ពលរដ្ឋពីរនាក់រស់នៅក្នុងក្រុងសំរោង ខេត្តឧត្តរមានជ័យ ត្រូវបានផ្តន្ទាទោសដាក់ពន្ធនាគារចំនួន៦ឆ្នាំ កាលពីខែមុន ពាក់ព័ន្ធនឹងការថតរូបស្ពានមួយកន្លែងដែលជាប់ព្រំប្រទល់រវាងខេត្តសៀមរាបនិងខេត្តឧត្តរមានជ័យ ដែលក្រោយមកត្រូវបានយោធាថៃបំផ្ទុះដោយការទម្លាក់គ្រាប់បែក។ យោងតាមការផ្សាយលើហ្វេសប៊ុកផេករបស់អង្គការ លីកាដូនៅថ្ងៃទី៨ ខែមិថុនា ឆ្នាំ២០២៦ ។
អង្គការ លីកាដូ បានបង្ហាញថា សាលាដំបូងខេត្តសៀមរាបបានផ្តន្ទាទោសចំពោះ លោក ម៉ិក ឌៀប អាយុ ៣៣ឆ្នាំ និងលោក ហ៊ុន ហុង អាយុ ៣៦ឆ្នាំ រស់នៅក្នុងក្រុងសំរោង ខេត្តឧត្តរមានជ័យ ត្រូវបានផ្តន្ទាទោសដាក់ពន្ធនាគារចំនួន៦ឆ្នាំ កាលពីថ្ងៃទី១១ ខែឧសភា ឆ្នាំ២០២៦ តាមបញ្ញត្តិមាត្រា ៤៤៦ ពីបទ ប្រមូលផ្តុំព័ត៌មាន ជាអាទិ ដែលអាចធ្វើឱ្យអន្តរាយការការពារជាតិ និងមាត្រា ២៧ ពីបទប៉ុនប៉ងក្នុងបទឧក្រិដ្ឋនៃក្រមព្រហ្មទណ្ឌ ។
អ្នកទាំងពីរត្រូវបានចាប់ខ្លួនកាលពីថ្ងៃទី១២ ខែធ្នូ ឆ្នាំ២០២៥ ចំពោះការថតរូបស្ពានអូរជីក ស្ថិតនៅព្រំប្រទល់ខេត្តសៀមរាប និងឧត្តរមានជ័យ អំឡុងពេលជម្លោះព្រំដែនជាមួយថៃ ។ ពីរទៅបីថ្ងៃក្រោយមក ស្ពាននោះត្រូវបានបំផ្ទុះដោយការទម្លាក់គ្រាប់បែករបស់យោធាថៃ ។
លោក ឌៀប និងលោក ហុង បានប្តឹងឧទ្ធរណ៍កាលពីថ្ងៃទី២៨ ខែឧសភា ឆ្នាំ២០២៦ ហើយអ្នកទាំងពីរកំពុងជាប់ឃុំនៅពន្ធនាគារខេត្តសៀមរាប ។
គួររំឭកថា យោធាថៃបានប្រើប្រាស់យន្តហោះ F-16 ទម្លាក់គ្រាប់បែកលើស្ពានអូរជីក ស្ថិតក្នុងភូមិសាស្ត្ររវាងស្រុកចុងកាល់ ខេត្តឧត្តរមានជ័យ និងស្រុកស្រីស្នំ ខេត្តសៀមរាប ដែលមានចម្ងាយប្រមាណ ១០០គីឡូម៉ែត្រ ពីព្រំដែនកម្ពុជា-ថៃ នៅវេលាម៉ោងប្រមាណ១១យប់ ថ្ងៃទី១៩ ខែធ្នូ ឆ្នាំ២០២៥ ម្តងទៀត ៕
