កម្មករប្រមាណ៥០០នាក់ដែលបម្រើការងារនៅក្រុមហ៊ុន គល័រ ស្តារ ខេមបូឌា ប្រូដាក់ ខូអិលធីឌី ស្ថិតនៅភូមិព្រែកជ្រៃ រាជធានីភ្នំពេញ បានចេញតវ៉ា និងបិទផ្លូវរយៈពេលពីរថ្ងៃជាប់ៗគ្នា បន្ទាប់ពីរោងចក្របានប្រកាសថានឹងផ្លាស់ប្តូរទៅទីតាំងថ្មី ដែលនៅចម្ងាយពីទីតាំងបច្ចុប្បន្នប្រហែល៤០គីឡូម៉ែត្រ។
ដំណឹងនៃការផ្លាស់ប្ដូរនេះ បានធ្វើឱ្យកម្មករមានការព្រួយបារម្ភពីការបាត់បង់ការងារ និងអត្ថប្រយោជន៍ផ្សេងៗ ដោយសារទីតាំងថ្មីនៅឆ្ងាយ ហើយរោងចក្របានប្រកាសដោយមិនបានជូនដំណឹងពួកគេជាមុន។
ក្រុមហ៊ុនផលិតសម្ភារៈប្រើប្រាស់ក្នុងផ្ទះ និងការិយាល័យនេះ បានបញ្ជាក់ថា ថ្ងៃទី៣០ ខែកញ្ញា ឆ្នាំ២០២៥ គឺជាថ្ងៃធ្វើការចុងក្រោយនៅរោងចក្របច្ចុប្បន្ន ខណៈដែលរោងចក្រថ្មីនេះគ្រោងនឹងបើកដំណើរការនៅថ្ងៃទី២៦ ខែឧសភា ឆ្នាំ២០២៥ ដោយមានកម្មករចាស់មួយចំនួនតូចប៉ុណ្ណោះ ដែលទំនងជាទៅធ្វើការជាមួយពួកគេនៅកន្លែងថ្មី។
តាមរយៈការបង្ហោះនៅលើបណ្ដាញសង្គមហ្វេសប៊ុករបស់អង្គការ សង់ត្រាល់ កាលពីថ្ងៃអង្គារ ដែលបង្ហាញពីស្ថានភាពរបស់កម្មករ ឱ្យដឹងថា ការផ្លាស់ប្ដូរទីតាំងរោងចក្រនេះគឺដោយសារម្ចាស់ដីមិនចង់បន្តការជួលឱ្យក្រុមហ៊ុនទៀត។ ការតវ៉ានេះបានកើតឡើងបន្ទាប់ពីការចរចាកាលពីថ្ងៃចន្ទ មិនអាចឈានដល់ដំណោះស្រាយដែលកម្មករអាចទទួលយកបាន។
កម្មករវ័យ៣០ឆ្នាំម្នាក់គឺ លោក នំ នឹម បាននិយាយថា ពួកគេភ្ញាក់ផ្អើលនៅពេលដែលថៅកែរោងចក្រប្រកាសផ្លាស់ប្តូរទីតាំងទៅខេត្តតាកែវភ្លាមៗ។
យ៉ាងណា លោកសង្ឃឹមថា ថៅកែរោងចក្រនឹងដោះស្រាយសំណងជូនកម្មករស្របតាមច្បាប់ការងារ ហើយធានាថាកម្មករដែលបម្រើការងារយូរឆ្នាំនឹងទទួលបានអត្ថប្រយោជន៍ពេញលេញ។
ម៉្យាងវិញទៀត លោកបន្តថា កម្មករដែលយល់ព្រមទៅធ្វើការនៅទីតាំងថ្មីនឹងទទួលបានប្រាក់ ២០០ដុល្លារបន្ថែម ដោយមានន័យថាកម្មករនឹងទទួលបានប្រាក់បន្ថែម ៣០ដុល្លារជារៀងរាល់ខែ លើប្រាក់ខែគោលរហូតដល់សរុបបានចំនួន២០០ដុល្លារ។ ប៉ុន្តែ លោក នំ នឹម បាននិយាយថា នេះមិនមែនជាជម្រើសល្អសម្រាប់កម្មករទេ។
លោក នំ នឹម លើកឡើងថា៖ «បញ្ហាទី១ គឺរោងចក្រទើបតែប្រកាសផ្លាស់ប្តូរទីតាំងដោយមិនជូនដំណឹងទៅក្រសួងការងារ និងបណ្តុះបណ្តាលវិជ្ជាជីវៈ ហើយទី២ កម្មករនឹងជួបការលំបាកក្នុងការធ្វើដំណើរទៅទីតាំងថ្មី ព្រោះវានៅឆ្ងាយ។ ការតវ៉ារបស់យើងកាលពីម្សិលមិញ [១៩ ឧសភា] មិនមានប្រសិទ្ធភាពទេ ដោយសាររោងចក្របានផ្តល់អត្ថប្រយោជន៍មិនសមរម្យ»។
កម្មការិនីម្នាក់ទៀតឈ្មោះ ព្រឿង សារ៉ាន់ អាយុ ៤២ឆ្នាំ បាននិយាយថា ចម្ងាយទៅរោងចក្រថ្មីគឺនៅឆ្ងាយពេក ខណៈផ្ទះរបស់ពួកគេនៅជិតរោងចក្របច្ចុប្បន្ន។ មួយវិញទៀត ដំណោះស្រាយរបស់រោងចក្រក៏មិនសមស្របដែរ ដោយអ្នកស្រីឆ្ងល់ថា តើពួកគេនឹងទទួលបានដំណោះស្រាយស្របតាមច្បាប់ការងារទេ ប្រសិនបើពួកគេមិនព្រមទៅធ្វើការនៅទីតាំងថ្មី។
អ្នកស្រីបញ្ជាក់ថា៖ «ពួកយើងមានការព្រួយបារម្ភ ហើយមិនដឹងថារោងចក្រធ្វើអ្វីស្របច្បាប់ឬអត់។ យើងបានសួរទៅសហជីពប្រចាំរោងចក្រ ប៉ុន្តែពួកគេបានបញ្ជូនតំណាងទៅពិភាក្សាជាមួយថៅកែ។ បើពួកយើងយល់ដឹងផ្នែកច្បាប់ ប្រហែលជាយើងមិនមកធ្វើការនៅរោងចក្រទេ»។
អ្នកស្រី សារ៉ាន់ ឱ្យដឹងដែរថា ការតវ៉ាដែលធ្វើឡើងនៅជិតបរិវេណរោងចក្រនេះ គឺដើម្បីស្វែងរកកិច្ចអន្តរាគមន៍ និងដំណោះស្រាយស្របតាមច្បាប់ការងារ។ ដោយបន្ថែមថា កម្មករទាំងអស់បានត្រឡប់ទៅធ្វើការវិញនៅពេលដែលតំណាងក្រសួងចុះទៅដល់ដើម្បីដោះស្រាយបញ្ហា។
ទោះជាយ៉ាងនេះក្តី ដំណោះស្រាយនឹងត្រូវចំណាយពេលវេលា ព្រោះការពិភាក្សានឹងបន្តរហូតដល់ថ្ងៃទី៣០ ខែមិថុនា មុននឹងរោងចក្រជូនដំណឹងជាថ្មីដល់កម្មករ។
អ្នកស្រី សារ៉ាន់ បន្ថែមថា៖ «ហេតុអ្វីបានជារោងចក្រចំណាយពេលយូរក្នុងការពិភាក្សា?ប្រសិនបើរោងចក្រមិនព្រមដោះស្រាយតាមសំណើរបស់កម្មករ តើបញ្ហានេះនឹងដោះស្រាយចេញទេ? ប្រសិនបើកម្មករនៅតែបន្តធ្វើការឱ្យរោងចក្រ នោះរោងចក្រនឹងចាប់ផ្ដើមអស់សម្ភារដេរហើយ»។
យោងតាមសេចក្តីជូនដំណឹងរបស់ក្រសួង កិច្ចព្រមព្រៀងមួយបានធ្វើឡើងនៅព្រឹកថ្ងៃទី២០ ខែឧសភា ដែលក្រុមហ៊ុនបានយល់ព្រមផ្តល់ការទូទាត់បញ្ចប់កិច្ចសន្យាដល់កម្មករដែលមិនចង់ទៅធ្វើការនៅទីតាំងថ្មី។
ក្រសួងបន្តថា ក្រុមហ៊ុនបានយល់ព្រមបើកប្រាក់ឈ្នួលដល់កម្មករដោយផ្អែកលើ៤ចំណុចដែលកំណត់ដោយច្បាប់ការងារ។ ក្នុងនោះ រួមមានការទូទាត់សម្រាប់ប្រាក់ឈ្នួលដែលមិនទាន់បើកសំណងសម្រាប់ការឈប់សម្រាកប្រចាំឆ្នាំដែលនៅសេសសល់ សំណងជំនួសការមិនបានជូនដំណឹងជាមុន និងប្រាក់អតីតភាពការងារ។
ជាមួយគ្នា ក្រសួងបានអំពាវនាវឱ្យកម្មករត្រូវជឿជាក់ និងរង់ចាំដំណោះស្រាយរបស់ខ្លួន ហើយចៀសវាងការតវ៉ាដោយបិទផ្លូវសាធារណៈ ដែលអាចប៉ះពាល់ដល់សណ្តាប់ធ្នាប់សាធារណៈ និងនាំឱ្យមានការបំពានច្បាប់។
ប្រធានសហព័ន្ធសហជីពកម្ពុជា(CATU) អ្នកស្រី យ៉ាង សុភ័ណ្ឌ បានប្រាប់ សារព័ត៌មានខេមបូចា ថា ការផ្លាស់ប្ដូរទីតាំងនេះមិនមែនជារឿងចៃដន្យទេ ដោយសាររោងចក្រមានកម្មកររាប់រយនាក់ ហើយបានដំណើរការជាច្រើនឆ្នាំមកហើយ។ ការផ្លាស់ប្ដូរត្រូវបានគ្រោងទុក ដូច្នេះ កម្មករគួរតែទទួលបានប្រាក់បំណាច់ និងអត្ថប្រយោជន៍ផ្សេងទៀតតាមច្បាប់ការងារ ក្នុងករណីដែលពួកគេមិនព្រមបន្តធ្វើការនៅទីតាំងថ្មី។
អ្នកស្រី សុភ័ណ្ឌ មានប្រសាសន៍ថា៖ «រយៈពេលនៃការជូនដំណឹងរបស់ក្រុមហ៊ុនក្នុងការបិទ និងបើកភ្លាមៗគឺខ្លីពេក ដូច្នេះវាបានធ្វើឱ្យកម្មករមានការព្រួយបារម្ភ ខណៈចម្ងាយពីរោងចក្រចាស់ទៅរោងចក្រថ្មីគឺជាបញ្ហាមួយ»។
អ្នកស្រីបន្ថែមថា៖ «ទាក់ទងនឹងការបញ្ឈប់កម្មករដោយបំពេញវិញនូវចំណុចទាំងបួននោះ គឺត្រូវតែបន្ថែមចំណុចមួយបន្ថែមទៀត ដែលជាប្រាក់បំណាច់»៕
ប្រែសម្រួលពីអត្ថបទភាសាអង់គ្លេស៖ Govt Temporarily Remediates Color Star Workers’ Two-Day Strike After Factory Announces Sudden Relocation
