សាលាឧទ្ធរណ៍ភ្នំពេញ បានសម្រេចតម្កល់សាលក្រមសាលាដំបូងរាជធានីភ្នំពេញ ដែលបានផ្តន្ទាទោស លោក រ៉ុង ឈុន ចំនួន៤ឆ្នាំ ពីបទញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម និងដកហូតសិទ្ធិនយោបាយជាអចិន្រ្តៃយ៍ កាលពីឆ្នាំមុន ខណៈមេធាវីរបស់លោកបានសរសេរលិខិតស្នើសុំពន្យារពេលសវនាការ តែត្រូវបានតុលាការបដិសេធ។ យោងតាមអង្គការ លីកាដូ។
ការតម្កល់ការផ្តន្ទាទោសនេះ ធ្វើឡើងជុំវិញការចោទប្រកាន់ថា លោក រ៉ុង ឈុន បានបញ្ចេញមតិ ទាក់ទងនឹងការបោកប្រាស់តាមប្រព័ន្ធអ៊ីនធឺណិតនៅកម្ពុជា និងបញ្ហាព្រំដែន កម្ពុជា-វៀតណាម។ សូមបញ្ជាក់ថា លោក រ៉ុង ឈុន និងមេធាវីរបស់លោក មិនមានវត្តមានក្នុងសវនាការនារសៀលថ្ងៃទី៣១ ខែមីនានោះទេ។
លោក រ៉ុង ឈុន ដែលជាសកម្មជនសិទ្ធិការងារ និងជាទីប្រឹក្សាគណបក្សកម្លាំងជាតិ ធ្លាប់ត្រូវបានតុលាការផ្តន្ទាទោសពីបទញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម កាលពីឆ្នាំ២០២១ និងធ្លាប់ត្រូវបានជាប់ពន្ធនាគារអស់រយៈពេល១៥ខែផងដែរ ។ ការផ្តន្ទាទោសជាលើកទីពីរ ចំពោះបទចោទ ញុះញង់ ដដែលនេះ ត្រូវបានធ្វើឡើង នៅថ្ងៃទី៥ ខែឧសភា ឆ្នាំ២០២៥ ហើយសាលាដំបូងរាជធានីភ្នំពេញ បានសម្រេចផ្តន្ទាទោសលោក រ៉ុង ឈុន ដោយដាក់ទោសពន្ធនាគាររយៈពេល៤ឆ្នាំ និងពិន័យជាប្រាក់ចំនួន៤លានរៀល (ប្រហែល ១ ០០០ដុល្លារអាមេរិក) និងដកហូតសិទ្ធិបោះឆ្នោត និងឈរឈ្មោះបោះឆ្នោតរបស់លោក ជាអចិន្ត្រៃយ៍៕
