សមាគមសម្ព័ន្ធអ្នកសារព័ត៌មានកម្ពុជា

រដ្ឋាភិបាលចាប់ផ្ដើមអនុវត្តគោលនយោបាយប្រាក់សោធនសម្រាប់វិស័យឯកជន

កម្មកររោងចក្រកាត់ដេរកំពុងទិញម្ហូបសម្រាប់អាហារថ្ងៃត្រង់នៅខាងមុខរោងចក្រមួយនៅជាយរាជធានីភ្នំពេញ។ រូបភាពថតកាលពីថ្ងៃទី១៤ ខែមករា ឆ្នាំ២០២២។ ខេមបូចា/ព្រីង សំរាំង
កម្មកររោងចក្រកាត់ដេរកំពុងទិញម្ហូបសម្រាប់អាហារថ្ងៃត្រង់នៅខាងមុខរោងចក្រមួយនៅជាយរាជធានីភ្នំពេញ។ រូបភាពថតកាលពីថ្ងៃទី១៤ ខែមករា ឆ្នាំ២០២២។ ខេមបូចា/ព្រីង សំរាំង

រដ្ឋាភិបាល​បាន​ប្រកាស​ពី​ការ​ចាប់​ផ្ដើម​ដំណើ​រការ​លើ​ប្រព័ន្ធ​សន្តិសុខ​សង្គមប្រាក់សោធន​ ដែល​អាច​​ផ្ដល់​អត្ថប្រយោជន​ដល់​និយោជិត​ក្នុង​វិស័យ​ឯក​ជន​នៅ​ពេល​ចូល​និវត្តន៍ ហើយ​កម្មវិធី​នេះ​បាន​ទទួលការ​សាទរ​ពី​ក្រុម​អង្គការ​សង្គម​ស៊ីវិល និង​កម្មករ​ផង​ដែរ​។​

រដ្ឋមន្ត្រី​ក្រ​សួង​ការងារ និង​រដ្ឋ​មន្ត្រី​ក្រ​សួង​សេដ្ឋកិច្ច បាន​ចុះ​ហត្ថលេខា​រួម​គ្នា​លើ​សេចក្ដី​ប្រកាសរួម​មួយ​ ស្តីពីប្រាក់សោធននឹង​ចាប់​អនុវត្ត​ពី​ថ្ងៃទី​១ ខែកក្កដា ឆ្នាំ​២០២២ ខណៈ​ក្រុម​ហ៊ុន សហគ្រាស​នានា​នៅ​មាន​ពេល​ពីរ ទៅបី​ខែ​ទៀត​ដើម្បី​ចាប់​អនុវត្ត​លើ​កម្មវិធី​នេះ។​

លោក ហេង សុផាណារិទ្ធ អគ្គនាយក​រង​នៃ​បេឡាជាតិ​សន្តិសុខសង្គម​ ប្រាប់​ខេមបូចា ថា​ ការ​បង់​ភាគ​ទាន​នឹង​ត្រូវ​ចាប់​ផ្ដើម​ចាប់​ពី​ថ្ងៃទី​១ ខែតុលា ឆ្នាំ​២០២២។

លោក​ឲ្យ​ដឹង​ថា៖ «​ពេល​[និយោជិត] ដល់​វ័យ​៦០​ឆ្នាំ [ប.ស.ស] នឹង​គណនា​ប្រាក់​ខែ​ប្រាំ​មួយ​ខែ​ចុង​ក្រោយ​របស់​អ្នក​ទាំង​នោះ[ដើម្បី​កំណត់ប្រាក់​សោធន]»។ លោក​បន្ថែម​ទៀត​ថា បើ​សិន​ជា​និយោជិត​ស្លាប់​មុន​វ័យ​ ៦០​ឆ្នាំ គ្រួសារ​សព​នឹង​ទទួល​ប្រាក់​សោធន​នោះ​សម្រាប់​រយៈពេល​មួយ​ឆ្នាំ​។

លោក​ឲ្យ​ដឹង​ដែរ​ថា​ សម្រាប់​អ្នក​ដែល​មាន​បណ្ណ​ ប.ស.ស ដែល​គ្រប​ដណ្ដប់​លើ​ថ្លៃ​ថែទាំ​សុខភាព និង​គ្រោះ​ថ្នាក់​ការងារ នៅ​ថ្ងៃទី​១ ខែតុលា អ្នក​ទាំង​នោះ​នឹង​ត្រូវ​បាន​ចូល​ដោយ​ស្វ័យប្រវត្តិ​ទៅ​ក្នុង​ប្រព័ន្ធ​ប្រាក់​សោធន​នេះ។​

លោក​ពន្យល់​បន្ថែម​ថា កម្មវិធី​ប្រាក់​សោធន​នេះ គឺខុស​ពី​របប​សន្តិសុខ​សង្គម​ដែល​គាំពារ​លើ​​គ្រោះ​ថ្នាក់​ការងារ និងថែទាំ​សុខភាព។ លោក​ថា ពីរ​ករណី​នេះ ភាគីនិយោជក​ជា​អ្នក​បង់​ភាគទាន​។​

លោក​បញ្ជាក់ថា៖ «​សម្រាប់​កម្មវិធី​ប្រាក់​សោធន​នេះ និយោជិត​នឹង​ត្រូវ​បង់​ភាគ​ទាន​ ២​ភាគរយ​នៃ​ប្រាក់​ខែ ហើយ​និយោជក​[បន្ថែម] ២​ភាគរយ​ទៀត»។​

លោក អាត់ ធន់ ប្រធាន​សហភាព​ការងារ​កម្ពុជា ស្វាគមន៍​ទៅ​នឹង​កម្មវិធី​ប្រាក់​សោធន​នេះ ប៉ុន្តែ​ថា​វា​ហាក់​ដូច​ជា​យឺត​បន្តិច​ក្នុង​ការ​ជួយ​ដល់​និយោជិត​មាន​វ័យ​ចំណាស់​។​

លោក​បន្ថែម​ថា៖ «​​ភាព​យឺត​យ៉ាវ​នៃ​ការ​អនុវត្ត​កម្មវិធី​ប្រាក់​សោធន​នេះ​ នឹង​ធ្វើ​ឲ្យ​ប្រជា​ពល​រដ្ឋ ឬ​កម្មករ​ ឬនិយោជិត​វ័យ​ចំណាស់​ មានឱកាស​ខ្លី​ក្នុង​ការ​ចូល​រួម​ភាគ​ទាន ហើយ​អ្នក​ទាំង​នោះ ក៏​នឹង​ទទួល​បាន​ភាគរយ​នៃ​ប្រាក់​សោធន​តិច​ទៅ​តាម​ហ្នឹង​ដែរ»។​

យ៉ាងណា លោក ថាអ្នក​ទាំង​នេះ ក៏​មិន​ត្រូវ​បាន​គេ​កាត់​​ចេញ​ទាំង​ស្រុង​ដែរ ដោយ​ច្បាប់​បាន​កំណត់​បញ្ញត្តិ​សម្រាប់​អ្នក​ទាំង​ឡាយ​ណា​ដែល​បានចុះ​ឈ្មោះ​នៅ​វ័យ​ចំណាស់ អាច​ត្រូវគិត​ពី​ប្រាក់​សោធន​ទៅ​លើ​ពេល​កន្លង​មក​ដែល​ពួកគាត់​បានបង់​ភាគ​ទាន​​ដែរ​។​

លោក អាត់ ធន់ ថា​និយោជិត​នឹង​ទទួល​បាន​ប្រាក់​សោធន​នៅ​ពេល​ពួក​គេ​ចូល​និវត្តន៍​ឬ​ដល់​វ័យ​៦០​ឆ្នាំ។ ប្រាក់​សោធន​នឹង​អាច​ទទួល​បាន​ ៥០​ភាគ​រយ​នៃ​ប្រាក់​ខែ​របស់​ពួកគាត់​។​

 បើ​តាម​អនុក្រឹត្យ​លេខ​ ៣២ ស្ដី​ពី​កម្មវី​ប្រាក់​សោធន បាន​បញ្ជាក់​ថា​និយោជិត​អាច​ទទួល​ប្រាក់​សោធន​បាន​​នៅ​អាយុ​យ៉ាង​តិច​ ៦០​ឆ្នាំ ឬ​បាន​ចូល​រួម​បង់​ភាគទាន ​១២​ខែ​។

​អនុក្រឹត្យ​​ដដែល​ចែងថា ក្រុម​ហ៊ុន​ដែល​មិន​ទាន់​ចុះ​បញ្ជី​ជាមួយ​ ប.ស.ស ត្រូវ​តែ​ចុះ​ឈ្មោះ​នៅ​ត្រឹម​បំណាច់​ខែ​នេះ ហើយ​បុគ្គលិក​របស់​ក្រុម​ហ៊ុន​ទាំង​នោះ​ត្រូវតែ​ចុះ​ឈ្មោះ​ក្នុង​រង្វង់​បី​ថ្ងៃ​បន្ទាប់​ពីចាប់​ផ្ដើម​ការងារ​។​

​លោក សុផាណារិទ្ធ ឲ្យ​ដឹង​ដែរថា រដ្ឋាភិបាល​មាន​គម្រោង​អនុវត្ត​កម្មវិធី​ប្រាក់​សោធន​នេះ​តាំង​ពី​ឆ្នាំ ២០១៩ ប៉ុន្តែ​ថា​ត្រូវ​បាន​ពន្យារ​ពេល​ដោយសារតែ​មាន​ការ​ផ្ទុះ​ការ​រាលដាល​ជំងឺកូវីដ-១៩ និង​ផល​ប៉ះពាល់​របស់​វា​លើ​វិស័យ​ឯកជន​។​

​លោក​បន្ថែម​ថា៖ «​បើ​សិនជា​យើង​នៅ​ទុក​វា​បន្ត​ទៅ​ទៀត វា​នឹង​ប៉ះ​ពាល់​ដល់​និយោជិត​វ័យ​ចំណាស់ មាន​ន័យ​ថា​នៅ​ពេល​ដល់​វ័យ​ ៦០​ឆ្នាំ ពួកគេ​នឹង​បាត់​បង់​សិទ្ធិ​។ ដូច​នេះ យើង​ត្រូវ​តែ​អនុវត្តវា ដូចនេះ​ពួកគាត់​អាច​ទទួល​ប្រាក់​សោធន​នេះបាន»។​

​អ្នក​សារព័ត៌មាន​ វីអូឌី លោក ញឹម សុខន ដែល​មាន​វ័យ​ ៥៤​ឆ្នាំ​ហើយ​នោះ លើក​ឡើង​ថាថ្វី​បើ​លោក​អាច​បាត់​បង់​អត្ថប្រយោជន៍​ខ្លះ​ តែ​ថា​នេះ​ជា​ជំហាន​ដ៏​ល្អ​មួយ​។​​

លោក​បន្ថែម​ថា៖ «​វា​យឺត​បន្តិច​ហើយ មិន​មែន​តែ​ខ្ញុំ​ទេ​ដែល​បាត់​បង់​អត្ថប្រយោជន៍ ប៉ុន្តែ​នៅ​មានមនុស្ស​ជា​ច្រើន​ទៀត​ដែល​ស្ថិត​ក្នុង​វ័យ​ប្រហាក់​ប្រហែល​ខ្ញុំ​»។​

លោក​បន្តថា៖ «​[ប៉ុន្តែ] ​វាក៏​ជា​រឿង​ត្រឹម​ត្រូវ​មួយ​ដែល​រដ្ឋាភិបាល​មាន​ឆន្ទៈ​ធ្វើ​រឿង​នេះ ហើយ​ខ្ញុំ​គិតថា​រដ្ឋាភិបាល​មាន​ការ​ទទួល​ខុស​ត្រូវ​​ក្នុង​ការ​ប្រមូល​ពន្ធ និង​ផ្ដល់​ប្រាក់​ទាំង​នោះ​ត្រឡប់​វិញ​ឲ្យ​ប្រជា​ពល​រដ្ឋ​ដើម្បី​ទ្រទ្រង់​ជីវ​ភាព»។​

លោក គី សារឿន វ័យ​៥២ ឆ្នាំ ជា​សន្តិសុខ​ឯកជន​មួយ​រូប​ធ្វើ​ការ​ក្នុង​ស្រុក​បាទី ខេត្ត​តាកែវ ថា​លោក​មិន​បាន​ដឹង​ពី​កម្មវិធី​ថ្មី​នេះទេ​។​

លោក​ឲ្យ​ដឹងថា៖ «​បើ​សិន​ជា​សេចក្ដី​សម្រេច​នេះ​ចេញ​លឿន​ជាង​នេះ​បន្តិច​ វា​ជារឿង​ល្អ​ណាស់ ពី​ព្រោះ​ខ្ញុំ​អាច​ទទួល​បានអត្ថប្រយោជន៍​ច្រើន ប៉ុន្តែ​ពេល​នេះ​ខ្ញុំ​ចាស់​ហើយ ហើយ​អត្ថប្រយោជន៍​ក៏​អាច​នឹង​ទទួល​បាន​តិច»។​

លោក ប៉ិច ពិសី នាយក​ប្រតិបត្តិ​អង្គការ​តម្លាភាព​កម្ពុជា មា​ន​ប្រសាសន៍​ថា ​សាធារណជន​មាន​ការ​ងើយឆ្ងល់​លើ​ការ​គ្រប់​គ្រង​មូលនិធិនេះ ដែល​រដ្ឋាភិបាល​អាច​កាត់​បន្ថយ​ការ​សង្ស័យ​បាន​តាម​រយៈ​ការ​វិនិយោគ​ប្រកប​ដោយ​តម្លា​ភាព​។​

លោក បន្ថែម​ថា៖ «​វា​ជារឿង​ល្អ​សម្រាប់​ជាតិ ដែល​រដ្ឋាភិបាល​អាច​បង្កើតមូលនិធិនេះ​សម្រាប់​​វិនិយោគ និង​ទទួល​ចំណូល ហើយ​អាច​សន្សំ​សម្រាប់​ពល​រដ្ឋ​នៅ​ពេល​ដល់​អាយុ​ចូល​និវត្តន៍»។​

លោក​បន្តថា៖ «ប្រជា​ពល​រដ្ឋ​នៅ​តែ​បារម្ភ​ ថា​តើ​ពួកគេ​បង់ភាគទាន​២ភាគរយ​នៃ​ប្រាក់​ខែ ហើយ​ការ​គ្រប់​គ្រង​ថវិកា​ទាំងនេះ​បែប​ម៉េច​វិញ»។​

លោកបានលើកឡើង​ថា៖ «តើ​យើង​អាច​ធានាពី​តម្លាភាព និង​គណនីយភាព​ខ្ពស់​លើ​ការ​គ្រប់​គ្រង​ថវិកានេះបានទេ? បើ​សិនជា​យើង​បង់​គិត​តាំង​ពី​វិស័យ​ឯកជន ក្រុម​អង្គការ​សង្គម​ស៊ីវិល ឬ​ក្រសួង​ទាំងអស់ រដ្ឋាភិបាល​អាច​ប្រមូល​ទុន​បាន​ច្រើន​សម្រាប់​ប្រយោជន៍​រួម ប៉ុន្តែ​រដ្ឋ​អាច​ធានា​បានទេ?»

បើ​តាម​អនុក្រឹត្យ អត្រា​បង់​ភាគ​ទាន​នឹង​ត្រូវ​ធ្វើ​ឡើង​ជា​បី​ដំណាក់​កាល។ ដំណាក់​កាល​ដំបូង​ ភាគទាននឹង​ត្រូវ​ធ្វើ​ឡើង​ ៤​ភាគ​រយនៃ​ប្រាក់​ខែ​ ដោយ​២ភាគរយយកពី​និយោជិត និង​ ២ភាគ​រយ​ពី​និយោជក​។​

បន្ទាប់​ពី​ប្រាំ​ឆ្នាំ តួលេខ​នឹង​ឡើង​ដល់​ ប្រាំបី​ភាគ​រយ​សម្រាប់​រយៈពេល​ប្រាំ​ឆ្នាំ​​។ ក្រោយពីនោះ តួលេខ​នឹង​កើន​ឡើង​ ២,៧៥​ភាគ​រយ​រាល់​​១០​ឆ្នាំ​ម្ដង​។​

សម្រាប់​អ្នក​បង់ភាគទាន​ដែល​បាត់​បង់​ការ​ងារ​មុន​អាយុ​ ៦០​ឆ្នាំ នឹង​នៅ​តែ​អាច​បន្ត​បង់​ភាគ​ទាន​បាន ហើយ​ក៏​នឹង​អាច​ទទួល​បាន​ប្រាក់​សោធន​នៅ​វ័យ​ ៦០​ឆ្នាំ​ដែរ៕

(រាយការណ៍​បន្ថែម​ដោយ ទ្រី ថានី និង​ឃាង សុខមាន)

ប្រែសម្រួលពីអត្ថបទភាសាអង់គ្លេស៖ Government kicks off pension scheme for private sector

367 views

ព័ត៌មានថ្មីៗ

អត្ថបទពេញនិយម