សាលាដំបូងខេត្តឧត្តរមានជ័យ បានចេញដីកាឃុំខ្លូនមន្ត្រីសាលាខេត្តម្នាក់ និងមនុស្សបីនាក់ទៀត កាលថ្ងៃ៧ ខែមករា ឆ្នាំ២០២៥ ពីបទដឹកជញ្ជូន ប្រមូល ធ្វើសន្និធិ ឬប្រមូលសន្និធិផល និងអនុផលធនធានធម្មជាតិដោយគ្មានលិខិតអនុញ្ញាត ដែលប្រព្រឹត្តស្ថិតនៅតំបន់ដែនជម្រកសត្វព្រៃសង្ឃរុក្ខាវ័ន្ត ស្ថិតនៅភូមិបាក់នឹម សង្កាត់សំរោង ក្រុងសំរោង ខេត្តឧត្តរមានជ័យ។
កាលពីថ្ងៃទី៤ ខែមករា អ្នកទាំងបួនត្រូវបានឃាត់ខ្លួនក្រោមបទល្មើសព្រហ្មទណ្ឌដែលមានចែងនិងផ្តន្ទាទោសតាមមាត្រា៨៥០ ចំណុចងនៃក្រមបរិស្ថាន ដោយមានការប្រព្រឹត្តស្ថិតនៅតំបន់ដែនជម្រកសត្វព្រៃសង្ឃរុក្ខាវ័ន្ត ត្រង់ចំណុចផ្លូវបំបែកស្នាក់ការស្រោងស្រឡៅ ស្ថិតនៅភូមិបាក់នឹម សង្កាត់សំរោង ក្រុងសំរោង ខេត្តឧត្តរមានជ័យ។
យោងតាមដីកាបង្គាប់ឱ្យឃុំខ្លួនបានបញ្ចាក់ថា ជនជាប់ចោទមានឈ្មោះ សាល វ៉ាន់សារិទ្ធ មានអាយុ៣៧ឆ្នាំជាមន្ត្រីរាជការនៅសាលាខេត្ត លោក រឹប រ័ត្ន មានអាយុ៤៤ឆ្នាំ លោក ផាន់ រ័ត្ន អាយុ៤២ឆ្នាំ និង លោក ឈាំង ឈឿន មានអាយុ៣៦ឆ្នាំ អ្នកទាំងបីជាកសិករ។
ព្រះតេជគុណមួយអង្គ ដែលចូលរួមការពារព្រៃនៅសហគមន៍សង្ឃរុក្ខាវ័ន្ត សុំមិនបញ្ជេញឈ្មោះដោយព្រួយបារម្ភពីសុវត្ថិភាពផ្ទាល់ខ្លួន បានមានសង្ឃដីកាថា បុគ្គលទាំងបួនខាងលើ បានកាប់និងដឹកប្រមូលឈើប្រណិតដោយគ្មានការអនុញ្ញាត។
ព្រះតេជគុណក៏មានសង្ឃដីកាថា៖ «ថ្ងៃទី៥ អ្នកទាំងបួនប្រគល់ឱ្យមន្ទីរបរិស្ថាន ដែលឃាត់ខ្លួននៅកន្លែងជាក់ស្តែងនៅគោយន្តនិងមនុស្ស នៅវេលាម៉ោង៦ និង១៥នាទី»។
លោក ហេង គឹមហុង ប្រធានប្រត្តិបត្តិសមាគមបណ្តាញយុវជនកម្ពុជា បានថ្លែងថា ទាក់ទងសកម្មភាពល្មើសនិងការប្រព្រឹត្តបទល្មើសនៅក្មុងតំបន់ការពារធម្មជាតិដែលកើតឡើងដោយសារតែការប្រម៉ាញ់ បរបាញ់ និងការកាប់បំផ្លាញព្រៃឈើគួរតែមានការរឹតបន្តឹង។
លោកបានបញ្ចាក់បន្តថា៖ «ជាពិសេសបើសិនជារកឃើញថាមានអំពើវិនាសកម្មធ្ងន់ធ្ងរទៅដល់ធនធានធម្មជាតិ ជីវចម្រុះនិងព្រៃឈើ ជនល្មើសគួរតែទទួលខុសត្រូវចំពោះមុខច្បាប់ ដោយខានពុំបាន នេះជាអ្វីដែលយើងគួរតែគិតនិងជំរុញ»។
លោកបន្តថា នៅពេលការអនុវត្តច្បាប់កាន់តែថមថយក្រុមអ្នកប្រព្រឹត្តបទល្មើសនៅបន្ត។
លោកលើកឡើងថា៖ «ខ្ញុំគិតថាជារឿងត្រឹមត្រូវដែលយើងយកវិធានការច្បាប់មកទប់ស្កាត់ទៅលើសកម្មភាព ជាពិសេសការប្រើវិធានការតុលាការ និងអនុវត្តយន្តការច្បាប់ប្រឆាំងទៅជនទាំងឡាយណាដែលបំផ្លិតបំផ្លាញ ធនធានធម្មជាតិនៅប្រទេសកម្ពុជា»។
លោក ម៉េត មាសភក្តី នាយករងរដ្ឋបាលសាលាខេត្តឧត្តរមានជ័យ សុំមិនផ្តល់ព័ត៌មានដល់អ្នកហត្ថការខាងផ្នែកព័ត៌មាននៃសារព័ត៌មានខេមបូចា ប៉ុន្តែទោះបីជាអ្នកសារព័ត៌មានខេមបូចា បានទាក់ទងលោកតាមតេឡេក្រាម ហើយគាត់នៅតែមិនឆ្លើយតបដដែល។
គម្របព្រៃឈើជាង ៣៥ ០០០ ហិកតាបានបាត់បង់នៅឆ្នាំ២០២២ ទោះបីជាទាបជាងកាលពី ២ឆ្នាំមុនក៏ដោយ ដែលឆ្នាំនីមួយៗមានលើសពី ៤០ ០០០ ហិកតា។
តំបន់ដែលរងផលប៉ះពាល់ខ្លាំងជាងគេទាំង៤នោះមាន ឧទ្យានជាតិបុទុមសាគរ ឧទ្យានជាតិជួរភ្នំក្រវាញកណ្តាល ដែនជម្រកសត្វព្រៃភ្នំឱរ៉ាល់ និងដែនជម្រកសត្វព្រៃបឹងពែរ។
យោងតាមអង្គការឃ្លាំមើលព្រៃឈើពិភពលោក(Global Forest Watch) ក្នុងឆ្នាំ២០២៣ កម្ពុជាបាត់បង់ព្រៃឈើចំនួន ១២១ ០០០ ហិកតា។ ទំហំនៃការបាត់បង់គឺស្មើនឹងតំបន់នៃទីក្រុង Los Angeles ក្នុងសហរដ្ឋអាមេរិក៕