បេក្ខជននាយករដ្ឋមន្ត្រីបក្សប្រជាធិបតេយ្យមូលដ្ឋាន លោក យ៉ង សាំងកុមារ សុំចូលគណបក្សប្រជាជនកម្ពុជា

បេក្ខជននាយករដ្ឋមន្ត្រីគណបក្សប្រជាធិបតេយ្យមូលដ្ឋានលោក យ៉ង សាំងកុមារ និង​អ្នក​នាំ​ពាក្យ​គណបក្សលោក ឡឹក សុធារ បានសុំចូលគណបក្ស​ប្រជាជនកម្ពុជា។

ថ្លែងតាមរយៈកិច្ចសម្ភាសន៍ដោយផ្ទាល់នៅក្នុងបរិវេណស្នាក់ការកណ្ដាលគណបក្ស​ប្រជាធិបតេយ្យមូលដ្ឋាន លោកបណ្ឌិត យ៉ង សាំងកុមារ មានប្រសាសន៍ថា លោកបាន​ដាក់ពាក្យចូលគណបក្សប្រជាជនកម្ពុជាគឺដើម្បីចូលរួមជំរុញវិស័យស្រូវអង្ករដែលកំពុងតែជួបបញ្ហា។

លោក សាំងកុមារ ថ្លែងថា៖«កាលពីប៉ុន្មានថ្ងៃមុនខ្ញុំជួបរដ្ឋមន្ត្រីក្រសួងកសិកម្ម ខ្ញុំបាន​បង្ហាញ​គម្រោងរបស់ខ្ញុំជូនរដ្ឋមន្ត្រីកសិកម្ម(លោក ឌិត ទីណា) ។ គាត់ក៏ប្រាប់វិញ​ថាឱ្យ​ខ្ញុំ​មក​ធ្វើគម្រោងនេះ ដោយផ្ទាល់តែម្ដងទៅ ខ្ញុំក៏ឆ្លើយថាព្រមទើបឱ្យគេរៀបចំលិខិតនេះ»។

លោក សាំងកុមារ អះអាងថា លោកបានឱ្យសហការីម្នាក់រៀបចំលិខិតសុំចូលជាមួយ​គណបក្សប្រជាជនកម្ពុជា ដើម្បីបានអនុវត្តគម្រោងការជួយផ្នែកកសិកម្ម។ លោកថា ខ្លួន​នឹងត្រៀមប្រាប់សមាជិកបក្ស GDP សិន មុនប្រកាសជាសាធារណៈ ប៉ុន្តែអ្វីៗមិនដូច​ការ​គ្រោងទុកឡើយព្រោះខុទ្ទកាល័យនាយករដ្ឋមន្ត្រីបានផ្ដល់លិខិតនោះទៅសារព័ត៌មាន​ដើម្បីឱ្យចុះផ្សាយនៅថ្ងៃទី២៧ ខែវិច្ឆិកា នោះតែម្ដង។

លោក សាំងកុមារ បន្ថែមថា៖ «ខ្ញុំនិងលោកសុធា(ឡឹក សុធារ)មានពីរនាក់ហ្នឹងទៅ គឺ​ទៅ​ដើម្បីបានគ្នា។ ខ្ញុំគ្មានបំណងចង់ធ្វើធំអីទេ ពួកយើងគិតថា​នឹងឱ្យគេប្រកាស​នៅថ្ងៃ​ទី២​ធ្នូ តែស្រាប់តែកាសែតចេញថ្ងៃនេះតែម្ដង។ អីចឹងនៅក្នុងបក្សនេះគេគ្រប់គ្នា ភ្ញាក់​ផ្អើល»។

ខុទ្ទកាល័យនាយករដ្ឋមន្ត្រីនៅថ្ងៃទី២៧ ខែវិច្ឆិកា បានបញ្ចេញលិខិតសុំចូលបក្ស CPP របស់​លោក យ៉ង សាំងកុមារ និងលោក ឡឹក សុធារ ទៅឱ្យសា្ថប័នសារព័ត៌មាន​ហ្វ្រែសញូយ៍។ ក្នុងលិខិតលោកបណ្ឌិត យ៉ង សាំង កុមារ បញ្ជាក់ថា លោកស្នើសុំចូល​រួមជីវភាពនយោបាយជាមួយគណបក្សប្រជាជនកម្ពុជា ដោយសារពេញចិត្តនឹង​គោល​នយោបាយ​លើវិស័យកសិកម្មរបស់លោកនាយករដ្ឋមន្ត្រី ហ៊ុន សែន។

លោក សាំងកុមារ លើកឡើងថា៖ «ខ្ញុំបាទមានទំនុកចិត្តថា ការដាក់ចេញនូវគោល​នយោបាយ​ប្រាកដនិយមថ្មីនេះ គឺដូចគ្នាទៅនឹងចំណេះដឹង និងជំនាញ ឆន្ទៈ និងបទ​ពិសោធន៍ការងារលើវិស័យកសិកម្មរបស់ខ្ញុំ»។

អ្នកនាំពាក្យគណបក្សប្រជាធិបតេយ្យមូលដ្ឋាន លោក ឡឹក យសុធារ មិនលើកទូរសព្ទ​ឆ្លើយ​សំណួរឡើយនៅថ្ងៃទី២៧ ខែវិច្ឆិកា។ ប៉ុន្តែលោកបានអះអាងក្នុងលិខិតរបស់ខ្លួនថា មូលហេតុដែលនាំឱ្យលោកសុំចូលរួមជីវភាពនយោបាយ ដោយសារពេញចិត្តនឹងគោល​នយោបាយ​លើវិស័យកសិកម្ម ។

លោក សុធារ ថ្លែងថា៖ «ខ្ញុំបាទមានទំនុកចិត្តថា ការដាក់ចេញនូវគោលនយោបាយ​ប្រាកដ​និយមថ្មីនេះ គឺដូចគ្នាទៅនឹងចំណេះដឹង និងជំនាញ ឆន្ទៈ និងបទពិសោធន៍ការងារលើ​វិស័យ​កសិកម្ម​របស់ខ្ញុំ»។

ក្រៅពីលិខិតសុំចូលរួមជាមួយគណបក្សបក្ស លោក សាំងកុមារ និងលោក សុធារ ក៏ស្នើសុំចូលធ្វើការជាមួយរដ្ឋាភិបាលដែរ។

គណបក្សប្រជាធិបតេយ្យមូលដ្ឋានបានបើកកិច្ចប្រជុំវិសាមញ្ញមួយដោយមានការចូលរួមពីក្បាលម៉ាស៊ីនដឹកនាំបក្ស និងប្រធានប្រតិបត្តិគណបក្សបណ្ដាខេត្តនានា​មកចូលរួម។ កិច្ច​ប្រជុំបិទទ្វារពេញមួយរសៀលនោះបានបង្កក្ដីសោកសៅដល់មេដឹកនាំបក្សប្រជាធិតេយ្យ​មូលដ្ឋាន ដែលខិតខំដើរតាមគោលនយោបាយកណ្ដាលនិយមនេះអស់ជាច្រើនឆ្នាំ។

ទឹកមុខស្ងួត ដកដង្ហើមធំ មន្ត្រីជាន់ខ្ពស់បក្សម្នាក់ បានដើរចេញពីស្នាក់ការបក្ស ហើយប្រាប់​អ្នកកាសែតថា៖ «វិចារអើយខ្ញុំអស់រលីងតែម្ដងខំតស៊ូ៧ឆ្នាំ ស្រាប់តែគេលេងមួយក្បាច់​ហួស​ចិត្ត បើចង់ចូលអីចឹងមិនចូលតាំងពីក្រុមប្រឹក្សាពិរោះយោបល់? ខ្ញុំនិយាយអីលែង​ចេញ»។

អនុប្រធានគណបក្សលោក សាម ស៊ុនដឿន បដិសេធមិនធ្វើអត្ថាធិប្បាយទេ។ ខណៈ​ដែលប្រធានគណបក្សលោក យ៉េង វីរៈក៏សុំមិនផ្ដល់បទសម្ភាសន៍ដែរ។

មន្ត្រីជាន់ខ្ពស់បក្សប្រជាធិបតេយ្យមូលដ្ឋាន ប្រចាំខេត្តកំពតដែលស្និទនឹងលោក យ៉ង សាំងកុមារ គឺលោក អ៊ួន សុផល ប្រាប់ថា លោកហួសចិត្តនៅពេលទទួលបាន​ដំណឹង​នេះ។ លោក សុផល ជិះម៉ូតូពីឃុំដំណាក់សុក្រំ ស្រុកដងទង់ ខេត្តកំពត ដើម្បីចូលរួមប្រជុំបិទទ្វា​នៅថ្ងៃទី២៧នេះ។

លោក សុផល ឱ្យដឹងថា៖ «គាត់ចូលបក្សណាជាសិទ្ធិរបស់គាត់ ប៉ុន្តែខ្ញុំស្លុតចិត្ត​ដែល​លឺ​ដំណឹង​ភ្លាមៗបែបនេះ»។

ក្រៅពីសុំចូលបក្សប្រជាជនរួចហើយនោះ លោក សាំងកុមារ និងសហការី ក៏សុំ​ការងារ​ធ្វើក្នុងជួររដ្ឋាភិបាលដែរតាមរយៈលិខិតដាច់ដោយឡែកមួយម្នាក់ទៀត។

អ្នកវិភាគនយោបាយ លោកបណ្ឌិត សេង សារី បានថ្លែងថា លោកសុំផ្ដល់យោបល់​ខ្លីត្រឹមបីចំណុចរួមមាន៖ «ចំណុចទី១ខ្ញុំគោរពសិទ្ធិលោក កុមារ ដែលចង់ជួយ​ក្រសួង​កសិកម្មព្រោះជាជំនាញរបស់គាត់ផង ទី២ខ្ញុំសុំបដិសេធមិនជឿលើ​ហេតុផល​ដែល​គាត់អះអាងទេ និងទី៣ នៅពេលដែលខ្ញុំឃើញលិខិតសុំចូល​បក្សកាន់អំណាច​ធ្វើឱ្យខ្ញុំ​នឹករលឹកលោកបណ្ឌិតកែមឡីខ្លាំងណាស់បាទ»។

អ្នកវិភាគនយោបាយដែលកំពុងរស់នៅក្រៅប្រទេស លោក គឹម សុខ មានប្រសាសន៍ថា ការចុះចូលCPPរបស់លោកកុមារជាគំរូអាក្រក់ដែលបំបាក់ស្មារតីអ្នកស្រឡាញ់លិទ្ធិប្រជាធិបតេយ្យជំនាន់ក្រោយ។

លោក គឹម សុខ បន្តថា៖ «ប្រជាពលរដ្ឋអាចបារម្ភថាអ្នកនយោបាយជំនាន់ថ្មីៗ​អាចដូច​លោក យ៉ង សាំងកុមារ អីចឹងបង្កើតបក្សហើយខំធ្វើឱ្យបក្សរឹងមាំបន្តិចក៏ទៅចុះចូល។ អ្នក​នយោបាយ​ជំនាន់ក្រោយត្រូវចំណាយពេលយូរណាស់ដើម្បីឱ្យពលរដ្ឋទុកចិត្ត»។ លោក​បន្ថែម​ថា៖ «គណបក្សនេះតែងប្រើវិធានទាក់ទាញ អ្នកទាំងឡាយថា បើមានគម្រោងល្អ​គេនឹងសហការជាមួយបាន។ បើចូលហើយទោះបីជាបក្សប្រជាជនផ្ដល់ឱ្យធ្វើគម្រោង​ដែល​បានបង្ហាញពីមុនក៏ដោយក៏នៅតែធ្វើអ្វីមិនកើតហួសពីអ្វីដែលបក្សប្រជាជនកម្ពុជាអនុវត្ត​ដដែលជាដដែលទេ»។

ខេមបូចា មិនអាចទាក់ទងលោក សុខ ឥសាន អ្នកនាំពាក្យ​គណបក្សប្រជាជនកម្ពុជា​ដើម្បី​បរិយាជុំវិញបញ្ហានេះបានទេ នៅត្រឹមព្រលប់ថ្ងៃទី២៧ ខែវិច្ឆិកា។ ទោះជា​យ៉ាងណា​លោក​ថ្លែងប្រាប់កាសែតក្នុងស្រុកថា បក្សប្រជាជនកម្ពុជាស្វាគមន៍ទាំងអស់។

លោក យ៉ង សាំងកុមារ ជាសហស្ថានិកគណបក្សប្រជាធិបតេយ្យមូលដ្ឋានដែលមានរួម បណ្ឌិត កែម ឡី  លោក យ៉េង វីរៈ លោកបណ្ឌិត សាម អ៊ីន អ្នកស្រី ប្រុក វាន់នី លោក សាម ស៊ុនដឿន និងក្រុមយុវជនបញ្ញវន្តមួយចំនួនទៀតក្រោមហេតុផលថា បង្កើត​ជម្រើស​ថ្មីឱ្យអ្នកបោះឆ្នោតចៀសវាងបក្សនិយមនិងផ្តាច់ការនិយម៕