សមាគមសម្ព័ន្ធអ្នកសារព័ត៌មានកម្ពុជា

សង្គមស៊ីវិលរិះគន់អាជ្ញាធរដែលប្រើអំពើហិង្សា និងបៀតបៀនរាងកាយស្រី្តកូដករណាហ្គាវើលដ៍

កញ្ញា ឈឹម ស៊ីថរ ប្រធានសហជីពទ្រទ្រង់សិទ្ធិការងារបុគ្គលិកកម្មករខែ្មរ នៃក្រុមហ៊ុនណាហ្គាវើលដ៍ ត្រូវបានឃាត់ខ្លួននៅក្បែរស្ថានទូតអូស្ត្រាលី ក្នុងរាជធានីភ្នំពេញ ខណៈដែលកញ្ញាបានចូលរួមធ្វើកូដកម្មទាមទារឲ្យក្រុមហ៊ុនដោះស្រាយវិវាទការងារ។ រូបថតនៅថ្ងៃទី៤ ខែមករា ឆ្នាំ២០២២។ ខេមបូចា/ ព្រីង សំរាំង
កញ្ញា ឈឹម ស៊ីថរ ប្រធានសហជីពទ្រទ្រង់សិទ្ធិការងារបុគ្គលិកកម្មករខែ្មរ នៃក្រុមហ៊ុនណាហ្គាវើលដ៍ ត្រូវបានឃាត់ខ្លួននៅក្បែរស្ថានទូតអូស្ត្រាលី ក្នុងរាជធានីភ្នំពេញ ខណៈដែលកញ្ញាបានចូលរួមធ្វើកូដកម្មទាមទារឲ្យក្រុមហ៊ុនដោះស្រាយវិវាទការងារ។ រូបថតនៅថ្ងៃទី៤ ខែមករា ឆ្នាំ២០២២។ ខេមបូចា/ ព្រីង សំរាំង

សង្គមស៊ីវិលដែលធ្វើការលើសិទ្ធិមនុស្ស និងសហជីព រិះគន់អាជ្ញាធរដែលបាន​ប្រើអំពើ​ហិង្សា និងបៀតបៀនផ្លូវភេទលើកូដករជាស្ត្រី ដែលបានចេញ​ធ្វើ​កូដកម្ម​ទាម​ទារសិទ្ធិការងារពីក្រុមហ៊ុនណាហ្គាវើលដ៍។

បើតាមសេចក្ដីថ្លែងការណ៍របស់អង្គការសង្គមស៊ីវិល នៅថ្ងៃទី២៤ ខែកុម្ភៈ បានបង្ហាញ​នូវការ​សោកស្តាយចំពោះអាជ្ញាធរ ដែលបានប្រើអំពើហិង្សា និងទង្វើបៀតបៀន​ផ្លូវភេទទៅលើ​កូដករស្ត្រីដែលបង្កឡើងដោយមន្ត្រីរដ្ឋាភិបាល។

ក្រុមសង្គមស៊ីវិល បានលើកឡើងយ៉ាងដូច្នេះថា៖ «រដ្ឋាភិបាលគួរយកចិត្តទុកដាក់ និងពង្រឹង​ក្រមសីលធម៌វិជ្ជាជីវៈរបស់មន្ត្រីអាជ្ញាធរ ដើម្បីរួមគ្នា​លុបបំបាត់អំពើហិង្សា និងការរើសអើង​លើស្ត្រីភេទនៅកម្ពុជា និងលើកកម្ពស់សិទ្ធិសេរីភាពរបស់កម្មករនិយោជិតស្រ្តី ដែលកន្លង​មកបានដើរតួនាទីយ៉ាងសំខាន់ ដែលជាដង្ហើមសេដ្ឋកិច្ចជាតិ និងសង្គមគ្រួសារ»។

សេចក្ដីថ្លែងការណ៍ដដែល បានបញ្ជាក់ឱ្យដឹងទៀតថា ក្រុមកូដករភាគច្រើនជាស្ត្រី បានទទួល​រងនូវអំពើហិង្សា ការចាប់ដាក់ពន្ធនាគារ និងការអនុវត្តវិធានការកូវីដ១៩ ដោយមិនត្រឹមត្រូវ ក្នុងការឆ្លើយតបទៅនឹងការធ្វើកូដកម្មដោយសន្តិវិធីរបស់ពួកគេ ចាប់តាំងពីខែធ្នូ ឆ្នាំ២០២១។

កញ្ញា អ៊ុក សុភ័ក្រម៉ូលីកា ជាបុគ្គលិកណាហ្គាវើលដ៍ តួនាទីជាអ្នកគ្រប់គ្រងបេឡា​ជាន់ខ្ពស់​រយៈពេល១៣ឆ្នាំ និងជាកូដករមួយរូបបានឱ្យដឹងថា ចំពោះការបៀតបៀនមកលើស្រ្តីដែលជា​កូដករ គឺជាចេតនាក្នុងការគំរាមកំហែងមកលើក្រុមកូដករស្រ្តីផ្សេងទៀត។

កញ្ញា សុភ័ក្រម៉ូលីកា អះអាងថា៖ «អាជ្ញាធរយកដៃចាប់ដោះកូដករពេញៗដៃ គ្មានអៀនខ្មាស់ ហើយអ្នកដែលបំពានមកលើស្ត្រីកូដករ គាត់ជាមន្ត្រីស្លៀកពាក់ឯកសណ្ឋាន វាធ្វើអោយ​ប៉ះពាល់មុខមាត់ដល់មន្ត្រីផ្សេងទៀត ក៏ដូចជាស្ថាប័នផងដែរ ហើយនេះជាទង្វើអសីលធម៌»។

កញ្ញា សុភ័ក្រម៉ូលីកា បញ្ចាក់ថា ទោះបីជាមានការរារាំង និងចាប់កូដករទៅចត្តាឡីស័ក​ជា​បន្ត​បន្ទាប់​ក៏ដោយ ក៏ក្រុមកូដករនៅតែបន្តចេញធ្វើកូដកម្មរហូតទាល់តែមាន​ដំណោះ​ស្រាយ។

កូដកររូបនេះប្រាប់ថា៖ «បើទោះជាខាងសាលារាជធានីភ្នំពេញ ព្យាយាមដាក់បន្ទុកមក​លើ​ក្រុមកូដករយ៉ាងណាក៏ដោយ ពួកយើងនៅតែបន្តធ្វើកូដកម្ម ព្រោះពួកយើងបាន​ឃើញ​ទាំង​អស់គ្នាហើយថា ខាងសាលារាជធានីភ្នំពេញ ឈរនៅខាងក្រុមហ៊ុន»។ 

កញ្ញា សុភ័ក្រម៉ូលីកា បន្ថែមទៀតថា បើទោះជាខាងក្រុមកូដករបានខំប្រឹងអនុវត្ត​នៅវិធានការ​របស់ក្រសួងសុខាភិបាលក្ដី  ក៏ក្រុមកូដករនៅតែជាអ្នកខុសដដែល។

ជុំវិញបញ្ហានេះ លោក កើត ឆែ អភិបាលរងរាជធានីភ្នំពេញ បានបដិសេធមិនឆ្លើយតបជាមួយ​អ្នកសារព័ត៌មានអំពីការបៀតបៀនរបស់អាជ្ញាធរទៅលើកូដករស្រ្តីឡើយ។

លោក ឆែ បានលើកឡើងថា៖ «ចាំមើលសេចក្ដីប្រកាសព័ត៌មានរបស់សាលាក្រុងចុះណា អាស្រី ព្រោះកុំឱ្យនិយាយខុសពីសេចក្ដីប្រកាសព័ត៌មាន អ្នកនាំពាក្យកំពុងប្រកាសព័ត៌មាន​ហ្នឹងហើយណា៎ »។

បុគ្គលិកនៃក្រុមហ៊ុនណាហ្កាវើលដ៍ បានបន្តធ្វើកូដកម្មទាមទារដំណោះស្រាយ​ពី​ក្រុមហ៊ុន នៅមុខស្ថានទូតអូស្ត្រាលី ក្នុងរាជធានីភ្នំពេញ ជាទីតាំងដែលពួកគេត្រូវបាន​រារាំង​ដោយ​សមត្ថកិច្ច​ ខណៈប្រធានសហជីព កញ្ញា ឈឹម ស៊ីថរ ត្រូវបានចាប់ខ្លួន។ រូបថតថ្ងៃទី៤ ខែមករា ឆ្នាំ២០២២។ ខេមបូចា/ព្រីង សំរាំង

ចំណែកលោក សាន សុខសីហា អ្នក​នាំ​ពាក្យ​ស្នងការ​ដ្ឋាន​នគរបាល​រាជធានី​ភ្នំពេញ​ ពុំអាច​ទាក់ទងដើម្បីបំភ្លឺជុំវិញបញ្ហានេះបានទេ។ 

តែយ៉ាងណាមិញ តាមរយៈសេចក្ដីប្រកាសរបស់សាលាក្រុងកាលពីថ្ងៃទី២៣ ខែកុម្ភៈ កន្លង​ទៅ បានឱ្យដឹងថា សកម្មភាពក្រុមកូដករ គ្រាន់តែជាការសម្ដែង ដើម្បីទាមទារចំណាប់​អារម្មណ៍ពីមហាជន តាមរយៈការរៀបចំរបស់មនុស្សមួយក្រុមតូច។

សេចក្ដីថ្លែងការលើកឡើងថា៖​ «ក្នុងការឆ្លៀតឱកាសក្រោមលេសធ្វើកូដកម្មដោះស្រាយវិវាទ​ការងារ មនុស្សមួយក្រុមតូចបាន សន្សំចិត្ត ណែនាំឱ្យក្រុមបាតុករបង្កើត​ឈុតឆាកល្ខោន​តាមការគ្រោងទុក ហើយថតរូបភាពសម្រាប់បង្ហោះតាមបណ្តាញ សង្គមដើម្បី​បំភាន់​សាធារណមតិ សម្តែងដូចជាកម្សត់ វេទនា ដើម្បីឱ្យមហាជនយល់ច្រឡំថា អាជ្ញាធរ​មាន​សមត្ថកិច្ចធ្វើបាប កៀបសង្កត់ និងធ្វើទុក្ខបុកម្នេញពួកគាត់»។

ទន្ទឹមនឹងនេះ សាលាក្រុងភ្នំពេញ នឹងនៅតែបន្តចាត់វិធានការតាមច្បាប់ និងពិន័យជាប្រាក់​ដល់កូដករ ប្រសិនបើពួកគេនៅតែបន្តសកម្មភាពជួបជុំខុសច្បាប់ ក្រោមហេតុផលការពារ​ការរីករាលដាលឆ្លងនៃមេរោគកូវីដ និងរក្សាសណ្ដាប់ធ្នាប់សាធារណៈ សន្តិសុខ ជាដើម។

បើតាមលោកស្រី អ៊ូ ទេពផល្លីន ប្រធានសហព័ន្ធសហជីពកម្មករចំណីអាហារ និងសេវាកម្ម បានលើកឡើងថា ភាគីសាលាក្រុងគួរតែពិនិត្យមើលឡើងវិញ ចំពោះការអនុវត្តវិធានការ ចាប់កូដករទៅចត្តាឡីស័ក ដូចជាការប្រើពាក្យសម្ដី ការបៀតបៀនរាងកាយស្រ្តីកូដករ ដែលបង្ហាញថាការអនុវត្តសិទ្ធិនៅកម្ពុជាដើរថយក្រោយ។

លោកស្រីបញ្ជាក់ថា៖ «អាជ្ញាធរគួរពិនិត្យឡើងវិញ [ដូចជា]ការប្រើពាក្យសម្ដី និងចាប់​ដើម​ទ្រូងស្រ្តី ហើយអ្នកប្រព្រឹត្តដោយមិនញញើត និងក្រែងរអាចំពោះផ្លូវច្បាប់ ហើយអាជ្ញាធរ​មិនគួរអត់ឱនឱ្យអ្នកដែលប្រព្រឹត្តបែបនេះទេ»។

ជាមួយគ្នានេះដែរ អង្គលីកាដូ ក៏បានលើកឡើងដែរថា អាជ្ញាធរ​ត្រូវ​បញ្ឈប់​ការ​ធ្វើទុក្ខបុកម្នេញ​ទៅលើ​សមាជិក​សហជីព​ណា​ហ្គាវើ​ល​ដ៍​ជា​ស្ត្រី​ ​ដែល​កំពុង​ធ្វើ​កូដកម្ម​ដោយ​សន្តិវិធី​។

អង្គកាលីកាដូបានលើកឡើងថា៖ «​កាលពី​ថ្ងៃ​ទី​២​២​ ​ខែកុម្ភៈ​ ​ឆ្នាំ​២​០​២​២​ ​អាជ្ញាធរ​បាន​ចាប់​រុញ​ ​ទាញ​ ​និង​សែង​ ​កូដករ​អហិង្សា​ទាំងនោះ​ ​សមត្ថកិច្ច​ជា​បុរស​ម្នាក់​ ​បាន​ចាប់​និង​ច្របាច់​ដោះ​របស់​ស្ត្រី​ម្នាក់​ ​ខណៈ​ពេល​ដែល​ ​នាង​ត្រូវ​បាន​បង្ខំ​ឱ្យ​ចូល​ទៅ​ក្នុង​រថយន្តក្រុង»​ ​។

គួរជម្រាបជូនថា កាលពីថ្ងៃទី១៥ ខែកុម្ភៈ សាលារាជធានីភ្នំពេញបានចេញសេចក្ដីប្រកាស​ព្រមានថានឹងចាត់វិធានការច្បាប់ ហាមមិនឱ្យកូដករណាហ្គាវើលដ៍​ចេញតវ៉ាខុសច្បាប់នៅ​ទីតាំងក្បែរក្រុមហ៊ុនណាហ្គាវើលដ៍ ស្ថិតនៅក្នុងសង្កាត់ទន្លេបាសាក់ ខណ្ឌចំការមនទៀត​ឡើយ ។

ការប្រកាសយ៉ាងដូច្នេះ សាលាក្រុងពន្យល់ថា គឺដើម្បីទប់ស្កាត់ការឆ្លងរាលដាលជំងឺកូវីដ-១៩ បំប្លែងខ្លួនថ្មី ប្រភេទអូមីក្រុង ចូលក្នុងសហគមន៍កាន់តែច្រើនឡើងៗ ក៏ដូចជាធានាបាន​នូវ​សន្តិសុខ សណ្តាប់ធ្នាប់ របៀបរៀបរយសាធារណៈ រដ្ឋបាលរាជធានីភ្នំពេញ។

តែយ៉ាងណាមិញ អ្នករាយការណ៍ពិសេសទទួលបន្ទុកផ្នែកសិទ្ធមនុស្ស បានលើកឡើងថា អាជ្ញាធរ ហាក់ដូចជាប្រឹងប្រែងរារាំងសកម្មភាពការងារដោយសន្តិវិធី និងស្របច្បាប់ដោយ​សំអាងលើវិធានការសុខភាពសាធារណៈ ។

អ្នកជំនាញអះអាងថា៖ «មានភាពមិនស៊ីសង្វាក់គ្នាជារួម និងកង្វះតម្លាភាពក្នុងវិធានការ​គ្រប់គ្រងជំងឺកូវីដ-១៩របស់កម្ពុជា»៕

1,396 views

ព័ត៌មានទាក់ទង

ព័ត៌មានថ្មី

អត្ថបទពេញនិយម