ក្រុមហ៊ុន ហួយវ័ន ផេ នៅទីក្រុងភ្នំពេញ ត្រូវបានគេមើលឃើញថា បានដកស្លាកយីហោរបស់ខ្លួននៅថ្ងៃពុធ ពោលគឺប្រាំមួយថ្ងៃបន្ទាប់ពីរតនាគារសហរដ្ឋអាមេរិកបានរកឃើញថា ក្រុមហ៊ុន ហួយវ័ន គ្រុប ជាបណ្ដាញនៃការលាងលុយកខ្វក់ ហើយបានផ្ដាច់ឈ្មោះក្រុមហ៊ុននេះ ចេញពីប្រព័ន្ធហិរញ្ញវត្ថុរបស់សហរដ្ឋអាមេរិក។
កាលពីថ្ងៃទី១ ខែឧសភា បណ្តាញអនុវត្តឧក្រិដ្ឋកម្មហិរញ្ញវត្ថុ (FinCEN) ដែលជាការិយាល័យរតនាគារ សហរដ្ឋអាមេរិកបានស្នើច្បាប់មួយ ដើម្បីផ្ដាច់ប្រព័ន្ធដំណើរការរបស់ក្រុមហ៊ុន ហួយវ័ន គ្រុប ពីប្រព័ន្ធហិរញ្ញវត្ថុសហរដ្ឋអាមេរិក ដោយចោទប្រកាន់ថា ក្រុមហ៊ុននេះកំពុងលាងលុយកខ្វក់ ដែលបានមកពីការលួច និងការឆបោកតាមប្រព័ន្ធអនឡាញ។ចំណាត់ការនេះបានធ្វើឡើងតាមរបាយការណ៍ដែលចេញផ្សាយដោយស្ថាប័នផ្សព្វផ្សាយជាច្រើន និងការស៊ើបអង្កេតដែលភ្ជាប់ក្រុមហ៊ុននេះទៅនឹងបណ្តាញលាងលុយ ដែលពាក់ព័ន្ធនឹងក្រុមឧក្រិដ្ឋកម្មឆ្លងដែននៅក្នុងតំបន់អាស៊ីអាគ្នេយ៍ ជុំវិញការឆបោកតាមប្រព័ន្ធអនឡាញ និងប្រតិបត្តិការចោរកម្មតាមអ៊ីនធឺណិតដែលសន្មតថាមានប្រភពមកពីប្រទេសកូរ៉េខាងជើង។
បណ្ដាញ FinCEN បានរកឃើញថា ក្រុមហ៊ុន ហួយវ័ន គ្រុប បានជួយលាងលុយកខ្វក់យ៉ាងតិច៤ពាន់លានដុល្លារជាប្រាក់ចំណូលខុសច្បាប់នៅចន្លោះពីខែសីហា ឆ្នាំ២០២១ ដល់ខែមករា ឆ្នាំ២០២៥។ បណ្ដាញបុត្តសម្ព័ន្ធនេះក៏ដំណើរការសេវាកម្មជាច្រើនក្រោមយីហោ «ហួយវ័ន» រួមមានផ្នែកទីផ្សារ និងកម្មវិធីហិរញ្ញវត្ថុផងដែរ។ គ្រាន់តែនៅលើកម្មវិធីតេឡេក្រាមមួយត្រូវបានសង្ស័យថាបានផ្សារភ្ជាប់ទៅនឹងប្រតិបត្តិការខុសច្បាប់ចំនួន២៤ពាន់លានដុល្លារ។
លេខាធិការរតនាគារសហរដ្ឋអាមេរិកលោក Scott Bessent បាននិយាយនៅក្នុងរបាយការណ៍ថា៖ «ក្រុមហ៊ុន ហួយវ័ន គ្រុប បានបង្កើតឡើងជាទីផ្សារនៃជម្រើសសម្រាប់អ្នកប្រើប្រាស់អ៊ីនធឺណិតដែលមានគំនិតអាក្រក់ដូចជាកូរ៉េខាងជើង (សាធារណរដ្ឋប្រជាមានិតប្រជាធិបតេយ្យកូរ៉េ) និងក្រុមឧក្រិដ្ឋជន ដែលបានលួចលុយរាប់ពាន់លានដុល្លារពីជនជាតិអាមេរិកប្រចាំថ្ងៃ» ។
នៅព្រឹកថ្ងៃទី៦ ខែឧសភា អ្នកយកព័ត៌មានរបស់សារព័ត៌មានខេមបូចា បានចុះទៅដល់ទីតាំងផ្ទាល់ ដោយបានឃើញថា ក្រុមហ៊ុន ហួយវ័ន ផេ កំពុងចាប់ផ្តើមដកស្លាកសញ្ញារបស់ខ្លួនចេញ និងបានសង្កេតឃើញមានការតំឡើងរន្ទាដែក និងរុះរើផ្លាកយីហោរបស់ក្រុមហ៊ុន។
យោងតាម FinCeN ក្រុមហ៊ុនដែលមានទីស្នាក់ការកណ្តាលនៅទីក្រុងភ្នំពេញនេះ ក៏មានសាខានៅខេត្តបាត់ដំបង ប៉ោយប៉ែត សៀមរាប និងខេត្តព្រះសីហនុផងដែរ។ កន្លងមក ក្រុមហ៊ុននេះក៏បានផ្សាយពាណិជ្ជកម្មពីទីតាំងមួយកន្លែងនៅក្នុងទីក្រុង Laukkaing ដែលជាមជ្ឈមណ្ឌលឆបោកក្នុងវិស័យវិនិយោគនៅក្នុងតំបន់ Kokang នៃប្រទេសមីយ៉ាន់ម៉ា នៅមុនការបង្ក្រាបកាលពីឆ្នាំមុន ដោយបានបិទប្រតិបត្តិការជាច្រើនទីតាំង ។
ក្រុមហ៊ុន ហួយវ័ន គ្រុប ក៏បានរាយឈ្មោះលោក ហ៊ុន តូ ជានាយកក្រុមហ៊ុនម្នាក់ផងដែរ ដែលលោកជាបងប្អូនជីដូនមួយរបស់លោកនាយករដ្ឋមន្ត្រី ហ៊ុន ម៉ាណែត។ លោក ហ៊ុន តូ បានប្រឈមមុខនឹងការចោទប្រកាន់ថាជាប់ពាក់ព័ន្ធក្នុងការជួញដូរគ្រឿងញៀន និងការលាងលុយកខ្វក់ ប៉ុន្តែលោកបានបដិសេធការអះអាងនេះ និងបានបន្តបណ្តឹងបរិហារកេរ្តិ៍លើរបាយការណ៍នេះ។
នៅពេលដែល សារព័ត៌មានខេមបូចា ទូរសព្ទទៅលេខដែលមានរាយក្នុងគេហទំព័រហ្វេសប៊ុកផ្លូវការរបស់ ក្រុមហ៊ុន ហ៊ុយវ័ន ផេ បុរសម្នាក់ដែលមិនស្គាល់អត្តសញ្ញាណបាននិយាយថាក្រុមហ៊ុន «គ្រាន់តែលាបពណ៌ថ្នាំឡើងវិញ» និងមិនផ្លាស់ប្តូរទីតាំងឡើយ ដោយបន្ថែមថា «ក្រុមហ៊ុនបើកដំណើរការជាធម្មតា»។
កាលពីខែមីនា ធនាគារជាតិត្រូវបានរាយការណ៍ថា ខ្លួនបានដកហូតអាជ្ញាបណ្ណរបស់ក្រុមហ៊ុន ហួយវ័ន ផេ ដើម្បីផ្តល់សេវាទូទាត់លើការមិនអនុលោមតាមច្បាប់។
ក្រសួងមហាផ្ទៃមិនបានឆ្លើយតបនឹងសំណួរ ថាតើអាជ្ញាធរនឹងស៊ើបអង្កេតលើក្រុមហ៊ុន ហួយវ័ន ផេ ឬយ៉ាងណានោះទេ។ ក៏ប៉ុន្តែ រដ្ឋលេខាធិការក្រសួងមហាផ្ទៃ លោក ប៉ោ ភ័ក្រ បានអះអាងថា កម្ពុជាមានយន្តការជាច្រើនក្នុងការប្រយុទ្ធប្រឆាំងនឹងការលាងលុយកខ្វក់ ព្រមទាំងលើកឡើងពីក្រុមការងារកម្មវិធីវាយតម្លៃឡើងវិញ (RPG)។
បើតាមលោក ប៉ោ ភ័ក្រ ក្រុមការងារ RPG បានកត់ត្រាករណីលាងលុយចំនួន១៧៧ករណី កាលពីឆ្នាំ២០២៤ ដែលបានធ្លាក់ចុះពី៣២៤ករណី កាលពីឆ្នាំកន្លងទៅ។
ធនាគារជាតិនៃកម្ពុជាមិនបានឆ្លើយតបភ្លាមៗចំពោះសំណើសុំការអត្ថាធិប្បាយរបស់ សារព័ត៌មានខេមបូចា ឡើយ។
គួរកត់សម្គាល់ថា អង្គភាពកម្ពុជាផ្សេងទៀតដែលជាប់ក្នុងបញ្ជីខ្មៅរបស់សហរដ្ឋអាមេរិក ក៏បានប្រើវិធីសាស្ត្រស្រដៀងគ្នានេះ ដែលហាក់បីដូចជាបិទបាំងប្រតិបត្តិការរបស់ពួកគេ។
បន្ទាប់ពីសហរដ្ឋអាមេរិកបានដាក់ទណ្ឌកម្មសមាជិកព្រឹទ្ធសភាគណបក្សកាន់អំណាច និងឧកញ៉ា លី យ៉ុងផាត់ កាលពីខែកញ្ញា ក្រុមហ៊ុនជាច្រើនរបស់គាត់ ឬក្រុមហ៊ុនដែលមានទំនាក់ទំនងជាមួយគ្រួសាររបស់គាត់បានលុបចេញពីការចុះបញ្ជីពាណិជ្ជកម្ម គេហទំព័របានលុប និងដកស្លាកសញ្ញាចេញពីទីតាំងការិយាល័យ។
នាយកទទួលបន្ទុកកិច្ចការទូទៅនៃអង្គការសិទ្ធិមនុស្ស លីកាដូ (Licadho) លោក អំ សំអាត បានថ្លែងថា ការលាងលុយកខ្វក់មិនមែនជារឿងថ្មីទេនៅកម្ពុជា។
លោកបានព្រមានថា ការបន្តអសកម្ម និងកង្វះតម្លាភាព អាចធ្វើឱ្យប៉ះពាល់ដល់ការអភិវឌ្ឍរបស់ប្រទេស។
លោកបានមានប្រសាសន៍ថា៖ «បញ្ហាទាំងអស់នេះបានធ្វើឱ្យខូចមុខមាត់រដ្ឋាភិបាល និងប្រទេសកម្ពុជាយ៉ាងធ្ងន់ធ្ងរ»។ លោកបន្តថា៖ «អាជ្ញាធរត្រូវតែស៊ើបអង្កេតរឿងនេះឱ្យបានច្បាស់លាស់ តម្លាភាព និងយុត្តិធម៌ ក្នុងគោលបំណងបង្កើតទំនុកចិត្ត»៕
ប្រែសម្រួលពីអត្ថបទភាសាអង់គ្លេស៖ Huione Pay Removes Sign After U.S. Blacklist Move
