លោកនាយករដ្ឋមន្ត្រី ហ៊ុន សែន បានព្រមានគណបក្សភ្លើងទៀន ថានឹងប្រឈមការរំលាយចោលដោយសារតែមានទំនាក់ទំនង ជាមួយលោក សម រង្ស៊ី អតីតប្រធានគណបក្សសង្គ្រោះជាតិ។
អំឡុងការថ្លែងសុន្ទរកថានៅខេត្តកំពង់ឆ្នាំងកាលពីថ្ងៃពុធ លោក ហ៊ុន សែន បានទទូចឲ្យមេដឹកនាំគណបក្សភ្លើងទៀន រួមមានលោក ទាវ វណ្ណុល ប្រធានគណបក្ស លោក សុន ឆ័យ អនុប្រធានគណបក្ស និងលោក ថាច់ សេដ្ឋា អនុប្រធានគណបក្សធ្វើការថ្កោលទោសលោក សម រង្ស៊ី ជាសាធារណៈដោយសារលោកបានប្រមាថព្រះមហាក្សត្រ ថាជា«ជនក្បត់ជាតិ»។
លោកនាយករដ្ឋមន្ត្រីក៏បានអំពាវនាវឲ្យសមាជិកគណបក្សភ្លើងទៀននិងសមាជិកក្រុមប្រឹក្សាឃុំសង្កាត់ចាកចេញពីគណបក្សនេះ មកចូលរួមជាមួយគណបក្សប្រជាជនកម្ពុជា ឬជាមួយគណបក្សផ្សេងទៀត។
លោកថ្លែងថា៖ «ខ្ញុំចង់ឲ្យមេដឹកនាំគណបក្សភ្លើងទៀន ចេញមកបញ្ជាក់អះអាងថា តើការនិយាយរបស់ សម រង្ស៊ី [ប្រមាថព្រះមហាក្សត្រថាជាជនក្បត់ជាតិ] ត្រឹមត្រូវ ឬមិនត្រឹមត្រូវ យើងចង់បានការបញ្ជាក់ពីគណបក្សភ្លើងទៀន…ចំនុចនេះខ្ញុំចង់បាននូវការធានាមួយ»។
លោកបន្ថែមថា៖ «ច្បាប់ស្តីពីគណបក្សនយោបាយគឺចែងមិនឲ្យមានទំនាក់ទំនងជាមួយទណ្ឌិត ដូច្នេះចំណុចនេះគ្រាន់តែប្រាប់អ្នកឲ្យបានដឹងថាតម្រុយ ឆ្ពោះទៅរកនៃដំណាក់កាលមួយកំពុងប្រឈម [ការំលាយ]»។
លោក សម រង្ស៊ី ដែលរស់នៅបរទេសជាច្រើនឆ្នាំ ធ្លាប់បានបង្កើតគណបក្ស សម រង្ស៊ី ដែលក្រោយមកបានប្តូរទៅជាគណបក្សភ្លើងទៀននៅឆ្នាំ២០១៨ បន្ទាប់ពីច្បាប់ថ្មីស្តីពីគណបក្សនយោបាយត្រូវបានវិសោធនកម្មដោយរដ្ឋសភាដែលគ្រប់គ្រងដោយគណបក្សប្រជាជនកម្ពុជានោះបានចាត់ទុកថា ជាទង្វើខុសច្បាប់ ប្រសិនបើគណបក្សណាមួយយកឈ្មោះរបស់បុគ្គលម្នាក់ឬដឹកនាំដោយនរណាម្នាក់ដែលត្រូវបានផ្តន្ទាទោសពីបទឧក្រិដ្ឋ។
លោក សម រង្ស៊ី ត្រូវបានផ្តន្ទាទោសជាច្រើនបទល្មើស ដែលលោកនិយាយថា គឺជារឿងនយោបាយ។
លោក ហ៊ុន សែន បានថ្លែងថា៖ «ខ្ញុំសូមបញ្ជាក់ថារឿងនេះមិនមែនជាតូចតាច សមាជិករបស់គណបក្សភ្លើងទៀនគួរតែផ្តាច់ខ្លួនឲ្យបានលឿនបំផុតពីគណបក្ស ដើម្បីចៀសវាងបញ្ហា ព្រោះនេះជាកម្លាំងនៃការផ្តួលរំលំរដ្ឋាភិបាល និងជាការផ្តួលរំលំរបបរាជានិយម»។
លោក ហ៊ុន សែន បានអះអាងថា លោកមានខ្សែអាត់ស្តីពីការប្រជុំអនឡាញរវាងលោក សម រង្ស៊ី និងមេដឹកនាំគណបក្សភ្លើងទៀន។
លោកថ្លែងថា៖ «ហេតុអ្វីបានជាខ្ញុំត្រូវចោទសួរ ព្រោះគណបក្សភ្លើងទៀនត្រូវបានបង្កើតដោយសម រង្ស៊ី ហើយខ្ញុំសូមអំពាវនាវឲ្យសមាជិកក្រុមប្រឹក្សាឃុំគណបក្សភ្លើងទៀនចេញមកថ្កោលទោស ដោយកំបារម្ភពីការបាត់បងតួនាទី បើ[បក្សបណ្តេញចេញ]»។
គណបក្សភ្លើងទៀនបានក្លាយជាគូប្រជែងសំខាន់របស់គណបក្សប្រជាជនកម្ពុជាអំឡុងការបោះឆ្នោតឃុំសង្កាត់ក្នុងខែមិថុនា បន្ទាប់ពីមានការរំលាយគណបក្សសង្គ្រោះជាតិក្នុងឆ្នាំ២០១៧។ គណបក្សនេះទទួលបានអាសនៈមេឃុំត្រឹមចំនួនបួនអាសនៈ បើធៀបនឹងគណបក្សប្រជាជនកម្ពុជាដែលទទួលបាន១.៦៤៨អាសនៈ។
លោក ហ៊ុន សែន ក៏បានលើកឡើងផងដែរថា អង្គការក្រៅរដ្ឋាភិបាលដែលលោកមិនបញ្ចេញឈ្មោះមិនគួរនៅស្ងៀមជុំវិញសម្តីរបស់លោក សម រង្ស៊ីទេ។
លោកថ្លែងថា៖ «ខ្ញុំជឿថាក្នុងចំណោមអង្គការដែលប្រឆាំងរដ្ឋាភិបាលមិនអះអាងទេ [ថ្កោលទោស សម រង្ស៊ី] ព្រោះគេក៏ចូលរួមចំណែកដើម្បីចង់ផ្តួលរំលំរដ្ឋាភិបាល និងប្តូររបបរាជានិយមផងដែរ»។
ការចោទប្រកាន់នេះ រំលឹកពីការចោទប្រកាន់របស់រដ្ឋាភិបាលកាលពីឆ្នាំ២០១៧ ដែលពេលនោះក្រុមមន្ត្រីរដ្ឋាភិបាលបានចោទប្រកាន់គណបក្សសង្គ្រោះជាតិដែលជាគណបក្សប្រឆាំងដ៏ធំដែលដឹកនាំដោយលោក សម រង្ស៊ី និងលោក កឹម សុខា ថា បានគប់គិតជាមួយមហាអំណាចបរទេសធ្វើបដិវត្តពណ៌ ដើម្បីផ្តួលរំលំគណបក្សប្រជាជនកម្ពុជាដែលកាន់អំណាចដ៏យូរនោះ។
លោក កឹម សុខា ដែលត្រូវបានចោទប្រកាន់ពីបទសន្និដ្ឋិភាពជាមួយបរទេសរយៈពេលពីរខែមុនពេលគណបក្សសង្គ្រោះជាតិត្រូវបានតុលាការកំពូលរំលាយចោលនោះបានបដិសេធការចោទប្រកាន់ដោយលោកអះអាងថា លោកគ្រាន់តែព្យាយាមយកឈ្នះតាមរយៈការបោះឆ្នោតប៉ុណ្ណោះ។
លោក សឹង សែនករុណា ជាអ្នកនាំពាក្យសមាគមសិទ្ធិមនុស្សអាដហុកបានមានប្រសាសន៍ថា ជម្លោះនយោបាយមិនគួរភ្ជាប់ជាមួយនឹងអង្គការសង្គមស៊ីវិលដែលធ្វើការដោយឯករាជ្យ ដើម្បីលើកកម្ពស់សិទ្ធិមនុស្សនោះទេ។
លោកថ្លែងថា៖ «ហេតុអ្វីបានជាត្រូវទាញអង្គការសង្គមស៊ីវិលមកពាក់ព័ន្ធ វាបង្កើតឲ្យមានការបារម្ភរបស់អង្គការសង្គមស៊ីវិលលើកិច្ចការងាររបស់ពួកគេ។ វាជាសង្គ្រាមពាក្យសំដីរវាងអ្នកទាំងពីរ ហើយវាធ្វើឲ្យមានការព្រួយបារម្ភសម្រាប់សកម្មភាពរបស់អង្គការសង្គមស៊ីវិល ដោយសារអ្នកនយោបាយព្យាយាមទាញអង្គការសង្គមស៊ីវិលទៅភ្ជាប់និងនិន្នាការនយោបាយរបស់ខ្លួន»
យោងតាមវីដេអូឃ្លីបដែលបង្ហោះអនឡាញនៅសប្តាហ៍នេះ ដោយបណ្តាញព័ត៌មាន Fresh News ដែលមានទំនាក់ទំនងជាមួយរដ្ឋាភិបាលនោះ លោក សម រង្ស៊ី បានហៅព្រះមហាក្សត្រនរោត្តម សីហមុនី ថា «ក្បត់ជាតិ» ខណៈពេលថ្លែងសុន្ទរកថា។
នៅពេលសួរថា ហេតុអ្វីបានជាលោកប្រមាថ ព្រះមហាក្សត្រថា «ក្បត់ជាតិ”» លោក សម រង្ស៊ី បានប្រាប់ខេមបូចាថា លោក ហ៊ុន សែន បាន «ភ្ជាប់» ព្រះមហាក្សត្រទាំងបង្ខំទៅនឹង «ទង្វើក្បត់ជាតិ» របស់លោកនាយករដ្ឋមន្ត្រីដោយទទួលស្គាល់សន្និសញ្ញាបំពេញបន្ថែមឆ្នាំ២០០៥ស្តីពីបញ្ហាព្រំដែនជាមួយប្រទេសវៀតណាម ដែលលោក សម រង្ស៊ី និយាយថា ត្រូវបានឡាយព្រះហស្តលេខាដោយព្រះមហាក្សត្រក្រោម «ការគំរាមកំហែង»។
លោក សម រង្ស៊ី បានឲ្យដឹងតាមរយៈអ៊ីម៉ែថា៖ «ការប្រគល់ទឹកដីប្រទេសកម្ពុជាទៅឲ្យបរទេសគឺជាទង្វើក្បត់ជាតិ»។
អ្នកនយោបាយរូបនេះបានចោទប្រកាន់លោក ហ៊ុន សែន និងគណបក្សប្រជាជនកម្ពុជាយូរមកហើយថា បានកាត់ទឹកដីទៅឲ្យប្រទេសវៀតណាមនិងធ្វើជាអាយ៉ង់របស់ប្រទេសជិតខាងមួយនេះ។
លោក សម រង្ស៊ី ថ្លែថា លោក ហ៊ុន សែន គំរាមរំលាយគណបក្សភ្លើងទៀនដោយសារមានការភ័យខ្លាច។
លោក សម រង្ស៊ី សរសេតាមអ៊ីម៉ែលថា៖ «ហ៊ុន សែន ខ្លាចគណបក្សភ្លើងទៀនដែលជាគណបក្សប្រឆាំងដ៏គួរឲ្យជឿជាក់ហើយគាត់កំពុងរកលេសដើម្បីទប់ស្កាត់ការលូតលាស់របស់គណបក្សនេះ»។
កាលពីដើមខែនេះ សាលាដំបូងរាជធានីភ្នំពេញបានបង្គាប់ឲ្យលោក សុន ឆ័យ ជាអនុប្រធានគណបក្សភ្លើងទៀននិងជាអតីតមន្ត្រីគណបក្សសម រង្ស៊ី បង់សំណងជំងឺចិត្ត៣ពាន់លានរៀល (៧៥០.០០០ដុល្លារ) ទៅឲ្យគណបក្សប្រជាជនកម្ពុជាដែលជាគណបក្សកាន់អំណាចដោយរកឃើញលោកមានពិរុទ្ធភាពពីបទបរិហាកេរ្តិ៍ដោយសារតែអះអាងថា មានការលួចបន្លំសន្លឹកឆ្នោតអំឡុងពេលបោះឆ្នោតឃុំសង្កាត់កាលពីខែមិថុនា។
លោក ថាច់ សេដ្ឋា អនុប្រធានគណបក្សភ្លើងទៀន បានបដិសេធគណបក្សរបស់លោកថាគ្មានការជាប់ពាក់ព័ន្ធជាមួយនឹងលោក សម រង្ស៊ី ទេដោយអះអាងថា គណបក្សភ្លើងទៀនបានគោរពរដ្ឋធម្មនុញ្ញនិងតួនាទីរបស់ព្រះមហាក្សត្រ។
លោកបន្តថា៖ «យើងមិនគាំទ្រ ជនណាក៏ដោយដែលបំពានលើព្រះមហាក្សត្រ និងរដ្ឋធម្មនុញជាដាច់ខាត មិនថាតែលោកសម រង្ស៊ីនោះទេ»។
លោក សេដ្ឋា បានមានប្រសាសន៍ថា លោកចាត់ទុកការលើកឡើងរបស់លោក ហ៊ុន សែន ដោយអំពាវនាវឲ្យសមាជិកគណបក្សភ្លើងទៀនចុះចូលជាមួយគណបក្សប្រជាជនកម្ពុជាថា ជាវោហារសាស្ត្រនយោបាយ ដើម្បីស្វែងរកការគាំទ្រប៉ុណ្ណោះ។
លោកបន្តថា៖ «វាគ្មានអ្វីពិបាកទេសម្រាប់យើង យើងប្រកាន់ជំហគោរពច្បាប់ ប៉ុន្តែបើសិនគេមានចេតនារំលាយ យើងមិនអាចធ្វើអ្វីបានទេ ព្រោះវាដូចគណបក្សសង្គ្រោះជាតិ ដែលត្រូវបានរំលាយអញ្ចឹង ទោះបីជាការធ្វើឡើងដោយបំពានគ្មានភស្តុតាង ក៏គេអាចធ្វើបានដែរ»។
នៅព្រឹកថ្ងៃព្រហស្បតិ៍នេះ គណបក្សភ្លើងទៀន បានចេញសេក្តីថ្លែងការណ៍មួយដោយបញ្ជាក់ថា គណបក្សនេះមិនមានជាប់ពាក់ព័ន្ធទៅនឹង លោក សម រង្ស៊ី នោះទេ។
សេចក្តីថ្លែងការណ៍ដដែលក៏បានថ្កើលទោសចំពោះបុគ្គលទាំងឡាយណា ដែលប្រមាថអង្គព្រះមហាក្សត្រ ប៉ុន្តែមិនបានបញ្ជាក់ឈ្មោះរបស់ លោក សម រង្ស៊ី។
លោក ឯម សុវណ្ណារ៉ា ជាអ្នកវិភាគនយោបាយបានមានប្រសាសន៍ថា ជម្លោះរវាងលោក ហ៊ុន សែន និងលោក សម រង្ស៊ី គឺជារឿងផ្ទាល់ខ្លួន ហើយមិនគួរចាត់ទុកជាបញ្ហាជាតិទេ ដែលនឹងធ្វើឲ្យបរិយាកាសនយោបាយកាន់តែអាប់អួរ។
លោកបន្តថា លោក ហ៊ុន សែន បានធ្វើយុទ្ធនាការមុនការបោះឆ្នោតជាតិខែកក្កដារួចទៅហើយ ដោយលោកនាយករដ្ឋមន្ត្រីគំរាមគូប្រជែងនយោបាយ ជាពិសេសគណបក្សភ្លើងទៀន ដែលកំពុងទាក់ទាញការគាំទ្រ។
លោកថ្លែងថា៖ «លោកនាយករដ្ឋមន្ត្រីបានឆ្លៀតការឃោសនាមុនការបោះឆ្នោត និងគំរាមកំហែងគូប្រជែងនយោបាយ គឺគណបក្សភ្លើងទៀនដែលកំពុងទទួលបានការចាប់អារម្មណ៍ពីប្រជាពលរដ្ឋ និងមានការគាំទ្រកើនឡើង អ្វីដែលគណបក្សកាន់អំណាចបារម្ភនោះគឺ សំឡេងរបស់គណបក្សភ្លើងទៀននៅសភាអាចកើនឡើងលើស១ភាគ៣ ដែលវាគ្រប់គ្រាន់ក្នុងការកោះហៅមន្ត្រីរដ្ឋាភិបាលមកសួរបាន»
ប៉ុន្តែអ្នកវិភាគរូបនេះបន្តថា គណបក្សណាដែលធ្វើតាមការចង់បានរបស់លោក ហ៊ុន សែន នឹងបាត់បង់ការជឿទុកចិត្តពីអ្នកគាំទ្រ។
លោកបន្តថា៖ «បើធ្វើតាមគូប្រជែង វាហាក់បីដូចជាគណបក្សនេះចុះចូលជាមួយគណបក្សកាន់អំណាច ហើយបាត់បង់ជំហនយោបាយខ្លួនឯង នឹងបាត់បង់នូវការគាំទ្រ»។
ស្របពេលជាមួយគ្នានេះដែរ លោក សម រង្ស៊ី បានលើកឡើងថា វាឆាប់ពេកក្នុងការសម្រេចចិត្តថា លោកនឹងគាំទ្រគណបក្សណាមួយនៅក្នុងការបោះឆ្នោតជាតិនៅឆ្នាំក្រោយ ប៉ុន្តែគណបក្សសង្គ្រោះជាតិនឹងបន្តតស៊ូដើម្បីត្រឡប់មកវិញទាំងក្នុងនិងក្រៅប្រទេស ដោយធ្វើការទាមទារដែលនឹងត្រូវបានឆ្លើយតបជាស្វ័យប្រវត្តិនៅពេលណាលោក កឹម សុខា រួចផុតពីបទចោទ »សន្និដ្ឋិភាព» ដែលត្រូវបានចោទប្រកាន់ដោយលោក ហ៊ុន សែន។ ការធ្វើសេចក្តីសន្និដ្ឋានសម្រាប់សំណុំរឿងរបស់លោក កឹម សុខា គ្រោងធ្វើនៅថ្ងៃទី២១ ខែធ្នូ៕ (រាយការណ៍បន្ថែមដោយ Matt Surrusco)
ប្រែសម្រួលពីអត្ថបទភាសាអង់គ្លេស៖ Hun Sen Warns Candlelight to Cut Ties With Rainsy or Be Dissolved