អ្នកតស៊ូមតិផ្នែកសិទ្ធិមនុស្សដ៏លេចធ្លោម្នាក់ កញ្ញា សេង ធារី ដែលកំពុងជាប់ពន្ធនាគារបានផ្អាកធ្វើកូដកម្មបង្អត់អាហារក្នុងរយៈពេលប្រាំបួនថ្ងៃ ដោយសារបញ្ហាសុខភាព ខណៈដែលក្រុមសង្គមស៊ីវិលអំពាវនាវឱ្យដោះលែងកញ្ញាចេញពីពន្ធនាគារ។
នេះជាការធ្វើកូដកម្មអត់អាហារលើកទីបួនរបស់កញ្ញាចាប់តាំងពីកញ្ញាត្រូវបានជាប់គុកក្នុងឆ្នាំ២០២២ ដើម្បីទាក់ទាញការចាប់អារម្មណ៍ពីអន្តរជាតិកាន់តែខ្លាំងឡើងចំពោះការធ្លាក់ចុះនៃសិទ្ធិមនុស្ស និងលទ្ធិប្រជាធិបតេយ្យនៅក្នុងប្រទេសកម្ពុជា នេះបើយោងតាមអង្គការអន្តរជាតិមួយ។ អង្គការក្រៅរដ្ឋាភិបាលក្នុងស្រុកបានសម្តែងការព្រួយបារម្ភយ៉ាងខ្លាំងចំពោះ «សុខុមាលភាព» របស់កញ្ញា ធារី ព្រោះការឃុំខ្លួនរបស់កញ្ញាយូរបានធ្វើឱ្យសុខភាពគាត់កាន់តែងាយរងគ្រោះ។
អ្នកនាំពាក្យអគ្គនាយកដ្ឋានពន្ធនាគារ លោក ឃៀង សុណាឌីន បានបញ្ជាក់ថា ធារី គ្រោងធ្វើកូដកម្មអត់អាហារពីថ្ងៃទី១ដល់ថ្ងៃទី១៤ ខែមិថុនា។
លោកបានមានប្រសាសន៍ថា៖ «ជនជាប់ឃុំ កញ្ញា សេង ធារី បានគ្រោងធ្វើ១៤ថ្ងៃ គឺពីថ្ងៃទី១ដល់ទី១៤ ខែមិថុនា ឆ្នាំ២០២៥ តែធ្វើបានត្រឹមថ្ងៃទី៩ ខែមិថុនា គាត់ក៏សម្រេចចិត្តបញ្ចប់មុនកំណត់ និងហូបអាហារធម្មតា»។
លោក សុណាឌីន មានប្រសាសន៍ថា៖ «សូមបញ្ជាក់ថាសកម្មភាពនេះអត់ប៉ះពាល់ ឬជាការរំលោភសិទ្ធិគាត់ឡើយ តែជាការគោរពសិទ្ធិសម្រេចចិត្តរបស់ជនជាប់ឃុំ សេង ធារី»
គាត់បាននិយាយថា ពន្ធនាគារនឹងនៅតែផ្តល់អាហារឲ្យគាត់ ១ថ្ងៃ២ពេលជារៀងរាល់ថ្ងៃ បូករួមជាមួយការតាមដានសុខភាពជាប្រចាំ ហើយការសម្រេចចិត្តរបស់ជនជាប់ឃុំរូបនេះ «មិនមែនជារឿងថ្មីទេ» គឺគាត់ធ្លាប់ធ្វើរួចហើយ។
ពលរដ្ឋដែលមានសញ្ជាតិអាមេរិក-កម្ពុជា កញ្ញា សេង ធារី ត្រូវបានកាត់ទោសឱ្យជាប់ពន្ធនាគាររយៈពេលប្រាំមួយឆ្នាំក្នុងខែមិថុនា ឆ្នាំ២០២២ ពីបទសមគំនិតក្បត់ជាតិ ដែលជាសមាជិកម្នាក់ក្នុងចំណោមសមាជិកជាង១០០នាក់នៃអតីតគណបក្សសង្គ្រោះជាតិដែលត្រូវបានរកឃើញមានទោស បន្ទាប់ពីធ្វើយុទ្ធនាការទាមទារឲ្យលោក សម រង្ស៊ី វិលត្រឡប់មកវិញនៅឆ្នាំ២០១៩។
អង្គការសហប្រជាជាតិ និងសិទ្ធិមនុស្សអន្តរជាតិបានបរិហារការកាត់ទោស និងការចោទប្រកាន់ថាមានហេតុផលនយោបាយ។
ប្រធានប្រតិបត្តិអង្គការសិទ្ធិមនុស្សលីកាដូ លោក អំ សំអាត មានជំនឿថា កញ្ញា សេង ធារី បញ្ចប់កូដកម្មអត់អាហារដោយសារបារម្ភពីសុខភាព។
លោកមានប្រសាសន៍ថា៖ «យើងមានការព្រួយបារម្ភអំពីស្ថានភាពសុខភាពរបស់នាង ជាពិសេសព្រោះនេះជាកូដកម្មអត់អាហារលើកទីបួនរបស់នាងក្នុងពន្ធនាគាររួចហើយ»។
លោក សំអាត មានប្រសាសន៍ថា៖ «ខ្ញុំគិតថា កូដកម្មអត់អាហាររបស់នាងគឺជាការអំពាវនាវរកយុត្តិធម៌ មិនត្រឹមតែសម្រាប់ខ្លួននាងប៉ុណ្ណោះទេ ប៉ុន្តែសម្រាប់អ្នកជាប់ឃុំនយោបាយផ្សេងទៀតផងដែរ»។
ស្ថានទូតអាមេរិកប្រចាំទីក្រុងភ្នំពេញ និងលោក ប៉ែន បូណា អ្នកនាំពាក្យរដ្ឋាភិបាលទាំងពីរមិនបានឆ្លើយតបដើម្បីធ្វើអត្ថាធិប្បាយទេ៕
ប្រែសម្រួលពីអត្ថបទភាសាអង់គ្លេស៖ Imprisoned Activist Seng Theary Halts Hunger Strike, Her Fourth Since 2022










