណង​ជំងឺ​ចិត្តជា​ប្រាក់​១លាន​ដុល្លារ​ដល់​គណបក្ស​កាន់អំណាច​ ដោយបានរឹប​អូស​ផ្ទះ​ចំនួន​ពីរ​កន្លែង​របស់​លោកជាបណ្តោះអាសន្ន​សម្រាប់ទូទាត់សំណង​នេះ​ដល់​បក្ស​កាន់​អំណាច​។​

ទោះយ៉ាងនេះ​ក្ដី លោក សុន ឆ័យ អះអាង​ថា​សកម្មភាព​ប្រឆាំង​នឹង​ថ្នាក់​ដឹកនាំ​គណបក្សភ្លើងទៀន ទំនងជាអាច​ធ្វើ​ឲ្យ​គណបក្ស​នេះ​ទទួល​បាន​ការគាំទ្រកាន់តែ​ខ្លាំង​។​

លោក សុន ឆ័យ ថ្លែង​ថា​៖ «អ្នកគាំទ្រគណបក្ស​ភ្លើងទៀន​បន្ត​ចូលរួមកាន់​តែ​ច្រើន​ឡើង ហើយ​​សន្ទុះ​នេះនឹង​ពិត​ជា​ធ្វើ​ឲ្យ​គណបក្ស​ភ្លើង​ទៀន​ទទួល​បានជោគ​ជ័យ​សម្រាប់​ការ​បោះ​ឆ្នោត​ថ្ងៃទី​២៣ ខែកក្កដា ខាង​មុខ​»។ លោក​បន្ថែម​ថា៖ «យើង​យល់​ថា [គណបក្សភ្លើងទៀន] ត្រូវ​មាន​ការ​ដឹក​នាំ​ជា​ក្រុម មិន​មែន​ដោយ​បុគ្គល ហើយ​នេះ​ដើម្បី​ធានាពី​ប្រសិទ្ធភាព​របស់​គណបក្ស ក៏​ដូច​ជា​តម្រូវ​ការកម្លាំង និង​គំនិត​ច្រើន»។​

គណបក្ស​មិន​ទាន់​បាន​ប្រកាស​ពីបេក្ខភាព​នាយក​រដ្ឋមន្ត្រី​នៅឡើយទេ​គិត​មក​ដល់ពេល​នេះ ដោយថា​ការ​សម្រេច​ចិត្ត​នឹង​ធ្វើ​ឡើង​ពីរខែមុន​ការ​បោះ​ឆ្នោត​។​

លោក​​ សុន ឆ័យ ឲ្យ​ដឹង​ដែរថា លោក​រំពឹង​ថា​ប្រ​ជា​ពល​រដ្ឋ​​នឹង​បោះ​ឆ្នោត​ឲ្យ​គណបក្ស​នេះ​មួយទ្វេ​ជា​បី​សម្រាប់​ការ​បោះ​ឆ្នោតជាតិ បើ​ធៀប​នឹង​ការ​បោះ​ឆ្នោត​ឃុំ សង្កាត់​កន្លង​មក ដែល​កាល​នោះ​មាន​អ្នក​បោះ​ឆ្នោត​ឲ្យ​ជាង​១,៦​លាន​នាក់។​

លោក​បន្តថា៖ «យើង​មាន​ពេល​ច្រើន​សម្រាប់​រៀប​ចំខ្លួន បើធៀប​ទៅ​នឹង​ការ​បោះ​ឆ្នោត​ឃុំ​សង្កាត់​កន្លង​មក​»។ លោក​លើក​ឡើង​ទៀត​ថា៖​ «​យើង​មាន​ពេល​វេលា​ច្រើន​សម្រាប់​រៀបចំ​អ្នក​សង្កេត​ការ​នៅ​តាម​បណ្ឌលបោះ​ឆ្នោត និង​យើង​មាន​ពេល​សម្រាប់​ផ្សព្វ​ផ្សាយ​សារ​នយោបាយ​ទៅ​ដល់​ថ្នាក់​មូល​ដ្ឋាន»។​

អ្នកគាំទ្រគណបក្សភ្លើងទៀន​មក​ចូល​រួម​សមាជ​ក្នុង​ខេត្ត​សៀម​រាប​កាលពី​ថ្ងៃទី​១១ ខែកុម្ភៈ ឆ្នាំ​២០២៣។ ខេមបូចា/ស៊ន សារ៉ាត
អ្នកគាំទ្រគណបក្សភ្លើងទៀន​មក​ចូល​រួម​សមាជ​ក្នុង​ខេត្ត​សៀម​រាប​កាលពី​ថ្ងៃទី​១១ ខែកុម្ភៈ ឆ្នាំ​២០២៣។ ខេមបូចា/ស៊ន សារ៉ាត

លោក សុខ គឹមសេង អគ្គលេខាធិការរង​គណបក្ស​ភ្លើងទៀន​លើក​ឡើង​ថាគណបក្ស​ពឹង​ផ្អែក​លើ​សកម្មជន​នៅ​តាម​មូល​ដ្ឋាន ដើម្បី​ផ្សព្វ​ផ្សាយសារនយោបាយ​ ហើយ​នឹង​បន្ត​ធ្វើ​ក្នុង​ដំណើរ​ការបោះ​ឆ្នោត។​

អ្នកនាំពាក្យ​គណបក្ស​ប្រជា​ជន​កម្ពុជា លោក សុខ ឥសាន មាន​ប្រសាសន៍​ថា​លោក​មិន​មាន​ការ​ភ្ញាក់​ផ្អើល​ជាមួយ​នឹង​គោល​នយោបាយ​របស់​គណបក្ស​ភ្លើងទៀន​នោះទេ ដោយថា​គណបក្ស​កាន់​អំណាច​បាន​ដំឡើង​ប្រាក់ឈ្នួល​សម្រាប់​កម្មករ និង​មន្ត្រី​រាជការ​រួច​ទៅ​ហើយ​។​

លោក​លើក​ឡើង​ថា៖ «គណបក្ស​ប្រឆាំងបាន​សន្យាដដែលបែបនេះ​តាំង​ពីអតីតកាល ហើយ​គណបក្ស​ប្រជា​ជន​មិន​បារម្ភនោះទេអំពីគោលនយោបាយ​ប្រកួត​ប្រជែង​នេះ»។ លោក​ថា៖ «[ការអនុវត្តគោលនយោបាយ]មិន​មែន​ងាយ​ស្រួល​​ដូច​ការ​និយាយទេ»។

លោក ឈឿង​ សារ៉ន វ័យ​៦១​ឆ្នាំ អ្នក​ដឹក​នាំ​គណបក្ស​ភ្លើងទៀន​ប្រចាំ​ខេត្ត​បាត់​ដំបង មានប្រសាសន៍ថា លោកបាន​ចូល​រួម​ជាមួយ​គណបក្ស​ប្រឆាំង​ពីរទសវត្ស​​មក​ហើយ និង​នៅ​តែ​បន្ត​តស៊ូ​ដើម្បី​ការ​ផ្លាស់​ប្ដូរ​។​

លោក​បន្ត​ថា៖ «​ខ្ញុំ​ក៏​បារម្ភ​ផង​ដែរ​អំពី​ការធ្វើទុក្ខបុកម្នេញ​ផ្នែក​នយោបាយ ដែល​វា​បាន​កើត​ឡើង​មក​លើ​រូប​ខ្ញុំ​ជាង​២០​ឆ្នាំ​មក​ហើយ»។ លោក​បន្ត​ថា៖ «ប៉ុន្តែ​ខ្ញុំ​នឹង​មិន​បោះ​បង់​ទេ ពីព្រោះ​ខ្ញុំ​បានតស៊ូ​មក​ជា​យូរ​ឆ្នាំ​ហើយជាមួយ​គណបក្ស​ប្រឆាំង​ដើម្បី​លទ្ធប្រជាធិបតេយ្យ»។​

(រាប់ពីឆ្វេង)សហអនុប្រធានគណបក្ស​ភ្លើងទៀន​លោក សុខ ហាច ប្រធានគណបក្ស​លោក ទាវ វណ្ណុល សហនុប្រធានលោក សុន ឆ័យ និង​លោក រ៉ុង ឈុន កាន់​ដៃគ្នា​ក្នុងពេល​សមាជ​នៅ​ខេត្ត​សៀម​រាប ថ្ងៃទី១១ ខែកុម្ភៈ ឆ្នាំ​២០២៣។ ខេមបូចា/ ស៊ន សារ៉ាត

ប្រែសម្រួលពីអត្ថបទភាសាអង់គ្លេស៖ Candlelight Party Congress Unveils Platform Ahead of National Elections

919 views

ព័ត៌មានទាក់ទង

ព័ត៌មានថ្មីៗ

អត្ថបទពេញនិយម