កម្មករសំណង់ចំនួន៤នាក់ស្លាប់និងម្នាក់របួសធ្ងន់បញ្ជូនមកព្យាបាលនៅមន្ទីរពេទ្យឯរាជធានីភ្នំពេញ បន្ទាប់ពីជួបគ្រោះថ្នាក់ដាច់ខ្សែកាបយោងជណ្តើរយន្តពីកម្ពស់១៥ជាន់ នៅការដ្ឋានកំពុងសាងសង់មួយកន្លែងក្នុងក្រុងព្រះសីហនុកាលពីថ្ងៃសុក្រ។
ហេតុការនេះកើតឡើងនៅព្រឹកថ្ងៃទី២០ ខែឧសភា ឆ្នាំ២០២២ ក្នុងការដ្ឋានមួយកន្លែងដែលកំពុងសាងសង់ ស្ថិតក្នុងភូមិ២ សង្កាត់លេខ៣ ក្រុងព្រះសីហនុ ខេត្តព្រះសីហនុ។
លោក ជួន ណារិន្ទ ស្នងការនគរបាលខេត្តព្រះសីហនុ មានប្រសាសន៍ថា អគារដែលសាងសង់បានកម្ពស់១៩ជាន់នេះ មានម្ចាស់ជាជនជាតិខ្មែរ ដោយគ្រោងសាងសង់ឡើងដើម្បីធ្វើជាខុនដូ ដែលមានកម្ពស់២១ជាន់។
លោកបន្តថា អាជ្ញាធរកំពុងស្វែងរកមេការសាងសង់ និងម្ចាស់អគារ ខណៈអគារនេះបានផ្អាកដំណើរការសាងសង់នៅឆ្នាំ២០១៩ និងបានបើកដំណើរការឡើងវិញនៅឆ្នាំ២០២០។
លោកប្រាប់ថា៖«យើងសួរបានមេការម្នាក់(អ្នកមើលការនៅអគារ)អ្នកទទួលខុសត្រូវនេះ ឥឡូវយើងកំពុងបន្តរកមេការអគារ(ម្ចាស់អគារ)និងកំពុងរកមេការសាងសង់»។
លោក តី វិសាល អធិការនគរបាលក្រុងព្រះសីហនុ បានមានប្រសាសន៍ថា កម្មករខ្មែរដែលរងគ្រោះចំនួន៥នាក់ ក្នុងនោះកម្មករប្រុស៣នាក់បានស្លាប់ភ្លាមៗនៅកន្លែងកើតហេតុ និងស្រីម្នាក់ស្លាប់អំឡុងពេលបញ្ជូនដល់មន្ទីរពេទ្យបង្អែក ខណៈកម្មករប្រុសម្នាក់ទៀតដែលរងរបួសធ្ងន់កំពុងបញ្ជូនមកព្យាបាលនៅឯរាជធានីភ្នំពេញ។
លោកបន្តថា ហេតុដែលនាំឱ្យដាច់ខ្សែនេះ បណ្ដាលមកពីបញ្ហាបច្ចេកទេសក្នុងការដំឡើងខ្សែកាបយោងជណ្តើរយន្តរបស់អ្នកគ្រប់គ្រងការសាងសង់។
លោកឱ្យដឹងថា៖«ពាក់ព័ន្ធនឹងការធ្វើកោសលវិច្ច័យទៅវាដាច់ខ្សែកាប។ ចឹងខាងកម្មករគាត់ដឹងតែធ្វើទេ អ្នកគ្រប់គ្រងគាត់ខាងបច្ចេកទេសខាងដំឡើងប្រដាប់យោងអីឱ្យគាត់»។
លោក យ៉ូវ ខេមរា ប្រធានមន្ទីរការងារនិងបណ្ដុះបណ្ដាលវិជ្ជាជីវៈខេត្តព្រះសីហនុ មានប្រសាសន៍ថា កម្មករដែលរងគ្រោះទាំងនោះពុំមានប្រើប្រាស់បេឡាជាតិសន្តិសុខសង្គម(បបស)ឡើយ។
លោករៀបរាប់ថា៖«កាលណាអត់មាន បបស ត្រូវម្ចាស់ការដ្ឋានគាត់អ្នករ៉ាប់រងទាំងស្រុងតាមផ្លូវច្បាប់ ក្នុងការទូទាត់សំណង»។
បើតាមប្រធានមន្ទីរការងាររូបនេះ បានអះអាងថា ពុំមានតួលេខណាមួយច្បាស់លាស់អំពីចំនួនកម្មករសំណង់ដែលកំពុងធ្វើការនៅខេត្តព្រះសីហនុ ដោយសារតែជាវិស័យសេដ្ឋកិច្ចក្រៅប្រព័ន្ធ។
លោក ខេមរា បានឱ្យដឹងទៀតថា នៅក្នុងឆ្នាំ២០២២ ខេត្តព្រះសីហនុ មានចំនួន២ករណីគ្រោះថ្នាក់នៅឯការដ្ឋានសំណង់ គឺទី១ ការឆក់ខ្សែភ្លើងបណ្ដាលឱ្យមនុស្សស្លាប់ម្នាក់ និងលើកទី២ គឺការដាច់ខ្សែកាបយោងជណ្តើរយន្តនេះតែម្ដង។
លោក សួ ឆ្លូញ អនុប្រធានសហជីពកម្មករសំណង់និងព្រៃឈើកម្ពុជា មានប្រសាសន៍ថា ការដាច់ខ្សែកាបយោងជណ្តើរយន្តពីកម្ពស់១៥ជាន់នេះ ជាការឆ្លុះបញ្ចាំងពីភាពចន្លោះប្រហោងរបស់អាជ្ញាធរលើការអនុវត្តការងារខ្លួន។
លោក ឆ្លូញ ជំរុញឱ្យអាជ្ញាធរពាក់ព័ន្ធត្រូវពង្រឹងលើមន្ត្រីអធិការកិច្ច ក្នុងការចុះពិនិត្យនិងតាមដានសុវត្ថិភាពរបស់កម្មករគ្រប់ការដ្ឋានសាងសង់ទាំងអស់។
លោកនិយាយថា៖«ការដាច់ខ្សែរយោងនេះ ខ្ញុំយល់ថាជាកង្វះការយកចិត្តទុកដាក់មួយទៅលើការត្រួតពិនិត្យប្រព័ន្ធសុវត្ថិភាព ពីព្រោះកម្មករមានតួនាទីក្នុងការបំពេញការងារ។ តែអ្វីដែលសំខាន់ក្រសួងនិងក្រុមហ៊ុនទាំងអស់នោះត្រូវ បំពេញបន្ថែមនូវគណៈកម្មការសុខភាពសុវត្ថិភាព ក៏ដូចជាអ្នកដែលត្រូវចុះអធិការកិច្ចទៅលើប្រព័ន្ធសុវត្ថិភាពភាពរបស់កម្មករ»។
សង្គមស៊ីវិលធ្វើការលើវិស័យការងារ បានរកឃើញថា កម្មករក្នុងវិស័យសំណង់នៅកម្ពុជាជាង២០ម៉ឺននាក់កំពុងប្រឈមគ្រោះថ្នាក់ការងារក្នុងអត្រាខ្ពស់បំផុត បើធៀបនឹងវិស័យការងារផ្សេងទៀត ខណៈពួកគេទទួលបានការផ្តល់កិច្ចការពារផ្នែកសុខភាពសុវត្ថិភាព និងការធានារ៉ាប់រងគ្រោះថ្នាក់ការងារក្នុងកម្រិតមួយទាប។
ប្រភពដដែល ឱ្យដឹងទៀតថា តាមការចុះស្រាវជ្រាវនាចុងឆ្នាំ២០១៧ លើកម្មករសំណង់ជាង១០០០នាក់ បានរកឃើញថា ក្នុងចំណោមពួកគេ១០០នាក់ មាន១៩នាក់ បានជួបគ្រោះថ្នាក់នៅពេលបំពេញការងារ ហើយគ្រោះថ្នាក់នេះ មានដល់ថ្នាក់ស្លាប់ដោយឆក់ខ្សែភ្លើង ឬធ្លាក់ពីលើអគារជាដើម៕